الهي ماعدت أبغي شيئا في هذه الحياة سوي عفوك ورضاك

الجمعة، 13 فبراير 2009

هما الــي اختـــــشـوا ماتــوا ؟



زمان ياجدعان في خبر كان وكان كان المجتمع قبل مانقرا عليه الفاتحة كل صباح عنده شوية دم خشي او زي ما احنا بنعرفه حياء يعني دلوقتي بقي كل شيء ايزىىىىىى تلاقيه يقولك والبسمة علي شفايفه أنا حرامي ..وأفتخر والغريب ان اللي بيسمعه مابقاش بيتعجب له كأنها مهنة حلوة وممكن تلاقيه في نفسه بيقول وهو متحسر علي نفسه يا بختك

زمان كان العيل من دول بتاع 16 سنة اما يحب يصيع بقي ويعمل فيها كبير يشتري لك علبة سجاير يتمنظر بيها قدام صحابه و قبل مايطلع البيت يطمن انه تخلص من كل البلاوي الزرقا اللي معاه انما أباء العصر الحديث الاباء الاسبور زي مابيسموهم يصحي من النوم الصبح علي الفطار يشرب فنجان القهوة وبابتسامة الصباح المشرقة ينده علي ابنه عشان يسلفه سيجارة من معاه وابنه مايديهالوش كده بالساهل لاء لازم ياخد قصادها تمن علبة والاب الطيب الحنون اللي مابيحرمش ابنه من حاجة يعطي له كل مايري


زمان كان اللسان عفيف وكانت البنت برة البيت زي جواه ملاك تشوفها تتعجب وتقول ياجمال أدبك وأخلاقك لسانها مش عليه غير كلام طيب وحلو تعالي بقي اتفرج علي شباب اليومين دول وخصوصا في المدارس الاعدادي والثانوي البت من دول تبقي النجمة الستار لما تشتم شتايم متنقية وبنت كذا وابن كذا علي لسانها ياسلام دي بت جامدة قووووووي وتلاقي كل الفصل بيتمني يبوس تراب رجليها ويخطب ودها ولما تتمادي بقي وتقل أدبها علي المس ولا المستر الغلبان أوبااااااا كده تربعت علي عرش المدرسة وتتعرف بالاسم ويتشاور عليها بالصابع وتاخد قلم في نفسها ماهي فاقت زويل في أدبه قصدي في علمه وتمشي تقول للارض اتهدي ماعليكي أدي

زمان كان العلم له هيبة والمتفوق تتهز له الدنيا دلوقتي بقي اللي بيذاكر نكرة والعيال تتجنبه واوعوا تكلموه ده واد شاطر ولا بت شاطرة ممكن تتعدوا منه ياخرابي وأجمل لحظات بقي أيام الامتحانات قبل دخول لجنة الامتحان تلاقي البنات واقفين برة وتسمعها تقولك والله مافتحت كتاب طول الليل عمالة اتفرج علي مسلسل نور وأعيط أعيط يخلص ااقلب اشوفه علي قناة تانية فمعتمدة علي ربنا ثم عليكم طبعا في الغش ترد التانية تقولها والله ياحبيبتي الحال من بعضه بس اطمني معايا برشام مايخرش الماية خلاصة المنهج وعصارته يطمنوا بقي ويخشوا يغشوا وينجحوا ويطلعوا سنة جديدة وهما لا مؤاخذة طور الله في برسيمه

زمان ومش زمان قوي يعني كنت تقعد تتفرج علي التلفزيون لو لاقيت منظر مش ولا بد من غير ماتفكر ياتقفل التلفزيون ياتحول القناة وتغض بصرك فورا وتقول بغضب استغفر الله العظيم يارب دي مناظر يجيبوها في التلفزيون ديه لكن تعالي بقي وحدث ولا حرج عن الايام دي ايام الفضائيات وما ادراك ما الفضائيات المشاهد تجاوزت اي مدي مسموح بيه وتلاقي العيال قاعدين يبرقوا أه وربنا بلا مبالغة هما اساسا مستنيين المشهد ده من الفيلم كله ولو لا سمح الله حد لسة عنده خشي ودم وشخط فيهم وقالهم عيب كده ااقلبوا ياكلووووووه بلا مبالغة ياكلوووووه وتلاقي اللي يقولك دي مشاهد عادية مافيهاش حاجة انتي اللي متخلفة ومن العصر الحجري

زمان كانت الام الحكيمة تخاف علي بنتها وتنصحها من صغرها معرفاها انها كنز ثمين لازم تحافظ علي نفسها بالعفة والطهارة لغاية مايجي ابن الحلال اللي يصونها ويحتويها كانت زارعة في قلبها حب الصلاة تلاقيها وهي لسة بتتعلم المشي واقفة جنبها علي السجادة تصلي ولابسة الطرحة وهي فرحانة بيها واول ماتكبر من نفسها تنزل تشتري الطرحة وتغير لبسها للبس الشرعي وتحافظ علي الصلاة والقران اما دلوقتي بقي فلا زالت نصائح الام موجودة ولكني أتساءل أين ذهبت الحكمة؟ لو لاقيتها لابسة بنطلون واسع شوية تقولها حبيبتي مش شايفة ان البنطلون واسع شوية؟ لو لاقيتها نازلة من غير ماتلخبط وشها تقولها قبل ما تنزل حبيبتي انتي نسيتي تحطي الميك اب بتاعك ولا ايه؟ لو لاقت البت كبرت ومصممة تتحجب تقولا حبيبتي انتي لسة صغيرة ماتخنقيش نفسك دلوقتي ؟ ام حكيمة برده ولكن حكيمة عيون

الموبايل وما أدراك ما الموبايل أنا أعتقد أنه أصبح أفة العصر الحديث مفيش عيل فيكي يامصر من سن 5 سنين فيما طالع الا والموبايل بقي في ايده والسماعت في ودانه تلاقي الواد رايح الدرس وبدل مايحط دماغه في الكتاب يحفظ له كلمتين ينفعوه لاء السماعة في ودانه يسمع لك اخر اغاني هيفا ونانسي لاء والاخطر بقي والمصايب الفيديوهات الي بقت متداولة علي الموبيلات والله أكتر من مرة الاقيلك مجموعة عيال وربنا مايزيدوا عن 11 سنة متجمعين في الشارع وواحد فيهم عمال يفرجهم علي فيديوهات وانا بتساءل ياتري بيفرجهم علي اييييييييه حد عارف؟


لو فضلت أعدد في اللي كان واللي لم يعد يكون مش هنخلص لكن خلاصة القول ممكن نتساءل

هما اللي اختشوا ماتوا ؟

تحياتي






هناك 51 تعليقًا:

محمود الششتاوي يقول...

مبارك

طرقعات فجائية يقول...

الاخت العزيزة بطة

السلام عليكم ورحمة الله وبركاته

للاسف اذا ذهب الحياء ذهب الدين واذا ذهب الدين ذهب كل شيىء وانهار المجتمع ايضا وهذا هو مانعيشه حاليا من انهيار للقيم والمبادىء والاخلاق ففعلا قل على الدنيا السلام

ولك تحياتى
اخوكم طارق الجيزاوى

ميرا ( وومن ) يقول...

يا بطوطة دي بقت مهزلة خلاص الموازين اتقلبت

ربنا يستر

تحياتي يا قمر علي البوست الجامد

محمد مارو يقول...

ده زمااااااااااااااااااااااااان

الفرق بين الان و زمان فرق شااااااااااااااسع


زمان كان الخير كله

الان مفيش خير

زمان كان الاسلام اقوى
الان الاسلام اضعف للاسف

عالم حبيب يقول...

الله المستعان .. مقارنة تدمي القلب .. ياريت الزمن ده يرجع تاني .. أيام كانت البراءة تسكن القلوب والناس كبيرهم وصغيرهم في قلوبهم حب لله .. جزاكي الله كل خير

موناليزا يقول...

هل تعلمين قصة هذا المثل"اللى اختشوا ماتوا" اجدها مناسبة للتعليق على هذا الموضوع
"كان زمان النساء بتذهب لحمام بغرض التجميل ذى بيوتى سنتر دلؤتى وفجأة شبت النار فى الحمام وماكان من النساء الا ان خرجوا عرايا الى الشارع والباقى ماتوا لانه عندهم حياء واتكسفوا يطلعوا الشارع كده"

آلاء محى يقول...

تصدقى يابطة

ان شر البلية مايضحك

وزمان مش بعيد اوى

ده كان لسه مفيش

رحم الله الحياء

الا من رحم ربى

Kiara يقول...

لو كدا يبقي اه ماتو

************

من الواضح اني كل يوم بكتشف حاجات هو انا مش كنت عايشه ولا ايه

blue-wave يقول...

اذا لم تستح فافعل ما شئت

Unknown يقول...

السلام عليكم
كيف حالك اختى
اقولك نعيب على الزمان والعيب فينا
وما لزماننا عيب سوانا
ببعد عن الله
بنسيان الاخلاق
بالسكوت على الغلط والسلبية
بتلبيس الحق بالباطل والعكس
ولا حول ولا قوة الا بالله

المحرر يقول...

قل للزمان ارجع يا زمان !!!!!!
مجهود ممتاز ارجوا لك الاستمرارية

حسن حنفى يقول...

يااااااااااااااه

ربنا معاكي انتي لسه عارفه دول ميتين من زمان

مش بقي فيه منهم الا قليل

عمله نادره يعني

وردشان smilyrose يقول...

بطوط

كل سنة وانتى طيبة

ههههههههههههههههه

حبيبتى انتى كنتى فين

الله يرحم دا كله

دا كان زماااااااااااااااان

مبقاش الكلام دا

وبعدين هما ماتوا من زمان

كله راح يا حبيبتى الصغيرة

كله اتمسح بمية نااااااااااار

مش بقالوا وجود

ربنا يرحمنا

المهم هابى فالنتين


بالعربى

ههههههههه

smilyrose

روح الحب الصادق

kochia يقول...

اذا كان ده سؤال بجد
احب اقولك
وبكل ثقة

فعلا
اللي اختشوا مــــاتــــوا

مختار الجندى يقول...

مرت فتره طويله ، لم اكتب تدوينات أو اعلق ، ومر الكثير منذ اخر تعليق لى فى مدونتك بنت الاسلام ولكن لايزال اسلوبك المتميز فى الكتابه يستدعى اعجابى وانبهارى .

تمنياتى لك بمزيد من التميز والنجاح

mohamed ghalia يقول...

عندك حق معدش فيه حياء
زى مبقاش فيه حاجات كتير اختفت من مجتمعنا
ربنا يستر علينا
دمتى بكل الود

kochia يقول...

اذا كان ده سؤال بجد
احب اقولك
وبكل ثقة

فعلا
اللي اختشوا مــــاتــــوا

محمود الششتاوي يقول...

مبارك

moubarak

ريمان يقول...

للاسف يا بطه

ده الواقع


بقينا بنعانى من البجاحه فى الزمن ده

الله المستعان

ربنا يحفظنا

Heba Sayed يقول...

والله عندك حق اللى اختشوا ماتوا


بوست رائع بجد وفعلا بيحصل اكتر من كده

ياريت شتايم فى المدارس وبس

ربنا يهدى الجميع

hasona يقول...

السلام عليكم

اللي اختشوا ماتوا - او انقرضوا - او مستخبين شوية
لغاية ما نشوف اخرتها ايه ؟؟؟

،،،
حضرتك قولتي أحد الاسباب - الام عندما تعلم أولادها في مدرستها فكيف ستربي هذا النشأ
وفي الاخر نري النتيجة علي الابناء في حركتهم اليومية

اذا ما نراه اليوم هو تربية الامس
الام والاب لهم دورا كبير
ومن ثم دور الاسرة ثم المجتمع
،،،،
نتمني أن يفيقوا قريبا
قبل ضياع بقية الاخلاق

تحياتي

نور الاسلام يقول...

السلام عليكم

معاكي حق والله يا قمر

بس مش كلهم طبعا
دا احنا في زمن العجاااااااااااااااايب
اغلي ما نملك هو الحياء وخصوصا البنت
بس نقول ايه والله ماعاد حد مهتم غير بالبس والشكل والميك اب وشعره وشعرها
يلا بقي تفاهات بجد

ربنا يرحمنا يارب ويهدينا

والله انتي عثل عثل عثل وثكرررر كمان
والله ياريتك تبقي مدرسة عندنا يا بختهم والله اللي انتي بتدرسيلهم

ومن نحية اللي اختشوا ماتوا فعلا والله بس لسه فيه شويه والله بيبقوا نادرين نحن في زمن الفتن علشان كدا الجليس الصالح والصداقه الصالحه هم خير وسيله للتغلب علي هذا الزمن لكن مين يسمع فعلا لما نيجي ننصح حد يقولوا انتي من العصر الحجري

يلا بقي حسبنا الله ونعم الوكيل ربنا يحفظنا يارب
ربنا يكرمك يا قمر

في رعاية الله
يارب تقدميلنا دايما كل جديد بجد ما شاء الله عليكي متميزه وممتازه
السلام عليكم

بنت الاسلام يقول...

محمود الششتاوي

مبارك عاملك ازمة مزمنة يامحمود

نفسي اعيش واشوفها اتفكت

هههههههههه

تحياتي

بنت الاسلام يقول...

استاذ طارق

الحياء نصف الايمان

وفعلا ان لم تستحي فافعل ماشئت

ياريت قيمنا وحمرة خجلنا ترجع لنا تاني

تحياتي

بنت الاسلام يقول...

وومن

المهازل مابقاش لها حد

نورتيني ياجميل

بنت الاسلام يقول...

محمد مارو

ان شاءالله بينا هيعود اقوي واقوي

تحياتي

بنت الاسلام يقول...

عالم حبيب

قول للزمان ارجع يازمان

جزانا واياكم

وضيف دائما غالي علي مدونتي

تحياتي

بنت الاسلام يقول...

موناليزا

سمعت القصة دي فعلا قبل كده

في الزمن ده بقي هما خرجوا عرايا فعلا

لكن من غير مايكون في نار ولا حريقة

تحياتي

بنت الاسلام يقول...

الاء محي

التغيير عندنا مفيش اسرع منه في الخراب والفساد

انما في العمار بطء بطء السلحفاة

تحياتي

بنت الاسلام يقول...

كيارا

ولسة ياما هتشوفي

اصحي بقي وفووووووووقي

تحياتي

بنت الاسلام يقول...

blue-wave

اكتر من كده اشياء؟

تحياتي

بنت الاسلام يقول...

نهر الحق

معاكي حق

تحياتي

بنت الاسلام يقول...

مدونة الاحرار

اشكرك للاشادة

واتمني التواصل

تحياتي

بنت الاسلام يقول...

حسن حنفي

فعلا عملة نادرة

تحياتي

غير معرف يقول...

أمانى

مهو لما الناس تبعد عن دينها يابطه كل حاجه بتتشوه حتى الحياء بقى الايام دى شىء غريب يعنى الغريب انك تلاقيه دلوقتى الزمن مش بيتغير احنا الى بنتغير

حاجات جوايا يقول...

ههههههههه
ياااااااااه انتى لسه فاكرة يا بطوط
على راى ثومة
" عايزنا نرجع زى زمان .. قول للزمان ارجع يا زمان "

والله يا بنتى انا شايفة المشكلة الحقيقة فى جيل الاباء الحالى

بجد مش عارفين يربوا
زى ما تقولى كده متعقدين من معاملة ابائهم الناشفة ليهم وهما صغيرين وبيعوضوا ولادهم بالدلع
وللاسف ده بيفسدهم مش بيصلحهم


المهم فين هدية دودو ؟؟؟
ايه العرايس اللى مش بيحتفلوا بعيد ميلاد عرسانهم دول ؟؟
بنات اخر زمن
صحيح اللى اختشوا ماتوا
ههههههههههههههه

aidy يقول...

دى اول زيارة ليا هنا

بصراحة عجبتنى المدونة

بس انا شايفة ان الدنيا زمان زى دلوقتى مع اختلاف الطابع

يعنى طول عمرنا فى صراع ما بين الخير والشر فى الدنيا من اول ما بدأت

والصراع مش هينتهى الا بإنتهائها

معنى كده ان زى ما فى عدم حياء وشر

فى ناس لسة محتفظة ببرائتها وقيمها

تحياتى ,,

محمود الششتاوي يقول...

مبارك
مبارك
مبارك
مبارك
مبارك
مبارك
مبارك
مبارك
مبارك
مبارك
مبارك
مبارك
مبارك
مبارك
مبارك
مبارك
مبارك
مبارك
مبارك
مبارك
مبارك
مبارك
مبارك
مبارك
مبارك
مبارك
مبارك
مبارك
مبارك
مبارك
مبارك
مبارك
مبارك
مبارك
مبارك
مبارك
مبارك
مبارك
مبارك
مبارك

بنت الاسلام يقول...

smilyrose

كله راح

كله ضاع

كله اتكسر

كله اتغير

ههههههههههههه


هابي فلانتين ياجميل

ونورتيني

بنت الاسلام يقول...

kochia

اجابة واقعية

تحياتي

بنت الاسلام يقول...

مختار الجندي

سعيدة بعودتك للتعليق عندي يامختار

ودايما تتواجد معانا باستمرار

تحياتي ليك

بنت الاسلام يقول...

mohamed ghalia

عندي امل ترجع تاني

بينا

تحياتي

بنت الاسلام يقول...

محمود الششتاوي

واضح ان مبارك عاملك ازمة نفسية بكل اللغات

تحياتي

مش ليك لوحدك

تحياتي

بنت الاسلام يقول...

ريمان

هي بجاحة بعقل

؟

نورتيني ياجميل

بنت الاسلام يقول...

Heba Sayed

ما انا ماحبتش افسر بقي علي البلاوي اللي بقت بتحصل في المدارس ياهبة

ربنا يحفظنا

نورتيني بالزيارة

واتمني التواصل

تحياتي

بنت الاسلام يقول...

حسونة

هي لو الام والاب فضلوا القدوة اللي كان بينظر ليها الطفل

كان ده بقي حالنا

تحياتي

بنت الاسلام يقول...

نور الاسلام

اختي الصغنونة اسراء ربنا يحميكي ياحبيبتي ويحفظك وتفضلي دايما متفوقة و متميزة

انتي ياستي اللي عثل وانا اتشرفت بمعرفتك كتير كتير وسلامي لوالدتك ياجميل

عاوزين نشوف مدونتها قريب

تحياتي

بنت الاسلام يقول...

اماني

احنا اللي بنتغير

وللاسوا

بنت الاسلام يقول...

حاجات جوايا

والله ما اعرف يا سالي ان عيد ميلاد دودو حبيبي جه

مش تقوليلي ياوحشة

اجيب له شيكولاتة واجي

كل سنة وهو طيب وعقبال ماتشوفيه احسن ابن في الدنيا يااااااااااارب

ربيه كويس وخليه شاب امور روش بس مؤدب وشاطر عارف اللي ليه واللي عليه

ربنا يجعله قرة عين ليكي يارب

بنت الاسلام يقول...

aidy

صح

الخير والشر وجهان لعملة واحدة علي مر العصور

لكن عندما يتحول ويري الناس الشر خيرا

فهذا هو الشيء المثير

والملفت للانتباه

تحياتي

بنت الاسلام يقول...

ششتاوي

مبارك بيقولك

الرحمة حلوة

ههههههههههههه

تحياتي

مصر