الهي ماعدت أبغي شيئا في هذه الحياة سوي عفوك ورضاك

الثلاثاء، 15 يناير، 2008

نورت مصر ياحاج بوووووش


ياجماعة حد يعدله السماعة مايصحش كدة لايقطع الخط


عم بوووووش خلاص علي الأبواب


جاي أهو ينورنا


بنرحب بيه كلنا وبنقوله


يامراااااااحب


أهلا بالغالي ابن الغالي


البلد بلدك واحنا أغراب فيها


قلنا جايبلنا معاك ايه وانت جاي


وحشتنا هدياك ياراجل يابخيل


تهديد ولا تخويف


ولاجايز قتل وتدمير


لالا


شكلك كدة جايبلنا معاك معونة تخزي بيها عنينا


وتخرس بيها لسانا


وتزود بيها ذلنا


ولايمكن حابب توصينا وتفكرنا بحقوق الجيرة


مع جارتنا وحبيبة قلبنا


الي مغتصبة أرضنا


ومدنسة عرضنا


وملوثة بيوت ربنا


هتنورنا ياعم بووووووووووووووش


اطمن مش هنسألك


علي المشردين


ولاهنفتحلك سيرة المجروحين


ولا القنابل المزعومة


ولا الفتنة الي ولعتها


ولا البلد الي دمرتها


وطبعا منتظرين خطبتك الرنانة في ايران


وقصيدة المدح المحفوظة في ارهابها


وخطرها علي نن عيونك من جوة مش احنا طبعا


واحنا نطول


ماتزعلش انت بس ولا تشيل في نفسك


ولاتاخد علي خطرك


من شعبنا المصري


ده غلبااااااااان


قال ايه مظاهرات واحتجاجات


وندوات ومقاطعات


الحمد لله مفيش اضرابات


وكل ده عشان رافضين زيارتك الميمونة


بالذمة ده كلام


هو انت يعني عملت ايه


ده انت نسمة


وحمامة سلام في العالم كله


ماتزعلش من الشعب بقي


كفاية عليك الحكومة


شرم الشيخ ودنياااااااااااااا


وعيش بقي


بايدك الحمرا


وقلبك الاحمر


وتاريخك الا سود


يووووووه


أآأقصد الابيض منه ماشفت


غلطة مش مقصودة معلش


سامحني


محدش محرضني والله


لا ايران ولاغيره


غلطت يابيه


وطالبة من جنابك السماح


أنا والحكومة


وبنقولك


وعنينا مدمعة


من الفرحة طبعا


نورت مصر ياحاج بوش


وكارثة سعيدة


برده


ااقصد


رحلة سعيدة


ارجوووووووكم


اوعي حد يفهمني صح

























































هناك 25 تعليقًا:

د/عبد الخالق زهران يقول...

اول تعليق بطه هيييييه
نسيتى تقولى يا بطة على هديته الكبيرة قبل مايشرف مصر 19 شهيد فى غزة مرة واحدةمنهم حسام الزهار زيارة شؤم من شخص شؤم لحكام شؤم وفى النهاية دايما الشعوب الغلبانة هى اللى بتدفع الفاتورة
ربنا ينور بيته الابيض بنار قنبلة ذرية قولوا امين

رائع بطة كلام بسيط من القلب ومعبر عن ماسى كتييير جوانا تسلم ايدك

nosha يقول...

بطة ـ بنت الإسلام
لحقت أهو أول تعليق من المدونين كلهم
وبالنسبة للبوست بقى فيا سلام عليكي وعلى كلامك ومدحك في عمنا بوش حقيقي هو يستاهل كل الكلام اللي قلتيه عليه ده وزيادة عليه حبتين بس يلا بقى هو ده أضعف الإيمان وعلى رأيك أهلاً وسهلاً بصاحب المعونات ومحب شعوب العالم واللي عمره ما بيحب الحرب وبيكرهه نهائي !!!!؟؟؟؟
بوست هايل يا بطة وتحياتي ليكي

nosha يقول...

أسف جداً يا بطة .... واضح إني لما علقت كان الدكتور عبد الخالق سبقني ... لا مؤاخذة بقى ... وسماح النوبة

محمد مارو يقول...

اه طبعا منورنا و ماكلنا و حمينا و مدينا حريتنا انتى عندك شك فى كده و لا ايه
؟
؟
؟
بس عاوز اقول حاجه انا اعرف انه جي لنا ارضنا ارض المصريين اللى اعرفه ان مصر هى اللى تحدد مين اللى يكون معاه و مين اللى هنقابله
لكن الواضح انه جاى ارض امريكيه لانه بيرفض مقابله ابو الغيط بسبب تصريح له

الشريف / جمال طة يقول...

بطه بابنت الاسلام يابنت مصر المحروسه يحرصك ربى ويرعاكلى بس فاتك ان تهنئى الحاج بوش وتصفقه له على رقصته الجميله بالسيف فى بلد الاسلام مع سلمان بن عبد العزيز محافظ ولاية الرياض أقصد أمير منطقة الرياض بتاعة زمان

وياريت كان اسعدنا بالرقصة كمان خادم الحرمين علشان تكمل مملكة امريكا
http://gamal51.blogspot.com

غير معرف يقول...

بطوط
الراجل تاعب نفسه وجاي من آخر الدنيا يسلم على أصدقائه وحبايبه الزعماء العرب ربنا يحطم كراسيهم يارب فلازم طبعاً نفرشله تحت الأرض نور أمال إحنا بردة ولاد كرم .... ربنا ينور خطواته هو وحبايبه الزعماء العرب بنار الدنيا قبل نار الآخرة
بطوط أنتظر تعليقك على الجزء الأول من قصتي العائلة
أخوكي
حمادة زيدان

shams يقول...

انا مش عارف الراجل احنا مطظهدينوا لية
بيكره الارهاب
احنا كمان بنكره الارهاب
بيكره ايران
احنا من امتى بنحب ايران
بيساعد اسرائيل تقتل الفلسطنين
ما احنا بنبعت لاسرائيل حديد و اسمنت يبنوا الجدار العازل
دة غير انه جاي يأكلنا و يشبعنا و يلبسنا دة كلام يا بطوط دة الراجل يجي و ينور و عشان هو ما مقامه عندنا عالي لازم نستقبله بانظف جزمة تليق بيه

amany يقول...

من جهة منور مصر فهو منورها
بس يارب نوره م يزدش علينا ويحرقنا
ويحرق البلد معانا

appy يقول...

بطه

كلنا معترضين بس ايه الريس ادى له فى التمام بجد حققت رغابتنا اخير ورفض كلامه كله عن ايران وعن غزة يالا مرة اهو من المرات النادرة انه يفرحنا كتر خيرة والله

احمد الجيزاوى يقول...

دة يا ستنى حلقله وجه 3 سعات بس عمل منهم مؤتمر صحفى مع صحفين بس سعاتين وقولى قعد يوقله اهلا وسهلا وويحلف عليه انه يتغدة معاه واو جمال وعلاء هتزل لو مشى من غير ميتغدة ومسك فيه الساعه البقيه خلاص
يعنى زيارة تكاويه واى كلام
زيارة دبلوماسيه بس
عموما
موضوع اكثر من رائع
تحاتى
احمد الجيزاوى

انا مسلمه يقول...

متخافيش

مش هانفهمك صح وأكيد مش هانفهمك صح

بجد

كلماتك جامده وقويه

ابعتيها له فى برقيه

ربنا يريحنا منه

جزاكم الله خيرا يافاطمة

دعوة الفردوس يقول...

في بلاد الأسلام يرقص بسيوف الأسلام وبسيف العرب قُتل العرب
ولا حول ولا قوة الا بالله

hend...hanady يقول...

دى جولة لازم تتعمل علشان اسرائيل تفرقعله كام بيت وكده ومحدش يتنفس والناس تموت وهو يرقص بالسيف ويافرحتى

بنت الاسلام يقول...

د/عبد الخالق زهران

ماهو مكانش يصح يجي يادكتور كدة وايديه فاضية

دي لزوم الزيارة برده

كتر شره

يووووووه

ااقصد كتر خيررره

تحياتي

بنت الاسلام يقول...

نوشة

هو انا قلت حاجة

دانا كنت بفتح شهيتكم بس

شكرا لزيارتك الغالية يانوشة

تحياتي

بنت الاسلام يقول...

محمد مارو

مصر عمرها مابتقفل باباها في وش حد

حتي لو كان وشه مخضب بدم اغلي الناس

اهل كرم بقي

نعمل ايه

بنت الاسلام يقول...

الشريف / جمال طة

هنا بقي ياجدو مش قادرة اتكلم

لهذه الدرجة وصلنا

وحكام العرب للاسف مابقوش عرب

لاحول ولا قوة الا بالله

تحياتي

بنت الاسلام يقول...

حمادة زيدان

نعطيه امل لا امال يا اخويا

المهم نحافظ علي نفسويته

واجب بردك

طبعا هزورك قريب ان شاء الله

تحياتي

بنت الاسلام يقول...

shams

معاك حق

لازم نستقبله بانظف .........عندنا

ضيف برده

ومايصحش

تحياتي

بنت الاسلام يقول...

amany

لا نوره زاد وفاض

وهيولع ويولعنا معاه قريب

تحياتي

بنت الاسلام يقول...

appy

مش هننساها للريس

واهي نقطة بيضا في وسط تاريخ اسود


ربنا يحميه

تحياتي

بنت الاسلام يقول...

احمد الجيزاوى

واخرتها ايه الدبلوماسية ديه

الي مقللة من قيمتنا

الظاهر مالهاش اخر

تحياتي

بنت الاسلام يقول...

انا مسلمة

ابعتهاله

مابعتهالوش ليه

هخاف انا مثلا ولا ايه

انا مش هخاف طبعا

هترعب بس

تحياتي

بنت الاسلام يقول...

دعوة الفردوس

سيوف مسمومة

وقلوب تغشاها سموم نفوس خائفة ذليلة

بنت الاسلام يقول...

hend...hanady

سيووووووووف

وقنابل نووية

احنا بنحارب بالسيف سلمي

وهو بالقنابل النووية عايش حياته

وشايف نفسه

مصر