دي مجرد اشاعة ...واسألوا المفتي

في اشاعة الناس مطلعينها عليا مضيقاني قوي قوي وللاسف اشاعة لزقة بقي همووت واعرف مين الي مطلعها في

الرايحة والجاية عم نادي البواب ومراته يقولوا الدكتورة راحت الدكتورة جت اهلا يادكتورة خدي وصل النت يادكتورة

بتاع الرخام جه وانتوا مش موجودين يادكتورة ده علي العبدة لله طبعا منين بقي جابوا اني دكتورة ودكتورة في ايه بالظبط

كل خوفي لايجيبلي الواد صابر ابنه في نص الليل سخن ولا بيرجع ويقولي اكشفي عليه يادكتورة ساعتها بقي هعمل ايه

انا مش هقدر اصدمه طبعا وااقوله الحقيقة يرجع يسخن ويحتاج كشف هو كمان طبعا اي حد مكاني هيفرح بالاشاعة

ومش بعيد يسوق فيها ويشتريله سماعة ويعملوا روشتات ويوصف دوا كمان ويعيش الدور وربنا يستر ومايفتحلوش عيادة

فكرت كتير في موضوع الاشاعة ديه وعمالة افكر مين وراها مين بقول اكيد حد بيحبني جداا بدليل انه رقاني ورفعني

درجات بس هيكون مين ما اظنش حد من اخواتي ماهو عمرهم مها يمجدوا فيا طب ماما لا مش ممكن دي كل مناها

اتجوز واقعد في البيت طب حد من ولاد الجيران بعيدة ديه طب وبعدين



ما انا ماينفعش اسكت علي موضوع خطير زي ده ده فيه ارواح ناس برده أنا بقول بقي أحولها لقضية كبيرة والحمد الله

الازهر والمفتي في صفي وانا المضرورة هنا وفتوته الاخيرة في صالحي ان مروجي الاشاعات يستحقوا الجلد بس الي

محيرني بقي الفتوي ديه سارية علي كل طوايف الشعب ولا فتوي خاصة بالصحفيين بس هحاول اسال في الموضوع ده





المهم بس أخلي مسئوليتي لا يرجعوا يتهموني بانتحال شخصية وانا بريئة والله

دي مجرد اشاعة ..واسألوا المفتي