الهي ماعدت أبغي شيئا في هذه الحياة سوي عفوك ورضاك

الثلاثاء، 29 أبريل 2008

لومحدش رد علينا هنشيل المصنع بايدينا...شعار الدمياطي الثائر اليوم

بالــــــــــــــروح بالــــــــــــدم نفديــــــــــكي يادميــــــــــــــــاط



يامبــــــــــــــارك خد قرار الدمايطـــــــــة في الانتظــــــــــــار



لو محدش رد علينا هنشيل المصنــــــــــــع بايدينــــــــــــــــــا



لا للمصنـــــــــــــــــــــــــــــــــع لا للمصنـــــــــــــــــــــــــــع


لا للمـــــــــــــــــــــــــــــــــــــــــــوت لاللمــــــــــــــــــــــــــــوت


يميــــــــــــــن شـــــــــمال المصنـــــــــــــــــــــــع هيتشــــــــــــــال



النهاردة بجد كان يوم تاريخي لشعب دمياط كله



في ناس مش فاهمة هو في ايــــــــــــــــــه؟؟؟؟؟؟؟؟



أقول تاني ليه لاء؟؟؟؟ كل دمياط معترضة علي اقامة مصنع تابع لشركة اجريوم الكندية بالقرب من مدينة راس البر الدمياطية الساحلية نظرا للاخطار والاثار السلبية علي البلد كلها


وبعديــــــــــــــــــن


يوم الثلاثاء الموافق29 ابريل كان يوم الثورة والغضب وفعلا كانت ثورة وكان الغضب

صحيت الصبح بدري الساعة 10 ونص لبست أسود في أسود ونزلت ركبيت المكروباص قلتله البوسطة ياأوسطي نزلت عند البوستة لاقيت الدنيا فاضية الا مجموعة سيدات لابسين اسود في اسود زيي ندهوا عليا


قلتلهم انتم هنا عشان المصنع قالوا ااااااااااه قلت خير قعدنا كلنا علي الارض نتكلم في الموضوع وبعدين بدات الناس تيجي رجالة كتيرة شايلين يفط مكتوب عليها تنديدات باقمة المصنع في دمياط لافيت بعنيا في المكان لاحظت حاجة غريبة مفيش محل الا وعلق ورقة علي بابه لا للمصنع الموت في دمياط مفيش عمارة الا ونازل منها قماشة طويلة مرسوم عليها علامة الموت لا للموت لا للمصنع مفيش عربية او تاكسي او حتي ميكروباص الا والورقة موجودة وملزوقة فيه




المهم فضلنا واقفين وسيدات كتيرة جداا بصراحة ام جاية ومعاها اربع اطفالها صغيرين جدااا سيدة عجوووووووووزة جدااااااااااا موجودة معانا المهم بدا الامن ييجي علينا يالا ياجماعة من هنا المصنع خلاص اتلغي وصدر قرار بكدة روحوا هاتوا المصري اليوم هتلاقوا الخبر طبعا محدش صدق وفجاة صرخت اول سيدة من الخلف لاللمصنع لا للمصنع والكل وراها يهتف وبدانا المسيرة من حديقة البوسطة متوجهين ناحية مبني المحافظة الامن حاول يعمل ستار حاجز لكن معرفش واستمرينا في المشي والاعداد تتزايد بسرعة رهيبة عينيا مكانتش قادرة تحصر الاعداد لانها فعلا كانت بالالاف والاعلام كان موجود ومكثف جدااا لغااااااية ماوصلنا مبني المحافظة واحنا بنهتف وعند المحافظة بدات عظمة شعب دمياط تظهر بكل طوائفه وعلي راسهم محافظ البلد




وصلنا المحافظة وقفنا وصوت هتافنا بيعلي


وفجأة



لاقيناه خارج بنفسه قدامنا بقي واحد مننا واقف وسطنا مين هو المحافــــــــــــظ الدكتور فتحـــــــــي البرادعي بنفسه وقف يكلمنا ويهتف فينا الحقيقة انا كنت بعيد مكنتش سامعة هو بيقول ايه ومن بعده وقف نواب الشعب يكلمونا وبرده مكنتش سامعة والهتاف استمر وتعالت الاصوات عاوزين قرار عاوزين قرار لومحدش رد علينا هنشيل المصنع بايدينا والناس كلها قالت مش ماشيين لغاية مايصدر قرار وقعدوا علي الارض كلهم والظهر اذن صلوا جماعة






موقف غريب لاقيت رجل عجوووووز بلامبالغة لما ااقول 80 سنة صوته مش طالع وبيزعق جامد في ايه ياحاج بيكذبوا علينا بيقولوا انه وقف وكل يوم الساعة 2 باليل نسمع اصوات المعدات شغالة فرحت بيه قوي فرحت بكل الدمايطة


فجأة لاقيت تصقيف عالي وصفيروالناس بتوسع الطريق ودخل مجموعة اطفال في قلب الاعتصام رافعين نعش اه والله لاء كمان نعشين مغطينهم بالاسود ومكتوب عليهم مدينة دمياط مدينة رأس البر أغيثووووووووونا


والصراحة كان مشهد راااااائع اثار الحماس في الناس اكتر واكتر دخل المحافظ مبني المحافظة ساعتها انا كنت قربت جدااا من الصوت وبدا يتكلم من مكبر صوت واعلنها رسمي


يا اهال دمياط الكرام انتم ضربتم اعظم مثل وبفضل جهودكم واتحادكم صدر قرار نهائي بوقف المصنع مش هيقام في راس البر ولا في اي جزء من مدينة دمياط وسمعنا كلام ان يوم السبت واحد مايو يوم عيد العمال الريس شخصيا هيذيع ان المصنع اتنقل من دمياط رسميا وقعد يحمس الناس ويشجعها ترجع لشغلها وماتضيعش وقتها


وبدأت الناس تهدا وقعدنا نقول لبعضنا احنا نصدق كلام المحافظ ونمشي لانه بجد راجل محترم واكيد بيحترم كلمته ولو طلع كلام بيضحكوا بيه علينا المرة الجاية بقي علي المصنع فورااااااااااا


وفعلا بدانا ننسحب بهدووووء روحت البيت مش قادرة من التعب والهتافات لسة بتتردد في دماغي


للاسف مكانش معايا كاميرة اصور ولا حتي موبايل بكاميرة لكن اكيد في صور كتير جدااا هحصل عليها وهنشرها


نسيت ااقول ان احنا قررنا يوم الغضب يكون النهاردة لان كان في لجنة صحة من مجلس الشعب مقرر ليها انها تيجي النهاردة تعاين الموقف لكن للاسف اللجنة مجاتش سمعنا اقاويل بتقول انها اتمنعت من المجيء واقاويل تانية بتقول ان قرار النقل صادر من امبارح عشان كدة مجيئها مابقالوش لازمة الله اعلم الحقيقة فين بالظبط


المهم ان شعب دمياط كله ضرب اعظم مثل واحترم كلمة محافظه وانصرف ولعلها تكون الاخيرة لان الصرخة القادمة ان كانت هناك معارك قادمة ستكون صرخة الدمــــــــــــار

بنت دميــــــــــــاط أنــــا

سعيــــــــــــــدة

بشعبـــــــــــــــي


المتحضــــــــــــــر


وخصوصـــــــا


بالسيــــــــدات

الأحد، 27 أبريل 2008

شعار الدمياطي...الموت لا يأتي مرتين ويا أنا يا الحكومة





الموت لايأتي مرتين

نعم


هذا هو الشعار الذي يحمله أهل دمياط


اليوم علي أكتافهم

خدعنا

نعم خدعنا باشاعة تقول


أن العمل بمصنع الموت أجريوم في رأس البر قد توقف

فرحنا



عم الفرح قلوبنا


ولكن فجأة وبلا مقدمات


تناثرت الاقاويل عن عملية الليل

في الليل والظلام ساتر


نزلت ورست بموقع الموت طائرات تحمل المعدات

لتنزلها بمقر الموت

واستمر العمل والبناء

استفزاز بمشاعر المواطنين

أدني اعتبار لغضبهم واحتجاجهم

ولكنهم نسوا أو تناسوا

من هو الدمياطي

بالامس دار حوار بيني وبين سواق تاكسي

عن المصنع واستمرار العمل فيه

هزتني كلمته

هي موتة واحدة الي هنموتها

ويا احنا ياهما


الان أصبح شعار الدمياطي

يا أنا يا الحكومة

والدمياطي الصنايعي


بلاتفكير


يعني حقي بدراعي

ويا أكل قوتي ياناوي علي موتي



بمعني

انه بجد يتخاف منه

وقد قررنا الاتي

غدا


يوم شم النسيم


حيث يأتي الزائرين من كل مكان

علي بوابة الزائرين برأس البر

سيتوقف أطفال دمياط بشارات سوداء احتجاجا

ويوم الثلاثاء

اليوم المحدد لزيارة رئيس الوزراء

دكتور أحمد نظيف


في مهمة رسمية


الا وهي اقناع الشعب الدمياطي

بتقبل المشروع


الساعة الحادية عشر ظهرا


ستنطلق مسيرة سلمية

سيشارك فيها الجميع


حتي ادارات المدارس


قد استعدت وجهزت أبنائها بالسواد


وسننطلق جميعا معلنين الحداد

باتشاحنا بالسواد


حتي مقر المحافظة




كل هذا والاحتجاج حضاري



والموقف مشرف

ولكني من هنا أحب أن أطلق



صفارة انذار


وأدق



ناقوس الخطر




لقد أعلنها الدمياطي




لا لمصنع الموت




ولن تجدي معه مفاوضات




أو اتفاقات




وان لم ترضخ الحكومة والشركة الكندية



لطلبات المجتمع المدني


فلا يلومن أحد الا نفسه




لانهم هنا أعلنوها صراحة

وحضروا أكفانهم


فالمصنع حقا بالنسبة لموسم الصيف الذي ينتظره



الجميع طوال العام



موتا حقا




والصرخة التي شارفت علي الانفجار

اقتربت

و

أصبح شعار الدمياطي


الموت لا يأتي مرتين و يا أنا يا الحكومة


الجمعة، 25 أبريل 2008

الطائر المغرد



تساقطت الدموع من عينيه الجميلتين

وحاول أن يرفرف بجناحه السليم

الا ان جرح جناحه الاخر ألمه

وذكره بعجزه عن الطيران

فاستكان


ولاخرمرة نظر الي طائره المغرد

الذي كان بالنسبة له شدو وألحان


كم حن عليه هذا الطائر



كم غمره بلحظات أمل وحنان


لدرجة نسي معها جرح الأيام



كم خفف بشدوه أنات ألمه



وكم أضحك بصفائه ظلمات قلبه


كم رسم بنقائه ابتسامة وجهه


التي أعدمتها قسوة الايام



كانت رفرفته تسعده


وطيرانه يشعره أنه هو المحلق


كانت أصوات حفيف الاشجار الذي يقف عليها


بالنسبة له كأجمل أصوات الانسان




ولكن فجاة

تذكر أن الطائر الحر


لايستقر به المكان



ولا يعرف معني للزمان

بل تشتاق دائما اليه السماء


وتتكالب عليه الطيور


ليعود معها للتحليق في كل مكان




ليسمع ألحانه لأهل السماء


ليشدو بعذوبته علي كل الاغصان


فانقبض قلبه


وتذكر يوم الرحيل


ماذا سيفعل؟؟؟؟

سيعود كما كان

وحيدا

جريحا

بلا

عنوان

لن

يتحمل


الالام


فقرر أن يرحل

وفي

صمت

بلا

أشجان


تغلب علي الام جرحه



وأخذ يجر ورائه أحزانه



حاملا معه جعبة لاتنتهي



من الذكريات السعيدة


مع طائره الجميل

متمنيا له حياة سعيدة له


بين زرقة السماء


وشدو طيورها الحرة


وداعيا له أن تصل ألحانه

لكل الاذان

أما

هو

فالذكري السعيدة


ستظل باقية معه
مدي الحياة

الثلاثاء، 22 أبريل 2008

عندما صرخ الدمياطي...انظروا ماذا حدث؟؟؟



أولا أنا فرحااااااااااانة قوي جداااااااااااا لأن صوتنا وصل وأثر وسمع

طبعا في ناس مش فاهمة صوت ايه الي وصل وسمع

أأقوله صوت شعب دمياط

وصل فين هو في ايه

أأقولك ياسيدي فجأة ومن 3 شهور بالظبط لاقينا شركة كندية معروفة عالميا اسمها أجريوم حطت رحالها علي أرض دمياط الحبيبة بمعداتها الثقيلة واستثماراتها الرهيبة قلنا خير وبركة أهي بشرة خير وأفواه هتاكل وايدين عاطلة هتشتغل

لكن فجأة
لاقيناها ركزت علي مكان لايمكن أن يتقبله أحد كمكان لمصنع ضخم متخصص في انتاج اخطر مادتين علي الصحة في العالم اليوريا والامونيا اختارت موقع علي مشارف مدينة رأس البر اللي طبعا لايخفي علي أحد من هي مدينة رأس البر مدينة ساحلية تعتبر منفذ لاغلبية شعب مصر في الصيف وبدأ الكلام ازاي والاخطار وأصبح حديث المصنع هو الحديث في كل بيت في دمياط لان مجرد تواجد معدات المصنع وبدأهم في البناء اثر تاثير سلبي غير متوقع علي حجم الاستثمارات في المدينة نزلت اسعار الاراضي والفيلات 60 في المائة الجروبات السياحية المحجوزة بالفنادق والقري السياحية اتلغت

وفجأة الكل اتحرك ايوة الكل اتحرك وضربوا أعظم مثل للحضارة والرقي في العالم كله حسينا فجأة ان كلنا ايد واحدة وطني واخوان ووفديوالمحافظة والنقابات والغرفة التجارية وغيره حصل تعاون بين كل فصائل شعب دمياط بدون سابق انذار

أعضاء مجلس الشعب سمير زاهر ومحمود صيام قدموا احاطات لمجلس الشعب وتنقلوا بين الوزارات المختلفة للبحث عن أصل الشركة ومن أعطي لها التصريحات وخلافه واكتشفوا خلال رحلة البحث حقائق في قمة الغرابة اسمحولي أعرضها عرض سريع


1_أن الشركة الكندية حصلت علي قرار الموافقة منذ عام 2002 ونحن لم نعلم عن هذا القرار شيء الا منذ 3 اشهر فقط اذن في سرية ليييييييييييه؟؟؟؟؟

2_أن الحكومة المصرية تساهم بنسبة 24 في المائة و16 في المائة قطاع خاص وطبعا نظرا لعظم وكبر النسبة المشاركة بها الحكومة المصرية(بتريق أنا) فقد سمحت لنفسها أن تصرف لصالح المصنع كميات مهولة من منبع الغاز الطبيعي بدمياط بأسعار رخص التراب هذا بالاضافة الي انها أعطتها مياه النيل لمدة 25 سنة بمايعادل مليار متر مكعب ماء سنويا تقريبا بلا ثمن
في الوقت الذي يتحدث فيه العالم كله عن حرب المياه القادمة

3_وهذا ما اثارني انا شخصيا خطابان الخطاب الاول موجه من السيد وزير البييئة الي وزير الزراعة يطالبه فيها بتحويل مدينة راس البر لمحمية طبيعية نظرا لموقعها الفريد واحتوائها علي مايقرب من 2 مليون نخلة و72 طائر مهاجر وووو ولم يمضي أربعة أشهر الا وقد صدر خطاب أخر من نفس الوزير يعلن فيها موافقته علي المصنع وبانه ليس لديه أي اخطار علي البيئة ؟؟؟كيف هذا ؟؟؟

هذه كانت الحقائق التي خرج بها لنا نواب الشعب اتوجه بخالص الشكر لهم

اما بالنسبة لاهالي دمياط فاليك ما فعلوا:

1_لافتات سوداء علي المنازل خطوا عليها لاللمصنع الملوث للبيئة

2_تكاتف رجال الاعمال والتجار بجمع تبرعات وصلت لمائة وسبعين الف جنيه لعمل حملة اعلامية ضخمة ورفع قضايا للمطالبة بنقل المصنع من مدينة راس البر ونجحت الحملة

3_مظاهرات متعاقبة عقب صلاة الجمعة للتنديد بالمصنع

4_وقفات احتجاجية للنقابات واشهرها نقابة المحاميين وقفة محترمة تذكر لها

5_لابل قرروا الذهاب للاعتصام أمام مجلس الشعب ان لم يتوقف

6_بالنسبة لي انا شخصيا فقد كتبت علي مدونتي من قبل موضوعا في هذا الشأن وفوجئت بتعلقين أثرا فيا اولهما من صحفي دمياطي ترك لي ايميله الشخصي وترك في رسالته لو انني ااريد معلومات عن المصنع ارسل اليه والثاني من شاب دمياطي ايضا ترك لي جروب قام بانشائه علي موقع الفيس بوك يرفض فيه المصنع اطلق عليه لا للمصنع ودعاني للمشاركة واشتركت حقيقة ايجابية اسعدتني من أبناء بلدي

وبالامس فقط صدر القرار بوقف العمل في بناء المصنع

وانتصر الشعب بتحالف كل قواه وتحية خاصة مني للسيد المحافظ فتحي البرادعي لموقفه البطولي معنا فبفضل تشجيعه ماكنا حققنا شيء

عرفتم بقي انا فرحانة ليه


عشان ولاد بلدي طلعوا جدعان قوووووووووي

ووقفتهم شرف ليا وشرف لكل مصري


دعوة عامة لكل المصريين
اوعوا تصيفوا في اي حتة
راس البر أجمل مدينة في العالم نورووووونا
وهتتبسطوا قووووووووووي
بس تعالوووووووا

الخميس، 17 أبريل 2008

ان لم تعد اسراء...فكلنا اسراء...ولن نخاف



ماذا فعلت اسراء لكل هذا ؟؟؟؟؟؟؟؟

ماذا فعلت لتهان بهذا الشكل المخزي؟؟؟؟؟؟؟

قررت النيابة الافراج عنها وانتظر الجميع خروجها ولكن فجأة اختفت ؟؟؟؟

مامعني اختفاءها؟؟؟؟

واي رسالة اكثر من الرعب تريدون ان تبعثون بها الينا؟؟؟؟؟؟؟؟

لا لن نخاف بعد اليوم

فما عاد لدينا شيء نبكي عليه

ولم تعد وسائلكم المرعبة وارهابكم لشعب طفح به الكيل تفيد أو تجدي


انها فتاة بسيطة هيأتها تدل علي أنها ليس لها تاريخ سياسي عريض

ولا تواجد علي الساحة السياسية مميز

ولكن كل مافي الامر انها احست وشعرت بالام من حولها فكان جزائها ان تتالم

يا أمن مصر الهمام

ليس من الشهامة ولا الرجولة

ان تقتصوا من امراءة كل ذنبها وجريمتها أنها شعرت بالام من حولها

ليس من البطولة ان تتخذوها كبش فداء ازمة انتم صانعيها

ليس من المروءة ان تحملوها مأساة أنتم السبب فيها

يارجال أمن مصر

قبل أن تكونوا أمن دولة فأنتم في بيوتكم أباء وبين أبنائكم تنسون أنكم أمناء

فلاتلومونا اذن نحن الابناء حينما نقف في وجوهكم صارخين

رافضين ظلمكم الذي تجاوز كل حد

افرجوا عن اسراء
والا

فستعلن كل امهات مصر منذ اليوم ان كل بناتهن اسراء

وسيقف كل اب في مصر ليكتب بنفسه شهادة ميلاد ابنته الشجاعة التي وقفت وصرخت

لا والف لا

ومهما كان الالم ومهما كان الظلم ومهما كان العذاب فسنتحمل

لان قلوبنا التي ذاقت معني الالم

وأرواحنا التي عاشت بين أنات الظلم

لن تستذل بعد اليوم

ولن نكون عبيدا لكم صامتون

لن نكون

ومن هنا

اعلن تاييدي وانتظاري مع كامل اشواقي ليوم 4 مايو

يوم الاضراب

الذي ادعو من الله ان يكلل بنجاح وتوفيق
في اطار حضاري سلمي يعبر عننا نحن المصريون

وان لم تعد اسراء

فكلنا اسراء

ولن نخاف
فلتخطفونا جميعا اذن
فلتعذبونا كلنا اذن
فقد جربنا كل الوان العذاب
ولن تكون كرابيجكم احن علينا
من صرخات بطون الغلابة
سنصرخ
ولن نخاف

الأحد، 13 أبريل 2008

الاخوان والاضراب



كلنا بنحبك يامصر

تعالت الاصوات مختلفة ومتشاحنة علي الاضراب وتصيد الصائدون في الماء العكر ربما شامتون وربما حاقدون وربما
أيضا صادقون في هذا المقال أحببت أن أجيب علي سؤال كل الناس وملوا من طرحه وأثار حيرة الكثير والكثير لا بل وربما دفع البعض للخوض أكثر والغي أكثر وأكثر ألا وهو موقف الاخوان من اضراب 6 ابريل؟؟؟؟ وتعليل سبب عدم مشاركتهم بمائة علة وعلة أنا لن أتحدث عن قرار الاخوان سليم أم لا فهذا شيء يخصهم وهم الوحيدون الادري بالصالح والطالح لهم بالذي يحسب لهم والذي يحسب عليهم الا انني ومن خلال رؤيتي المتواضعة التي ربما لاتستند علي دلائل وقرائن الا انها رؤية من بعيد كنت سعيدة بعدم مشاركتهم ككيان وكهيأة كبري وكقوة معارضة كبري لها وزنها في الشارع المصري نعم كنت سعيدة أن هناك أصوات أخري قوية أيضا أصبح لها صدي مسموع وتأثير ملموس ووجود هذه القوة ونمو هذا الكيان النابع من أعماق الشعب من بين أبناءه بلا دافع سوي التغيير وبلاهدف سوي الاصلاح والذي أسعدني أكثر أن مطلقوا الصرخة كانوا شباب نعم شباب طفح بهم الكيل وفاض بهم فصرخوا ولبي كثيرون الصرخة تبنوها وراعوها ولم تعد وليدة خرجت للحياة ربما مشوهة مغلفة بقطرات عنف ودماء أحزننا جميعا فلم نتمني يوما ان ننال حقوقنا بدماء الابرياء او بتلويث ايادينا بما ليس لنا حتي ولو تاوهت بطوننا جوعا الا ان الصرخة هزت الفضاء وأسمعت الارض والسماء وهكذا تعالي النداء وتعددت جوانبه كان النظام متصيدا دائما للاخوان وعلي مر الزمان عاني الاخوان من ظلمهم كثيرا وكثيرا فهنيئا لكم ايها الاخوان فلم تعد اصواتكم فقط التي تعلو ولم يعد أبنائكم وحدهم الذين يضحون فقد قام ابناء مصر بمختلف اتجاهاتهم ومختلف أعمارهم وطوائفهم ومن حيث لايدري أحد ولا يتوقع وأعلنوها اضرابا ضد الظلم والظالمين ضد الذل والقهر وهكذا تعددت القوي وأن للاصوات التي لم يكن وراءها سوي مهاجمة وطنية الاخوان والتشكيك الدائم في اغراضهم التي اراها مشروعة طالما كانت طرقها منابر الشرعية أن تتوجه لتصب جام أحقادها علي القوي الاخري التي اعلنتها اضرابا عندما لم تجد امامها منفذ سواه وعندما حركتها وهزتها بطون الجياع وانات الباحثين عن علاج ولكني اتساءل للداخلية؟؟؟ ماذا ستفعلون بنا نحن دعاة الاضراب؟؟؟؟هل ستتهمونا ايضا بالاغراض وتطلقون علينا المغرضين وتلقبوننا بالمخربين وتلقوا بنا مثلهم في السجون وتتفننوا في رسم صور لنا بالبدل الحمراء وبالمحاكمات العسكرية ؟؟؟أما أن الوقت لتشعروا أننا مافعلنا هذا سوي لاننا نحب مصر وحب مصر يفرض علينا أن ننقذ أبناءها الجياع ولو بصرخة الشبعانين لذا من أجلها سنكرر الصرخة يوم 4 مايو صرخة سلمية من اجل مصر ولتفعلوا مايحلو لكم يكفينا فخرا أننا نحبها؟؟؟


كلماتي ليست غزلا في الاخوان فربما كان اختلافي معهم أقوي من اتصالي بهم وربما العكس ولكنها الحقيقة التي لمستها بنفسي والله أعلم بما في الصدور

تحياتي

الخميس، 10 أبريل 2008

أنشر ولك أجر



بقولك ايه هتقاطع ولا لاء

طبعا هقاطع

طب هتقاطع ايه

اللي انتي هتقولي عليه

هو انا هقول ايه

انا عارف قولي وسمعيني ياسيتي

شوف ياسيدي احنا طبعا مسلمين وموحدين بالله تمام كدة

تمام التمام حد يقدر يقول غير كدة

حلو الكلام بنحب دينا لان هو اللي علمنا اننا نحب كل الناس ونحترم كل البشر ومانغلطش في حد ولاننجرح حد غلطتش أنا

أبدا دانتي حتي كلامك عبر


طب خير طبعا اللي علمنا الرحمة والحب والخير واللي مواقفه كلها عفو وتسامح ومحبه هو مين؟؟؟

ايوة مين

يابني بقولك انت هو مين ...؟؟؟؟؟؟

قولي انتي ياأختي

طيب هقول هو سيدنا النبي صلي عليه

عليه أفضل الصلاة والسلام أه والله عندك حق

سمعتش أنت بقي علي اللي الغرب بيقولوه عليه

غرب... بيقولوا عليه ايه دول قولي بسرعة

طب اسمع هحكيلك أهو في بلد اسمها هولندا تعرفها المهم برلماني يعني واحد زي عضو مجلس الشعب عندنا كدة اسمه ياسيدي جيرت فيلدرز عمل فيلم سماه الفتنة بيسيء فيه لسيدنا النبي وللقرأن ونشره في مواقع علي الانترنت

ايه الكلام اللي بتقوليه ده والمسلمين ساكتين ازاي علي كدة الراجل ده لازم يتقتل فورا مش لازم نسكت ووووو

هس هس ايه العبط اللي بتقوله ده ده كلام اهدي كدة وخلينا نفكر بالعقل

عقل ايه دول ماينفعش معاهم عقل

لاء طبعا ينفع اسمعني بس هفهمك

فهميني بس لومافهمتش هتنح بقي ومش ساكت

اسمع بس الناس في الغرب مابيفهموش ولايعرفوش غير لغة اليوروووووو الورق الاخضر المادة يابابا تعرف ان حجم تعاملات هولندا في العالم العربي بس كام

كام

4 مليار دولار سنويا يعني لو كلنا اتفقنا وصممنا اننا نقاطع منتجاتهم ولو لفترة محدودة اسبوعين مثلا اتفرج بقي علي اللي هيحصل

ها قولي هيحصل ايه

هيأثر علي اقتصادهم يابني جدااا وهيخليهم يفكروا جامد

طب الهدف من المقاطعة دي ايه؟؟؟؟

ااقولك ياسيدي دي اهداف كتيرة مش هدف واحد خد عندك

اولا بالمقاطعة الاقتصادية ديه هنضغط علي البرلمانات الاوربية لتشريع قانون يمنع الاساءة للاديان

اه وايه كمان

تاني حاجة وده المهم احنا نبقي عملنا حاجة فعلية ومحسوسة لنصرة حبيبنا المصطفي

اه


كمان ديه بقي هتبقي فرصة مهمة لتعريف الغرب بمن هو النبي وبعظمته وبأخلاقه ده انا سمعت ان في رجال اعمال مصريين ربنا يبارك فيهم هينشروا صفحات في جرايد هولندية للتعريف بأشرف الخلق

بجد

اه والله جد الجد

كمان في حاجة بقي معظم الشركات الهولندية معانا وفي صفنا وسمعت انهم هيرفعوا قضية لتشريع القانون كمان

اه والله كلام جميل قوي بس أنا عاوز اعمل حاجة فعالة احس اني عملت حاجة

بس كدة هتعمل ياسيدي

انا هعطيك دلوقتي قايمة فيها كووووووول البضائع الهولندية عاوزاك تحفظها صم وتقاطعها مش كدة وبس لاء كمان تنشرها تلف علي السوبرماركتات وتعلقها وماتشوفش حد الا لما تقوله

وانشر ولك أجر

الله يفتح عليكي

ويفتح علينا كلنا

يالا ننفذ كلنا بقي وننشر ونقاطع لعلها نصرة ولعله الاجر


هذا البوست تضامنا مع الحملة التي أطلقها مجمع البحوث الاسلامية تحت رعاية الاعلامي الكبير الاستاذ عمرو اديب لبرنامج القاهرة اليوم والتي مدتها اسبوعين بدءا من اليوم 10 ابريل الي 25 ابريل و

انشر ولك أجر
هذا الرابط به كافة البضائع الهولندية

الاثنين، 7 أبريل 2008

اضراب 6 ابريل....ومضة أمل


أخي المصري اصرخ دون تخريب ...انه حقك



اضراب 6 ابريل ومضة أمل كبيرة لشعب مصر ربما لم يكلل بنجاح قاطع ربما لم يحقق أهداف مرجوة تمناها الشعب وحلم بتحقيقها
ولكنه بلا شك ايجابية لا يمكن انكارها او اغماض العين عنها وخاصة أنه صوت بلا قائد أو زعيم انه صوت الشعب ومن الشعب بكافة طوائفه أثبتنا للعالم أجمع وقبل ذلك أثبتنا لأنفسنا أنه عندما تضيق الحبال ويتلذذ بعذابنا الجلاد ونقترب بسبب ضعفنا وخوفنا من حافة الموت فان أضعف صوت نابع منا نسمعه حتي لوكانت دعوة ربما لم يحلم الداعي يوما بوصولها لاذان الداعين الا أن الاذان استمعت ولبت رغم ضعف الصوت ورغم بعده ربما يتساءل سائل أي نجاح هذا الذي تتحدثين عنه؟؟ فأجد نفسي أجاوب بأنه نجاح الصوت كمريض ضاعت حنجرته منه أعواما وأعوام ومن ذاته وبلا طبيب يداوي عندما زاد عليه الألم وعندما ضاقت نفسه بظلمات الصمت صرخ فخرجت الصرخة ربما مبحوحة ربما مكتومة الا أنها سمعت ودوت الا أنها أراحته وأشعرته بوجوده الذي كاد أن ينعدم رغم تكالب أصحاب الدعاوي المضادة دعاوي الذل والصمت عليه ليخرسوه ليضللوه لا وبل ليوهموه بأن مافعل ليس نصرا ولا فخرا انما هو شغبا أعجبتني كلمة قرأتها في أحد المقالات بجريدة حكومية(المغرضين) استوقفتني الكلمة وتعجبت لها وتساءلت من المغرضين؟؟دعاة الاضراب مغرضين لانهم طفح بهم الكيل واحسوا بمعاناة الاخرين فصرخوا فكانت أغراضهم ماذا لست أدري؟؟؟ أتمني أن أجد جوابا وتفسيرا لهذه الكلمة التي أثارت حيرتي وقلقي اذن فخلاصة القول أن النجاح هو نجاح الصوت فحسب وبلا قائد ينسب له الفضل والتحريض فليعتقلوا الشعب كله اذن ...الشعب المغرض

لابد قبل الختام القاء الضوء علي الحدث الاعظم في هذا الاضراب وهي المحلة الكبري وماحدث بها نقطة سوداء مشينة في تاريخ هذا الاضراب فما نجحت مطالب يوما ما بعنف ولابتخريب ان كنت تريد حقك فلتتحدث فلتتكلم فلتصرخ بكل ماتملك من قوة تذكرت واقعة في زمن الرسول الكريم بطلها أحد الصحابة الصالحين وهو أبو ذر الغفاري الصحابي الشجاع الذي عندما دخل نور الاسلام في قلبه لم يخشي الا الله وذهب الي قلب الكعبة وعرض نفسه لأذي المشركين باشهاره اسلامه ذات يوم ساله المصطفي عليه أفضل الصلاة والسلام
يا أبا ذر كيف أنت اذا أدركك أمراء يستأثرون بالفيء"..؟ أي يستحوذون علي خيرات البلاد ويجوعون الشعوب فكان رد أبا ذر الغاضب الذي لايخاف في الحق لومة لائم "اذن والذي بعثك بالحق، لأضربن بسيفي".!!انظروا ماذا كان رد المصطفي الحبيب رافض العنف الذي ياتي المغرضون اليوم ليصفونه بالدموية انظروا قوله
"أفلا أدلك على خير من ذلك..؟اصبر حتى تلقاني".

وتمسك ابا ذر بنصيحة النبي وعاش في زمن سيطر فيه المال وجشعه علي الامراء فماذا فعل انظروا لهذه الكلمات من كتاب رجال حول الرسول

ولسوف يحفظ أبو ذر وصية معلمه، فلن يحمل السيف الذي توّد به الأمراء الذين يثرون من مال الأمة.. ولكنه أيضا لن يسكت عنهم لحظة من نهار..أجل اذا كان الرسول قد نهاه عن حمل السيف في وجوههم، فانه لا ينهاه عن أن يحمل في الحق لسانه البتار..ولسوف يفعل.. وقد فعل كان لسانه لايتوقف لهم بهذه الاية الكريمة
بشّر الكانزين الذين يكنزون الذهب والفضة بمكاو من نار تكوى بها جباههم وجنوبهم يوم القيامة"..!! صدق الله العظيم

هذا هو رسول الله وعظمة الاسلام فلنصرخ ولنشجب ولكن دون أن نفقد احترامنا لانفسنا واحترام الاخرين لنا
ولتحيا الصرخة التي انطلقت أمس ولن تكتم بعد اليوم لانها صرخة الكرامة ورفض الظلم صرخة محترمة

الجمعة، 4 أبريل 2008

صرخة كل المصريين



كان لازم اتكلم عن الاضراب


اشمعني انا يعني ما الكل عمال يتكلم


والكلام انفتح قوي والظاهر هيتقلب بخناقة


والجماعة دول مالهمش فيه ودول


ياجماعة الله يكرمكم تعالوا ننسي اي حاجة


لاء تعالو ننسي كل حاجة


ونفتكر حاجة واحدة بس


اننا مصريين


تعبانين


تعبانيين قوي


مشاكلنا كل يوم بتزيد ومحدش حاسس بينا


بالعكس كل همهم انهم يدبحوا فينا


ااقولكم حاجة


كنا زمان بنقول علي نفسنا الحمد لله مستورين


بناكل اللحمة والسمك


ونشرب الشاي والعصير



ونلبس في الصيف والشتا


بنتعلم وبنتفسح


كانت حياتنا مستورة ميسورة


عمر ماكان رغيف العيش بيجي في بالنا

وعمر ماكانت ازازة الزيت مصدر لتعبنا


ده احنا الطبقة المستورة شوفوا حالنا اتغير ازاي


شوفوا قلقنا علي الرغيف بقي عامل ازاي

مابالكم بقي باللي كانت لقمة العيش بالنسبة له حكاية


وطبق الفول عنده رواية


المشكلة ديه حاسس بيها كل الشعب


وطنينوه واخوانه


مستقلينوه ووفدينيه


كل الناس


تعالوا يومها يوم 6 ابريل نصرخ كلنا


ونقول علي كل اللي في نفسنا


نقولهم ارحمووونا بقي


ذلتونا برة واتحملنا


دوستوا كرامتنا وعديناها


جوة كمان ذلتونا بلقمتنا


حاولنا نتحمل لكن خلاص طفحنا


مابقيناش قادرين


قلنا نصرخ كلنا في نفس واحد


جايز الصرخة تأثر فيكم


جايز بطون الغلابة تحييكم


جايز الامنا تصحيكم


يالا نضرب كلنا


كل واحد مننا ينزل يبلغ الناس اللي يعرفها واللي مايعرفهاش


يوم 6 ابريل ماتعملوش حاجة غير انكم تصرخوا بس


صرخووووووووووووا


صرخوووووووووووووووووووووووا


عاوزين يوم 6 ابريل يبقي


صرخة كل المصريين




الثلاثاء، 1 أبريل 2008

تاج العزوبية.....وعروض مغرية


التاج ده اتمرر لي من أحمد سعيد مدونة قلب ابيض بشكره جداااااااااااا

ما رأيك فى الجملة التى تقول ...العزوبية تاج على رؤوس العزاب لا يراه الا المتزوجين ؟


جملة خاطئة طبعا العزوبية عمرها ماكانت تاج ولا هتكون
أولا لانها ضد المنظومة الكونية الي ربنا خلقنا عشانها
ثانيا لانها هتكون سبب في انتشار الفواحش والرذائل
مش عارفة ليه بقي الاتجاه السائد دايما هو الفشل اصبح الزواج كارثة مشكلة طول عمرنا نسمع ان الزواج رحمة ومحبة وسكن تضحية وقوة تحمل وصبر لكن الظاهر ان المنظومة ديه اتغيرت في المجتمع بقي الواحد بيحس ان الزواج اصبح صفقة مجرد صفقة كل واحد من الطرفين وااقصد هنا مش الشاب والفتاة بس لكن كل جانب بأسرته وعيلته هدفه يمص دم الاخر وبس عشان كدة بقت العزوبية عند كتير وكتير افضل كمان في ظل الفساد الاخلاقي وانتشار المواقع الاباحية والفضائيات في كل مكان اصبحت اسهل من انك تشرب كوباية ماية كل شيء اصبح سهل ومباح فيا اهلا بالعزوبية....ربنا يحفظنا الستر من عندك ياااااارب

ماهي من وجهة نظرك العوائق التى تحول بين الشباب والزواج هذه الايام ؟؟؟

انا شايفة ان احنا بقينا عايشين في منظومة فساد متكاملة عاملة زي شبكة الاخطبوط كله بيوصل لكله لو عاوز تعرف ايه العوائق بص لكل مشكلة حواليك هتلاقيها احد الاسباب نعدهم سوي

اولا ودي اهم مشكلة مشكلة الغلاء الرهييييييييييب الي احنا عايشين فيه والمشكلة ديه اثرت في الناس تاثير بشع بمعني زرعت الخوف والرعب في قلوبهم بقي خوفهم من المستقبل اقوي من أي خوف ونسيوا ان المستقبل بايد ربنا فبدأوا يتحولوا لوحوش نسيوا ان اهم شيء في الدنيا انهم يلاقوا لبنتهم انسان يحبها ويحترمها ويتقي الله فيها فبدل مايعلموا بنتهم الرضا علموها الطمع والجشع بدل مايصبروها بقت اسهل كلمة علي لسانهم سيبي عياله في دماغه وتعالي وبدل مايهونوا عليها بقت كلمة الطلاق وبكرة نجوزك سيد سيده عشان اكون منصفة احيانا بعذر البنات لانهم اصبحوا ضحايا لابائهم افتقدوا لعامل التربية الصحيحة المنبثقة من تعاليم اسلامنا السامية ارجعوا كدة لعصر حبيبنا النبي وشوفوا بنته سيدة نساء اهل الجنة اتجوزت بايه وعلي ايه التاريخ خلد ذكري زوجها لانه كان الامام علي بن ابي طالب كرم الله وجهه ماخلدش التاريخ ذكري زواجهم عشانهم عاشوا في قصور ولا شبكتهم كانت الماظ ولا بيتهم كان طوبة فضة وطوبة دهب سعادتهم كانت في أخلاقهم وفي احترامهم وحبهم لبعض وحفظهم لغيبة بعض....فاظفر بذات الدين تربت يداك صدق رسول الله

تاني مشكلة بقي هي المظاهر الكدابة الي سيطرت علينا فلانة جابت وعلانة خطيبها جابلها وانا مالي عاوزة زيها وتتقلب لحظات الهنا والسرور لبؤس وشقاء من تحت راس القرايب والصحاب فالشباب يسئلوا نفسهم وانا مالي ما كنت في حالي ومحلاها عيشة العزوبية.....يابنتي سيبك منهم عاوزين يخربوا عليكي ياعزاب بنصحهم اهوووووو

من وجهة نظرك هل النكد موجود فى العزوبيه ام فى الزواج ؟ ولماذا ؟

النكد احنا الي بنصنعه بايدينا والله لو حتي علي كرسي العرش وحوالينا الخدم والحشم بس انا عاوزة انكد عليك هنكد والعكس صحيح النكد موجود في كل وقت ومش بيرتبط بحالة عازب ولا متجوز لكن ااقول ايه ماهو لو الواد عيان ومفيش فلوس لدكتور اكيد هتنكد ماهو لو الانبوبة خلصت ومفيش فلوس اكيد هتنكد وانت عازب لو عيان وتعبان ومش لقادر تقوم ومش لاقي الي يناولك كوباية ماية اكيد هتتنكد لو يوم العيد الصبح مالاقيتش حد يقولك كل سنة وانت طيب اكيد هتتنكد صحيح شيء جميل اننا نحلم ان حياتنا تكون حياة كريمة لكن برده الصبر جميل ممكن بطبق مش ورغفين عيش بس القلوب راضية نعيش احلي حياة.

المشكلة الووووووحيدة هي التربية من شب علي شيء شاب عليه

نفسي كل زوجين يغنوا الاغنية ديه

وهي هتبعد عنهم النكد

وانا وايااايا بعيش زي المليونيرات واحلم وانا معاييش ملعنش الازمات

مع تحيات مدحت صالح

ونحلم بقي

وخلوها علي الله

والله ربنا كبيرررررررررر ومابينسي حد


ما الحل من وجهة نظرك لمشكلة (( العزوبية )) فى مصر ؟؟


حلول عملية وسريعة بقي

اولا نلغي الشبكة وده طبعا لغير القادرين فقط لكن اللي معاه و قال بركة ياجامع يبقي بررررررررة
ونكتفي بدبلتين محفور عليهم اسامينا واهو ياسيتي الاكسسورات مالية البلد وحتي شكلها احلي

ثانيا مش لازم الشقة تكون علي النيل واربع مطارح وعفشة ماية مالها الاوضيتين وصالة يعني المهم تجمعهم سوي في الحلااااااااااااال

ثالثا ودي للاهالي اتقوا الله في بناتكم دي مش بيعة وشروة هتدوها لليدفع اكترررررررر تخيرواااااا فان العرق دساااااااس يكفيها انها اتجوزت راااااااااااجل مش بيحط جل في شعره مع احترامي للجل والجلاللين طبعا وياريت كلمة الاب ترجع تاني اهم شيء هو انك تسعد بنتي بدل الكلمة اللي بقت اليومين دول معاك كام وعندك ايه


رابعا
يابنتي ارضي وبلاش تنكدي علي الراجل الغلبان وسيبك من الهدايا والاعياد والمناسبات وركزي في بيتك محتاج ايه ده الاهم وارضي بوردة ولا دبدوب ياسيتي ان شا الله حتي سندوش فول وطعمية كباب شعبي يعني المهم تكونوا سوي سعدااااااااااء


خامسا الايمان التام ان انا وانت واحد مفيش فرق عارفين طبعا ان الحياة صعبة واهو كل واحد بيتعب عشان يسعد التاني بمعني اوضح لو معايا وانت محتاج مش هتردد اديك عنييا ولو انت معاك وانا محتاجة ارجووووووووك ماطنشنيش واهو كله ينقط بطاقيته زي مابيقولي

سادسا الي يعرف حلول تانية يكتبها وادينا بندردش ورانا ايه ورانا ايه واللي معترض علي كلامي برده يقووووول


من وجهة نظرك ....هل للعزوبية مميزات وعيوب ؟؟؟

مميزاتها روقان البال جايز واهو محدش هيقولك هات لكن ياتري سعيد مرتاح ؟؟؟؟؟؟؟؟؟؟؟؟؟

عيوبها بقي العمر هيجري بيك تخيل كدة فيما بعد لما تكبر تبص حواليك تلاقي نفسك وحييييييييد محدش قالك كلمة بابا
قتلت جواك اسمي وانبل المشاعر واهمها الحب والاسرة والعزوة والعيلة

عاوزة ااقولك ايها العازب ان الحياة تعب ومشقة وصدق الله العظيم حينما قال لقد خلقنا الانسان في كبد

سواء عازب ولا متجوز اكيد في تعب والم لكن لما تضايق تلاقي ايد حنونة بطبطب عليك لما تمرض تلاقي صدر حنون بيحس بيك لما
ا تضحك تلاقي ابتسامات محوطاك وبراءة ولادك بتاثر فيك هنا بس هتحمد ربنا ولو عندك مشاكل الدنيا هتفتكر قول
الخالق العظيم

انما يوفي الصابرون اجرهم بغير حساب

واهو تتقابلوا في الجنة علي صبركم وتعيشوا احلي حياة حياة الخلووووود


ماهو رأيك فى انشاء مدونة (( رابطة )) للعزاب من المدونين ؟؟؟


لاء انا رايي ننشيء مدونة ((رابطة))الراغبين في الزواج من المدونين

عندنا عروض مغرية

بأقل تكلفة ممكنة

رجالة بجد محترمين جداا وملتزمين جدااا

وبنات مهذبات

متربيات علي الصبر والتحمل

واحترام شريك الحياة

وكمان مش عاوزين شبكة

دول حتي بيغنوا اغنية جميلة قوي

مش عاوزة مهر ياقوت او ماس

ولاعاوزة مال متعبي أكياس

ده كفاية سيرته مابين الناس

وايمانه بالله يكفيني

حاسة اني انفع خاطبة.....ايه رايكم؟؟؟؟؟؟؟

أخيرا ...لمن تمرر هذا التاج ...على الأقل خمسة ؟؟؟


لكل المدونين والمدونات المتزوجين والمتزوجات العازبين والعازبات

ويارب كل الناس تتجوز خلوا الدنيا تخف بقي

اصلها بقت زحمة قوي

واسفة لوطولت عليكم

بس اعمل ايه لما بتفتح في الكلام

صعب حد يوقفني

تحيااااااااااااااااااتي

ولو عجبكم كلامي

يبقي للحديث بقية

وكل الي عاوزه ياخده







مصر