الهي ماعدت أبغي شيئا في هذه الحياة سوي عفوك ورضاك

الثلاثاء، 29 أبريل 2008

لومحدش رد علينا هنشيل المصنع بايدينا...شعار الدمياطي الثائر اليوم

بالــــــــــــــروح بالــــــــــــدم نفديــــــــــكي يادميــــــــــــــــاط



يامبــــــــــــــارك خد قرار الدمايطـــــــــة في الانتظــــــــــــار



لو محدش رد علينا هنشيل المصنــــــــــــع بايدينــــــــــــــــــا



لا للمصنـــــــــــــــــــــــــــــــــع لا للمصنـــــــــــــــــــــــــــع


لا للمـــــــــــــــــــــــــــــــــــــــــــوت لاللمــــــــــــــــــــــــــــوت


يميــــــــــــــن شـــــــــمال المصنـــــــــــــــــــــــع هيتشــــــــــــــال



النهاردة بجد كان يوم تاريخي لشعب دمياط كله



في ناس مش فاهمة هو في ايــــــــــــــــــه؟؟؟؟؟؟؟؟



أقول تاني ليه لاء؟؟؟؟ كل دمياط معترضة علي اقامة مصنع تابع لشركة اجريوم الكندية بالقرب من مدينة راس البر الدمياطية الساحلية نظرا للاخطار والاثار السلبية علي البلد كلها


وبعديــــــــــــــــــن


يوم الثلاثاء الموافق29 ابريل كان يوم الثورة والغضب وفعلا كانت ثورة وكان الغضب

صحيت الصبح بدري الساعة 10 ونص لبست أسود في أسود ونزلت ركبيت المكروباص قلتله البوسطة ياأوسطي نزلت عند البوستة لاقيت الدنيا فاضية الا مجموعة سيدات لابسين اسود في اسود زيي ندهوا عليا


قلتلهم انتم هنا عشان المصنع قالوا ااااااااااه قلت خير قعدنا كلنا علي الارض نتكلم في الموضوع وبعدين بدات الناس تيجي رجالة كتيرة شايلين يفط مكتوب عليها تنديدات باقمة المصنع في دمياط لافيت بعنيا في المكان لاحظت حاجة غريبة مفيش محل الا وعلق ورقة علي بابه لا للمصنع الموت في دمياط مفيش عمارة الا ونازل منها قماشة طويلة مرسوم عليها علامة الموت لا للموت لا للمصنع مفيش عربية او تاكسي او حتي ميكروباص الا والورقة موجودة وملزوقة فيه




المهم فضلنا واقفين وسيدات كتيرة جداا بصراحة ام جاية ومعاها اربع اطفالها صغيرين جدااا سيدة عجوووووووووزة جدااااااااااا موجودة معانا المهم بدا الامن ييجي علينا يالا ياجماعة من هنا المصنع خلاص اتلغي وصدر قرار بكدة روحوا هاتوا المصري اليوم هتلاقوا الخبر طبعا محدش صدق وفجاة صرخت اول سيدة من الخلف لاللمصنع لا للمصنع والكل وراها يهتف وبدانا المسيرة من حديقة البوسطة متوجهين ناحية مبني المحافظة الامن حاول يعمل ستار حاجز لكن معرفش واستمرينا في المشي والاعداد تتزايد بسرعة رهيبة عينيا مكانتش قادرة تحصر الاعداد لانها فعلا كانت بالالاف والاعلام كان موجود ومكثف جدااا لغااااااية ماوصلنا مبني المحافظة واحنا بنهتف وعند المحافظة بدات عظمة شعب دمياط تظهر بكل طوائفه وعلي راسهم محافظ البلد




وصلنا المحافظة وقفنا وصوت هتافنا بيعلي


وفجأة



لاقيناه خارج بنفسه قدامنا بقي واحد مننا واقف وسطنا مين هو المحافــــــــــــظ الدكتور فتحـــــــــي البرادعي بنفسه وقف يكلمنا ويهتف فينا الحقيقة انا كنت بعيد مكنتش سامعة هو بيقول ايه ومن بعده وقف نواب الشعب يكلمونا وبرده مكنتش سامعة والهتاف استمر وتعالت الاصوات عاوزين قرار عاوزين قرار لومحدش رد علينا هنشيل المصنع بايدينا والناس كلها قالت مش ماشيين لغاية مايصدر قرار وقعدوا علي الارض كلهم والظهر اذن صلوا جماعة






موقف غريب لاقيت رجل عجوووووز بلامبالغة لما ااقول 80 سنة صوته مش طالع وبيزعق جامد في ايه ياحاج بيكذبوا علينا بيقولوا انه وقف وكل يوم الساعة 2 باليل نسمع اصوات المعدات شغالة فرحت بيه قوي فرحت بكل الدمايطة


فجأة لاقيت تصقيف عالي وصفيروالناس بتوسع الطريق ودخل مجموعة اطفال في قلب الاعتصام رافعين نعش اه والله لاء كمان نعشين مغطينهم بالاسود ومكتوب عليهم مدينة دمياط مدينة رأس البر أغيثووووووووونا


والصراحة كان مشهد راااااائع اثار الحماس في الناس اكتر واكتر دخل المحافظ مبني المحافظة ساعتها انا كنت قربت جدااا من الصوت وبدا يتكلم من مكبر صوت واعلنها رسمي


يا اهال دمياط الكرام انتم ضربتم اعظم مثل وبفضل جهودكم واتحادكم صدر قرار نهائي بوقف المصنع مش هيقام في راس البر ولا في اي جزء من مدينة دمياط وسمعنا كلام ان يوم السبت واحد مايو يوم عيد العمال الريس شخصيا هيذيع ان المصنع اتنقل من دمياط رسميا وقعد يحمس الناس ويشجعها ترجع لشغلها وماتضيعش وقتها


وبدأت الناس تهدا وقعدنا نقول لبعضنا احنا نصدق كلام المحافظ ونمشي لانه بجد راجل محترم واكيد بيحترم كلمته ولو طلع كلام بيضحكوا بيه علينا المرة الجاية بقي علي المصنع فورااااااااااا


وفعلا بدانا ننسحب بهدووووء روحت البيت مش قادرة من التعب والهتافات لسة بتتردد في دماغي


للاسف مكانش معايا كاميرة اصور ولا حتي موبايل بكاميرة لكن اكيد في صور كتير جدااا هحصل عليها وهنشرها


نسيت ااقول ان احنا قررنا يوم الغضب يكون النهاردة لان كان في لجنة صحة من مجلس الشعب مقرر ليها انها تيجي النهاردة تعاين الموقف لكن للاسف اللجنة مجاتش سمعنا اقاويل بتقول انها اتمنعت من المجيء واقاويل تانية بتقول ان قرار النقل صادر من امبارح عشان كدة مجيئها مابقالوش لازمة الله اعلم الحقيقة فين بالظبط


المهم ان شعب دمياط كله ضرب اعظم مثل واحترم كلمة محافظه وانصرف ولعلها تكون الاخيرة لان الصرخة القادمة ان كانت هناك معارك قادمة ستكون صرخة الدمــــــــــــار

بنت دميــــــــــــاط أنــــا

سعيــــــــــــــدة

بشعبـــــــــــــــي


المتحضــــــــــــــر


وخصوصـــــــا


بالسيــــــــدات

هناك 25 تعليقًا:

rtrcbh يقول...

جزاكم الله خيرا يابنت الاسلام على هذه التغطية الجميله
وحقا أنا مثلك أفتخر أنى اعيش بين شعب دمياط
وأن شاء الله سنكمل المشوار جميعا معا حتى يتم الايقاف تماما

طلاب من أجل مصر يقول...

مــــــبـــــارك شعب دمياط ...
حققتوا اللي عاوزينه بالوحده اتوحدتوا على كلمة واحده ..
وربنا كان معاكم ..
لو كل مصر اتحدت وعملت كده هيكون اكيد في تغير وتغير كبيييير..
ولو الوطن العربي توحد برده هيعمل تغيييير بس هيكون تغييييير في العالم باذن الله
شعب دمياط اثبت ان الوحده.. والتوحد في صف واح هيه الحل لكل مشاكلنا..
تحية لشعب دمياط ..
ومشكوره يا بطه على التغطيةويارب نشوف صور ..هيكون احسن طبعا
ارق تحياتي
س ا ر ه

رحاله يقول...

بسم الله
بطوط بجد بجد مش قادرة اوصف مدى سعادتى وفرحتى الكبيرة بيكم وليكم
وانتى بتحكى يابطوط تخيلت نفسى معاكم وانى بهتف وقد ايه اتاثرت بجد يابطه
ربنا يكرمكم ويفرحكم كمان ومش تطلع كدبه كلنا طبعا عارفين الحكومه بتاعتنا بنت ...........ستين فى سبعين
تقبلى تحياتى

محمد مارو يقول...

بطه
و الله انا سعيد جدا بموقفكم

بطه
انا بقرا و جسمى بيقشعر من الفرحه

مبسوط اننا بناخد حقنا من الحكومه

مش فى كل مره يزوروا ارادتنا
الانتخابات و بنسكت لكن هنا اكيد مش هنسكت

اه مش هنسكت

انا بقول و بحط نفسى معاكم لان ده يشرفنى بجد و لان دمياط للمصريين كلهم مش للدميطه بس

و بدعو كل مدون محترم للتضامن معاكم
معا من اجل دمياط من اجل مصر

غير معرف يقول...

انااول مره اشوف المدونه ديه جميله جداواحييك علي التغطيه الجميله دي وبانتظارالصور

أحمد سعيد بسيوني يقول...

ربنا معاكم
تحياتي الخالصة لاهالي دمياط

حاجات جوايا يقول...

ألف مبروك ليكى وليا ولكل الدمايطة الكرام
انا مبسوطة جداااااااا والله من اللى حصل ده
قمت الصبح الساعة 11 على صوت الشعب أمام مبنى المحافظة وهما بيقولوا بالروح بالدم نفديك يا دمياط
طلبت زوجى وقلتله الناس بدأت أهى انا نازله .. قاللى لا خلاص جه فى المصرى اليوم ان المصنع وقف
الحمد لله
الحمد لله
والله أنا فرحانة جدااااااااااا بالشعب
حاسة اننا انتصرنا انتصار كبير جداااااااا

تغطيتك للموضوع هايلة
ياريتنى كنت معاكم
انا غطيته على حسب مشوفت من البلكونة تغطية متجيش الربع هههههههه

اسمحيلى انقل البوست بتاعك فى مدونتى مع ذكر المصدر

دمتى بكل الخير أختى الدمياطية

سالى

امواج يقول...

فعلا يابطه
ال حصل فى دمياط دليل على تحضر ورقى فى الاعتصام
لافتات وهتافات
لا تكثير ولا تخريب
ناس وعيه وعارفه ان ده يضرها

إسلام يقول...

بجد اشكرك يا بطه علي التغطيه الهائله ويارب ينصركو وتقدرو تقفو ايد واحده للحد من مصنع الموت ويارب يتحق كلام المحافظ ويوقف عمل المصنع المدمر لشعب دمياط لو استمر في عمله طبعا هيكون خطر علي اهل دمياط وربنا يقدركو علي وقف المصنع تحياتي

عاشــــــ النقاب ـقــــة"نونو" يقول...

تحية وتقدير لشعب دمياط
يارب نتعلم بقى منهم ويعدي 4مايو على خير
دعواتي وتحياتي

Hosam Yahia حسام يحيى يقول...

مبرووووووووك مش (مبارك) لاهل دمياط

على انتصارهم على انفسهم

وشجاعتهم

عقبال باقى مصر

بنت الاسلام يقول...

أدم ويحيي

باذن الله هنكمل

ولاخر نفس

ولنا الفخر

تحياتي

بنت الاسلام يقول...

عبد الهادي -سارة

سارة نورتيني

ومتشكرة خالص لروحك الجميلة ديه

وتحيتك وصلت

ومننا ليكي اجدع تحية

بنت الاسلام يقول...

رحالة


يوم الانتصار اكيد فرحة

لكن الفرحة بتكبر

وتزيد

لما نلاقي قلوب جميلة معانا

بتحس بينا

وفرحانة لفرحنا

وانتي منها

تحياتي

بنت الاسلام يقول...

محمد مارو

بشكر ليك جداا روحك الحلوة

واحساسك العالي

وتضامنك معانا

شيء يشرفنا

تحياتي

بنت الاسلام يقول...

بنت مصرية

نورتيني بزيارتك

ويارب تتكرر

اتمني التواصل

تحياتي

بنت الاسلام يقول...

احمد سعيد بسيوني

تحيتك وصلت ومنهم ليك تحية مماثلة

بنت الاسلام يقول...

sally

نورتيني بالزيارة جدااا

وسعدت اكتر بكونك دمياطية

والبوست كله بتاعك ياسيتي وتحت امرك

وفرحانة انك فرحانة

واتمني التواصل

بنت الاسلام يقول...

امواج

الحمد لله الحمد لله

ربنا يكلل جهودنا بالخير يارب

تحياتي

بنت الاسلام يقول...

اسلام

انا اللي بشكركم

علي فرحتكم لينا

ووقوفكم جنينا

وده شيء دايما متوقع منكم

تحياتي

ابن رشد يقول...

نفسي بجد اسقف الف سقفة لكل دمياط و كل الدمايطة
تحياتي على كل تصرف حضاري عملتوه

مدحت محمد يقول...

الف مبروك ياباشا
المصنع مش هيتعمل عندكم فى دمياط خلاص
هيتعمل عندنا فى السويس
بس بجد طلعتم رجالة
انتم والمحلة
تحياتىىىىى

أنا مسلمة يقول...

والله الواحد سعيد جدااااا

ربنا يبارك لك ويبارك فيكى

بنت الاسلام يقول...

nonoymm

اه اتعلموا بجد كان موقف ووقفة حضارية

يارب تتكرر

وتبقي عنوان مشرف لشعب مصر كله


يااااااااارب

بنت الاسلام يقول...

حسام يحيي


عقبالك ياسيدي

وعقبال مصر كلها

لاء العالم كله

مصر