الهي ماعدت أبغي شيئا في هذه الحياة سوي عفوك ورضاك

الخميس، 30 يونيو 2011

كفاية يا اعلام بقى ولم نفسك الناس مابقتش ناقصة.

نفسى افهم الاعلام ليه بيعمل فينا كده؟ ليه بيهول الامور بشكل مفزع ومرعب؟...حاسة ان سيناريو أحمد شفيق بيتكرر مرة تانية مع د . عصام شرف ...شفيق لالا أصله من النظام وماينفعش ومايصلحشى ودخلت علينا وقلنا ماشى وطلعت مظاهرات تطالب برحيله ورحل فى صمت ...ودلوقتى نفسهم هما هما بيزنوا على خراب عش شرف ..حكومة الكى جى ون أصل معظم وزرائها من النظام السابق ...ياجماعة شبح النظام السابق بقى بعبع بيرجعنا لورا مش بيطلعنا لقدام خلونا ندى للناس فرصة و بعدين نحاسب ولا احنا استحلينا المظاهرات ؟ بقينا بندور على اى حاجة عشان ننزل ونعلى صوتنا ونتظاهر ؟ الاولى بقى اننا نمسك كرباج فى ايدينا ونمشى ورا الناس نفر نفر اى واحد له علاقة من قريب او من بعيد بالنظام السابق نكربجه ونربطه ونقول انت خلاص برة الليلة مالكش فيها حاجة بلاش ندارى ونخبى ناس كتير مالهاش اول من اخر اللى كان بيحركها المصلحة وبس لا حبا فى النظام ولا عشق فى سواد عيونه . فى اى...انا حاسة ان هيطلع جروب يسمى نفسه كل يوم مظاهرة شاركوا معنا...لا والجهاز الامنى ياسيدى عارفين بلاويه السابقة وعاقبناه نفسيا ومعنويا بما فيه الكفاية ...نريحكم ازاى نشنقه؟ نجمعهم ظابط ظابط وعسكرى عسكرى ونحطهم فى ميدان عام نطلق فيهم بالرصاص ولا ندبحهم بسكاكين؟...الناس هتشتغل ازاى وشبح المظاهرات المنندة بيهم وبسلوكهم فى كل موقف دبحاهم ...هتقولى ودم الشهداء ياسيدى دم الشهداء على عينى وراسى دى ثورة وانقلاب مفاجىء مكنش مترتب له فى بلد مش قليلة زى مصر عاوزينها تتغير بدون نقطة دم واحدة؟...الشهداء حقهم هيتاخد والقضايا شغالة وان مكنش قواتنا المسلحة حاطة دم شهداء مصر فى قمة اولوياتها مكنش مبارك وولاده فى الوضع الحالى اللى ما اظنش ان فى رئيس فى العالم القديم ولا الحديث اتفضح ولا هيتفضح زيه وده جزاءا وفاقا دى اخرة اللى يضيع امانة لستأمن عليها... من الاخر بقى ناس لاقت البلد بقت مفتوحة ولا فيها ظابط ولا رابط وجهاز امنى الشعب رعشه وخوفه ومابقاش ليه قيمة ولا هيبة وطول ما احنا بنفكر بالشكل ده واحنا اول ناس بنهاجمه عمره ماهتكون له قومة ...اتفرج ياسيدى الجروبات بدات تلعلع ...وحركة 6 ابريل منظمة بكرة مظاهرة عند مديرية الامن تندد باحداث التحرير...هى مصر كلها كانت فى التحرير؟؟؟وحكمت ان الشرطة جانية ..ناس بتتلقق بالطوب ردت بقنابل غازية ..اى اللى حصل ...ماتدفعش عن نفسها كمان ؟..تقف لهم طابور وتصدر لهم وشوشهم وتقولهم لقوا ياحلوين لقوا ياحلوين؟ ياجدعان كرامة الجهاز الامنى فى الباى باى ...وده معناه ببساطة اننا بنقول للمجرمين والبلطجية وقتالين القتلة مستخبين ليه ياحبايبى ؟ اطلعوا وهيصوا وشوفوا مزاجكم؟ اللى عاوز يقتل يقتل واللى عاوز يسرق وماله واللى جواة شرارة غضب من اخوه يروح يفجره واطمنوا خالص الشرطة بح بح لان الشعب زعلان منها ومش بيحبها اصلها وحشة خالص وضربت الناس فى التحرير ..وبمناسبة التحرير بقى هو فى اى؟ مش الميدان حررنا وانتهت مهمته العظيمة؟...لازمته اى بقى كل يوم حبة يروحوا هناك والاعلام يزئطط ويطلق عليهم ( الثوار) ثوار اى؟ ما خلاص الثورة انتهت والبلد بتتغير ويصوتوا ويصرخوا ويعملوا اى مصيبة عشان نسيب اللى ورانا واللى قدامنا ونفضل نصقف لهم على اى مش عارفة ..بس سيبك انت الوزير طلع محترم لما سحب قواته من الميدان..وتسمعى على قنا الجزيرة بقى يقولك اى وبمزاج عالى ..الثوار بدأوا يسيطروا ع الميدان ويغلقوا المنافذ المؤدية اليه ومفيش عربيات لا بتدخل ولا بتخرج ...هو فى اى ياجدعان مين اللى اداهم السلطة بكده؟ مين اللى اداهم الحق يتصرفوا كانهم اصحاب البلد ..هما مين دول اصلا؟...الوضع بقى مستفز والبلد دى مش هتقوم لها قومة الا لما يحكمها جهاز امنى من حديد على حق ...اى واحد فاكر نفسه فوق القانون ياخد على دماغه اى واحد فاكر نفسه ان هو المصرى والبطل والثائر يفتكر كويس قوى ان اللى وقف جنبه فى ثورته وغضبه هى قواته المسلحة اللى حمته ورفضت ترمى عليه طلقة واحدة دبابتنا نزلت وحامتنا محصلناش زى مابيحصل فى سوريا واليمن وليبيا يبقى ااقل واجب ناحية الجيش العظيم ده اننا نساعده فى اداء مهمته المقدسة اللى اختارها بارادته وكان ممكن يكون موقفه وبال علينا نقف جنبه ونسنده ونرجع لقواتنا المسلحة وجهازنا الامنى هيبته ومكانته عشانا احنا بدل ماكل يوم الجرايم اللى بتوصل لودانا اكتر من اى اصوات تانية بنسمعها وبدل مانعمل مظاهرات تندد خلونا نعمل مظاهرات تشيد وترجع الهيبة وتصون الكرامة ..وبصراحة كفاية يا اعلام بقى ولم نفسك الناس مابقتش ناقصة.

مصر