الهي ماعدت أبغي شيئا في هذه الحياة سوي عفوك ورضاك

الخميس، 27 نوفمبر، 2008

ظباط مصر بقوا عار علي مصر


ياصباح الاخبار العسل المدهونة بالقشطة والسمنة البلدي تفتح عينيك الصبح تدخل علي النت وانت بتشرب حاجة دافية وتقول لما ادخل اشوف الاخبار اخبار بلدنا الحلوة اللي زي ما الوطني بيقول عليها بلدنا بتتقدم بينا اول خبر سعيد مفرح مبهج يقابلك وفاة سيدة بأزمة قلبية بعدما هددها ظابط شرطة بخلع ملابسها وملابس بناتها امام اهالي القرية اذا لم تخرج السلاح ايه ده هو فيه ايه الشرطة بقت بتعمل فينا كده ليه هو مابقاش في كبير في البلد ديه يوقف كل واحد عند حده بقي كل واحد حاطط نجمة علي كتفه فاكر نفسه ملك والشعب عبيده يهين كرامة يجرح يضرب يهتك عرض ويلوث شرف بدون اي ضمير كل مرة نقول حالة فردية حالة خاصة في الشرطة وحرام ياجماعة تعمموا ان كان في ظابط وحش وابن ستين في سبعين فانظروا وتأملوا في الظباط الشرفاء الذين ضحوا بأرواحهم في سبيل ايه معرفش الصراحة جميل ما اختلفناش لكن كل يوم عن يوم يتثبت لنا ان الحالة مش فردية ومش خاصة لاء ديه حالات زادت وعادت وتجاوزت اي مدي يمكن حد يتحمله او يقبل بيه ياظباط امن الدولة وياوزير الداخلية احنا مش حيوانات عشان تعاملونا معاملة الحيوانات احنا مش عبيد عندكم وانتم الاسياد الست ديه اللي ماتت بازمة عشان خافت خوفها مش هيعدي عند ربنا بالساهل رعبها لحظةانا ببشركم انكم هتشوفوه كل لحظة هتعيشوهافي جهنم الحمرا ان شاء الله

ماهو مش صدفة ان جار متهم يضرب عليه نار في اسوان من يومين عشان رفض تفتيش بيته والراجل يموت ولا هو استثناء ان ميرفت عبد السلام مينيا الصعيد تموت من الضرب في مراكزكم اللي فاقت وبكل جدارة اعتي مراكز القوي في العالم ولا هو صدفة ان شاب 20 سنة زي المدون محمد عادل يختفي فجاة وبدون سابق انذار ولا حد عارف له طريق جرة


واضح انكم فقدتم السيطرة علي اعصابكم لاء والاهم انكم تجردتم من كل اخلاقكم قبل ماتجردوا بنات الناس من شرفهم وسترهم شوفوا انتم قلوبكم اتجردت من ايه شوفوا انتم حصلكم ايه انتم امن مصر؟ ظباط مصر؟ فخر مصر؟ رمز مصر؟ ولا وبدون زعل اعترفوا انكم بقيتم عار علي مصر ؟


انا من هنا وباسمي وباسم كل بنت شريفة حرة ابية مايهمهاش الموت ولا بتهاب من الخوف وهتدافع عن شرفها وبتعتبر شرف كل امراة عربية مسلمة مصرية جزء من شرفها اللي هو اغلي ما عندها بطالب كل مسئول عنده قلب وضمير ده اذا كان لسة فيه بطالب كل اب عنده بنت وكل ام ممكن تضعها الظروف ذات يوم في مثل ظروف هذه الام


ان تطالب باقالة وزارة الداخلية بداية من وزير الداخلية ونهاية باقل عسكري او حتي امين شرطة لانهم وبلا اي مجاملة لا يصلحون للدفاع عن شرف وطن لا بل يسعون يوما بعد يوم بتدنيس شرف اغلي مافي الوطن زهراته البريئة التي كانت مهمتهم السابقة الحفاظ عليه الا انه يبدو وفقا للتغيرات الجذرية التي طرأت علي بلدنا الحبيبة تحولت مباديء الدفاع عن الشرف لتصبح مباديء تدنيس الشرف وليس في حجرات مغلقة فقط امام بضعة من رجال الدفاع عن الشرف لا بل تجاوز بالطاغيين في قلوبهم كل المدي وبات التهديد علنيا امام الاهالي عيني عينك زي مابيقولوا و تحيا مصر برجال تدنيس الشرف

هناك 14 تعليقًا:

حسن مدني يقول...

في زمن مض
قال عمر بن الخطاب للقبطي "اضرب ابن الأكرمين" فضربه، ثم قال له "اجعلها على صلعة ابن العاص، فإنما ضربك بسلطانه"

وفي زماننا هذا نقول
"من أمن العقوبة أساء الأدب" وهكذا حال كل صاحب سطوة في غيبة القانون.

تحياتي

حاجات جوايا يقول...

النظام لو كان محبوب من الناس .. عمرالمعاملة ما كانت تبقى كده
قطيع الامن معاهم تصريحات من سلطاتهم العليا بالبطش بالمواطنين
اللوم مش عليهم
على الكبار
واللى اكبر منهم

هنقول ايه .. ربنا اكبر من الكل ويومهم قريب بإذن الله

blue-wave يقول...

بالفعل
جاوز الظالمون المدى
فمن لنا غير الله؟؟؟

mohamed ghalia يقول...

مش عارف بلدنا رايحه لفين
تحياتى

احمد بدر الدين يقول...

السادة الاحرار ظباط مصر الشرفاء حماة الوطن ... طظ فيكو

مفكر يقول...

السلام عليكم::

أنا حسيت بغضب وسخط كبير لما قرأت مقطع الست اللي من الخوف ان الظابط يجردها من....

أعوذ بالله،،

افتكرت سجن أبو غريب،،

يعني منقدرش نلوم الأمركان،،

ما احنا أهو تمام وشغالين برضه،،

حسبي الله ونعم الوكيل،،

ريمان يقول...

والله يا بطه تسلم اديكى بجد

والله يا بطه يسلم فومك بجد

هو ده اقل كلام ممكن يتقالهم وعجبتنى فيكى شجاعتك وجراءتك وده اللى اتعودناه منك

ومش هقول بجد غير حسبى الله ونعم الوكيل فيهم وفى كل ظالم من الظلمه دول

ابو على يقول...

صدقينى هيا حالات فرديه

شوفى انتى جواكى ايه وجوه كل ولد وبنت ازاى عزيمتكم ضد ظلم الغير للغير


حطى نفسك مكان الظابط او غيرى مجرى حياتك وشغلك واعتبرى نفسك مسؤووله عن ارواح ملايين من الناس شوفى انتى هتعملى ايه


عرفتى بقى ان لسه فيه ناس شرفا

م/ الحسيني لزومي يقول...

من اجل مصر
شارك في الحملة الشعبية للقيد بالجداول الانتخابية وادعو غيرك
ضع بنر الحملة علي مدونتك
البنر موجود علي مدونتي
اذا كنت ترغب في وضعه علي مدونتك ارسل ميلك كي ارسل لك كود البنر
ارجو المعذرة للدخول بلا مقدمات لأني ادخل علي مئات المدونات يوميا

مولان يقول...

ايه اللي بيحصل ده

بجد عااااااااااااااااااااااااار وعار والف عار بس مين اللي خلاهم كدا ؟؟؟؟

مـجـنـووون يقول...

طبعا حاجه تزعل


بس أحنا نستاهل علشان عطينلهم أكتر من حجمهم

لو وقفنا وقولنا ملكش حق او بتعمل ليه كده هنلاقي في رهبه لينا في نفسهم


تقبلي مروري سيدتي
مجنووون

أحمد سعيد يقول...

تحيا مصر حرة مستقيلة


شكلها كده أستقالت

بعد ما أمن الدولة مسكوها

ماهو ما ينفعش مصر تبقى شغاله وفي أمن الدولة

لذا فكان لازاماً على الدولة أن تستقيل .


حالات فردية يا بطة

يعني كل يسوم حد يموت على أيد الشرطة ، حد يعتقل ، يتسجن .

وبكده يكون حققنا الحد الأدني من المطلوب في سياسة أديني عقلك .



*********************

وأنا معاكِ يا بطة بنطالب بإستقالة كل فرد يعمل بالحكومة

فهم عار علينا .


أتمنالك دوام التوفيق عزيزتي .


أخوكِ دائماً..نيجــر .

عمرو عبد الباري يقول...

نظام يترنح لا يملك الا ان يهذي بهذه الحركات الجنونية ... سمعنا قديما ان المتهم برئ حتى تثبت ادانته ... ولكننا نرى الان ان الشعب كله مذنب مالم يثبت العكس ... حسبنا اله ونعم الوكيل ... والله ان الله يمهل ولا يهمل .. "ولا تحسبن الله غافلا عما يعمل الظالمون "

materials يقول...

It seems different countries, different cultures, we really can decide things in the same understanding of the difference!
nike shoes

مصر