الهي ماعدت أبغي شيئا في هذه الحياة سوي عفوك ورضاك

الجمعة، 4 أبريل، 2008

صرخة كل المصريين



كان لازم اتكلم عن الاضراب


اشمعني انا يعني ما الكل عمال يتكلم


والكلام انفتح قوي والظاهر هيتقلب بخناقة


والجماعة دول مالهمش فيه ودول


ياجماعة الله يكرمكم تعالوا ننسي اي حاجة


لاء تعالو ننسي كل حاجة


ونفتكر حاجة واحدة بس


اننا مصريين


تعبانين


تعبانيين قوي


مشاكلنا كل يوم بتزيد ومحدش حاسس بينا


بالعكس كل همهم انهم يدبحوا فينا


ااقولكم حاجة


كنا زمان بنقول علي نفسنا الحمد لله مستورين


بناكل اللحمة والسمك


ونشرب الشاي والعصير



ونلبس في الصيف والشتا


بنتعلم وبنتفسح


كانت حياتنا مستورة ميسورة


عمر ماكان رغيف العيش بيجي في بالنا

وعمر ماكانت ازازة الزيت مصدر لتعبنا


ده احنا الطبقة المستورة شوفوا حالنا اتغير ازاي


شوفوا قلقنا علي الرغيف بقي عامل ازاي

مابالكم بقي باللي كانت لقمة العيش بالنسبة له حكاية


وطبق الفول عنده رواية


المشكلة ديه حاسس بيها كل الشعب


وطنينوه واخوانه


مستقلينوه ووفدينيه


كل الناس


تعالوا يومها يوم 6 ابريل نصرخ كلنا


ونقول علي كل اللي في نفسنا


نقولهم ارحمووونا بقي


ذلتونا برة واتحملنا


دوستوا كرامتنا وعديناها


جوة كمان ذلتونا بلقمتنا


حاولنا نتحمل لكن خلاص طفحنا


مابقيناش قادرين


قلنا نصرخ كلنا في نفس واحد


جايز الصرخة تأثر فيكم


جايز بطون الغلابة تحييكم


جايز الامنا تصحيكم


يالا نضرب كلنا


كل واحد مننا ينزل يبلغ الناس اللي يعرفها واللي مايعرفهاش


يوم 6 ابريل ماتعملوش حاجة غير انكم تصرخوا بس


صرخووووووووووووا


صرخوووووووووووووووووووووووا


عاوزين يوم 6 ابريل يبقي


صرخة كل المصريين




هناك 12 تعليقًا:

Hosam Yahia حسام يحى يقول...

اول تعليق

حمادة زيدان يقول...

يارب الناس تحس يا بطوط
الموضوع ده بنشروا فى الصعيد على كل اللى أعرفهم واللى معرفهمش ... يارب الناس تعرف أنه عمل تاريخي ممكن يتكبلهم فى تاريخ مصر ... ياريت الناس تشعر انها هاتغير تاريخ مصر
ويارب انا اكون اول كومينت

Hosam Yahia حسام يحى يقول...

مع الاضراب سابقا

لكن بعد بيان كفايه عن الاضراب والاخوان


ضد الاضراب حاليا

وتحياتى

رحاله يقول...

بطوط
وحشانى عامله ايه
مجهود رائع يابطه الى بنعمله علشان 6 ابريل دة بس صدقينى وربنا محد هيعبر اهلنا دى حكومه بت ستين ف سبعين وياخوفى تطلع صدمه ابريل
يلا ربنا يكرمهم ويكرمنا
واحنا قربنا خلاص ع النهايه
تقبلى تحياتى

رحاله يقول...

بطوط خد دى هديه منى


ياحكومه ياحرميه
يابلد ملهاش هويه
على الغلابه مستقويه
مكفايه بقه سياسه الفتونه والبلطجيه
متسيبو الشعب يقول
ليه الصمت كدة علطووول
ياحكومه ياحراميه
لالا
ياشعب ياغلبان
اصرخ وقول
ليه كدة يافرعون
ليه 25 سنه ظلم واستبداد
ليه جعلت الكرسى ابكم مابيعرف الكلام
ليه جعلت الشعب يموت عطشان
ليه جعلت شباب يموت فيه الايمان
ليه جعلت الناس فقرا ومجتاجين
جعلت الناس على رغيف العيش يضربو بعض بالسكاكين
خليت تراب البلد يتباع بالملاليم
خليت الاخضر يابس وجنيت على البساتين
خليتنا نشحت بعد ماكان فينا سلاطين
خلتونا ننام ونحلم بقزازة زيت او حتى بكو بسكوت
خليت اسم البلد يتسب من ملاعين يهود ومفترين
خليت اسم مصرى اضحوكه الملايين
خليت اسم مصرى نكته بايخه يقولها المسطولين
خليت ابو الهول يشق فى الهدوم
مكفايه بقه ياحكومه يامفتريه
ياايد فى الضرب قويه على قفا البنى ادمين
كفايه افترى
كفايه غشششش
وخداااااااااااااااع
كفايه تزوير فى الانتخابات
واحنااااااااامش خااااااااااايفين
وكلنا عارفين
انك حكومه مفتريه لالا
سوووووووووورى قصدى حكومه حراميه

محمد مارو يقول...

يا ريت يا بطوط الكل يشارك بجد

و ادينا شوفنا مبارك عمل ايه من مجرد تهديد بالاضراب

امال لو اضربنا بئه

و من عندك ببعت برقيه عتاب لاحبائنا الاخوان المسلمين لرفضهم المشاركه

انا مسلمه يقول...

حاضر يافاكة

هانصرخ

وإن كنت شايفه إننا نعمل إضرب ضد أنفسنا

لأن الفساد اللى عايشين فيه دا من فساد أنفسنا

الناس هاتعمل إضراب لما هدد فى لقمة عيشها

وكانت عادى جدااا

لما هددت فى دينها

وإنا لله وإنا إليه لراجعون

هانضرب مش لانه السبب للنجاه من اللى إحنا فيه
هانضرب لاننا لازم نوقف الفاسدون عند حدهم

appy يقول...

يا خوفى من الاسد يا بطوط
عموما انا هضربواقعد فى البلكونه واغنى رد البيبان يا بهيه ههههههههههه وربنا يستر

walaa يقول...

بجد الناس لازم تتحرك بقه عايزنها تبقى ثوره على الفساد والظلم
على القهر اللى احنا عايشينه
على النهب والسرقه كفايه نوم كفايه سلبيه
بس يا ترى يا بطه الناس هتتحرك بكره
تحياتى ولاء

يورو يقول...

ياااااااااارب
يارب يا بطوط
دى تكون بدايه لصحوة الناس

نعلى صوتنا مره من غير خوف
ونقول احنا موجودين

مش راضين وقابلين بكل حاجه وعايشين مسلمين
ماشين جنب الحيط

يارب الناس تسمع
وتتحرك
احنا تعبنا اوى كفايه كدا

ebnmasr يقول...

ايه الاوفلاين دا ؟ خييييييييير
طمنينى عليكى
هايلة كالعادة
تحياتى

Zololkis يقول...

See Please Here

مصر