الهي ماعدت أبغي شيئا في هذه الحياة سوي عفوك ورضاك

الجمعة، 23 مايو 2008

هما هيرقصونا علي الشناكل ولا ايه نظامهم ؟؟؟؟؟؟؟؟؟؟



هما هيرقصونا علي الشناكل ولا ايه نظامهم ؟؟؟؟؟؟ صبرنا نفذ وكل الطرق السلمية اللي اتعرفت في الدنيا واللي ما اتعرفتش مارسناها بعد كدة بقي محدش يلومنا لو اضطرينا نكرر شعار كنا نسيناه لما حسينا انهم حسوا بينا بس الظاهر ان الاحساس غلا ضمن حملة الغلاء اللي ضربت البلد في الايام الاخيرة لو محدش رد علينا هنشيل المصنع بايدينا صرخنا صوتنا فرجنا العالم كله علينا واتارينا من غير ما ناخد بالنا كلامنا كله طلع كلام في الهوا وطلعنا عمالين ندن في مالطة فرحانين بصوتنا وصورتنا الحلوة قدام بعضينا وعمالين نستمع لكلمة المحافظ مرة والوزير مرة ورئيس الوزرا مرة ماهو بقينا كورة شراب بقي الكل بيلعب بيها شوية

بتكلم عن موضوع مصنع اجريوم اللي عاوزين يعملوه في راس البر ماهو خلاص هنغير شعار مدينة راس البر من تعالوا شموا هوا نضيف عندنا واستمتعوا بجونا وبحلاوة ضلنا وهنقلبه تعالوا شموا الروائح النادرة يوريا وامونيا وكل الملوثات عشان مايبقاش نفسك في ريحة وخدوا امراض وامشوا ومش هتنسوا الرحلة ابدااا واوعدكم مش هتتكرر واطمنوا هنبقي نيجي نقرالكم الفاتحة وابسط ياعم نظيف كله عشان خاطر عيونك اما احنا ....مين احنا ؟؟؟؟ فاضربوا دماغكم في اجدعها حيطة عندنا منكم كتيرررررر علي قفا من يشيل اكتر من الهم علي القلب يعني روحوا خلوا الدنيا تخف


اسعار الاراضي اللي انهارت والحجوزات بتاعة الفنادق اللي اتسحبت والسمك اللي مهدد بالموت ورزق الناس اللي بعنده بيجري ورا قطعه ولا علي بال معاليه عمالين يمطوحوا في الموضوع كل يوم أكتر مرة اه والف لاء لاء واللي يغيظك ويحرق دمك الشركة الكندية نفسها مندوبها في مصر طالعلنا علي التلفزيون بخريطة يقولنا عندنا في كندا مصنع زيه ووراه مدرسة وهاتوا وفد من عندكم واحنا نوريكم ياعم ماتروح تعمل ان شالله الف مصنع في بلدكم ان شالله حتي يكون ورا مستشفي اطفال بس احنا مش عاوزينكم عندنا حقنا ده ولا مش حقنا ؟؟؟؟؟؟؟

لاء والاعجب الشركة لما خافت من رد الفعل الدمياطي راحت تتعاقد مع شركة دعاية انجليزية عشان تعملها دعاية في دمياط وتخليها تكسب الراي العام الدمياطي وطرطق لي ودانك واسمع وغني معايا عروضهم الولهانة اللي هنقع قدامها من شدة الانبهار ياحرام وهنسلم ومن غير مقاومة

15 الف فرصة عمل بعد ما كانو 140 فرصة زادوا مع الزمن بقي كمان يومين هتبقي فرصة عمل لكل دمياطي او جايز يصرفوا معونة لكل طفل جديد يتولد ماهم طالبين الرضا بقي

4 الاف جنيه في الشهر للموظف ........ياسعدي ياهنايا لما اصرفهم علي علاجي وعلاج عيالي اللي شكلهم مش هييجوا خليهم في علم الغيب احسن

عربية اه وربنا الموظف في المصنع هيبقاله عربية........ ياعم والله لو عربية عيون ولا حتي شبح بقووووووولك لم اشباحك وابعد عني

واخيرا وليس اخرا رحلة ترفيهية سنوية لخارج مصر استحمام بقي ولا استجمام........ والله يامعلم عجبانا الترعة اللي في بلدنا نستجم علي شواطئها وهنيالك رحلاتك ياعم الكندي

اتفرجوا وشوفوا سبل العرض والاغراء بس بقولكم بقي انسوووووووا انتم اخركم تروحوا تغروا واحدة تزغلولوا عنيها بالماظتكم واوهامكم وسيبونا في حالنا


ياعم نظيف باشا شوف هما ليهم ايه عندنا ياخدوه ويمشوا وكفاية تطويل وتطويح في الموضوع بقي خرجتوا لهم معداتهم من المينا بحجة ماينفعش تقعد في البحر اكتر من كدة لا السمك ياكلها


بنيتوا لهم رصيف التصدير وهما شغالين بنا في بوابات الكترونية قريبة من موقعهم قال ايه تحسبا لاي هجوم انتحاري من الدمايطة حماية للموقع

حسوووووووووووا يابشررررررررر

بنقولكم مش عاوزينكم ومن بجاحتكم طالعين تقولولنا 25 مليون جنيه ولا باين دولار عمولات اندفعت عشان تسهل لنا الموضوع والله ماحد من شعب دمياط الغلبانة خد حاجة روحوا حاسبوا بعضيكم بعيد عنا واللي ادتوله جنيه طلعوا عنيه يستاهل ماهو باع بلده عشان الورق الاخضر وبصراحة ربنا مايلزمناش شنوا ورنوا علي بعض بعيد عننا بعيد عن أرضنا

في الاخر بقي زي ما شفتوا كدة اللهجة اتغيرت والدمايطة الي كنتم من يومين فرحانين بيهم وبتحضرهم وسط الدنيا اصبحوا خلاص علي اخرهم ماهي وقفات احتجاجية وعملوا مظاهرات وما اتاخروش ندوات اجتماعات مؤتمرات جريوا وماوقفوش منشورات ملصوقات ماعتقوش

بالعربي الفصيح

خلاااااااااااااااص


فينيتووووووووووووو



و

اتقوا شر الحليم اذا غضب


وقد أعذر من أنذر


هناك 26 تعليقًا:

mohammed alsha3r يقول...

لو محدش رد علينا هنشيل المصنع بايدينا

هو دا الحل

محمد مارو يقول...

بطوط
يا بطوط
اعتقد اننا شعب بنطلع نطلع و ننزل على مفيش و انهم هيعملوا اللى هما عوزينه مش اللى احنا عوزينه يبعنى شويه كده و هتشوفى

و الايام بيننا

حمادة زيدان يقول...

ههههههههههههههههههههههههههههههههههه
والله يا بطة لو بالمواصفات دى
انا عاوز اشتغل عندكم
ههههههههههههههههههههههههههههههههههه
ويمكن علشان هجيلهم من المنيا , يدوني مبلغ كبير شوية ....
على فكرة لو وقفتي في وش المصنع
هجبلك كام واحد صعيدي واخلى الحكومة تبنيه
هههههههههههههههههههههههههههههه
ربنا معاكم في وش الظلمة

غير معرف يقول...

اثبتوا ياأغلى الناس ربنا ينصركم ويأيدكم كلنا فخورين بيكم وما ضاع حق وراه مطالب

some one يقول...

نفوس ضعيفة باعت ضمائرها ووطنها وامتد هذا المنطق إلى كل شبر في المحروس

حتى وصل دمياط(راس البر)

بيلعبوا بالشباب اللى مش لاقى شغل

وبيعيشوهم فى احلام

مش هقول غير

يا حزني عليكي يا بلدي

بارك الله فيكى بطه

بس العنوان جاااااااااااااااامد اوى

انا اول ما وصلنى اللنك بالعنوان مت من الضحك وبعد ما قريت الموضوع حزنت
وزعلت على حال بلدنا
وعلى الاستثمار اللى بيتكلموا عليه

مشكوره بطه

دمتى بخير

فتك بعافيه
اخوكى ابو بسمله

حاجات جوايا يقول...

بتهيألى محدش يلومنا بعد كده عاللى ممكن يحصل

احنا مش هنقدملهم أرواحنا هدية مقابل فرصة عمل هتجيب لنا أمراض الدنياو تسببلنا مجاعة

مش كفاية موبكو علينا

امبارح نزلت لقيت على كل بعيد ومحل ولافتات بطول الشوارع بشكل مكثف جدا
مكتوب عليها : انتهى وقت الحوار لا حوار لا تفاوض
أجريوم تستعين بالدعاية الدولية ونحن نستعين بالله

وعلى راى الاخ الكريم ناصر العمرى
لو على جثثنا مش هيتعمل المصنع على أرضنا

بجد ناس مبتحسش خاااااااااااااالص


دمتى بخير يا بطوط
سالى

rtrcbh يقول...

السلام عليكم ورحمه الله وبركاته
جزيتم خيرا يابنت الاسلام
ان شاء الله لن يتم امر المصنع وستم التصعيد من الكل وعل كل المستويات والفئات فى كافه انحاء المحافظه ان شاء الله
والسلام عليكم ورحمه الله وبركاته
أخوك
د/أحمد جمال

عمرو عبد الباري يقول...
أزال المؤلف هذا التعليق.
عمرو عبد الباري يقول...

اعتقد ان الدمايطة يقدروا يمنعوا المصنع.. والا فإزالته.. لكن أرى ان المدونين الدمايطة لازم يكون لهم دور أكبر من كده

Unknown يقول...

بنت الاسلام

هما بيرقصونا كل يوم مش لسه هيرقصونا

ولا انت مش واخده بالك

قالوا علاوة ( هى فين ) ثم اتضح انها كلمة

السر لزيادة الاسعار

حسبى الله ونعم الوكيل .مستكترين على

الغلابه مصيف نظيف

Unknown يقول...

والله انا مش عارف هما عايزين ايه ده امر منتهي ,احنا بنتكلم في صحة ناس في حياة ناس واطفال بني ادمين من لحم ودم
حسبنا الله ونعم الوكيل
صحيح اتقوا شر الحليم وواضح ان مصر كلها عندها حلم ماشاء الله بس ممكن نغضب شوية لله بس
جزاكم الله كل خير علي الايجابية وربنا ييسر لكم كل امر

Hossam Nasr يقول...

موعدنا غداً لنتحد ولو لدقيقة
الساعة الرابعة عصراً نرسل رسالتنا الأخيرة
http://kawlansadida.blogspot.com/2008/05/blog-post_24.html

26.05.2008

بنت الاسلام يقول...

mohammed alsha3r

ماهو احنا بقينا في زمن القوة

والدراع والحق مابقاش يتاخد غير بيهم

زمع ذلك مفيش اكتر من دعوات السلام

والتحضر والتمدين في العالم

لكنها مجرد كلمات ابعد ماتكون عن

الواقع

تحياتي

بنت الاسلام يقول...

محمد مارو

بدأت أقتنع برايك يامارو

بس لايزال عندي امل

وزي ماقلت

الايام بيننا

بنت الاسلام يقول...

حمادة زيدان

لو كنت بتتكلم جد

فانا عذراك

ماهو برده من حقك تعيش

تركب عربية

تسافر برة

بس علي حساب مييييييييين؟؟؟؟؟؟؟

نفسك واهلك واخوانك

عرفوا نقطة ضعفنا

الحاجة

المادة

وبيضغطوا علينا بيها

ياتري هنصمد

ولا هنستسلم

الله اعلم

تحياتي

بنت الاسلام يقول...

زينب

اجمل لحظة اللي شفت فيها تعليقك عندي

انتي اللي اغلي واحب الناس لقلبي

ودعواتك لينا من قلبك الصادق اكيد

هتكون ليها صدي عندنا

Unknown يقول...

كلمه قالها جمال عبد الناصر زمان بس تصلح اوي للزمن ده

ما اؤخد بالقوه لا يسترد بغير القوه

و الشعب بقي علي اخره

تحياتي

ابن رشد يقول...

الحكومة بتاعتنا لا تتحرك الا وقت المصائب
و دة الطبيعي

eman alaa eldin يقول...

عادى خالص
دة شئ عادى واننا نموت من الاكراض عادى
انتى زعلانة ليه يا بطوط
احنا فى مصر مش دة سبب اننا نموت طبعا لكن السبب اننا فى مصر اللى بيحكهما مبارك (والله خسارة فيه الاسم)
وعارفة احتمال دة يحصل فى كل محافظة لغاية ما يقضوا علينا
واظن
انهم بعدين هيعملوا غزو على مصر ويلاقونا كلنا تعبانين ومش قادرين نروح نسلم بسهولة ويسر
عادى بردة
تحياتى اختك
ايمان بنت الحرية

بنت الاسلام يقول...

SOMEONE

ابو بسملة

مش عارفة العنوان جه في دماغي كدة من

حرقتي وغيظي والله

وفعلا بيلعبوا علي الوتر الحساس

وحاجة الناس

ربنا يستررررررر

بنت الاسلام يقول...

sally

اهو لما نشوف ياسالي اخرتها معاهم ايه

انتهي وقت الحوار ماشي

بس ايه اللي هيبدا

الله اعلم

تحياتي

بنت الاسلام يقول...

عمرو عبد الباري


كلنا بنحاول يكون لينا دور فعال

وربنا يقدم اللي فيه الخير

تحياتي

Hosam Yahia حسام يحيى يقول...

انا موافق بس العربيه تكون شبح


:d

متفق مع محمد مارو

Dr-Ahmed يقول...

أكيد كلنا رافضين الموضوع دا مهما عملوا ... احنا هنصيف فين !!!! هههههه

يورو يقول...

بطه
انا بقرا الموضوع ودمى بيتحرق
مبئتش عارفه بجد نعمل اى اكتر من كدا
الظاهر انهم قبل م هيموتونوا بالسموم
هيموتونوا من الغيظ
وبرضانا او من غير رضانا هيتعمل
يارب ارحمنا يارب

موناليزا يقول...

يعنى كالعادة كانوا بينيمونا ويعملوا اللى هما عايزينه وكالعادة رأى الشعب مالوش قيمة
حسبى الله ونعم الوكيل

مصر