الهي ماعدت أبغي شيئا في هذه الحياة سوي عفوك ورضاك

الثلاثاء، 6 مايو 2008

حلي بقك من مرارة الأيام


النهاردة قبل الضهرلاقيت أخويا محمد بيخبط علي الباب فتحت له لاقيته فرحان اه عادي بتحصل
مستغربين ليه كمان كان مبسوط ومضايق بس الاهم من ده كله كان معاه في ايديه كرملتين حاولت اخد منه
واحدة رفض بشدة حسسني انهم كنز غالي وثمين في ايه ياحمادة قالي اجرة الاعصر والسنانية زادت انا
طبعا عيني علي الكرملة وبدأت أفكر ايه دخلها في الموضوع بعد مابقت بربع جنيه بقت ب35 قرش وطبعا
لان مفيش برايز ولا شلنات عندنا بقت ب50 قرش وكرملتين فوقهم هديةضحكنا كتيرررررررقالي انا بقي هدفع له ربع جنيه وفوقيهم الكرملتين يعني من الاخر الكرملة اصبحت عملة نقدية معترف بها عندنا وبيفكروا ازاي يطوروها للبان

نزلت وشفت بنفسي موضوع الكرملة لاقيتالسواق بيعطي الكرملة للراجل اللي قدامي
وبيقوله خد حلي بقك من مرارة
الصراحة الكلمة علقت معايا وأثرت فيا حبتين تلاتة وحسيت اد ايه الايام بقت مرة وصعبة افتكرت جارتناالمدرسة طنط ميرفت قبل ما أنزل لاقيتها موقفاني علي باب الاسانسير شفتي يابطة الاسعار بقت نار والمواصلات غلت الضعف هنسكت؟؟؟؟ولاهنعمل ايه؟؟؟؟قلتلها ياطنط انتي شايفة ايه؟؟؟قالتلي حرام اللي بيحصل ده والله الناس هتعمل ايه

افتكرت دكتور نصر جارنا بسأله ايه الاخبار يادكتور اسعار الادوية زادت ولا لسة لاقيته اتفتح والله ده حرام الناس هتعمل ايه الاسعار ولعت ووووو
افتكرت الراجل بتاع السوبر ماركت كنت داخلة اشتري حلويات لولاد صاحبتي الصغنينين كل لما اشاور علي حاجة واساله هي بكام الاقيها زادت اسيبها طبعا اخر مازهقت قلتله طيب واخبار الشيبسي ايييييييه زاد ولا لسة قالي لسة اصله وصلني امبارح قبل ما البنزين وعربيات النقل تزيد

طيب وبعدين؟؟؟هو في ايه بالظبط؟؟؟ليه بيعملوا فينا كدة؟؟؟ليه بيستكتروا علينا الفرحة حتي؟؟؟ياسيدي الغي الزيادة مابقاش حد عاوزها بس حرام تدبح في الناس بالشكل ده؟؟؟مابقاش حد قادر يتحمل ظلم وضغط اكتر من كدة؟؟؟

وكمان بصراحة ربنا مش لاقية وصف أعبر بيه عن اللي حصل ده سوي الغباء ومش اي غباء ده غباء منقطع النظير؟؟؟ غباء مني اولا اه بعترف اني غبية لاني بحسن نية وبسلامة صدر صدقته وفرحت بالعلاوة زي كتير مافرحوا وقلت في سري والله وحسيت بينا ياريس ياكبيرررررررر لكن للاسف طلعت احلام المظلومين بالبراءة والمشانق لافة حوالين رقابيهم بس مش ندمانة لاني صدقت كدبة كنت اتمني تتحقق

وغباء من الحكومة غباء مستحكم ده الشعب كله ماعداش عليه شهر ثاير وهايج بسبب غلاء الاسعار ترجعي تزودي علي الغلاء غلاء مش عارفة بيفكروا ازاي لاء تفكير ايه واضح ان كل اللي همهم ازاي يطبقوا قرار الريس علي فئة من الشعب وكانت الوسيلة السهلة والمتاحة بالنسبة لهم يدبحوا في كل الشعب اللي العاطلين فيه اكتر من الموظفين

واضح انه الوضع اتأزم سوء ادارة وعجز وفشل في كل حاجة والله يرحمك يامصري ياغلبان ياجعان يصبرك ربنا علي مرارة الايام وبجد ربنا يسترها علينا في اللي جاي

في الاخر عاوزة انشر قصيدة صغيرة قريتها في تعليق لمواطن علي موقع مصراوي عجبتني قوي اثرت فيا قوي حسيت بيها قوي قلت انشرها جايز المرارة تقل شوية في حلوقنا او تزيد علي حسب بقي




شفت سحابة سودة في سماء بلدى


قلت ايه السبب ؟


قالوا دة قش رز بينحرق


و سحابة سوداء في عيون ولادى


قلت ايه السبب ؟


قالوا يابا بلادنا بتتسرق


يابا احلامنا بتتسلق


مستقبلنا قدام عيننا بيندعق


بكيت ودموعي صبحت سيل


قالوا ارحم قلبك مريض عليل


عارفين انك عاجز وقليل الحيل


********

يابا دانا ممنوع من العلاج


يابا دانا ممنوع من الزواج


ياريت الاقي لنفسي وظيفة


دا حلمي في لقمة نظيفة


**********


نزعوا من قلبي الانتماء


لما من فقرى زادت ثروة الاغنياء


شالوا من قلبي الولاء


لما حتت من جسمي تباع للاثرياء



*******


يابا داه انا ميت ميت من يوم ماتولدت


وشعرى شاب وفي الظلام غرقت


يحصل ايه لم اغرق في مية نيلي


ولا الجأ لعمل في الكيان الاسرائيلي


حصل ايه في البلد ما ماتو في عبارة


ححاول واروح ايطاليا شطارة


*********


ولو لقيت مفيش فايدة


يبقي ابيع كليتي


ولا ابيع كبدتي


مانا فقدت حريتي


***********


دمي بيتحرق


وطني بيتسرق


احلامي بتنسلق


نفسي اعرف ليه يارب بانخلق

هناك 11 تعليقًا:

يورو يقول...

المشكله دلوقتى يا بطه
ان مع كل الى بيحصل دا
ولسه الناس مش اهمه تعمل اى
النهاردا نزلت الصبح عشان اروح الكليه
لقيت السواقين عاملين اضراب
قلت الحمد لله الناس هتتحرك والحجات الى غلت يمكن تنزل تانى
اكتشفت ان السواقين عاملين اضراب مش عشان غلا البنزين والسولار
لا عشان الاجره تغلى هى كمان
وطبعا الحكومه مفيش عليها خساره اى يعنى المشكله لما يديلهم الحق انهم يغلو الاجره كمان والسواقين فرحوا ان الحكومه لبت طلبهم وحست بيهم

مش عارفه احنا امته هنفهم وامته هنعرف ازاى ناخد حقنا
واى هو حقنا الى لازم ناخده

حسن مدني يقول...

هو ده شعب مصر، بيصرف أموره بسرعة، بس يسبوه في حاله شوية، وهو ح يمشي أحواله كويس

تحياتي

رحاله يقول...

بسم الله
والله الواحد اتخنق ومل وزهق وتعب وجالو الضغط والسكر وكل حاجه كل حاجه يابطه
احنا الى افترينا الاول ع بعض
واتخلقنا علشان نتهان ونتذل واحنا راضين وبنديهم الجزمه علشان يضربونا بيها
والله حسبى الله ونعم الوكيل
الى مزعلنى ان بينظلم ناس ملهومش دعوة باى حاجه ولا سياسه ولا ثقافه ولا اى حاجه دول بس كل ذنبهم انهم عاوزين يعيشو ومش عارفين
استغفر الله العظيم يارب الناس بقو يستنو فرج حسنى عليهم علشان ياكلهم بعد ماكانو بيقولو يارب انتا الى هتاكلنا
حسبى الله ونعم الوكيل

ميرا ( وومن ) يقول...

بطة بجد مش عارفة الناس هاتعمل ايه ولا ايه هتلاقيها منين ولا منين بس الناس تستاهل اللي بيجرالها متكتفين بالخوف وماشيين جنب الحيط لحد ما الحيط هايقع عليهم
ومش عارفة هايتحركوا امتي لما يبيعم ولادهم ولا لحد الكلاب والحمير يبقي مصرح به

walaa يقول...

مش انا قولتلك يا بطه هيغلى الاسعار قدام زياده المرتبات
عارفه يا بطه مخطئا من ظنا يوما ان للثعلب دينا
الناس هتجيب منين الناس جابت اخر ما عندها انا لسه جايه من بره محروق دمى حرقه
منه لله
حسبنا اله ونعم الوكيييل
تحياتى ولاء

غير معرف يقول...

الله عليك يابطوط والله مش عارف نعمل أيه تاني صراخ وصرخنا إضراب وضربنا
وجوع وجوعنا انت عارفه ناقسنا حاجه واحده بس هي أن أي دوله تيجي وتشرفنا وتستعمرنا علشان تبقي كملت

محمد مارو يقول...

بطه
احب احيكى جدا
و بس كده

عاشــــــ النقاب ـقــــة"نونو" يقول...

ان بعد العسر يسرا
ولا يغلب عسرا يسرين
تحياتي

Empress appy يقول...

يا بطوط يا حبيبى ما هى دى اللعبه افهميها من عندى ده مخطط من بدرى بيلغوا دعم كل شئ بس بالراحه بجد زى اللى بيدى حقن زيت

rtrcbh يقول...

السلام عليكم ورحمه الله وبركاته
جزاكم الله خيرا كثيرا يابنت الاسلام على هذا الموضوع الذى يعبر عن جزء مما ألت اليه اوضعنا
نسال الله أن ينتقم من المفسدين الفاسدين وحسبى الله ونعم الوكيل
تعرفى أنى اشعر بمراره هذا السائق وهذا الراكب حينما قال له خد حلى بقك فما قالوها الا سخريه من الوضع ولكن مابيدهم شىء يدعون هذا
أطرف ما فى الامر حينما توقفت السيارات بعض الشىء فى الاعصر اول ما ارتفع سعر البنزين جاء عسكرى المرور قائلا لاحد الركاب الاجرة الجديده 36 قرش قال له طبيب والقرش ده هنجيبه ازاى؟؟؟
شىء اخير اختم به فى ظل ارتفاع الاسعار علينا ان نعى شىء بسيط ان هؤلاء السائقين ليس لهم ذنب فهم لم ياخذوا تلك العلاوة حتى يرفعوا عليهم سعر البنزين
ان اصحاب المحلات هم ياخذونها غاليه من الموردين
أن الفساد اخوتى مستشرى فى كافه الانحاء والاركان ولكن رأس الافعى يجب ان تقطع حتى تموت والا فكل ضرباتك لن تؤتى ثمارها
اعتذر على الاطاله
وفقكم الله وجزيتم عنا خيرا نرجوا منكم المزيد وكل جديد ومفيد
والسلام عليكم
د/أبا يحيى وادم

Hosam Yahia حسام يحيى يقول...

لذا لن اشارك فى الاضراب 4 مايو

وكل سنه وانتا طيب ياريس



:d

اظن ان عليكى الاعتذار

هههههههه

مصر