الهي ماعدت أبغي شيئا في هذه الحياة سوي عفوك ورضاك

الجمعة، 25 يناير 2008

هتوحشوني بجد

ه
انا مسافرة دلوقتي


اسبوعين القاهرة


هبعد عن التدوين


وهبعد عنكم


عاوزة ااقولكم انكم بجد هتوحشوني


وهفتقدكم جدااا


بحس وانا بينكم انكم اسرتي الجميلة


اسرة حقيقية فيها أب وأم وجد واخوة واخوات


قلوبهم علي بعض


واحساسهم ببعض عالي وراقي


من غير مصالح ولا اغراض


ياما حزنت ولاقيتكم كلكم جنبي
بتواسوني وبتخففوا عني


رغم ان عمري لاشفتكم ولا شفتوني


وياما فرحت لاقيت قلوبكم فرحانة عشاني


وابتسامة عيونكم حسيت بيها رغم الحواجز


حقيقي هتوحشوني كلكم


عاوزة منكم طلب واحد


تدعولي


كتيررررررررر


الي منكم هيروح خطوبة الشرقاوي


ياريت يوصله مباركتي ليه
وتمنياتي ليه بالسعادة


والي هيزور منكم جدو جمال طه
ياريت يوصل له سلامي ليه


ودعواتي الخالصة ليه بالشفاء


ودعواتي ليكم جميعا
بدوام الصحة والسعادة

وابقوا افتكروني بالخير


و


راجعالكم


ان شاء الله



الثلاثاء، 22 يناير 2008

مهما عملنا ليكي....قليييييييل ياغزة


معبر ايه يامصر الي خايفة تفتحيه

واتفاقات ايه ومعاهدات ايه الي مخلياكي تفكري قبل ماتقرري
وشكلك كدة عمرك مها تقرري
افتحي المعبر ودخلينا واقفلي ورانا

ارجوكوووووكي

الموقف مابقاش يحتمل مجرد التفكير

يا اه
يا اااااااااااااه

_____________________________________________________

الحمد لله قدرت النهاردة أشارك في وقفة احتجاجية أمام نقابة الاطباء بدمياط وكانت واقفة جامدة بجد حضور مميز جدااا من كافة الاحزاب والاتجاهات لكن طبعا الغالب اخوان من غير كلام وعجبتني اوي كلمات كل الناس الي اتكلموا والهتافات الصاخبة الي قعدنا نرددها والحمد لله الامن كان جميل وهادي جدااا وتواجده مش كبير بالعكس حسيت انهم نفسهم يهتفوا معانا لولا خوفهم لا الهيبة تقع قدامنا(مع انها وقعت من ايام عماد الكبير) للاسف مكانش معايا كاميرا للتصوير هعمل حسابي واحوش وابقي اشتري

_____________________________________________________


الصراحة رجعت من المظاهرة سخنة وحسيت اني لازم اعمل حاجة الفكرة جت في دماغي في ثواني جبت كيس وورقة بيضا كتبت عليها تبرعوا من اجل غزة ولو بجنيه امضاء أطفال عمارة الشرق ونديت علي البت مادونا جارتنا طفلة صغيرة في رابعة ابتدائي واعطيتها الكيس بعد مادبست فيه الورقة وقلتلها ماتسبيش شقة واحدة في البرج الا لما تخبطي عليها وقد كان وجمعنا من عمارتنا مبلغ لا بأس بيه وبعدين قلت مش كفاية قلتلها يالا شدي رحالك علي البرجين التانيين الي جنبنا وطلعت لواد جارنا مطقطق كدة اسمه كريم في اولي اعدادي لكن رااااااااجل وقلتله مادونا في ايدك اهي ويالا ورينا همتك في لم التبرعات يا كيمو وهما دلوقتي نزلوا يلموا ادعولهم ربنا يوفقهم

______________________________________________________

والحمد لله استغنيت عن رصيد موبايلي وبدات ابعت رسايل smsلاقاريبي واصدقائي الي اعرف عنهم انهم عايشين في الطرااااااوة قلت افكرهم بالقضية جايز يسخنوااااااااا

____________________________________________________


امبارح عملنا كونفرانس بناتي وكان في بنات كتير واتفقنا اننا نصحي قبل الفجر بربع ساعة وندعي لاخوانا واهلنا في غزة بالنصر والثبات واخدنا موبيلات بعض عشان نصحي بعض رنوا عليا بس انا الصراحة صحيت الفجر ودعيت بعد الفجر بربع ساعة ........ربنا يتقبل

____________________________________________________


بفكركم بالمقاطعة ودورها الفعال شيبسي لالالالالالالالالالالالالالالا ارجوكم تابعو المنتجات الي لازم نقاطعها علي الموقع ده



__________________________________________________


وبختم بالاية الكريمة

ان تنصروا الله ينصركم ويثبت اقدامكم

كل واحد فينا يرجع لنفسه ويسالها سؤال واحد بس

ياتري يانفسي بتعملي ايييييييييه

خلانا نقرب من الذل ونبعد عن الفخر

نقرب من الهزيمة ونبعد عن النصر؟؟؟؟؟؟؟؟؟

اسالوها ماتنسوووووووووووووش

ولنا لقاء اخر ان شاء الله
______________________________
تحديث
الحمد لله جمعنا مبلغ محترم من برجنا والبرجين الي جنبنا انا والعيال مشينا نزلت معاهم ورحنا جبنا من ام ناني البقالة وعم طلعت بتاع الجرايد وحكيم بتاع البلاستك وبتاع الفراخ مش فاكرة اسمه ومن سوبر ماركت سنجام ورغم ان الدنيا كانت برد جداااا والمطرة شغالة الله ينور الا اني شعرت ولازلت اشعر بسعادة غامرة في ناس غلست معانا بس قلت للعيال ولايهمكم طنشوا احنا بنعمل خيرررر اوعوا تخافوا وبدعي من قلبي وبقول اللهم تقبل
وياااااااارب يووووووووووووووصل
قوووولوا اميييييين
نكمل بعدين بقي

الاثنين، 21 يناير 2008

أرجوووووووكم شوروا عليا .....أعمل ايه؟؟؟؟؟؟؟؟


اتخنقت بجد


ومش عارفة اعمل ايه


بعد مادفعت الالف جنيه

وجبت الورقة المختومة بختم النسر

وبعد كدة
اخدتها وانا فرحانة

لا هطير من الفرحة

ورحت بيها علي الكلية

دكتورتي قالتلي جميلة

جهزت ورقي عشان يدخل لرئيس قسم الكيمياء

رحت تاني يوم اشوف لما خرج الورق من عنده

حصل ايه


لاقيت ورقة صغيرة فوق ورقي بخطه

بيقولي فيها

أسف

الجهة الي دفعتي فيها الف جنيه

غير بحثية


ومش هنتعامل معاها
مع العلم اني سائلة وكيل الكلية عن شرعية الجهة
قبل ما اروح واجيب الورقة


والدكتور المشرف بتاعك مش نافع

محستش بنفسي غير وانا بعيط واصرخ في سكرتيرته

حرام
4 شهور دايخة

وفي الاخر

تموتوا فرحتي

ماجستير ده

ولا عقاب علي جريمة


كل الي بيحصلي ده

نتيجة نفوس سودا

بتكره بعضها

رئيس القسم بيكره الدكتورة المشرفة
والدكتور المشرف

وعمال يوقع وينفخ في السم بينهم

وعشان يعجزهم
مالاقاش قدامه غيري

الدكتور المشرف بيقولي امبارح

انا فقدت الثقة في كل الناس بسبب
رئيس القسم

رديت عليه وقلتله
لا يادكتور

الدنيا لسة بخير

النهاردة بقوله

بسحب كلمتي يادكتور

وبتساءل معاك

هو فين الخير؟؟؟؟؟؟؟؟


اما الدكتورة المشرفة

كلمتني وقلبها بيتقطع

قالتلي مش هينفع يابطة

لازم تغيري موضوعك

خاااااااااالص

من مكان تاني

ومع دكاترة تانية

ومأساة تانية

انا محتارة

اعمل ايه

استمر

واستعوض ربنا في الفلوس الي راحت

ولا انسحب

واقتل حلم الماجستير والدكتوراة جوايا

ارجوووووكم شوروا عليا

اعمل ايه

انسحب بهدووووووووء وللابد

ولا استمد من ضعفي قوة واستمررررررر

بس انا حقيقي


تعبت
بجد
تعبت




الجمعة، 18 يناير 2008

لحن وفاء ....لبلدي دمياط الجميلة

اسمحولي أعرض لكم بعض صور
لمحافظتي الجميلة جدااا
دميااااااااااااااط
Damitta
وطبعا الي يشرفكم كلكم تزوروها
وهي كمان تتشرف بزيارتكم
بس ياريت بعد ماتمشوا
ماتقولوش علي أهلها بخلا
مفهوووووووووووووم
كورنيش دمياط الرائع
بالنهار
قدام بيتنا مباشرة
حياة
و
أمل
و
نور
ليته يدووووووووووم



الصورة ديه أوضح للنيل والمواصلات رايقة زي ما انتم شايفين
أجمل حاجة في دمياط
هدوئها
ربنا يديمه عليها
I Love Damitta verrrrrrrrrrrrry
much


لحظة الغروب علي اللسان في راس البر
اللسان ده معجزة ربانية
ممر تمشي فيه علي ايدك اليمين النيل وعلي ايدك الشمال البحر
وقدامك اللسان
وصدق الله العظيم حينما قال
مرج البحرين يلتقيان بينهما برزخ لا يبغيان
اللسان هو البرزخ

الكورنيش باليل
شايفين النيل وجماله
سكون
وهدوء
وأحلام
ليتها تتحقق
_________________________________________
ليت قلوب أهل دمياط
في جمال كورنيشها الباهر
ليتهاااااااااااااااااا
____________________________________________

بشكر المدونة الدمياطية الجميلة يارا لانها هي الي أهدتني الصور

يارا ...مدونة اتكلم

http://etkhalem.blogspot.com/

الي اتشرفت جدااا بمعرفتها واتشرفت أكتر بصداقتها

و

زوروني كل سنة مرة

و

بلاش تنسوني بالمرة

مش أنا الي بقول

دي دمياط

مجرد

لحن وفاء لبلدي دمياط الجميلة




الثلاثاء، 15 يناير 2008

نورت مصر ياحاج بوووووش


ياجماعة حد يعدله السماعة مايصحش كدة لايقطع الخط


عم بوووووش خلاص علي الأبواب


جاي أهو ينورنا


بنرحب بيه كلنا وبنقوله


يامراااااااحب


أهلا بالغالي ابن الغالي


البلد بلدك واحنا أغراب فيها


قلنا جايبلنا معاك ايه وانت جاي


وحشتنا هدياك ياراجل يابخيل


تهديد ولا تخويف


ولاجايز قتل وتدمير


لالا


شكلك كدة جايبلنا معاك معونة تخزي بيها عنينا


وتخرس بيها لسانا


وتزود بيها ذلنا


ولايمكن حابب توصينا وتفكرنا بحقوق الجيرة


مع جارتنا وحبيبة قلبنا


الي مغتصبة أرضنا


ومدنسة عرضنا


وملوثة بيوت ربنا


هتنورنا ياعم بووووووووووووووش


اطمن مش هنسألك


علي المشردين


ولاهنفتحلك سيرة المجروحين


ولا القنابل المزعومة


ولا الفتنة الي ولعتها


ولا البلد الي دمرتها


وطبعا منتظرين خطبتك الرنانة في ايران


وقصيدة المدح المحفوظة في ارهابها


وخطرها علي نن عيونك من جوة مش احنا طبعا


واحنا نطول


ماتزعلش انت بس ولا تشيل في نفسك


ولاتاخد علي خطرك


من شعبنا المصري


ده غلبااااااااان


قال ايه مظاهرات واحتجاجات


وندوات ومقاطعات


الحمد لله مفيش اضرابات


وكل ده عشان رافضين زيارتك الميمونة


بالذمة ده كلام


هو انت يعني عملت ايه


ده انت نسمة


وحمامة سلام في العالم كله


ماتزعلش من الشعب بقي


كفاية عليك الحكومة


شرم الشيخ ودنياااااااااااااا


وعيش بقي


بايدك الحمرا


وقلبك الاحمر


وتاريخك الا سود


يووووووه


أآأقصد الابيض منه ماشفت


غلطة مش مقصودة معلش


سامحني


محدش محرضني والله


لا ايران ولاغيره


غلطت يابيه


وطالبة من جنابك السماح


أنا والحكومة


وبنقولك


وعنينا مدمعة


من الفرحة طبعا


نورت مصر ياحاج بوش


وكارثة سعيدة


برده


ااقصد


رحلة سعيدة


ارجوووووووكم


اوعي حد يفهمني صح

























































السبت، 12 يناير 2008

ختم النسر بقي بتبرع



أكملكم الحدوتة بقي بتاعة المرة الي فاتت كنا وقفنا فين فين اه افتكرت خلصنا من النصب في المعامل
الخاصة ودخلنا بقي علي مين ياحاج علي الحكوووووووومة بداية كدة عاوزة أوضح نقطة مهمة لاحظتها خلال المشوار البايخ ده الا وهي الكراهية الفظيعة البشعة بين الدكاترة وبعضها ماشفتش الصراحة كره بالشكل ده ولا شوفت حد بيتمني يدمر زميله زي ماشفت هنا رئيس القسم عندنا الله يباركله ماخلي حد في الكلية الا وكرهه في عبد الفتاح


ماعليناااااااااااااا


قالولنا حكومة وختم النسر دكتوري المشرف قالي بسيطة سهلة معارفي كتير في ثواني وبحركة ايد هجيبهالك انا اعرف الدكتور الفولاني حبيبي مش هيتأخر عني وهيجيبلي الختم في ثواني وشغال في مؤسسة حكومية كبيرة قلت له وماله يادكتور ما احب ماعندنا روحناله وكانت مقابلة الهنا خرجنا من عنده واحنا واثقين مليون في الماية انه لاوالف لا وقد كان جايز عشان ماكشفناش ورقنا ورمينا بياضنا لكن الي قاله والي اطرب أذانا بيه ان عندنا اوامر بمنع التعامل مع كلية علوم دمياط ليه الله أعلم جايز موبوءة ولا فيها حشرات ضارة العلم عند الله


قلتله ولايهمك يادكتور أنا هتصرف من عندي أبويا راجل واصل وهيحلهالي قلت للحاج والدي وطبعا هو في الطراوة قلت وبعدهالك يابطة أخدت بعضي ونزلت علي مركز الجهاز الهضمي والقلب عندنا ويامحاسن الصدف لاقيت مدير معامل التحاليل جارنا وصديق لوالدي قلت اهي بشرة خير هتتحل واسطة اهي الراجل الصراحة يازين مرحب وفي نهاية المقابلة قالي ماعندناش مانع يابنتي لكن هاتيلنا ورقة من الكلية انها معندهاش مانع من التعامل معانا ككجهة بحثية



جريت علي الكلية ورحت الدراسات هاتولي ورقة ياناااااس وكان ردهم العسل مابنخرجش أوراق لحد ولو عاجبك طلعت للوكيل نفس القصة طب وبعدين جريت علي المركز تاني الدكتور قالي مفيش مانع لكن لازم تدفعي تبرع الف جنيه للمستشفي قلت وماله جهزت 500 جنيه ورحت له قالي يالا نطلع للمدير وقفته قبل مانطلع يادكتورنا مش معايا غير 500 قالي ووشه في الارض احرجني الله يسامحه اسف يابنتي المدير مش هيوافق اصلك ماتعرفيش انه عارف اسعار دكتور عبد الفتاح (9 الاف فاكرين) قلتله طب ثواني يادكتور اجيب الالف واجي


أكملكم بعدين بقي


أصل الي حصل بعد كدة مايتحكااااااااش


حكوووووووووووووومة


الثلاثاء، 8 يناير 2008

أين أنت ياختم النسر؟؟؟؟؟؟؟؟؟؟؟؟؟


مش عارفة احكي الموضوع منين لكن هحكيه لان دمي محروق حرقة منيلة ولوطولت أولع في نفسي وفي الحكومة هولع لولا الحرمانية مكنتش اتاخرت
الموضوع بدايته من بتاع اربع سنين خلصت دراستي سنة 2005 وبتقدير جيد جداا قلت بركة أكمل دراسات عليا بقي وخصوصا اني خريجة قسم مميز في كلية العلوم مش عارفة تعرفوه ولا لا علي العموم اسمه الكيمياء الحيوية بفرحة شديدة قعدت اجري يمين وشمال واطلع شهادات ايشي مؤقتة وايشي بيان دراجات وقدمت تمهيدي ماجستير وكانت سنة مايعلم بيها الا ربنا المهم عديت ويوم النتيجة لاقيت الدكتورة كاميليا دكتورة عندنا في القسم بتتصل بيا وبتقولي مبروك يابطة نجحتي ماصدقتش نفسي وقلت الحمد لله ماعلينا المهم المفروض بعد النجاح ده اسجل الماجستير بقي بمعني تاني سنة التمهيدي كانت الجزء النظري في الدراسة والمفروض اسجل الجزء العملي عشان احصل علي الدرجة واتفتحت علينا ابواب جهنم هتقولولي ااقولكم ياحبايبي ليه من ايام ماكنا في التمهيدي واحنا بنسمع عن دكتور كبيرررررر في جامعة المنصورة واخد الدكتوراة من امريكا ورجع مصر جه عندنا دمياط الجديدة وبني مركز ابحاث فخم جداا وبدأ يتبني رسايل الماجستير والدكتراة يعني يستلملك الطالب البلاطة من دول من الصفر ويخرجه من عنده وفي ايده رسالة الدكتوراة والحلو يدفع بقي تحديدا كدة رسالة الماجستير 9 الاف جنيه ورسالة الدكتوراة 20 الف جنيه يابلاش تسعيرة بقي والي عاجبه مع العلم ان الاسعار بتزيد كل سنة الفين جنيه كله فدا عيون الكيماويات والطلبة تجيله من كل حتة وفي 9 شهور رسالة الماجستير تخلص وفي خلال سنة تكون حامل الدرجة النبي شوفتم حلاوة احلي من كدة مانرحلوش ليه بقي حتي لو هنبيع طقم الحلل الي حيلتنا المهم انا كنت في الاول متحمسة له جدااا اخدت الدكتورة كاميليا معايا ورحنا له المركز فرجني عليه وحولي البحر طحينة وقالي هاتي فلوسك 9 الاف وشرفينا الكلام ده كان في شهر 11 الي قبل الي فات وحاولي تيجي قبل شهر واحد لان في واحد الكيماويات هتبقي ب11 الف المهم حصلت لنا ظروف كدة وقعدت سنة مكملتش ولا رحت ولا سئلت ومن حوالي اربع شهور قلت بقي لازم اكمل اومال كنت باخد لتمهيدي ليه رحت الكلية ولاقيت الحرب قامت من اول راس لاخر راس في الكلية علي الدكتور عبد الفتاح عطا الله وأعلنوها علني لا لعبد الفتاح لا وطبعا فرغوا طاقتهم كلها وغضبهم كله علي راس الطلبة بتقولي ازاي ااقولك يابيه المفروض اني ااقدم ورقي بموضوع جديد لرسالة علمية لمجلس القسم في الكلية عشان يتوافق عليه وابقي كدة سجلت المجلس بقي حطلنا شرط تعجيزي ماننفعش نسجل من غير ماننفذه الا وهو ورقة مختومة بختم النسر من جهة بحثية حكومية حكومية حكومية بانها ليس لديها أي مانع من ان الطالبة المذكورة تستخدم الاجهزة الموجودة بمعاملها واتنقلنا من ايد النصب باسم العلم من المعامل الخاصة للحكوووووووووووومة وما ادراااااكم ايه الي حصلنا في الحكومة
البقية تأتي
هكملكم بعدين

يارب ما اكون طولت عليكم

اعذروني اصل انا بغلي

ويظل السؤال

أين أنت يا ختم النسر

الخميس، 3 يناير 2008

مستنية ردك ياداخلية



لغاية امتي هنفضل ساكتين لاسرائيل دي بقي


هو ايه الحكاية مش مكفيها الفلسطنيين كلهم


نازلة علي المصريين كمان


بفتح موقع مصراوي لاقيت الخبر


بالبونط العريض


مصرع مواطن مصرى برصاص اسرائيلي

على الحدود مع مصر 1/3/2008


واللينك اهو كمان



والصراحة بقي حاطة ايدي علي خدي


مستنية رد فعل الداخلية


الي دايما مشرفنا ورافع راسنا


فوق فوق فوق


وطبعا كالمعتاد وزي غيرهم وغيرهم


ولاهيحصل حاجة


واحنا طبعا شعب طيب وبنحب التسامح


ودم اولادنا دايما فدا للهبل وفدا للحدود


وسيظل الي الابد السلام قائم وشامل مع اليهود


بس السؤال لعم اولمرت


مالك ياعمنا


اد كدة بتعشق دمنا


كل كام يوم نفسك تروح علي حد مننا


وبطيارة طايشة وبايد طارشة تضرب وتقول


مكانش قصدنا


وعارف ومتأكد اننا حلوين وجدعان


ونعجبك قوي


بصوت واطي وبعين مكسورة هنهمس


ونقولك ليه ياعمو ليه


بالراحة علينا شوية


داحنا غلاااابة


وانت بعين واسعة وبصوت جهوري تصرخ


وتقولنا بحمي ارضنا بحمي ارضنا


ياعم اولمرت دا عشان اتنين راحوا من عندكم


اعلنتوها حرب ودمرتم بلد ومهمكوش


لكن عذراك


هقول ايه


ماهو الحق مش عليك


الحق علي الي ركعوا وسلموا


واتنازلوا


وصدقوا


غنوة الحمامة


وغصن الزتون


مع ملاعين


مابيشبعوش


غير بدم


ومابيتكيفوش


الا لو كان الدم مصري


وافرحي يا ام الشهيد


ابنك استشهد في ارض المعركة


معركة ايه وفين


اساليهم


في الداخلية


هيجاوبوكي


ويعطوا لابنك وسام الشجاعة


من الدرجة الاولي


وانا اهو مستنية


مستنية ردك ياداخلية








مصر