الهي ماعدت أبغي شيئا في هذه الحياة سوي عفوك ورضاك

الثلاثاء، 1 أبريل، 2008

تاج العزوبية.....وعروض مغرية


التاج ده اتمرر لي من أحمد سعيد مدونة قلب ابيض بشكره جداااااااااااا

ما رأيك فى الجملة التى تقول ...العزوبية تاج على رؤوس العزاب لا يراه الا المتزوجين ؟


جملة خاطئة طبعا العزوبية عمرها ماكانت تاج ولا هتكون
أولا لانها ضد المنظومة الكونية الي ربنا خلقنا عشانها
ثانيا لانها هتكون سبب في انتشار الفواحش والرذائل
مش عارفة ليه بقي الاتجاه السائد دايما هو الفشل اصبح الزواج كارثة مشكلة طول عمرنا نسمع ان الزواج رحمة ومحبة وسكن تضحية وقوة تحمل وصبر لكن الظاهر ان المنظومة ديه اتغيرت في المجتمع بقي الواحد بيحس ان الزواج اصبح صفقة مجرد صفقة كل واحد من الطرفين وااقصد هنا مش الشاب والفتاة بس لكن كل جانب بأسرته وعيلته هدفه يمص دم الاخر وبس عشان كدة بقت العزوبية عند كتير وكتير افضل كمان في ظل الفساد الاخلاقي وانتشار المواقع الاباحية والفضائيات في كل مكان اصبحت اسهل من انك تشرب كوباية ماية كل شيء اصبح سهل ومباح فيا اهلا بالعزوبية....ربنا يحفظنا الستر من عندك ياااااارب

ماهي من وجهة نظرك العوائق التى تحول بين الشباب والزواج هذه الايام ؟؟؟

انا شايفة ان احنا بقينا عايشين في منظومة فساد متكاملة عاملة زي شبكة الاخطبوط كله بيوصل لكله لو عاوز تعرف ايه العوائق بص لكل مشكلة حواليك هتلاقيها احد الاسباب نعدهم سوي

اولا ودي اهم مشكلة مشكلة الغلاء الرهييييييييييب الي احنا عايشين فيه والمشكلة ديه اثرت في الناس تاثير بشع بمعني زرعت الخوف والرعب في قلوبهم بقي خوفهم من المستقبل اقوي من أي خوف ونسيوا ان المستقبل بايد ربنا فبدأوا يتحولوا لوحوش نسيوا ان اهم شيء في الدنيا انهم يلاقوا لبنتهم انسان يحبها ويحترمها ويتقي الله فيها فبدل مايعلموا بنتهم الرضا علموها الطمع والجشع بدل مايصبروها بقت اسهل كلمة علي لسانهم سيبي عياله في دماغه وتعالي وبدل مايهونوا عليها بقت كلمة الطلاق وبكرة نجوزك سيد سيده عشان اكون منصفة احيانا بعذر البنات لانهم اصبحوا ضحايا لابائهم افتقدوا لعامل التربية الصحيحة المنبثقة من تعاليم اسلامنا السامية ارجعوا كدة لعصر حبيبنا النبي وشوفوا بنته سيدة نساء اهل الجنة اتجوزت بايه وعلي ايه التاريخ خلد ذكري زوجها لانه كان الامام علي بن ابي طالب كرم الله وجهه ماخلدش التاريخ ذكري زواجهم عشانهم عاشوا في قصور ولا شبكتهم كانت الماظ ولا بيتهم كان طوبة فضة وطوبة دهب سعادتهم كانت في أخلاقهم وفي احترامهم وحبهم لبعض وحفظهم لغيبة بعض....فاظفر بذات الدين تربت يداك صدق رسول الله

تاني مشكلة بقي هي المظاهر الكدابة الي سيطرت علينا فلانة جابت وعلانة خطيبها جابلها وانا مالي عاوزة زيها وتتقلب لحظات الهنا والسرور لبؤس وشقاء من تحت راس القرايب والصحاب فالشباب يسئلوا نفسهم وانا مالي ما كنت في حالي ومحلاها عيشة العزوبية.....يابنتي سيبك منهم عاوزين يخربوا عليكي ياعزاب بنصحهم اهوووووو

من وجهة نظرك هل النكد موجود فى العزوبيه ام فى الزواج ؟ ولماذا ؟

النكد احنا الي بنصنعه بايدينا والله لو حتي علي كرسي العرش وحوالينا الخدم والحشم بس انا عاوزة انكد عليك هنكد والعكس صحيح النكد موجود في كل وقت ومش بيرتبط بحالة عازب ولا متجوز لكن ااقول ايه ماهو لو الواد عيان ومفيش فلوس لدكتور اكيد هتنكد ماهو لو الانبوبة خلصت ومفيش فلوس اكيد هتنكد وانت عازب لو عيان وتعبان ومش لقادر تقوم ومش لاقي الي يناولك كوباية ماية اكيد هتتنكد لو يوم العيد الصبح مالاقيتش حد يقولك كل سنة وانت طيب اكيد هتتنكد صحيح شيء جميل اننا نحلم ان حياتنا تكون حياة كريمة لكن برده الصبر جميل ممكن بطبق مش ورغفين عيش بس القلوب راضية نعيش احلي حياة.

المشكلة الووووووحيدة هي التربية من شب علي شيء شاب عليه

نفسي كل زوجين يغنوا الاغنية ديه

وهي هتبعد عنهم النكد

وانا وايااايا بعيش زي المليونيرات واحلم وانا معاييش ملعنش الازمات

مع تحيات مدحت صالح

ونحلم بقي

وخلوها علي الله

والله ربنا كبيرررررررررر ومابينسي حد


ما الحل من وجهة نظرك لمشكلة (( العزوبية )) فى مصر ؟؟


حلول عملية وسريعة بقي

اولا نلغي الشبكة وده طبعا لغير القادرين فقط لكن اللي معاه و قال بركة ياجامع يبقي بررررررررة
ونكتفي بدبلتين محفور عليهم اسامينا واهو ياسيتي الاكسسورات مالية البلد وحتي شكلها احلي

ثانيا مش لازم الشقة تكون علي النيل واربع مطارح وعفشة ماية مالها الاوضيتين وصالة يعني المهم تجمعهم سوي في الحلااااااااااااال

ثالثا ودي للاهالي اتقوا الله في بناتكم دي مش بيعة وشروة هتدوها لليدفع اكترررررررر تخيرواااااا فان العرق دساااااااس يكفيها انها اتجوزت راااااااااااجل مش بيحط جل في شعره مع احترامي للجل والجلاللين طبعا وياريت كلمة الاب ترجع تاني اهم شيء هو انك تسعد بنتي بدل الكلمة اللي بقت اليومين دول معاك كام وعندك ايه


رابعا
يابنتي ارضي وبلاش تنكدي علي الراجل الغلبان وسيبك من الهدايا والاعياد والمناسبات وركزي في بيتك محتاج ايه ده الاهم وارضي بوردة ولا دبدوب ياسيتي ان شا الله حتي سندوش فول وطعمية كباب شعبي يعني المهم تكونوا سوي سعدااااااااااء


خامسا الايمان التام ان انا وانت واحد مفيش فرق عارفين طبعا ان الحياة صعبة واهو كل واحد بيتعب عشان يسعد التاني بمعني اوضح لو معايا وانت محتاج مش هتردد اديك عنييا ولو انت معاك وانا محتاجة ارجووووووووك ماطنشنيش واهو كله ينقط بطاقيته زي مابيقولي

سادسا الي يعرف حلول تانية يكتبها وادينا بندردش ورانا ايه ورانا ايه واللي معترض علي كلامي برده يقووووول


من وجهة نظرك ....هل للعزوبية مميزات وعيوب ؟؟؟

مميزاتها روقان البال جايز واهو محدش هيقولك هات لكن ياتري سعيد مرتاح ؟؟؟؟؟؟؟؟؟؟؟؟؟

عيوبها بقي العمر هيجري بيك تخيل كدة فيما بعد لما تكبر تبص حواليك تلاقي نفسك وحييييييييد محدش قالك كلمة بابا
قتلت جواك اسمي وانبل المشاعر واهمها الحب والاسرة والعزوة والعيلة

عاوزة ااقولك ايها العازب ان الحياة تعب ومشقة وصدق الله العظيم حينما قال لقد خلقنا الانسان في كبد

سواء عازب ولا متجوز اكيد في تعب والم لكن لما تضايق تلاقي ايد حنونة بطبطب عليك لما تمرض تلاقي صدر حنون بيحس بيك لما
ا تضحك تلاقي ابتسامات محوطاك وبراءة ولادك بتاثر فيك هنا بس هتحمد ربنا ولو عندك مشاكل الدنيا هتفتكر قول
الخالق العظيم

انما يوفي الصابرون اجرهم بغير حساب

واهو تتقابلوا في الجنة علي صبركم وتعيشوا احلي حياة حياة الخلووووود


ماهو رأيك فى انشاء مدونة (( رابطة )) للعزاب من المدونين ؟؟؟


لاء انا رايي ننشيء مدونة ((رابطة))الراغبين في الزواج من المدونين

عندنا عروض مغرية

بأقل تكلفة ممكنة

رجالة بجد محترمين جداا وملتزمين جدااا

وبنات مهذبات

متربيات علي الصبر والتحمل

واحترام شريك الحياة

وكمان مش عاوزين شبكة

دول حتي بيغنوا اغنية جميلة قوي

مش عاوزة مهر ياقوت او ماس

ولاعاوزة مال متعبي أكياس

ده كفاية سيرته مابين الناس

وايمانه بالله يكفيني

حاسة اني انفع خاطبة.....ايه رايكم؟؟؟؟؟؟؟

أخيرا ...لمن تمرر هذا التاج ...على الأقل خمسة ؟؟؟


لكل المدونين والمدونات المتزوجين والمتزوجات العازبين والعازبات

ويارب كل الناس تتجوز خلوا الدنيا تخف بقي

اصلها بقت زحمة قوي

واسفة لوطولت عليكم

بس اعمل ايه لما بتفتح في الكلام

صعب حد يوقفني

تحيااااااااااااااااااتي

ولو عجبكم كلامي

يبقي للحديث بقية

وكل الي عاوزه ياخده







هناك 24 تعليقًا:

قلب أبيــض يقول...

اول تعليق
لاجمل مدونة ...فى عالم التدوين


بجد انتى مبدعة يا اخت بطة


ربنا يزيدك ويحفظك


وااباتك تحفة ...وعجبتنى جدا


بسم الله ماشاء الله


بارك الله بكم اختى

NO PROBLEM يقول...

ابنى العزيزة واختى الغالية بطة

يسلم فمك كده بالعامية التى لاأحبذها ولكن وقد سبق ان ناقشت هذه القضية على مدونتى مشكلة المشاكل التى انشأتها أصلا لحل مشاكل الزواج والمتزوجين والمقدمين على الزواج والراغبين فى الزواج ولكن لاسباب خارجة عن ارادتى لم يكتمل بناء المدونة وتحولت عنها لطرقعات فجائية على مكتوب ولكن كلامك هز مشاعرى وحرك احساسيسى القديمة نحو انشاء مجتمع مستقر فى اطار ماحدده لهم الله تعالى جل فى علاه وقد تناقشت معك مرارا وتكرارا فى هذه القضية وناقشتها اكثر من مرة فى مدوناتى وياريت كل اب وكل ام وكل شاب وكل شابة يفكر فى كلام بطة ويحاول يعمل اللى ربنا يقدره عليه منه

ولك تحياتى وخالص دعواتى ومرة أخرى يسلم فمك وقلمك يابطوط

وتقبلى تحياتى ويارب كل شاب وكل شابة يتجوزوا يارررررررررررررررررررررررررررررب

مع خالص تقديرى طارق الجيزاوى

مدحت محمد يقول...

بطة
والله محدش مرتاح فى حاله ولا المتجوز ولا
العازب
العيشة اللى احنا فيها والغلا ده
محدش يقدر يقول انه مرتاح صدقينى
وبتفق معاكى انى طلبات
اهل العروسة بجد تقطم
وبستغرب اوى
من اللى يعجزو العريس بالشكل ده
ويطلبو فى بنتهم الكتير
اه حقهم يطلبو بس مش للدرجة اللى تكسر
تحياتى ليكى

Hosam Yahia حسام يحى يقول...

ممممممممممممم


ماشاء الله اجابات رااائعه بجد


تحياتى القلبيه لكل العازبين

وابقوا قابلونى لو اتجوزتم

اقصد قابلونى فى افراحكم

يورو يقول...

هههههههههه
انتى عسل يا بطوط
بس الاغنيه دى ممكن فعلا واحده فى الزمن دا تغنيها

انا موافقه على اقتراحاتك كلها
بس يبئا فى ضمير

يعنى مش واحد يحس انه ممكن يتقدم لواحده بس بدبلتين ويبقى الموضوع عادى
فيخطب كل واحده شويه
والغرامه تبقى مجرد دبلتين

يبقى فى ضمير
ومراعاه لربنا

أحمد سعيد بسيوني يقول...

بسم الله
اجابات في الصميم
زادكم الله
تقبلوا خالص تحياتنا

محمد المهدي يقول...

ربما عليّ في البداية أن أشكر الله تعالى أن وفقني للاشتراك في هذه المجموعة الفعالة من مدونين من أجل التغيير . فبريدكم الذي أتلقاه دوما كان له من الأثر الكبير في تعرفي إلى كثير من أمور طالما وددتُ معرفتها والاقتراب من حقيقتها .
بالطبع هناك أمورٌ أختلف بشأنها مع كثير من الأعضاء ، إلا أن الأغلب هو اتفاق تام فيما تطروحنه من قضايا وآراء .

أما بالنسبة لإجاباتك عن أسئلة التاج هذه ، فأرى أن واقعيتها ومصداقيتها هما السمتان الغالبتان فيها . ولستُ أملك من الحديث ما أزيد به على ما قلتيه ..
ربما فقط لو ألحقتُ صوتي برَكبِك إلى كل أب وأم بأن يتقوا الله في أبنائهم ذكرانا كانوا أو إناثا . فالرسول الكريم (صلى الله عليه وسلم) قال " إذا أتاكم من ترضون دينه وخلقه فزوجوه ، إلاّ تفعلوا تكن فتنة في الأرض وفسادٌ عظيم " صدق رسول الله .
وأعتقد أننا اكتوينا مما نراه ونشمه ونحسه من فساد أسود داكن ..
فلو أننا سرنا على نهج هذا الحديث لتغيرت حالنا تماما . ولكن الحياة بسرعتها وشراستها تمكنت منا وجعلتنا نلهث ورائها غير عابئين بقيمنا ومبادئنا التي نطؤها بأقدامنا في ركضنا المحموم هذا ..

وإلى كل فتى وفتاة ..
اتقوا الله في آبائكم كذلك ، فحسن اختياركم أو سوءه سينعكس بالإيجاب أو بالسلب عليهم لا محالة .
لا تتعجلوا ، واعلموا - بتجربة يقينية - أن النصر مع الصبر . وأنّ الله لن يضيع أجر من أحسن عملا ..
وثقوا أيضا ...
بأن الله تعالى لن يغير ما بقوم حتى يغيروا ما بأنفسهم . فأصلحوا نواياكم واجعلوا الإخلاص تاجها وسوف يغنيكم الله من فضله ..

أحسنتِ يا بطة ..
وفقك الله لما فيه الخير ..
وفي انتظار المزيد بإذن الله ..

محمد المهدي
Deepvision.jeeran.com

YHYيــوســف الـمصـرى يقول...

السلام عليكم ورحمة الله وبركاته
...........................
بطوط بنت بلدى :) والى مقصر معاها
والى ديما بتحرجنى بذوقها وبتزور مدونتى ديماً ..

التاج لذيذ واجاباتك مقنعة ;)
هما كل الدمايطة كده مقنعين هههههههههه
تحياتى
:)

غير معرف يقول...

بطوط روح قلبى
اجابتك رائعه يابطه دايما فى المركز الاول
تحياتى
جيجى

بنت الاسلام يقول...

قلب أبيض

التاج تاجك

واحنا مجرد اجابات

ربنا يكرمك علي كلماتك الطيبة

الي اتمني ان استحقها

تحياتي

appy يقول...

امممممممممممم
تنفع خرفانى بس تجاوب عليه مش انا ههههههههههههه

حلوة يا بطوطه دبلوماسيه طول عمرك هههههههه

وائل المصري يقول...

السلام عليكم
احيكي علي هذا الموضوع الجيد
اكيد ليست العزوبية تاج ولا حاجة خالص لان الزواج نصف الدين كما قال سيد الخلق محمد(ص) .. المشكلة هي في البطالة الكبيرة في المجتمع والمغلاة في المهور وتلك الامور الي حد التعجيز .. واصبحنا لا ننظر الي الشروط الاسلامية في اختيار سواء الوج او الزوجة . فقط الان الوجاة ودي ابن كذا او شغال في كذا فقط وننسي الباقي وهذا خطأ كبير وسبب كبير في المشاكل الزوجية .
ندعوا الله لكل من لم يتزوج بالزواج . ولا نقول اني فقير كيف سوف اتزوج الزواج ممكن ان يكون سبب في تحسن الحال كما قال الرسول الكريم عندما اتي الية رجل وقال لة اني فقير فقال لة تزوج ولما تزوج رجع لة وقال اني فقير قال تزوج الي ان اتمهم الاربعة ولم يعد علي الرسول الي بعد سنتين محمل بالهدايا لة وللصحابة وقال ان الله رزقني بسبب الزواج ..
وسلاماتي

بنت الاسلام يقول...

no proplem

استاذي الغالي طارق الجيزاوي

اشكر لحضرتك ثنائي علي موضوعي

وان شاء الله حضرتك تستمر في طرح القضايا الاجتماعية وطرق حلولها

وانا تحت امر حضرتك في اي حاجة

ويااااااااااااارب كل الناس تتجوز ويبقوا سعداااااااااااء

تحياتي

بنت الاسلام يقول...

مدحت محمد

الرحمة حلوة

ولو اخدنا الحياة ببساطة

وتقبلنا اوضاعنا كما هي وكيفنا حياتنا عليها مع سعينا المستمر للافضل

اكيد الحياة هتبقي حلوة

ويارب نسمع عنك اخبار كويسة عن قررررررررررريب

تحياتي

بنت الاسلام يقول...

حسام يحيي

ركز انت في مذاكرتك ياولد

ومش هتاكل تورتة تاني بقي

تحياتي

بنت الاسلام يقول...

يوروووووو

منورة ياقمر

انا بقول لو اخترت راجل صح

يبقي شبكتي الي هي المفروض هديتي اكيد هووووو

ودبلة بقي مايضرش


عقبالك ياقمر

بنت الاسلام يقول...

احمد سعيد بسيوني

مرورك شرفنا وزادنا بركة ياريت تقبل التاج

تحياتي

بنت الاسلام يقول...

استاذي محمد المهدي

اكيد الشرف لينا اشتراك حضرتك في مجموعتنا البريدية المتواضعة

كسبنا عقل ناضج متفتح كلماته لينا نصائح غالية

يشرفني التواصل مع حضرتك


تحياتي

بنت الاسلام يقول...

يوسف المصري

ابن بلدي زيارتك ازالت كل تقصير

واتفضل التاج هدية ياسيدي

تحياتي

بنت الاسلام يقول...

جيجي

كفاية انك زرتيني وطمنتيني عليكي

ارجعيلنا بقي

محتاجينك

ومنتظرينك

مهما طال الزمن

خدي بالك من نفسك

تحياتي

بنت الاسلام يقول...

appy

بالتاكيد مش احلي منك

ومنتظرين ردود خرفانك بفارغ الصبر

نورتيني

تحياتي

بنت الاسلام يقول...

وائل المصري


اشكر لحضرتك تواجدك الطيب


وربنا يصلح الاحواااااااال

تحياتي

Hosam Yahia حسام يحى يقول...

مستنين مواضيعك الجديده

ده شعورى وانا باكتب التعليق دا بجد
:(

Grogal يقول...

SECURITY CENTER: See Please Here

مصر