الهي ماعدت أبغي شيئا في هذه الحياة سوي عفوك ورضاك

السبت، 10 نوفمبر 2007

الفراعنة عاملين شغل جامد قوي في لاس فيجاس


طول عمري اعرف انك جزء مهم وغالي قوي من بلدي جايين النهاردة يقولولي الاصل كان في لاس فيجاس اعمل انا ايه بقي



الفراعنة عاملين شغل جامد قوي في لاس فيجاس


طبعا هتسأل ايه العنوان الغريب ده


ومش بعيد تبرق بعنيك وتفتح بقك من شدة الدهشة


ايه الي خلي الفراعنة يروحوا لاس فيجاس وكمان يعملوا فيها شغل جامد


حقيقي مش عارفة أأقولك ايه ولا عارفة حتي أأقولك تسأل مين يقدر يجاوبك


لكن كل الي هطلبه منك بس تروح علي صفحة جوجل الانجليزي وتكتب الاقصر بالانجليزي وتشوف أول موقع
هيظهرلك ايه ونصيحة


أخوية مني اوعي تفتح الموقع وتدخل تشوفه

luxor


أحسن بصراحة هتشوف مالا يحمد عاقباه فراعنة جداد جداد خالص مودرن مودرن قوي


من الاخر كدة يعني احنا


اتسرقنا


أيوة اتسرقنا هتقولي مش فاهم هقولك من يوم ما جيت للدنيا
واحنا نعرف ان كلمة الاقصر خاصة بينا وان الفراعنة


مصريين اتأمركوا ازاي بقي واحنا قاعدين نتفرج كدة ولا علي بالنا حقيقي مش عارفة


الي اتسرق مننا هو حق من حقوقنا تحت بند


حقوق الملكية الفكرية


وده حق معروف في العالم كله والي بيتعداه بيتحاسب قانونيا


أنا بكتب البوست ده للأسف متأخر جدااا


السبق في الموضوع للاستاذة الكبيرة


نوارة نجم....جبهة التهييس الشعبي




وللزعيم طبعا


شمس الزناتي ...مصري للنهاية



هما الي بدأوا الحملة من البداية وأنا دلوقتي بضم صوتي لصوتهم
وبقدم دعوة عامة باسم كل مدون حر في مصر


لازم نعمل حاجة بجد لان الفراعنة هما الشيء الوحيد في الماضي الي بنتمني نكون زيهم في المستقبل


نوصل لعلمهم ونكبر زيهم ومش هنسمح ابداا ان اسمهم مجرد اسمهم يكون واجهة لاهل رزيلة وانحلال



كل واحد مننا لازم يقوم ويدافع عن حقنا


ويصرخ بعلو الصوت ويقول


سكتنا كتير وخوفنا كتير ضاع مننا الكتير والكتير لكن الفراعنة لا


دول رمزنا


فخرنا


ده حقنا


ومش هنضيعه ابدا مهما يكون


هتقولي طيب انا اعمل ايه انا بايدي ايه اعمله انا غلبان


هقولك الموضوع لازم يكبر لازم يتصعد لازم كل الناس تعرف
لازم كل مسئول وصاحب كرسي في البلد ديه يعرف


وبعد مايعرف لازم يتحرك نرفع قضية نطالب بتعويض
نوصل لللاعلام مش المصري بس الاعلام الامريكي نفسه


ممكن من علي جهازنا ده نقلب الدنيا نراسل كل الجرايد علي ايميلاتهم
نبعتلهم موقع الاقصر لاس فيجاس يشوفوه


يشوفوا السرقة العلني الي من غير خشي يشوفوا الصمت الحكومي الي ولا كأن حاجة حصلت


مش قادر تعمل كل ده ارفع ايدك للسما وقول


حسبي الله ونعمة الوكيل


المهم


تعمل حاجة


كلنا لازم نعمل حاجة


والا


بكرة هتلاقي نهر النيل في نيويورك


وشوف بقي هتثبت ان مصر هبة النيل ازاي








هناك 28 تعليقًا:

ابن رشد يقول...

الله اكبر اول مرة
عشان انضمامك للحملة
و انت من اقوى المدونين
و الله اكبر اني اول تعليق
و الله اكبر يقف جنبنا

hekaytna يقول...

انا كمان بضم صوتي ليكي يا بطه وان شاء الله نعمل حاجه

غير معرف يقول...

مصر اتباعت من زمااااااان

لما ولادها نسيوها

لما قال كل واحد وانا مالى

لما بقا شعارنا اللامباله

بس فى الأمل لسه موجود

كل ليل ليه نهار

وكل ظالم وليه نهايه

اتمنالك التوفيق بطه

اخوكِ دائماً..نيجــر

غير معرف يقول...

المشكلة مش ان الاقصر بس اللى اتبعت مصر كلها اتبعت من زمان وادفع تمنها مقدما
وبعدين كام واحد مصرى زار الاقصر ولا يعرف مكانها على الخريطة انا عن نفسى عمرى ما زورتها واعرف مكانها كده تطشش
http://newegyption.blogsome.com/

محمد جمعه يقول...

حضرتك الاثار مازالت بتتباع
حضرتك الا بيبيع الا مسؤلين عن الاثار فى مصر

على فكره فى واحد صحبى حاليا فى لجنة التنقيب فى مكان ماء فى مصر هذا المكان صرح سيادت المسؤل وقال مفيش فيه اى اثار

صحبى قال الا هم لاقوا قرية كاملة تحت الارض
وحاليا ظهروا بيتين وجارى البحث فيهم
ونقلا عن صحبى ان فى جرانيت فرعونى بيرمى فى النيل لانهم من نوين يظهروه للاسباب سياسه
ان شاء الله انا بضم صوتى لكم ومدونتى وهكشف الموضوع ده ان شاء الله بالصور والفديوا
انتظروا ذالك قريبا على مدونتى

فى القلب يقول...

لا حول و لا قوه الا بالله

عارفه يا بطوطتى

لسه مخلصه كلاممع واحده بتقولى على مشكله بيع البنوك و اثارها السيئه على تحكم الأجانب من جوه عقر درنا

ووصلنا أن أننا هنرجع تانى لأيام الكامب الأنجليزى

مش عارفه الزمن مخبى أيه اكتر من كده

بنت الاسلام يقول...

شمس

الله اكبر علي كل ظالم ومضيع للحق

و
ده ااقل واجب

بنت الاسلام يقول...

حكايتنا

وده المنتظر منك ومن كل مصري شريف ياعلاء

بنت الاسلام يقول...

احمد سعيد

احنا عايشين بالامل

وهنعيش

بنت الاسلام يقول...

المصري الجديد

العبرة مش مين زارها انا زيك مازورتهاش

لكن طول عمري اعرف انها جزء مهم جدااا من بلدي

مصر

بنت الاسلام يقول...

محمد جمعة

واضح ان عندك الكثير والكثير

في انتظاره منك باذن الله

بنت الاسلام يقول...

محمد جمعة

واضح ان عندك الكثير والكثير

في انتظاره منك باذن الله

بنت الاسلام يقول...

محمد جمعة

واضح ان عندك الكثير والكثير

في انتظاره منك باذن الله

بنت الاسلام يقول...

في القلب

عن جد وحشاني جداا


الزمن مخبي لنا ايه

سؤال صعب نلاقي له جواب

لانه سر في بحر الزمن

هيثم الغيتاوي يقول...

عن نفسى يا بطوط
اتوقع طناش رسمى للحمله
!!!!!!!!!!

ازاى تتوقعى من المسؤلين يدافعو عن حقنا
ويقفلو الموقع ده
او حتى يهاجمو المدينه دى
بعد مايفتحو الموقع ويشوفو اللى انا شوفته
مش هتقدر تغمض عنيك
هههههههههههه

بس تقدر ع الاقل تقفل الصفحه بسرعه
يالهويييييييييييييييييى

ههههههههههه
هم يضحك وهم يبكى
مش لاقى تعليق
غير حرقة الدم

حبة حاجات (ايمان) يقول...

اخيرا لاقيت حد قلبه على مصر
انا نفسى افهم هما المسئولين دول مصريين بجد؟؟

تحياتى ليكى مدونتك رائعه

بنت الاسلام يقول...

هيثم

ما انا حذرتك يابني

بتفتح الموقع بس ليه

حسبي الله ونعمة الوكبل

بنت الاسلام يقول...

حبة حاجات ايمان

في كتير يابنتي والله لسة فيهم خير وقلبهم علي البلد ديه

بس العجز محوطهم من كل مكان

وعندهم امل ان حد يسمعهم

ahmed mefrh يقول...

انا عايز اعرف و ليه الاستغراب يعنى لما الولايات المتحده تأخد اسم مدينه من المدون و تطلقها على مدجينه عندنها بل و المدينه مهنتها الاساسيه القمار.؟


ما هى هى امريكا اللى واخده العراق
و هى ه امريكا اللى بتساعد الصهاينه على احتلال فلسطين.
و هى هى امريكا اللى بتساعد مبارك على توريثه للحكم لجمال .

ولا امريكا بتاعت لاس فيجاس ليست امريكا بتاعت واشنطن

انا معكم فى الحمله و لكن اضم الى حملتكم الكريمه المحافظه على حقوق الملكيه الفكريه للعلماء المصريين فى امريكا الذين لو فكروا فى القدوم لمصر يتم اغتيالهم

و كذلك على المحافظه على الحقوق الفكريه للشعب المصرى فى اختياره لحلكمه

و كذلك على المحافظه على الحقوق الفكريه
للشعب المصرى فى اختياره لهواء نظيف و حياه كريمه

تحياتى اليك اختنا الفاضله

ابو مفراح

بنت الاسلام يقول...

ابو مفراح

لك كل الحق في كل ماقلت

ولكن ربما احتجاجنا اليوم لانه يمسنا اكثر واكثر

ربما انانية مننا لاننا نفكر في انفسنا اكثر

ربما

الا انها محاولة مننا لعلها تجدي وتفيد

Hoda يقول...

يا حبيبتى احنا من زمان قوى واحنا مسروقين مش دلوقتى بس لكن العيب فى اللى بيفرطوا فى اثار بلدهم وعمرهم ما اعترضوا على شىء موضوع جرىء وجميل وانا معاكى وبصدق على كلامك يا ريت تشرفينى بالزياره فى مدونتى المتواضعه لان رأيك يهمنى
مع خالص تحياتى

كلاكيت تانى وتانى يقول...

مفيش حل يا بنت الاسلام صدقينى طول ما عقول الناس وقلوبهم ضايعة فالدنيا ومبتفكرش ان الدين خلق واداب وامانة وتفضيل للعام عن الخالص هنفضل كدة نفوس رخيصة تبيع الأخرين وفى حقيقة الأمر هى تبيع نفسها بلا ثمن
تحياتى

بنت الاسلام يقول...

كلاكيت تاني وتاني

كلمة مفيش حل دي صعبة قوي

معني كدة ااننا نسكت

مانكتبش

ولانعمل اي حاجة

معاكي ان الحل في اخلاقنا وقيمنا المنبعثة من تعاليم دينا


لكن من اخلاق المسلمين برده انهم مايسكتوش عن حق ضايع ابدااا

الساكت عن الحق شيطان اخرس

بنت الاسلام يقول...

haneen


حنين السؤال لغاية امتي

انا مش بقول اننا بالحملة ديه هنغير والحال هيتقلب لا

اهي محاولة

افضل من السكوت


واتشرفت بزيارتك جدااا ياقمر

واتمني التواصل يدوم بينا

محمد على ..هي كده يقول...

جات على دى
احنا اتسرقنا من زماان

اتسرقنا على ارضينا وفى بلدنا


لما اتسرقت اردتنا فى الانتخابات

لما اتسرقنا وضاع امولنا فى البنوك

لما تسرقنا وضاع حلمنا بالتغير

اتسرقنا من زماان

جات على الاجانب لما يسرقونا بعد ما سرقنا ناس من شعبنا

غير معرف يقول...

محمد علي

ان كنا اتسرقنا امبارح وسكتنا فدا كان عن ضعف منا

واحنا لما بنكتب قررنا مانكونش ضعفا حتي لو كانت الكتابة والحملة شيء لايجدي ولايفيد


لكن بنقولها وبكل وضوح

كفاية سرقة بقي


كفاية

رانيا الجبالي يقول...

هو في الاول حسبي الله ونعم الوكيل اما كلمة صعب ومستحيل دي مبحبهاش وطول ما احنا عايشين اكيد في امل ان في حاجات كتير تتغير لكن للاسف دلوقتي الغلط زاد جدا بس مش لازم نقابله بسلبيه عشان احنا اللي هنكون ضحايا وطبعا معاكي يابطه وبضم صوتي ليكي

بنت الاسلام يقول...

رانيا

طبعا مفيش مستحيل طول ما احنا عايشين

شكرا ياقمر لزيارتك الغالية

مصر