الهي ماعدت أبغي شيئا في هذه الحياة سوي عفوك ورضاك

الاثنين، 5 نوفمبر 2007

صورة المواطن المصري ...الغلبااااااااان

رسمت لنفسي جو جميل عشان اعرف اكتب الصورة ديه التحفة طبعا وشغلت عمك تامر حسني اغنية روعة

روعة محدش عارف حاجة محدش حاسس بيا هو لسة في احساس في البلد ياجدعان


وحسيت انها منطبقة تماما علي الصورة بصوا لها كدة كويس واتأملوا فيها وملوا عيونكم منها واسألوا نفسكم

تعرفوه مين ده؟؟ ماهو مش عمرو دياب ولا مصطفي قمر يعني عشان نفضل نبص له كتير كدة



معلش ياسيدي اسفين والله تعبنا عيون حضرتك الجميلة بس الراجل الي في الصورة ده لو بصيت من شباك

بيتكم هتلاقيه لو راكب اتوبيس هتلاقيه واقف جنبك بيقلب في جيوبه عشان يطلع حق التذكرة يا اما بقي بيجهز قفاه

للعلقة او بيسخن في رجليه عشان يجري طبعا هو ده نفسه لو قاعد علي القهوة هتلاقيه علي الكرسي الي جنبك

حاطط ايده علي خده وسرحان في ملكوت ربنا هو والاموات واحد ولو مية دبانة وقفت علي وشه مش فاضي

يهشها مش عاوزة ااقولك لو بصيت لنفسك في المرايا هتلاقيه برده بيكلمك وانت ياعيني مش عارف ترد عليه


اه والله مش بهزر بس اسكت مش عاجبك كلامي ولا ايه اه لو بصيت في المرايا هتلاقيه فعلا جايز تكون متسرح

ومتسبسب ولا شكلك حلو شوية لكن ركز قوي كدة هو انت وانت هو صدقني


هو ده بقي المواطن المصري المطحون الي بيقف علي طابور العيش الصبح ويرجع برغفين ياكل فيهم وهما اساسا

ماينفعوش علف للحيوانات


هو ده بقي المواطن المصري الي ضهره انحني ووشه اتجعد وشعره شاب وهو ماعداش الاربعين وما اظنش

هيعديها


هو ده المواطن الي مذلول بلقمة عيشه كمموه وقهروه وماخلهوش يفكر في حاجة غير انه يجري ويجري لغاية

ماروحه طلعت وفي الاخر طلع بيجري ورا لقمة واحدة ومحصلش رغيف حتي


ماهو هيحصله ازاي بس والاسعار كل يوم نازلة لعب فيه طالعة بس وحلفت وقالتله خليك انت تحت والله ما انا

نازلة الغلبان ياعيني يقولها مش مهم انا طب عيالي بس والله ماعايز غير ااكلهم واعلمهم ومش مهم البسهم اهو

اشحتلهم لبس وخلاص لكن الرحمة في القلوب ماتت



الظاهر كدة حبوا يعاقبوه لانه بعيد عنك اتعدي الحدود وخلفله عيلين تلاته هما السبب كان هيجري ايه ياراجل لما

تعيش كدة من غير عيال خالص كنا هنسيبلك لقمتين لقمة ليك ولقمة لام العيال الي ماجوش انت اذن الجاني علي نفسك

يا ابوعلي (يعني حسن لكن نفسه في علي


وحكومتنا الي مفيش زيها اتنين بقي والي طبعا ما وراهاش غيرك ومابتنمش ياعيني ماهي بتفكر ازاي تخرصك خالص

وتخصخص فيك كمان وبقي السايح عندها بعينك الله يعينها بقي بتتعب والله


ماتنساش تدعيلها في صلاتك يا ابو علي ينوبك فيها ثواب خد بالك بقولك ادعيلها مش حاجة تانية ما هو واجب علينا

برده اصيل والله وماشي جنب الحيط دايما

معلش بقي كترت في الكلام شوية اعمل ايه كله منها الصورة ديه ركزوا فيها شوية وحطوا مرايا جنبكم وقارنوا

ياتري

في فرق

؟؟؟؟

تحياتي












هناك 28 تعليقًا:

محمد مارو يقول...

ااااااااااسف يطه
انا معرفش حد له المناخير دى كلها

غير معرف يقول...

والله دي صورة كل مصري غلبان وتعبان وكاره نفسه بس مش قادر يعمل حاجة علشان وراه ميت حاجة يعملها غير أنه يعارض النظام أو يناكف فيه , تعرفوا ليه لأنه معندوش وقت غير للشغل والشغل والشغل إللي يدوبك بيجبلوا شوية فلوس علشان يعرف ياكل ويشرب
وهما يعملوا مؤتمرات ويقولوا الأقتصاد بيتحسن
حسبي الله ونعم الوكيل
حمادة زيدان

طرقعات فجائية يقول...

احزننى مقالك يابطة أو لنقل قلب علينا المواجع ولكن الحقيقة دائما مرة -بضم الميم طبعا -ونسأل الله أن يفرج كربنا ويزيل همنا ويهدى للحق قادتنا وان يهدينا للحق ويرزقنا اتباعه إنه ولى ذلك والقادر عليه .. طبعا مافيش حد بيكتب الكلام الصعب ده غيرى
طارق الجيزاوى

Unknown يقول...

تعرفى يا بطة انا فعلا بصيت فى المرايا لقيت 78 مليون نسخة من المواطن دا ويا دوب كام واح بس فى الناحية التانية لابسين البدل وراكبين احدث سيارات وبيتفرجوا على المواطن دا كأنه بهلوان فى سيرك او اراجوز فى مولد او ..........فى قفص فى حديقة حيوان.
ربنا يسامحك يا بطة قلبتى علينا المواجع
لكن برضه عندك حق لازم نفوق ونصحى وكل الشعب يصحى كمان يطالب بحقه
واول حق ان يقدر يقول لا والف لا

nosha يقول...

بطة
ربنا يصبرنا ويقوينا على اللي إحنا فيه ويقدر كل إنسان على إنه يعيش حياة مستورة بعيد عن الذل والمهانة وإن شاء الله فرج ربنا قريب وميبقاش فيه أي مواطن غلبان ومحتاج لأي حاجة

boswsalem يقول...

كلنا غلابه

انا شايف نفسى فى الصوره دى

سلالالالالالالالالالالالالالامى لك

ودام قلمك

ابو النجوم يقول...

بطة
احلى حاجة فى الدنيا الاحلام وارخص حاجة الكلام يابنتى طول ماالناس جعانة عمرها ماهتفكر تبص لفوق يعنى للكرسى الكبير او مين قاعد علية واحنا الظاهر شعب طماع لو كلنا وملينا بطننا هننقلب على الحاكم ونديها فلسفة وسفسطة وايشى ماركسى ةايشى اشتراكى وراسمالى والحاجات اللى بيتكلموا فيها الناس الفاضية .علشان كدة الحكومة ربنا يعمر بيت ابوها مجوعة الشعب والناس

غير معرف يقول...

بطوط..

دى صورة مصر كلها

مصر كلها مطحونه

نظراتها كلها حزينة

تترقب

تنتظر

تخاف المجهول

لكن بداخل تلك النظرة

نظرة للمستقبل

نظرة امل

وانشاء الله سيكون المستقبل

للذين يخافون الله

بطه..

ربنا يحفظك دايماً

نيجــر

ابن رشد يقول...

و الله يا بطة انا بصيت في المرايا لقيت مواطن غلبان
بس شبة اللي في الصورة
لا ما افتكرش

بنت الاسلام يقول...

مارو

ياريتها جت علي المناخير


كانت هانت

بنت الاسلام يقول...

حمادة زيدان

سياسة


هي ديه سياسة

النظام

بنت الاسلام يقول...

استاذي الفاضل طارق الجيزاوي


نعم الحقيقة مرة

بنت الاسلام يقول...

د عبد الخالق زهران

نكسر المرايا احسن ولا ايه

بنت الاسلام يقول...

علي رايك يانوشة

هو الستر


الي احنا عاوزينه


وبس

بنت الاسلام يقول...

بص وسلم


اه كلنا

غلااااابة

ريهام يقول...

الله عليكى فعلا الصورة دى شبهنا اوى بس مكناش شيفين نفسنا كويس كنا بنتظاهر اننا مش بالحاله اللى تبكى دى بس للاسف هى دى الحقيقه المره احنا حالتنا وحشه اوى محتاجين قنبله تنزل بس مش تموتنا لاء تغير من احوالنا الاقتصاديه والمعيشيه الزفت دى وتحياتى ليكى على موضوعك الحلوة ده يابطوط

بنت الاسلام يقول...

ابو النجوم

معاك طبعا في كل كلمة قلتها

هي سياسة تعجيز الشعب

بنت الاسلام يقول...

احمد سعيد

بالتاكيد في امل


وامل كبير كمان

بنت الاسلام يقول...

شمس

هي الصورة صعبة قوي كدة

بنت الاسلام يقول...

ريهام

ايوة

هي ديه

قنبلة

بس نلاقيها فين

غير معرف يقول...

على فكرة ، الصورة دي قديمة قدم الأزل منذ أيام الفراعنة وحتى الآن وعشان كده بنقدر نميز المصري من ألف مليون شخص

بنت الاسلام يقول...

محمد رمضان

يعني مفيش امل

تتغير

حبة حاجات (ايمان) يقول...

احييكى على الصوره

بنت الاسلام يقول...

ايمان

تحيتك وصلت ياقمر

mohammed alsha3r يقول...

بجد الصورة معبرة تماما

تكفى

بس اسلوبك بردة كويس

زى

مين

افتكر

الواد جمعاوى روش طحن

اسلوبه جميل كدا

يلا اعانكم الله

بنت الاسلام يقول...

الشاعر

الحمد لله ان الصورة

تكفي

the_littlepharaoh يقول...

تعرفى نفسى الصورة دى تتغير و برده انتى تكتبى مدونه بس تسميها ((صورة المواطن المصرى المرتاح اوىىىىىىىىىى))

بنت الاسلام يقول...

ياريت يامحمد تتغير


ياااااااااريت

مصر