هما الــي اختـــــشـوا ماتــوا ؟

زمان ياجدعان في خبر كان وكان كان المجتمع قبل مانقرا عليه الفاتحة كل صباح عنده شوية دم خشي او زي ما احنا بنعرفه حياء يعني دلوقتي بقي كل شيء ايزىىىىىى تلاقيه يقولك والبسمة علي شفايفه أنا حرامي ..وأفتخر والغريب ان اللي بيسمعه مابقاش بيتعجب له كأنها مهنة حلوة وممكن تلاقيه في نفسه بيقول وهو متحسر علي نفسه يا بختك

زمان كان العيل من دول بتاع 16 سنة اما يحب يصيع بقي ويعمل فيها كبير يشتري لك علبة سجاير يتمنظر بيها قدام صحابه و قبل مايطلع البيت يطمن انه تخلص من كل البلاوي الزرقا اللي معاه انما أباء العصر الحديث الاباء الاسبور زي مابيسموهم يصحي من النوم الصبح علي الفطار يشرب فنجان القهوة وبابتسامة الصباح المشرقة ينده علي ابنه عشان يسلفه سيجارة من معاه وابنه مايديهالوش كده بالساهل لاء لازم ياخد قصادها تمن علبة والاب الطيب الحنون اللي مابيحرمش ابنه من حاجة يعطي له كل مايري

زمان كان اللسان عفيف وكانت البنت برة البيت زي جواه ملاك تشوفها تتعجب وتقول ياجمال أدبك وأخلاقك لسانها مش عليه غير كلام طيب وحلو تعالي بقي اتفرج علي شباب اليومين دول وخصوصا في المدارس الاعدادي والثانوي البت من دول تبقي النجمة الستار لما تشتم شتايم متنقية وبنت كذا وابن كذا علي لسانها ياسلام دي بت جامدة قووووووي وتلاقي كل الفصل بيتمني يبوس تراب رجليها ويخطب ودها ولما تتمادي بقي وتقل أدبها علي المس ولا المستر الغلبان أوبااااااا كده تربعت علي عرش المدرسة وتتعرف بالاسم ويتشاور عليها بالصابع وتاخد قلم في نفسها ماهي فاقت زويل في أدبه قصدي في علمه وتمشي تقول للارض اتهدي ماعليكي أدي

زمان كان العلم له هيبة والمتفوق تتهز له الدنيا دلوقتي بقي اللي بيذاكر نكرة والعيال تتجنبه واوعوا تكلموه ده واد شاطر ولا بت شاطرة ممكن تتعدوا منه ياخرابي وأجمل لحظات بقي أيام الامتحانات قبل دخول لجنة الامتحان تلاقي البنات واقفين برة وتسمعها تقولك والله مافتحت كتاب طول الليل عمالة اتفرج علي مسلسل نور وأعيط أعيط يخلص ااقلب اشوفه علي قناة تانية فمعتمدة علي ربنا ثم عليكم طبعا في الغش ترد التانية تقولها والله ياحبيبتي الحال من بعضه بس اطمني معايا برشام مايخرش الماية خلاصة المنهج وعصارته يطمنوا بقي ويخشوا يغشوا وينجحوا ويطلعوا سنة جديدة وهما لا مؤاخذة طور الله في برسيمه

زمان ومش زمان قوي يعني كنت تقعد تتفرج علي التلفزيون لو لاقيت منظر مش ولا بد من غير ماتفكر ياتقفل التلفزيون ياتحول القناة وتغض بصرك فورا وتقول بغضب استغفر الله العظيم يارب دي مناظر يجيبوها في التلفزيون ديه لكن تعالي بقي وحدث ولا حرج عن الايام دي ايام الفضائيات وما ادراك ما الفضائيات المشاهد تجاوزت اي مدي مسموح بيه وتلاقي العيال قاعدين يبرقوا أه وربنا بلا مبالغة هما اساسا مستنيين المشهد ده من الفيلم كله ولو لا سمح الله حد لسة عنده خشي ودم وشخط فيهم وقالهم عيب كده ااقلبوا ياكلووووووه بلا مبالغة ياكلوووووه وتلاقي اللي يقولك دي مشاهد عادية مافيهاش حاجة انتي اللي متخلفة ومن العصر الحجري

زمان كانت الام الحكيمة تخاف علي بنتها وتنصحها من صغرها معرفاها انها كنز ثمين لازم تحافظ علي نفسها بالعفة والطهارة لغاية مايجي ابن الحلال اللي يصونها ويحتويها كانت زارعة في قلبها حب الصلاة تلاقيها وهي لسة بتتعلم المشي واقفة جنبها علي السجادة تصلي ولابسة الطرحة وهي فرحانة بيها واول ماتكبر من نفسها تنزل تشتري الطرحة وتغير لبسها للبس الشرعي وتحافظ علي الصلاة والقران اما دلوقتي بقي فلا زالت نصائح الام موجودة ولكني أتساءل أين ذهبت الحكمة؟ لو لاقيتها لابسة بنطلون واسع شوية تقولها حبيبتي مش شايفة ان البنطلون واسع شوية؟ لو لاقيتها نازلة من غير ماتلخبط وشها تقولها قبل ما تنزل حبيبتي انتي نسيتي تحطي الميك اب بتاعك ولا ايه؟ لو لاقت البت كبرت ومصممة تتحجب تقولا حبيبتي انتي لسة صغيرة ماتخنقيش نفسك دلوقتي ؟ ام حكيمة برده ولكن حكيمة عيون

الموبايل وما أدراك ما الموبايل أنا أعتقد أنه أصبح أفة العصر الحديث مفيش عيل فيكي يامصر من سن 5 سنين فيما طالع الا والموبايل بقي في ايده والسماعت في ودانه تلاقي الواد رايح الدرس وبدل مايحط دماغه في الكتاب يحفظ له كلمتين ينفعوه لاء السماعة في ودانه يسمع لك اخر اغاني هيفا ونانسي لاء والاخطر بقي والمصايب الفيديوهات الي بقت متداولة علي الموبيلات والله أكتر من مرة الاقيلك مجموعة عيال وربنا مايزيدوا عن 11 سنة متجمعين في الشارع وواحد فيهم عمال يفرجهم علي فيديوهات وانا بتساءل ياتري بيفرجهم علي اييييييييه حد عارف؟

لو فضلت أعدد في اللي كان واللي لم يعد يكون مش هنخلص لكن خلاصة القول ممكن نتساءل

هما اللي اختشوا ماتوا ؟

تحياتي