الهي ماعدت أبغي شيئا في هذه الحياة سوي عفوك ورضاك

الخميس، 3 يناير، 2008

مستنية ردك ياداخلية



لغاية امتي هنفضل ساكتين لاسرائيل دي بقي


هو ايه الحكاية مش مكفيها الفلسطنيين كلهم


نازلة علي المصريين كمان


بفتح موقع مصراوي لاقيت الخبر


بالبونط العريض


مصرع مواطن مصرى برصاص اسرائيلي

على الحدود مع مصر 1/3/2008


واللينك اهو كمان



والصراحة بقي حاطة ايدي علي خدي


مستنية رد فعل الداخلية


الي دايما مشرفنا ورافع راسنا


فوق فوق فوق


وطبعا كالمعتاد وزي غيرهم وغيرهم


ولاهيحصل حاجة


واحنا طبعا شعب طيب وبنحب التسامح


ودم اولادنا دايما فدا للهبل وفدا للحدود


وسيظل الي الابد السلام قائم وشامل مع اليهود


بس السؤال لعم اولمرت


مالك ياعمنا


اد كدة بتعشق دمنا


كل كام يوم نفسك تروح علي حد مننا


وبطيارة طايشة وبايد طارشة تضرب وتقول


مكانش قصدنا


وعارف ومتأكد اننا حلوين وجدعان


ونعجبك قوي


بصوت واطي وبعين مكسورة هنهمس


ونقولك ليه ياعمو ليه


بالراحة علينا شوية


داحنا غلاااابة


وانت بعين واسعة وبصوت جهوري تصرخ


وتقولنا بحمي ارضنا بحمي ارضنا


ياعم اولمرت دا عشان اتنين راحوا من عندكم


اعلنتوها حرب ودمرتم بلد ومهمكوش


لكن عذراك


هقول ايه


ماهو الحق مش عليك


الحق علي الي ركعوا وسلموا


واتنازلوا


وصدقوا


غنوة الحمامة


وغصن الزتون


مع ملاعين


مابيشبعوش


غير بدم


ومابيتكيفوش


الا لو كان الدم مصري


وافرحي يا ام الشهيد


ابنك استشهد في ارض المعركة


معركة ايه وفين


اساليهم


في الداخلية


هيجاوبوكي


ويعطوا لابنك وسام الشجاعة


من الدرجة الاولي


وانا اهو مستنية


مستنية ردك ياداخلية








هناك 36 تعليقًا:

حسن مدني يقول...

انت فعلا مش عارفة رأي الداخلية لا رأي الحكومة،
ما احنا كلنا شفنا رأي الحكومة لما قتلوا جنود مصريين في الجانب المصري في رفح، وشفنا رأي الداخلية لما أولادنا غرقوا في ايطاليا. ولما غرقوا في العبارة، ولما اتحرقوا في القطار،، ولما ولما ولما..
انتي لسه مستنية؟؟
يديكي طولة العمر
تحياتي

ابو مفراح يقول...

ههههههههه
اضحك احت بطه من انتظارك و يبدوا ان الانتظار سيطول جدا
كل عام و انتم الى الله اقرب و على طاعه ادوم
تحياتى ابو مفراح

EmY يقول...

للأسف دم ولادنا رخيص او بالأصح مالوش تمن

amany يقول...

هى دى مصر يا بطه

كلام لوجيك يقول...

مفيش فايدة
النظام الحاكم لم يعد يهتم الا بسلامته وزيادة قبضته على مقاليد الحكم دون الاكتراث بأي شيء اخر
صدقينى يا اختى الكريمة لو اننا نظام ديموقراطى حقيقي
ولو ان رئيسنا يستمد شرعية حكمه من الشعب ... وليس من خلال ولاءه لأمريكا ومهادنته للقوي الكبري وانبطاحه للاسرائيل
ما كان ابدا سيرضخ او سيهتم لتلك القوي الامبريالية الوقحة
لأنه اذا لم يرضخ لهم ويوافقهم على كل اجنداتهم السياسية .. فانهم سيزلزلون كرسى الحكم من تحته وسيتعاونون مع القوي المعارضة ضده وسيقومون بكل ما يلزم لكى يجعلوه فى أضعف واوهن وضع بحيث يكون وضعه مهددا وخطرا

رئيسنا الهمام لن يقبل أن يغضب منه قادة اسرائيل
ماذا فعل من قبل عندما قتل اولادنا على الحدود اكثر من مرة؟؟
ماذا فعل للحجاج الفلسطينيين العالقين فى عرض البحر ثم بعد ذلك فى العريش قبل ان يسمح لهم بدخول غزة؟؟؟؟
وماذا وماذا وماذا؟؟؟

تلك الكلمات زادت عن كونها كومنت واصبحت موضوع
اسف جدا للاطاله والاستطراد

خالص مودتى

اسامة سامى

حبة حاجات (ايمان) يقول...

والله حاجه تحزن
بس اللى يفرح اسلوبك فوق الرائع فى الوصف

تحياتى ومتستنيش ردود نصيحه منى

فى القلب يقول...

الظاهر هتستنى كتير يا بطوط

مفيش أمل فى ناس ماتت ضمائرهم بالرصاص

عاشقه الفردوس يقول...

اول مرة ادخل مدونتك
بس جميله وجريئه
اقولك ايه بس
والله العظيم مالاقيه كلام خالص

حسبنا الله ونعم الوكيل
تعرفى


انا بخاف على المسؤلين اوى بجد

الحساب هيبقى تقييييييييييييييييييييييييييل جدا

ربنا يهدى المسؤلين وينصرنا اللهم امين

انا مسلمه يقول...

كلامك يافاطمة مس قلوبنا

وبجد زة مع عاشقه الأقصى قالت

الحساب هايكون تقييييييييل قوى

كل روح إتعذبت فى رقبتهم

وكل روح غرقت وإتحرقت وإضربت برصاص الإحتلال

وكل أرواح المصريين الغلابه اللى عايشين مش عارفين مصيرهم إيه

سيدنا عمرو بن الخطاب كان خايف لبغله تتعثر فى العراق فيتحاسب عليها لم لم يمهد ليها الطريق

يارتنا كنا أى حاجة فى زمن عمرو بن الخطاب

أكبد كان أهون وأكرم لنا

وإنا لله وإنا إليه لراجعون

shimaa mahdy يقول...

متنتظريش أى رد يا بطوط، ده مش أول مرة يعنى، كانوا ردوا على اللى اتقتلوا قبل كده.. دول ما بيعملوش حاجة غير إنهم يروحوا يحتفوا بأبو حصيرة ـ أمال لو كان سجادة كانوا عملوا ايه ـ الناس ده ما بقاش في منها رجى خلاص

محمد مارو يقول...

بطه البوست بتاعك حاسس بان كله حسره و غل و غيظ و طبعا معاكى كل الحقوق مش حق واحد بس
لكن سوووووووووووووووووورى بطه الداخليه مالها ؟
اكيد تقصدى الخارجيه
الداخليه دى جهاز لتعذبنا و ارهابنا و موتنا
لكن الخارجيه هى المسوله مع انى اشك انها مسؤله و شكرا
محمد مارو

بنت الاسلام يقول...

استاذ حسن مدني

طب اعمل ايه طيب

هو انا قدامي حاجة غير الانتظار

بنت الاسلام يقول...

ابو مفراح

اضحك ياسيدي محدش واخد منها حاجة

غير معرف يقول...

اولادمك زى العسل برغم انك بتكتبى عن موضوع مش يبكى لايموت من الحزن والقهر والظلم وووووووووو
ربنا يرحم الاموات والاحياء لاننا فى زمن الصهيونية وحكوماتنا بقت اكتر صهيونية من الصهوينيين نفسهم
الامل فى ربنا وفى الناس ياتفوق يا تموت ومش هتفرق باى رصاص الرصا تشابه

بنت الاسلام يقول...

EmY

حتي الصرخة والبكا بقت غالية

غالية قوووووي

بنت الاسلام يقول...

اسامة سامي

بالعكس

استفدنا من وجهة نظرك جدااا

وشكرا لزيارة الكريمة

بنت الاسلام يقول...

حبة حاجات (ايمان


مش اجمل من اسلوبة يامنة

شكرا لمرورك الطيب

تحياتي

بنت الاسلام يقول...

فى القلب


وحشتينا جدااا يا اوشا حمدا لله علي سلامتك

ياريته مات بس

ده انعدم

أحمد سعيد يقول...

والله حاجة تحزن

العيب مش فيهم العيب فينا

ملحوظة صغيرة " أنتِ يا بنتِ مش عارفه الداخلية من الخارجية"

الداخلية يا بنت بتاع حبيب العادلى

واعتقال المواطنين وتعذيبهم

أما الخارجيه بتاع البهدلة وقلة الكرامه

أتمنالك دوام التوفيق

أخوكِ نيجــر

DR.HAMAS يقول...

لا حول و لا قوة الا بالله

حسبنا الله و نعم الوكيل

فيمن تسببوا فى إرخاص دمائنا

و بيع أرضنا

و سكتوا على هتك عرضنا



لكن بكرة الظلم هيزول

معلش

الصبر بس

و هيندموا على تهاونهم فى حقنا

و إن غدا لناظره قريب


د.حمــــاس

منى يقول...

بطه
مفيش حاجه اقولهاغير
حسبنا الله ونعم الوكيل
ان الله لا يغير ما بقوم حتى يغيروا ما بانفسهم
والله كتير بفكر هو ايه اللى يجبر قاده اسرائيل على تقديم اى تنازل حتى لو هوده الحق والعدل
هما مش عايزين غير مصلحتهم طبعا
ومفيش حاجه تجبرهم على التغيير
بقى يبقى الحال على ما هو عليه فى الكره الارضيه وعلى المتضرر اللجوء للعنايه الالهيه

بنت الاسلام يقول...

عاشقه الفردوس

اذا كان هما نفسهم مش خايفين علي نفسهم

والله دم المصري في رقبتهم كلهم

شكرا لزيارتك الي اسعدتني كتير

واتمني التواصل

بنت الاسلام يقول...

انا مسلمه

علي رايك ياندي
ياريتنا كنا اي حاجة في زمنك ياعمر يا ابن الخطاب

ياريتنا

بنت الاسلام يقول...

shimaa mahdy

لو سجادة كانوا عملولها احتفال رسمي يحضره بوش شخصيا عشان يبقي اول واحد يقعد عليها

تحياتي ياشيماء وسعيدة بزيارتك الطيبة

بنت الاسلام يقول...

محمد مارو

لا الداخلية ولا الخارجية

طلعت وزارة الدفاع

بس انا برده لسة مستنية رد الداخلية

غلاسة بقي

بنت الاسلام يقول...

غير معرف

شكرا لكلماتك الي كتيرة عليا

لا تفرق كتير بقي

واحنا ياهما اليهود دول

اما نشوف اخرتها معاهم ايه

بنت الاسلام يقول...

أحمد سعيد

معلش يانيجر هنعمل ايه بقي

نسيناااا

برده مستنية رد الداخلية

بنت الاسلام يقول...

DR.HAMAS

في انتظاره كلنا

إسلام يقول...

بطه
بصراحه انا مش عارف اقلك ايه
بس اللي اقدر اقول ان هيجي في وقت ويضربو مصر بصواريخ ودبابات
ويقولو مكنش قصدنا دي طلعت قذائف غلط
واحب اقللك كمان ان انتي مستنيه رد الدخليه بس للاسف هوفعلا مفيش رد زي كل مره
والله يكون في عونا وعون اهل اللي بيموتو دول يارب يصبرهم خير يارب
وفي الاخر اقول حسبي الله ونعم الوكيل

walaa يقول...

الحكومه ولا حتعمل حاجه اذا كان ريسنا راح عمل اتفاقيه معاهم ولما الناس عارضت وقالت ازاى دول قتلين الاسرى المصرين قال مش هعطل السلام علشان شوية افراد
وخلوهم يحجزوا الفلسطين على معبر رفح علشان اسير يهودى واحد ومين اللى نفذ ده مصر فدول عمله وخونه لاسرائيل وحسبنا الله ونعم الوكيل

تحياتى لك ولاء

walaa يقول...

اااااه نسيت اقولك كل سنه وانت طيبه انا جيت اقولك امبارح لقيتك قفلتى الماسنجر وعقبال الف سنه

بنت الاسلام يقول...

مني

مالناش غيرها في الدنيا

عناية ربنا

يااااااااااااارب

بنت الاسلام يقول...

اسلام

واحنا بقي مستنين لما يعملوا كدة

الف بركة علينا

بنت الاسلام يقول...

ولاء


هو ده ريسنا

وهي ديه مصر الجديدة

بلد كانت عزتها كرامتها

ولكن

ماحالها الان

بنت الاسلام يقول...

ولاء

وانتي طيبة يارب

وبتساءل بس

فين التورتة

طارق الغنام يقول...

بنت الاسلام
للاسف دم المواطن العربى مالوش دية ولا تمن
لاتنتظرى الرد
تقبلى تحياتى
واتمنى التواصل عبر مدونتى
ودمتى بود

مصر