الهي ماعدت أبغي شيئا في هذه الحياة سوي عفوك ورضاك

السبت، 24 نوفمبر، 2007

صرخة استغاثة...الناس في الشرفا بيموتوووووووووا



حقيقي مش عارفة أأقول ايه ولا أعمل ايه أصرخ مثلا أصوت مش عارفة بجد

ايه الموضوع طبعا بتسألوني

بفتح التلفزيون علي برنامج القاهرة اليوم وماصدقتش بصراحة المشاهد الي انا

شايفاها انا في مصر ولافين انا في القرن الواحد وعشرين ولا القرن الخمستاشر

ست قري بمدينة الصف محافظة الجيزة غرقانين زي مابقولكم كدة غرقانين وبالاخص قرية اسمها الشرفا

مياه الصرف الصحي غرقت القرية بأكملها اصبحت من الاخر كدة قرية مهجورة

والاعجب مدرسة القرية اسمها العلم كالماء الماية قفلت المدرسة

والطلبة نقلوهم مدرسة تانية تقولش لعنة الاسم حلت

المشهد الملفت للنظر بجد راجل عجوز ريفي قاعد قدام بحر الماية

وبلا مبالغة لما بقول كلمة بحر وفي ايده كوز والله العظيم كوز صغير

وعمال ينقل الماية من البحر لمكان بعيد....وعجبي

الماية دي يا حضرات غرقت الف وتمنمية وخمسين فدان ارض زراعية

يعني مش كفاية ان بيوتهم غرقت ومدارسهم اتقفلت لا كمان أكل عيشهم اتقطع

..وحسبنا الله ونعمة الوكيل

الاغرب والاعجب ان الغرق ده كان متوقع حدوثه من شهر كامل

اه مش بهزر كان متوقع من شهر حدوث الكارثة ديه لكن الظاهر

ان ماتش الاهلي وتونس كان اهم ان ريسنا يحضره
مش عاوزة ااقولكم بقي ان لما تصحي الصبح تفتح شباكك تلاقي بحر قدامك
اكيد هتجيلك حالة انتعاش وصحتك هتيجي علي الهوا

انما بقي لما يكون بحر مجاري وصرف صحي فانتظر الاوبئة تحل بدارك

وانتظر الكوليرا والتيفويد يدقوا علي بابك

الاغرب والاعجب من ده كله رد فعل حكومتنا الهمامة

وهي رايحة تبعتلهم ماكنة لرفع الماية ب3 بوصة

ماتضحكش زي مابقلك كدة 3 بوصة يعني الكوز الي كان في ايد الراجل العجوز

يرفع احسن منها


في البرنامج اتصلوا بنايب الدايرة الهمام الي حكي عن انجازاته الضخمة

الي ملخصها انه مخلاش وزارة فيكي يامصر الا وصوت لها من ري لزراعة لاسكان

ياقلبي لاتحزن


ولكن لاحياة لمن تنادي وبقي ايه ارخص منك في البلد ديه يامصري

انا عارفة اني بتكلم بانفعال لكن محروقة بجد من جوايا

اوبئة بتنتشر وناس بتموت وحياة بتنتهي وهما ولا هاممهم
الي غاظني بقي وحرق دمي لما اتصلوا برئيس مجلس المدينة

وبكل برود يقولهم الموقف تحت السيطرة كأننا مثلا عمي ومابنشوفش

وبعد هالك يابلد

لغاية امتي هيفضل الحال من سيء لاسوأ

بعتونا وخصختونا حرام عليكم بقي ارحمونا

مش عارف اناشد مين ولا انادي علي مين ولا اروح لمين ولا اجي لمين

لكن بجد ياريت اي حد يعرف يعمل اي حاجة
انا كل الي قدرت اعمله اني اكتب البوست الغلبان ده
لعله يلاقي عند الناس المهتمين صدي

وببعت من هنا

صرخة استغاثة....الناس في الشرفا بيموتووووووووووووا

لعل أحد يجيب




هناك 37 تعليقًا:

محمد جمعه يقول...

بسم الله ابدأ
باين احنا بقين فى مصر بنتفرج زى مسلسلات رمضان
احداث فساد كتير والمسئولين كله تحت السيطرة

حتى المدونين مش ملاحقين على فسادهم

وحسبى الله ونعم الوكيل

NO PROBLEM يقول...

يابطة مافيش مشاكل اهى كلها موتة وخلاص مات وهو بيدور على شغل فى بلاد الفرنجة او مات وهو رايح بلاد الفرنجة او مات غرقا فى مياه المجارى او مات بفيروس سى او مات بالبلهارسيا او مات وهو ينتظر معدية لتقله للجانب الاخر للحياة او مات وهو مريض على سرير ينتظر نقطة دم فتنقل له بفيروس الايدز او يموت سليما اهى كلها موتة المهم المفتى حيقول عليه مات شهيدا ام لا فهذا هو صك الغفران المصرى لعام 2007 ودمتم
طبعا عارفانى انا طارق الجيزاوى
الاسكندرية مساء السبت 24 نوفمبر 2007

محمد جمعه يقول...

بارك الله فيكى
وهو ده الا احنا متعودينه منك

وانا كنت عاوز اقول يسعدنى ان اكون اول من يعلق
لاكن الخبر ده منعنى من الشعور بالسعادة

تحيااااااتى

مدونه انا بحبك يا مصر يقول...

انا زهقت الناس فى الشرفه بيسرخه من الغرق من الميه الصرف
والناس فى الدلتا وكفر الشيخ هتموت من العطش والناس فى كفر علو نيمين فى الشارع والناس فى القسام بيسرخه
مصر كله بتقول اةةةةةةةةةةةةة
يا ترة الريس سامع وله
احمد الجيزاوى

رانيا الجبالي يقول...

لسه في حاجات كتير هتحصل طول ما احنا ساكتين ومبنتحركش غير بالاحساس بس لا ده كمان احساسنا اتبلد
حسبي الله ونعم الوكيل

اتحاد المدونيين المصريين يقول...

الفاضلة الغالية
كل الشكر لك على مدونتك الجميلة وادعوك لزيارةمدونة الاتحاد والاطلاع على ما بها وابداء الراى فيما هو معروض من ميثاق واهداف ولائحة
شكرالك والى لقاء قريب لك كل التحية
حسن توفيق

عصفور اسكندرية ( المواطن المطحون ) يقول...

لا اله الا الله
ربنا يرحمنا برحمته
البلد كلها بتقول آآآآآآآآآآآآآآه
من شمالها لجنوبها
بلد غريبه
بس نعمل ايه بلدنا

CresceNet يقول...

Oi, achei seu blog pelo google está bem interessante gostei desse post. Gostaria de falar sobre o CresceNet. O CresceNet é um provedor de internet discada que remunera seus usuários pelo tempo conectado. Exatamente isso que você leu, estão pagando para você conectar. O provedor paga 20 centavos por hora de conexão discada com ligação local para mais de 2100 cidades do Brasil. O CresceNet tem um acelerador de conexão, que deixa sua conexão até 10 vezes mais rápida. Quem utiliza banda larga pode lucrar também, basta se cadastrar no CresceNet e quando for dormir conectar por discada, é possível pagar a ADSL só com o dinheiro da discada. Nos horários de minuto único o gasto com telefone é mínimo e a remuneração do CresceNet generosa. Se você quiser linkar o Cresce.Net(www.provedorcrescenet.com) no seu blog eu ficaria agradecido, até mais e sucesso. If is possible add the CresceNet(www.provedorcrescenet.com) in your blogroll, I thank. Good bye friend.

محمد مارو يقول...

بطه
انا كمان شفت الموضوع ده ع العاشره مساء و كنت مشمئز جدا من اللى انا شايفه
و اللى استغربته اكتر و اكتر انهم 5 قرى غرقت فى الميه بس قريه واحده بس اللى سمحت بالتصوير فيها لان العمده بتاع كل قريه رفض التصوير زى ما منى بتقول

Salwa يقول...

والله الواحد مش عارف يقول إيه
الأمور زادت أوى
عجبني تعليق no problem
الشعب بيموت بكل الطرق فعلا
والله المستعان

بوستك فعلا معبر
تحياااااااااتي

بنت الاسلام يقول...

محمد جمعة

مسلسلات رمضان ارحم بكتيررررررر

بنت الاسلام يقول...

استاذ طارق

كلنا هنموت اه

لانها سنة الحياة

انما نموت واحنا احياء

نموت بضعفنا واستسلامنا وسكوتنا

يبقي لا والف لا

بنت الاسلام يقول...

محمد جمعة

شرفني طبعا ان تعليقك يكون اول تعليق

بنت الاسلام يقول...

احمد الجيزاوي

اكيد سامع

بس مطنش

الفاتح الجعفري يقول...

الناس في الشرفا بيموتوا الناس في العباره غرقوا الناس في القصر الثقافي ولعوا الناس في الطياره وقعوا الناس في مصر مش لاقيين يكلوا الحقيقه مفيش ناس
لقد اسمعت اذ ناديت حيا :::ولكن لاحياه لمن ينادي
لما نبقي عندنا غيره زي ناس كتير سعتها يمكن البلد دي تفوق ولكن (لايغير الله مابقوم حتي يغيروا مابأنفسهم)
وجزاكم الله خير

بنت الاسلام يقول...

رانيا الجبالي

اذن الحل في تجاوز ازمة الصمت

بنت الاسلام يقول...

اتحاد المدونين المصريين

استاذي حسن توفيق

شكرا لزيارة حضرتك

واتمني اشترك معاكم

بنت الاسلام يقول...

CresceNet

حقيقي مش فاهمة ولا كلمة

سامحني

بنت الاسلام يقول...

محمد مارو

رفض ليه ان شاء الله العمدة

بيخبوا علي الفساد كمان

بنت الاسلام يقول...

عصفور اسكندرية ( المواطن المطحون

معاك حق هنعمل ايه

بلدنااااااااااااااا

بنت الاسلام يقول...

سلوي

شكرا لزيارتك الكريمة

واتمني التواصل

بنت الاسلام يقول...

الفاتح الجعفري

بالظبط

ان الله لا يغير مابقوم حتي يغيروا ما بأنفسهم


اذن الحل في ايدينا

لو ساكتين نصرخ ونتكلم

لو خايفين نتغلب علي خوفنا

لو واقفين نمشي

المهم نغير

للصح

أحم يقول...

بنت الأسلام..

وزعلانه ليه يعنى ان الكوليرا

والتيفود يدقوا بابهم

ما محدش يفتح يعنى

هههههههههههههههه

وكمان الوضع تحت السيطره

ما هى دى السيطرة

وخطة الحكومه

القضاء على المواطنين

فى اماكن ولا فيه اصلا صرف ولا ميه

والناس ماشيه الله اعلم ازاى

ربنا يحرقهم

ويورينا فيهم يوم

تسلمى يا بطه

اخوكِ دائماً..نيجــر

أحمد سعيد يقول...

بنت الأسلام..

وزعلانه ليه يعنى ان الكوليرا

والتيفود يدقوا بابهم

ما محدش يفتح يعنى

هههههههههههههههه

وكمان الوضع تحت السيطره

ما هى دى السيطرة

وخطة الحكومه

القضاء على المواطنين

فى اماكن ولا فيه اصلا صرف ولا ميه

والناس ماشيه الله اعلم ازاى

ربنا يحرقهم

ويورينا فيهم يوم

تسلمى يا بطه

اخوكِ دائماً..نيجــر

أنا مسلمه يقول...

متزعليش يافاطمة

مش قالوا الوضع تحت السيطرة

خلاص إطمنى إحنا بلدنا أمان

وهدفها كرامه وصحة المواطن

زعلاااااااااااانه ليه بقه

وإنا لله وإنا إليه لراجعون

اللهم أجرنا فى مصيبتنا وأخلفنا خيرا

منها

بنت الاسلام يقول...

احمد سعيد

فعلا حل قاطعي وانا معاك فيه

بس مايفتحوش الباب ازاي بس والماية اصلا ماوقفتهاش لا ابواب ولا شبابيك

كان بقي الماية طلعت اقوي من الابواب

بيقولك الرجل وهو نايم في سريره في البلد ديه

بيبص جنبه هو والمجاري جنب بعض

كان نفسنا الابواب تنفع

لكن الامراض حلفت وقالت

دخلالكم دخلالكم

ومش هيمنعني ابواب

ولا حيطان حتي

ارحمنا برحمتك يارب

بنت الاسلام يقول...

ندا الغالية

الاوضاع دايما عندنا تحت السيطرة

سيطرة ايه بقي مش عارفة بالظبط

تب علينا يارب من سيطرة المسيطرين الي مابيفهموش في السيطرة اصلا

د/عبد الخالق زهران يقول...

السلام عليكم برافو بطة زى ما عودتينا دايما على التفاعل مع هموم الناس
انا شفت البرنامج والصور دى لكن مكنش عندى سرعة الرد زيك كدة فى المدونة
بس لما شفت الموضوع فى التليفزيون افتكرت حاجة غريبة
عندنا فى الريف لما واحدة ست غلبانة بتربى شوية كتاكيت فى عشة
وينزل عليهم مية المطر

بالاقيها محتارة تنظف الكتاكيت وتنشفهم وتدفيهم ازاى وهى قلبها محروق

قلبها محروق على الكتاكيت

ودى ست غلبانة
وكتاكيت
ومية مطر

واحنا بقه فى مصرنا المخروسة حكومة
وبنى ادمين بيغرقوا
فى مية صرف ومجارى
ومياه جوفية
6 قرى كاملة بتغرق

والعمد الاشاوس المعينين طبعا

كان كل همهم
منع التصوير


اين انت يا فاروق
يا من خفت ان يحاسبك ربك
انك لم تمهد الطريق
حتى لا تتعثر بغلة فى العراق
وانت فى المدينة

اللهم انا نشكوا اليك ضعفنا
وقلة حيلتنا

وهواننا على حكامنا

اللهم خلصنا ممن ظلمونا

بنت الاسلام يقول...

د/عبد الخالق زهران

الست الغلبانة محروقة عليهم لان في قلبها رحمة لانها تعبت فيهم

اما هما الرحمة هتجيلهم منينين وهيحسوا بيهم ازاي طالما كل واحد منهم نايم في بيت نظيف وبيشم هوا نقي يبقي ايه المشكلة
عندهم اذن

ربنا يرحمنا

osama يقول...

لا لا ملكيش حق خالص ... انت اكيد مأخدتيش بالك.. مصر الرخاء والتنمية مصر مبارك علينا كلنا...
الصور دي متفبركة من الخونة والعملاءوالفيدو كمان.. تلفيق
الحزب الوثني الاستبداي قال ان في تنميه يبقى لازم نقيس نظر

دمت بكل ود
خالص تحياتي

بنت الاسلام يقول...

osama

دانا عرفت معلومات ان الصورة الي قلتها دي وردية

ده الحقيقة افظع بكتير كتير

ربنا يرحمنا

shams يقول...

يعني انا مش عارف بصراحة الناس بتغرق في الشرفا و بتشرد في كفر العلو و بتموت في الدلتا و كفر الشيخ و الشباب كلهم عواطلية بيدورا على شغل هنحكي عن اية تاني و لا ندور على حلول لاية تاني الحل الوحيد حاجة من اتنين يا ابدة للشعب يا اما ابادة للحكومة

الحشرى يقول...

الفساد أصبح منتشر أختى الكريمة

واللى بيدافع عنه بقى كتير

بس المشكلة الحكومة اللى عاوزه تعمله بتعمله

مش بنقدر نتكلم وغصب عن الشعب المقهور

حتى الواحد ميقدرش يعلى صوته وإلا مش هيلاقى نفسه

حسبنا الله ونعم الوكيل

بنت الاسلام يقول...

شمس

الفساد كله لازم يتباد

وعلي ايدينا ان شاء الله

بنت الاسلام يقول...

الحشري

هتلاقي نفسك بجد

لما تقف في وش الظلم والفساد وتقوله
لا والف لا

مهما كانت النتيجة

yara m يقول...

شكرا ليكى يا بطه على مدونتك الجميله دى بس انا بجد نفسى افهم الناس الى عملوا نفسهم مسئولين عن البلد دى وعايشين خرس وعمى وطرش مطنشين عن كل حاجه م بيجيش على بالهم ولو للحظه واحده انهم فى يوم هيقفوا قدام ربنا يسئلهم عن اعمالهم ؟؟؟مش بيجى على بالهم هيقوا اى ولا هما نسوا خلاص انهم هيموتوا ولا اى

بنت الاسلام يقول...

معاكي حق يايري

المناصب عمتهم

والراحة الي هما فيها نستهم

ونامت ضمايرهم

لكن عين الله لاتنام

ولن تنام

مصر