الهي ماعدت أبغي شيئا في هذه الحياة سوي عفوك ورضاك

السبت، 12 يناير 2008

ختم النسر بقي بتبرع



أكملكم الحدوتة بقي بتاعة المرة الي فاتت كنا وقفنا فين فين اه افتكرت خلصنا من النصب في المعامل
الخاصة ودخلنا بقي علي مين ياحاج علي الحكوووووووومة بداية كدة عاوزة أوضح نقطة مهمة لاحظتها خلال المشوار البايخ ده الا وهي الكراهية الفظيعة البشعة بين الدكاترة وبعضها ماشفتش الصراحة كره بالشكل ده ولا شوفت حد بيتمني يدمر زميله زي ماشفت هنا رئيس القسم عندنا الله يباركله ماخلي حد في الكلية الا وكرهه في عبد الفتاح


ماعليناااااااااااااا


قالولنا حكومة وختم النسر دكتوري المشرف قالي بسيطة سهلة معارفي كتير في ثواني وبحركة ايد هجيبهالك انا اعرف الدكتور الفولاني حبيبي مش هيتأخر عني وهيجيبلي الختم في ثواني وشغال في مؤسسة حكومية كبيرة قلت له وماله يادكتور ما احب ماعندنا روحناله وكانت مقابلة الهنا خرجنا من عنده واحنا واثقين مليون في الماية انه لاوالف لا وقد كان جايز عشان ماكشفناش ورقنا ورمينا بياضنا لكن الي قاله والي اطرب أذانا بيه ان عندنا اوامر بمنع التعامل مع كلية علوم دمياط ليه الله أعلم جايز موبوءة ولا فيها حشرات ضارة العلم عند الله


قلتله ولايهمك يادكتور أنا هتصرف من عندي أبويا راجل واصل وهيحلهالي قلت للحاج والدي وطبعا هو في الطراوة قلت وبعدهالك يابطة أخدت بعضي ونزلت علي مركز الجهاز الهضمي والقلب عندنا ويامحاسن الصدف لاقيت مدير معامل التحاليل جارنا وصديق لوالدي قلت اهي بشرة خير هتتحل واسطة اهي الراجل الصراحة يازين مرحب وفي نهاية المقابلة قالي ماعندناش مانع يابنتي لكن هاتيلنا ورقة من الكلية انها معندهاش مانع من التعامل معانا ككجهة بحثية



جريت علي الكلية ورحت الدراسات هاتولي ورقة ياناااااس وكان ردهم العسل مابنخرجش أوراق لحد ولو عاجبك طلعت للوكيل نفس القصة طب وبعدين جريت علي المركز تاني الدكتور قالي مفيش مانع لكن لازم تدفعي تبرع الف جنيه للمستشفي قلت وماله جهزت 500 جنيه ورحت له قالي يالا نطلع للمدير وقفته قبل مانطلع يادكتورنا مش معايا غير 500 قالي ووشه في الارض احرجني الله يسامحه اسف يابنتي المدير مش هيوافق اصلك ماتعرفيش انه عارف اسعار دكتور عبد الفتاح (9 الاف فاكرين) قلتله طب ثواني يادكتور اجيب الالف واجي


أكملكم بعدين بقي


أصل الي حصل بعد كدة مايتحكااااااااش


حكوووووووووووووومة


هناك 9 تعليقات:

غير معرف يقول...

ايه اللى بيحصل ده يا بطه

والله انا مستغرب اوى

بس هستغرب ليه

يبقى أنت أكيد فى مصر

الناس كلها شكلها بقت حاجه لا تُحتمل

علم إيه وبطيخ ايه

كله عند المصريين صابووووووووون

تسلمى يا بطه

ويارب ينصرك على الناس دى

أخوكِ دائماً..نيجــر

محمد مارو يقول...

ايه ده انا اول تعبليق ؟ مش معقول

محمد مارو يقول...

مش طلعت اول تعليق للاسف

محمد مارو يقول...

اعلق بئه
اللى بتحكيه ده العادى فى مصر يا ماما
ده العادى بتاعنا
لكن اللى مش عادى
جمله انتى قلتيها و انامستغربها
حضرتك بتقولى انك قولتى له انك مش معاكى غير 500 جنيه و ال ايه الراجل كانمحروج ووشه فى الارض
الللى اعرفه انهم بجحه و الاهم من دى انك بتقولى قلتى له اروح اجيب لك الاف جنيه و اجى ايه هو عادى كده؟
محسسانى انهم الف شلن

ابن رشد يقول...

هي دي مصر يا عبلة قصدي يا بطة
و الله وحشني التعليق عندك يا بطوط بس انتي عارفة مأساتي مع الحكومة و النت
و معلش بقى انتي عارفة الحكومة بتاعتنا زبالة زبالة يعني بس و لا يهمك
مش عايزك تيأسي احسن الشباب لو ياست هتبقى كارثة

يورو يقول...

للمره التانيه يا بطه بجد بيقع منى الكلام مش عارفه اقولك اى
البلد دى مالها
واسطه ومحسوبيه ورشوه مقننه تحت اسم مسمياتهم التبرع وكمان بكل بجاحه بيطالبوا بيها
بجد حاجه تزهق
بس انتى زى م قولتى فى مدونتك
لا للياس...لا والف لا
ان الله لا يضيع اجر من احسن عملا
غير كدا مش قادره اقولك حاجه

Empress appy يقول...

اولا معلش من الروتين يا بطه والصراعات دى
بس اقولك ممكن اجيب لكى ختم من هنا من القاهرة من شارع محمد على بيعملوه ببلاش متخافيش والله ما عارفه اقولك ايه ربنا معاكى ولو كان فى ايدى حاجه كنت عملتها لكى على الرغم من انى اعرف ناس فى دمياط بس معرفش اساعدك

ahmed mefrh يقول...

السلام عليكم
الموضوع شكله كده كبر اكبر من حجمه الطبيعى ولا ايه
و القصه شكلها حتطول يا اخت بطه خدى بالك
تحياتى اليك اختنا الفاضله ابو مفراح

micheal يقول...

يا ساتر يا رب...هي مصر بقت بتلذذ بتعذيبنا بكافه الاشكال في أي موضوع و السلام
تحياتي

مصر