قبل ما اكتب البوست ده بساعة واحدة شوفت الخبر علي مصراويواستغربت له جدااا رحت أطبخ ورجعت عشان أكتب بوست عليه
لاقيت الخبر طار من علي الموقع دورت عليه في كل حتة مش
لاقياه احترت أكتب البوست ولا ماكتبهوش في الاخر قلت أكتبه
طيب اي هو الخبر الأول الخبر ياسيدي اسمع وياريت تسمع بمزاج عالي
السيدة الفاضلة عائشة عبد الرحمن وزيرة القوي العاملة أعلنت
ان بفضل الله نسب البطالة انخفضت جداا واصبح في زيادة بمعدل120%
لفرص التشغيل دي دراسة أكدها خبرررررراء من الوزارة
طبعا أكيد بتسألوا هي الوزارة دي تبع أي بلد أعتقد ان اسم الوزيرة ديه
مش غريب عليا متهيالي في مصر
بس هو ده الخبر الي لفت نظري جدااا أصل الغريب ان امبارح كنت بزور
والدي العزيز في مكتبه وجنب مكتب بابا علطوووووووول مكتب القوي العاملة
طول عمري كنت بشوفه امبارح بالذات لفت نظري قوي
جايز عشان نظافته الي زادت واليفط الجميلة الي بللغات الي اتحطت علي بابه
والغريب لا لاقيت فيه قوة ولا عاملة فااااااااااااااضي خاااااالص
قلت في بالي هو كل شباب البلد اشتغلت والموظفين كدة قعدوا من غير شغل
صعبوا عليا
مش عارفة بقي ايه الي حصل بس انا شامة ريحة تزوير في الوزارة
اه وانا حاسة الشم عندي قوية جدااا
واضح ان الخبراء عملوا احصائية علي بلد تانية
غير بلدنا طبعا وبعدين نسبوها لبلدنا الغالي والوزيرة صدقتهم
أنا بقي باناشد سيادة الوزيرة شخصيا وبطالبها بتحقيق عاجل وسريع
في الموضوع ومعرفة من وراء هذا التزوير وعزله من عمله فورا
ليصبح عاطل زي بقية شعب مصر
الي لسة محيرني
هو الخبر راح فين
حد يعرف
؟؟؟؟؟؟؟؟؟؟؟
هناك 19 تعليقًا:
الظاهر يا بطوط أنه نزل غلط , يعني كاتب الخبر كان قصده بلد تاني وراح جايب أسم الحجىة عائشة غلط بعد كدة راح شايل الخبر علشان يصلحه.
ضحكتيني ومكنش ليا نفس أضحك
سلاماتى يا حجة
أخوكي
حمادة زيدان
ههههههههههههه
والله يابطة ضحكتينى
تلاقى اللى عملوا الدراسة هما نفسهم اخوانا اللى بيعملوا استفتاءات ال 99 ,99 %
بس وسعت منهم شوية المرة ده
ايه الناس دي يا أخي
الخبر اتحط نسأل ليه
اتشال عاوزين كمان نعرف ليه
ايه الطمع ده :D
بطه يا بنتي
دي أكيد تهيآت طبيخ :-P
ربنا يستر على شبابنا وعلى أولادنا مستقبلا
م تزعليش يا بطوط احسن حاجه فى بلدنا ان حكومتنا دايما عاوزه تشوفنا مبسوطين بأى وسيله
تلاقيهم حطوا الخبر يفرحونا بيه شويه ولما حسوا اننا ممكن نصدق ونعيش فى الدور شالوه
يارب 2010 الجاى م نكررش نفس السؤال ويكون فى حاجه اتغيرت بجد
بس ياترى وقتها هيكون لسه عندنا القدره اننا نشتغل
هيكون لسه عندنا امل وحلم نحققه؟؟؟؟
لالالالا
هو الخبر ما اتحطش دة كان وهم يا بطوط
زي ما هو وهم ان فية شغل في البلد و ان البلد حلوة
وهم كبير اوي عايشين فية
بطوط
انا مش معاكى خالص فى البوست ده
ايه يا حاجه ؟
ليه الظلم
انتى بتقولى شامه ريحةتزوير
لاء حرام
هو انتى مش بتشوفى ؟
انا اهوه مخلص بكالوريوس علوم و تمهيدى ماجستير والحمد لله شغال و عال العال و مرتبى فى الشهر 2400 جنيه
ليه بئه الظلم
و اعرف شباب كتير شغالين و مرتبهم اعلى منى
انتى اهوه مرتبك 1750
و لا عوزه اكتر و لا ايه ؟
معلش دى المرتبات الحاليه على شان ظروف البلد فيها حراميه كتير
شفتي بئه يابطه ان العيب مش في الحكومه والعيب فينا فرص العمل علي افه من يشيل لدرجة ان الشباب مش عارف يشتغل ايه هو ناقصهم بس التوجيه والتدوير كويس في الوظايف الخاليه اللي مش موجوده وربنا يسهل
السلام عليكم
اعتقد بان الخبر طار زى ما طارت كل حاجه فى البلد دى وزى ما حطير السيده عائه عبد الهادى من الوزاره فى التعديل الوزارى الجاى و ابقى قولى ابو مفراح قال الكلام ده
تحياتى ابو مفراح
بفضل الله نسب البطالة انخفضت جداا واصبح في زيادة بمعدل120%
_____________
ما شاء الله زياده مرة واحدة 120 %
طيب مش يكدبوا الكدبه صح علشان نصدقها ونفرح شويه
جزاكم الله خيرا يافاطمة على البوست
حمادة هلال
اضحك ياحمادة
اهو احسن ماتعيط
سارة
اكيد هما
معاكي حق وسعت قوي
يارا
ونعمة الحكومة الحريصة علي نفسية الشعب
يارب
elbostagy2
صحيح اتجاوزنا الحدود كلها
بنسال ليه
شمس
الظاهر كله بقي وهم
هو يعني ايه حقيقة
محمد مارو
حرام عليك
انا مرتبي 1750 جنيه
ليه
علي اساس اني رئيسة جمهورية
يا اخي
قول يارب
رانيا الجبالي
معاكي حق
العيب فينا احنا
الظاهر استحلينا البطالة واستمتعنا بالفقر
ابو مفراح
شالوها حاطوها
مش فارقة
كله محصل بعضه
انا مسلمة
ندي لا يابنتي
اصل الشعب المصري متعود
يصدق اي حاجة
المهم انتي كنتي بتطبخي ايه ساعة الخبر ده هيترتب عليه نسبة البطاله اللي جت في الخبر وبعدين انتي ناسيه اننا مصريين اهل كرم يعني تلاقي واحد كان كريم قوي قال بحبح ايدك شويه والحمد لله اننا عايشين
تحياتي
إرسال تعليق