الهي ماعدت أبغي شيئا في هذه الحياة سوي عفوك ورضاك

الاثنين، 30 يونيو، 2008

سلمولي علي وزير الكوسة


شكلك فاهم يانصة

خلصت امتحانات الثانوية العامة وخلصنا معاها دخلنا في دوامة مش عارفين لها اول من أخر ومابقاش في جرنان ولا ورقة لحمة حتي هتلاقيها من غير ماتلاقي أكبر عناوين فيها عن مأسي الثانوية العامة والفساد اللي كشفته من كل الجوانب أأقول ايه ولا ايه

نقول عن تسريب الامتحانات وبيعها بالموتوسيكلات بنموذج الاجابة ب300 ج ولا نتكلم عن أولاد الناس المهمين اللي افتكروا نفسهم طايلين وماسكين في ايديهم البلد باللي فيها ودي حقيقة أغلب المتورطين في التسريب ولاد أعضاء مجالس شعب وشوري وولاد ظباط شرطة ومسئولين حلوين في بلدنا الحلوة ديه ويامراحب بالكوسة


ولا نتكلم بقي عن الغش العلني علي عينك ياتاجر بنت الباشا قاعدة في اللجنة وسي المراقب بيخدم عليها وفي ايديها الموبايل بتكلم المستر تمليه السؤال ويرد عليها بالاجابة وصوري ياكاميرا وافضحي علي الملأ.. المسئول هيتشال... البنت هيتحقق معاها... وغلاوتكم ماحد هيروح في الرجلين غير الكاميرا اللي صورت يافرحة قلبي


ناس هايصة وناس تانية لايصة ناس تعبت وشقيت طول السنة مافارقش عنيها السهر ولا عرفت طعم النوم والراحة عشان تحقق أمالها وأمال أهلها فيها لكن ياعيني علي وزارة التربية والتعليم ويامحلا الوزير اللي دمرهم وقتل جواهم أحلامهم بامتحانات لاعمرهم شافوها ولا في كتاب المدرسة لقيوها ولا في النموذج حتي صادفوها

وعااااااادي خالص واد في الجيزة يشنق نفسه وبنت في بورسعيد ترمي نفسها من الدور السادس المهم ان ولاد المسئولين بالهم مرتاح الامتحان في جيبهم باجابته والموبيلات شغالة في خدمتهم


وانتهت الامتحانات واكتر ما اثر فيا بنت في احد البرامج بتتصل قطعت قلبي وهي بتقول انا تعبت ذاكرت نفسي ادخل كلية بتعبي ومجهودي مش عاوزة ادخل جامعة خاصة هما ليه استكتروها علينا ليييييييه

وأنا بقولها معلش يابنتي عذراكي بس هو سؤال سهل اجابته لان الحكومة دي جت بلدنا عشان خاطر حاجة واحدة بس تعاند فينا اه وربنا الشعب عاوز ايه نعمل عكسه ماشية بمبدأ خالف تعرف

ماعلينا خلينا بقي في اللي جاي واللي وزير الكوسة قصدي التعليم بيفكر فيه سيادته لو ثبت ان النتيجة غش في غش ناوي معاليه يكرم الطلبة اخر كرم هيلغي التنسيق اه يعني خلاص لا ورق رغبات ولا دياوله اومال ناويلنا علي ايه خيرررررررررر ياولاد هو الوزير بينوي غير علي كل خير

هيعملكم امتحان قدرات وامتحان أعمال سنة ونتيجتهم اللي هتوديك الكلية هتقولي يعني ايه مش فاهم يعني حضرتك رقبتك هتبقي في ايد استاذك في الفصل ولا مدرستك اللي كنت مطلع عينها وربنا يستر بقي ويكون درسك الخصوصي كان عنده ولا عندها عشان يضربلك رقم حلو في اعمال السنة

لاء وايه الرشاوي هتبقي علي عينك ياتاجر ادفع تدخل أحسن جامعة طب ب100 الف يورو هندسة ب100 الف دولار وانت نازل بقي وولاد الكبار كسبانين برده هيدفعوا وياخدوا و

سلمولي علي وزير الكوسة


تحياتي




هناك 36 تعليقًا:

حمادة زيدان يقول...

الحمد لله شكلي لحقت اول كومينت

enjy يقول...

وزير الكوسة؟؟؟؟؟
هو الوزير دة بس هو بتاع الكوسة فى بلدنا؟ احنا بلدنا كلها كوسة مصر هى الراعى الرسمى للكوسة اساسا ربنا مع العيال بتوع ثانوية زفت و ان شاء الله ربنا مش هيضيع تعب حد اكيد اللى هيحصل هو اللى فيه الخير

(IBN_ELAZHAR) يقول...

يابختك ياسيدي حلال عليك اول تعليق

حمادة زيدان يقول...

أتكلم بقي

بصي يا ستي .... هحكيلك موقف صغنون من ذكريات مع الثانوية الزفت دي ... أنا يا بطوط من الدفعة اللي اتغير علينا 3 أنظمة يعني سياتي 3 نظام "رفعوا التحسين" ما هو كان في اول السنة في تحسين قولنا ماشي ... رفعولنا مادة ونزلوا مادة قولنا مماشي قعدور يغيروا ويجربوا علينا في السنتين لغاية ما قولت "جاى" على رأى اسمه ايه ده بتاع ليالي الحلمية ...

يعني انا مش مستكتر عليهم اى حاجة والله

عبدالهادى_سارة يقول...

ازيك يا بطه ..
كلامك في منتهى الصحه ..المشكله ان الموضوع ده اصدي موضوع -تسريب الامتحنات ..والغش ,,الخ -
مش مشكلة النهرده وبكره دية مشكله هتفضل ويفضل كل الشعب يدفع تمنها لعدة عقود لان اللي النهرده غشوة وسربو اللي امتحان بكره..هم اباء واساتذه واطباء وضباط
فتتوقعي ايه من انسان في اول حياته خان وطنه وغشه
تتوقعي منه ايه لما يطلع عشان ينمياها ويخليها تتقدم تتوقعي منه اييه (....)تتوقي طبعا كل حاجه
يلا ربنا المعين..ولازم نعمل كلنا عشان مصر

ارق تحياتي
س ا ر ه

نور جديد يقول...

السلام عليكم
على فكرة يا بطوطو احنا ظالمين الراجل ده بجد مش بهزر
يعني انا دلوقتي كنت لسه بكلمه عشان يتوسط لي في اني اكون اول تعليق و برده معرفش و مبقتش اول تعليق
يبقى راجل غلبان و لا لأ هههههههه
لللأسف محتاجة ازعق
حسبنا الله و بنعم الوكييييييييييل
و الله يا بطوط مهما حصل صدقيني احنا شعب ظلم نفسه بنفسه
طبعا انا مش بلغي التعاطف مع الناس اللي انا منهم اصلا
طبعا غلابة و مش عارفين يعملوا ايه
بس صدقيني احنا مش شعب قليل الحيلة
احنا عندنا الف وسيلة ناخد بيها حقنا
بس احنا اللي غاويين فقر
و يا بطوط كله بياخد وقت
الزعيق و اللي احنا فيه ده بياخد وقت
و النهضة بتاخد وقت
خلونا ناخد وقت في اللي هيجيب نتيجة افضل
وبعدين بصراحة بأه انا بضايق من الناس اللي بتدي الثانوية العامة اكتر من حقها
طب ما انا اختي ثانوية عامة و لا في توتر و لا حاجة الحمد لله
او يعني التوتر الطبيعي بالنسبة الطبيعية
انما باه اللي بنشوفه ده مينفعش بصراحة
بطوط .. انتي جايز تقولي اني متحاملة على الشعب
بس و الله يا بطوط انا برده من الشعب و ما يؤذيه يؤذيني و ما ينفعه ينفعني
فخلينا نركز مع نفسنا و نسيب الحكام دول تكفيهم بس
حسبنا الله و نعم الوكيل
و بدره بأه زعلانة
اني مش التعليق الاول
اهئ اهئ اهئ

رامز عباس يقول...

كويس ان الصم اللي زيي

ملهمش تعليم


وكويس اني خدت مؤهل والسلام في بلد مبارك



اسمعي انا حضرت المحاكمه الشعبيه لوزير التعليم السنه اللي فاتت


بنقابه الصحفيين


اللي عملها طايل مدير مركز الحق في التعليم ورئاسها د- حامد عمار



وحضرت كلمتين من اللي هما عارفه مين منعني نفس الناس اللي بتقول محاكمه




بشكرك علي اسلوبك المفهوم بالبوست

Hosam Yahia حسام يحى يقول...

موضوع مميز

الموضوع ده مهم جدا

بس انا شايف ان موضوع توزيع نماذج اجابه ده

مقصود لانه بيتوزع كل سنه بس المره دى الدائره وسعت

(نظريه المؤامره)

:d

زينب أبوزيد يقول...

بنا يستر ويرحمنا بس على فكره بما كسبت ايدى الناس ادعو الله ان يستعملنا ولا يستبدلنا ويعينا على تغير الفساد وجزاكم الله خيرا ياعزيزتى

appy يقول...

انتى شوفتى الراجل الكباره ده امبارح فى البيت بيت الحكومه
يا لهوى هموت من الضحك الناس دى شكلها بقى وحش قوى وعاوزين نعرفهم عمالين تسقط الاقنعه من وشوشهم بسرعه كان ناقص يقول ما ان شاء الله ما عنكم امتحنتوا ولا ذاكرتوا بجد
راجل هايل هايل
معلش يا بنتى

محمد مارو يقول...

بطوط
انا بحترمه جدا على قراره ده

غير معرف يقول...

للأسف هذه الممارسات والافعال دائما ما نجدها في مجتمعنا ،، وهي نوع من انواع الظلم لا ريب في ذلك ،، واظنها سبب رئيسي في تخلف مجتمعنا ،،
اختي الطيبة فاطمة كوني بخير ،،
ولكِ مني كل الود سيدتي .
عبدالخالق " البحر العذب "
http://abdulkaluk.maktoobblog.com

حاجات جوايا يقول...

ازيك يا بطووووووووط
والله يا بنتى احنا حالنا كل مدى من سئ إلى أسوأ بكتيررررررررررر
حسبى الله ونعم الوكيل
حسبى الله ونعم الوكيل
حتى الثانوية العامة مش راحمينها
ما يسيبوهم يعيشوا فى الوهم يومين ويحسوا انهم بيتعبوا وبيلاقوا نتيجة تعبهم بدخولهم الكلية اللى بيحلموا بيها
مهم كده كده هييجوا يقعدوا جنبنا فى الآخر هيروحوا فين يعنى
حتى الحلم مستكترينه عليهم
ربنا على الظالم

العراف يقول...

لو سمحت ممكن تسلميلى عليه وياريت نص كيلو بطاطس ونصين طماطم وبسله ههههههه

حلو الموضوع ربنا معاكى الا الجديد دائما

بنت الاسلام يقول...

حمادة زيدان

يستاهل الحمد

______________

انجي

فعلا اجمل وصف لبلدنا اليومين دول

بلد الكوووووووسة والتكوويس محتاجة مقوااااار

تحياتي

بنت الاسلام يقول...

(IBN_ELAZHAR)

نورتني بس فين تعليقك

__________________

حمادة زيدان

اه سليمان غانم

خليني ااقولها معاك

جاااااااااااااااااااااااي

_________________________

سارة

اتوقع كل خيرررررررررررررر

طبعا

ده علي اساس ان الدنيا لازالت ممتلئة بالخيرررررر

تحياتي

نونو يقول...

ههههههههههههه
انهو وزير بالضبط
اصلهم بقوا كلهم وحياتك
الكوسة راخرة غليت
ارحمنا يارب
تحياتي

فارس الأزهر .. معاذ فتحى يقول...

السلام عليكم

أولا ً :

أحب أطمئن كل الطلاب المظلومين وأقول لهم فتوى شرعيه قالها العلماء من زمان لكن غالبا ماحدش بيسمع لها لأنها مش جاى على مزاجنا

الفتوى بتقول

لو الطلب دخل اللجنه وغش الإمتحان ونجح بالغش
وجاب مجموع ودخل بالمجموع ده كليه واتخرج من الكليه واشتغل بيها
.. فلوسه حراااااااااااااااام ..
لانه دخل كليه بالغش وجاب مجموع بالغش وبسبب الغش ده اتعين فى الوظيفه دى
تبئى فلوسه حرام
يعنى ولاد الكبار وولاد البشوات والبكوات والبهوات وولاد الوزراء والعمداء وكل واحد شايف انه مسنود على كرسى
نقولهم
معادنا فى الآخره وحقنا محفوظ عند ربنا وهناخده يوم ان توضع الموازين القسط ليوم القيامه فلا تظلم نفس

ثانيا :

الكوسه

الكوسه نوعين
نوع بناكله : ودى بتاعنا وبتاع عامة الشعب
ونوع بياكلنا : ودى بتاع اصحاب الكراسى اللى بياكلوا كل حاجه

وفى النهايه
إنما يأكلون فى بطونهم نارا وسيصلون سعيرا

ثالثا :

أى واحد يحس إنه مظلوم وتعبان فى الدنيا
لازم علطول يفتكر قول النبى صلى الله عليه وسلم
( طوبى للغرباء )
جميل جدا لما أكون غريب فى الدنيا وتعبان لكن فى الآخره ربنا راضى عنى

ودى مش دعوه لإنى أسكت عن حقى أو أنام وأقول انا مظلوم وحقى فى الآخره

لاااااااااااااا دى دعوه للعمل ولطب الحق وعندم السكوت لان طلبى لحقى هو طريقى للجنه

والساكت عن الحق شيطان أخرس
والساكت عن الحق كالناطق بالباطل

أعتذر على الإطاله

جزاكم الله خيرا أختنا على الموضوع
وتقبلوا مرورى

mohammed alsha3r يقول...

هكذا حال التعليم فى بلدنا

وعلى فكرة مش بس التعليم

حال كل الوزارات

اوعى تفكر يقول...

يا اخى ده مش حال التعليم بس
دى الصحه والداخليه والحربيه
يعنى احنا عايشين فى بلد كلها فساد فى فساد

ابراهيم العشرى يقول...

شكرا على زيارة حضرتك لمدونتى المتواضعة

كلام جرىء وجميل وخصوصا ان الوزير السابق عملها معاى في الثانويه العامه

وضيع علي كلية الصيدليه بنص فى الميه

وهذة الابيات أهداء منى لكم

رأيت بنت اسلاما ابدعت كلماتها
فاصررت علي ان استمر واقرأ لها

وكأنها أرض تسقى نبتها
فكيف لشاعر مثلي يحاول فهمها

بنت الاسلام يقول...

نور جديد

معلش مفيش عندنا واسطة هنا بقي في المدونة اللي يجي الاول يحجز سوري مفيش كوسة مابنحبهاش

بلاش تظلمينا بقي

اما من حيث اننا عندنا طرق كتيرة ناخد بيها حقوقنا جميل بس كل لما نحاول ناخدها بيمنعونا بيجففوا منابع الحق جوانا نقوم نسكت نقول جايز مش حقنا بعد شوية نلاقي الظلم يزيد وابسط حقوقنا بتضيع عشان عيون الكبار والكوسة تبدا لعبها

موضوع الثانوية العامة رغم اعتراضي الشخصي علي المبالغة فيه لكن لما بنظر للاهالي واشوف المصاريف اللي بيصرفوها علي ولادهم بيحاولوا يأمنوا مستقبلهم في بلد المستقبل فيها اصبح نقطة غموض وبعد كل ده يتصدموا بامتحانات مش من المنهج وتسريب وغش يعني حتي السيئة مابقتش بتعم لاء دي بقت بتخص علي الغلابة اللي مالهمش ضهر

شيء مؤلم وموجع و

ربنا يتولانا برحمته

تحياتي

بنت الاسلام يقول...

رامز عباس

نورتني يارامز

وازاي بقي مالكش تعليم

احنا بنتعلم منك

وبنتحسر كلنا علي حال التعليم عندنا

تحياتي

بنت الاسلام يقول...

حسام يحيي

وهو لسة ايه في الدنيا دي من غير مؤامرة

ربنا يستر ومانطلع احنا كمان بنتأمر بس علي مين

علي نفسنا الظاهر

نورتني

بنت الاسلام يقول...

زينب ابو زيد

اللهم امين

ربنا فعلا يغير بينا وبكلمتنا الفساد اللي صانعناه بايدينا في دنيا خلقنا فيها للعمار لا للخراب

يااااااااااااااارب

بنت الاسلام يقول...

appy

حكومتنا كلها هااااااايلة

ودائما تنجح في

تكتيم مطالب الشعب

تحياتي

بنت الاسلام يقول...

محمد مارو

ده رايك بقي

وانا مش معاك فيه

تحياتي

بنت الاسلام يقول...

عبد الخالق

نورتني تحياتي ليك ولبلدك الغالي العراق


بندفع تمن سكوتنا علي فساد حكامنا

بس التمن بقي غالي قووووووووي

تحياتي

بنت الاسلام يقول...

حاجات جوايا

ايوة ياسالي

حتي الحلم بيقتلوه جوة زهرات صغيرة مش قادرين يتحملوا ضياعه

طيب احنا اتصدمنا بعد ماعودنا اتشد شوية

لكن هما

حرام بجد

بس في الاخر

كله محصل بعضه

تحياتي

بنت الاسلام يقول...

العراف

الكوسة كفاية

نورتني

بنت الاسلام يقول...

نونو

لاء ده وزير التكويس التعليمي

الكوسة انواع برده

تحياتي

بنت الاسلام يقول...

معاذ فتحي

مابقاش في كوسة بناكلها

اصلهم هرمونوها

انما اللي بتاكلنا كل يوم بتزيد

ربنا يبارك

نورتني

بنت الاسلام يقول...

محمد الشاعر

معاك طبعا منظومة متكاملة من الكوسة

تحياتي

بنت الاسلام يقول...

اوعي تفكر

يا اختك بقي لاني بنوتة وربنا

وانا اتفق معاك في رايك

تحياتي

بنت الاسلام يقول...

ابراهيم العشري

مش عارفة ااقولك ايه بس يارب تكون ابيات شعرك اتوجدت للشخص المناسب وصاحب المواضيع التي يستقها

متشكرة جداااا


تحياتي

غير معرف يقول...

[url=http://cialisonlinehere.com/#vajeg]generic cialis[/url] - buy generic cialis , http://cialisonlinehere.com/#eabdx cheap cialis online

مصر