الهي ماعدت أبغي شيئا في هذه الحياة سوي عفوك ورضاك

الخميس، 13 ديسمبر 2007

حد يقولي هو النصب اصبح هواية


حد يقولي هو النصب اصبح هواية


ولندن بقت مركز النصابين المصريين ولا ايه


مش عارفة سمعتم عن نصاب طوخ ولا لا


طوخ ديه قرية هنا في بلدنا مصر ياناس


طلع لهم رجل محترم من فترة ويدعي التقوي والصلاح


وقالهم ياناس هاتوا الي معاكم استثمار حلال هاتوا فلوسكم وهكسبكم دهب


الناس صدقت وقالت وماله يابيه خدامينكم طالما الحلة هتولد حلة


نبيع لك الهدوم الي حيلتنا حتي عشان نعرف ناكل لحمة بلدي في العيد


والكل باع ايوة باع


الي كان سواق ميكروباص باع مكروباصه وراح سلم فلوسه للراجل الطيب


والي كان عنده بيت ملك ماتأخرش باع وهو بيحلم بفيلا في المهندسين


الراجل نفسه النصاب ياعني ماصدقش الي بيحصل ده بيحلفلك بالله


انه قبل ما يعلق اليفطة علي المكتب وقبل مايكتب اول كلمة علي اليفطة كان جمع كام


تخيل حضرتك كام


20 مليون جنيه مصري


اه والله زي مابقلكم كدة 20 مليون جنيه مش عارفة هي طيبة القلب المصرية دي


مالهاش حدود ولا ايه


ماعلينا الراجل قال وماله نبتدي اللعب بقي واحنا مطمنين


وكام راجل نصاب زمايله بكام بدلة شيك وعربيات ابهة


ونزلوا بقي شوارع البلد يدهشوا الناس ويبهروهم الكل بقي يجري عليهم


ويتمني يبوس ايديهم


والاستثمار كان ايه شراء كروت موبيلات وكروت تليفون تابعة لشركة موبنيل


وطبعا كان في دعاية للنصاب الكبير دعاية جامدة بقاله اربع سنين في المجال المربح ده


وناس كتير اكلت من وراه الشهد وهو اصلا عمره الافتراضي في النصب اربع شهور مفيش غيرهم


جمع فيهم كام بقي قول تخيل معايا 300 مليون جنيه مصري اه والله من غير مبالغة


وبعدين فص ملح وداب كانه لم يكن رحل الي بلاد الاحلام بعيدا عن بلاد الحرمان


وموت يامصري بقي والله يرحمك يافلوسنا ربنا يعوض علينا


الناس اتجننت الحلة راحت ولا ولدت ولاحتي باضت وعن حق


القانون لايحمي المغفلين


وحسبي الله ونعمة الوكيل


ويظل السؤال دايما بيطرح نفسه


أين الضمير


أين


حد عنده اجابة










هناك 38 تعليقًا:

الشريف / جمال طة يقول...

ربنا يجازي كل ظالم يا بطة و يارب الناس توعى و تفهم حقوقها و على فكرة يوجد نصاب تاني انا هضعة للتحذير
مطلـــــــــوب القبــــــض
على نصاب شقق زهراء المعادى / بالمعادى / بمحافظة القاهرة
المهندس / ايهاب فراج محمد ابراهيم الزينى
وعلـى كـل من يقابله التفضل بتسليمه مشكورا لأقرب قسم شرطه أو أقرب رجل أمن
وهذا النصاب تم تأييد الحكم علية بالسجن فــى القضية رقم 9443 لسنة 2007 م جلسة 4/11 /2007 م محكمة المعادى حصر رقـــم 13182 لسنة 2007 م و صادر ضدة اكثر من ثلاثون حكما قضائيا
وعنوان سكنه وعنوان الشركة / شركة الزينى للتعمير 56 طريق مصر حلوان الزراعى برج بــــــدر / أمــام فندق المعادى
بطاقة رقم 27003211203839
و النصاب يتنقل بين مدينة 6 أكتوبر بمحافظة الجيزه و مدينة المنصورة بمحافظة الدقهلية /// ومركز بشبيش بطنطا بمحاظة الغربية
وعليه أكثر من حكم نصب واحتيال وجارى نشر اسماء وعناوين أقاربه وكل من تربط بينه وبينهم صلة نسب أو متسترا عليه

الشريف / جمال طـه
تليفون رقم 0104710778
( المواطن هو رجل ألأمن ألأول فى محاربة الجريمه والتصدى للمجرمين )

ahmed mefrh يقول...

السلام عليكم
اعتقد اختنا بطه انه لا غرابه اذا ما قولتيه موثق لان لدينا هنا و الحمد لله اطيب شعب و اغلب شعب فى الدنيا كلها تديله على قفاه و ميقولكيش لا ابدا
و حضرتكط زعلانه على 300 مليون طاب ما فى الموازنه العامه السابقه كان هناك 10 مليلار جنيه واقعه بجد و الله شم هزار مش معروفه راحت فين و زعلانه على 300 مليون و بعدين هناك حاجه مهمه جدا اذا كان الراجل اللى واقف على الرضيف الغلبان ده مبيحفظشعلى حقه و مبيطلبهوش يبقى انتى عايزه يحافظ على ماله من النصابين ازاى .
تحياتى ابو مفراح

ابن رشد يقول...

و الله الواحد مش عارف يروح من النصابين فين
من كتر النصابين في البلد الواحد بقى يشك في نفسه
يعني حضرتك بتكلمي على نصاب طوخ و دة غير نصاب المنصورة اللي نصب في 2 مليون و مفيش حد لاقية اول تعليق بيتكلم عن نصاب المعادي و القضايا اللي علية
الخوف لا يكون اسمه اية الكبير اوي دة هو اللي نصاب و مسرح عياله
يلا ربنا يستر
و هوني على نفسك هي الدنيا كدة فيها الخير و الشر

elbostagy2 يقول...

السلام عليكم ورحمة الله وبركاته

حسبنا الله ونعم الوكيل
لما يغفل الأمن عن دوره
ويصبح حاميها حراميها
يبقى لن ننتظر شيء

الله المستعان

أنا مسلمة يقول...

300 مليون جنيه

لا حول ولا قوة إلا بالله

اللهم أجرنا فى مصيبتنا وأخلفنا خيرا منها

أنا لسه شايفه يوم السبت فى برنامج الحقيقه إن فى فرق موسيقيه بتسافر على بلاد أوربيه وبتاخد من الواحد 70 ألف جنيه والناس باعت كل اللى حلتها علشان تسافر
والموضوع طلع فى الاخر نصب برضه

ربنا يرحمنا برحمته

غير معرف يقول...

للاسف يا بطه ناس كتير عايشه حياته على هدف واحد انها تجمع فلوس وبس
يموت كل حاجه جواها
يموت الضمير ويتحولوا مصاصين دماء فى الناس الغلابه
الناس عشان تعبانه لمل بتشوف اى طوق نجاه قدامها بتتمسك بيه حتى لو عارفه انها بتضيع نفسها بس اهوه يمكن يكون فى دا حل

بس ارجع واقول
ربنا بيمهل ولا يهمل

walaa يقول...

لا ده من دول كتير قوى حصل نفس القصه دى فى المنطقه بتاعتنا دى واخد الراجل منهم حوالى 3مليون جنيه وهرب الناس مبقاش عندها ضمير ولا دين اساسا حب الدنيا وبعدنا عن الدين جعل الناس عندها فساد اخلاقى

تحياتى لك ولاء

mohammed alsha3r يقول...

بلد

رئيسها ... اكبر نصاب

عاوزها تبقى ايه

غير معرف يقول...

يا جماعة الرغبة فى المال السهل بتخلى صاحبها يقع فى المحظور أمثال حالات النصب المختلفة
والى يشتغل ويعرق بيتعب فعلا .. والنهاية أكيد أكيد إنه ينول

hekaytna يقول...

الحل انه محدش ياامن لحد خالص وكل واحد معاه قرشين ينام عليهم احسن ما يروحوا عليه وربنا معانا لانه الشعب المصري غلبان بجد

Hoda يقول...

اولا انا جايه اهنيكى بعيد الاضحى اعاده الله عليكم جميعا بالخير والبركات وتقبل صالح الاعمال اللهم امين اما بالنسبه لموضوع النصب دا فهو من زمان بس للاسف هو زاد الايام دى ولسه هيزيد اكتر وحتتنوع اشكاله وهيتفننوا فيها كمان واكيد السبب حال البلد واللى احنا فيه من غلاء وضيق العيش يبقى الناس ما قدمهاش غير انها تنصب وتسرق علشان تعيش رحمنا الله برحمته
يا ريت تبقى تشرفينى فى مدونتى احب اعرف رأيك فى الموضوع الجديد لأن بجد رأيك يهمنى
خالص تحياتى وتقديرى

احمد الجيزاوى يقول...

وكل عام وانت بخير بمناسبه العيد الاضحى
وتقبل الله منا ومنكم
احمد الجيزاوى

بنت الاسلام يقول...

الشريف/جمال طه

يارب

كل ظالم ياخد جزاءه


مهما كان نفوذه او سلطته

بنت الاسلام يقول...
أزال المؤلف هذا التعليق.
بنت الاسلام يقول...

ابو مفراح

علي راي حضرتك

الي شايف حقه بيضيع وبيتسرق وواقف يتفرج ولاعلي باله

اظن ده بيدل علي انه سهل خداعه

ولو بكذبة محبوكة هيبيع نفسه لانه صدقها

بنت الاسلام يقول...

شمس

ربنا يقدرنا ونقدر نعيش فيها

بنت الاسلام يقول...

البوسطجي

الامن هيعمل ايه ولا ايه بس

خليه مركز في المظاهرات افضل

بنت الاسلام يقول...

انا مسلمة

فعلا ربنا يرحمنا

بنت الاسلام يقول...

يارا

معاكي حق الضمير مات واستغلال النفوس المحتاجة بقي اكبر واكبر

ولكن زي ماقلتي

ان الله يمهل ولا يهمل

ولكل ظالم نهاية

عصفور اسكندرية يقول...

السلام عليكم
كل عام وانتم بخير
عيد سعيد
رزقكم الله الحج
تقبل الله منا ومنكم

النصب الان مش هوايه
دول نصبوا في الحج علي الحجاج ينصبوا في اكتر الشعائر حرمه
مش حتفرق معاهم باق النصب الصغير

مفأجه العيد
http://mat7on.blogspot.com/

احساس لسه حى يقول...

عزيزتى
النصاب عمره ما بيخدع الا طماع واظن محدش يدى فلوسه لحد الا لما يكون واثق منه مش من كلمتين يديله اللى حليته
ومحدش بيتعلم ببلاش
وياريته بيتعلم
كل سنه وانتى طيبه
سلام

ahmed mefrh يقول...

كل عام و انتم بخير
اهنئكم بعيد الاضحى المبارك
تحياتى ابو مفراح

بنت الاسلام يقول...

ولاء

ربنا يرحمنا برحمته

والضمير فعلا هو الي عامل ازمة

محدش بيبيعه واحنا نروح نشتريه

بنت الاسلام يقول...

محمد الشاعر

لاتعليق

بنت الاسلام يقول...

غير معرف

طبعا

ويكفي انها حلال

حتي لو كانت قليلة

Ahmed Al-Sabbagh يقول...

صديقتى واختى العزيزة بطة

كل عام وانتى بخير

وعيد سعيد عليكى

الموضوع بقى غريب اوى

لسه بردة فى واحد فى الجيزة عامل نفس القصة

انا مش مستغرب ان النصب بقى هواية

انا مستغرب من الغباء والجشع اللى بقى عند الناس

ازاى يجى واحد يقولهم هاتو فلوس استثتمرها لكم ويدولو بالسهولة دى

حاجة غريبة اوى

احيكى على اسلوبك الرائع

تحياتى

ENAS يقول...

كل سنة وانتى طيبة يابطة وربنا يبعد عنك النصابين
تحياتى

حسن مدني يقول...

هو سؤالك مشروع جدا،،
أين الضمير؟؟

بس السؤال اللي محيرني حقيقة، هو
أين العقل؟؟

أين كان عقل من باع مصدر دخله، أو بيته الذي يملكه، متعلقا بوهم؟؟
أم أن الأوضاع الحالية أفقدت الناس الأمل ولم تترك لهم إلا الأزهام ليتعلقوا بها؟؟
أسئلة تستحق أن تناقش..
تحياتي

بنت الاسلام يقول...

hekaytna

لا طبعا ده مش حل

الحل اننا نفكر الف مرة قبل مانعمل اي خطوة

ونعمل حساب كل كبيرة وصغيرة

وبعدين نتوكل علي الله

اعقلها وتوكل

بنت الاسلام يقول...

haneen

ربنا يرحمنا من الدنيا ديه بشرها وبالامها كلها


وانتي اطيب واسعد يارب وعيد سعيد عليكي وعلي الاسرة كلها


وطبعا الشرف ليا انا بزيارتي مدونتك الرائع عن قريب ان شاء الله

بنت الاسلام يقول...

مدونه انا بحبك يا مصر

وانت طيب بصحة وسعادة يارب

بنت الاسلام يقول...

عصفور اسكندرية

وانت اطيب يارب

علي رايك النصب اليومين دول مابقالوش كبير

بنت الاسلام يقول...

احساس لسه حى

شكر اولا علي زيارتك الغالية

وفعلا معاك
حق

محدش بيتعلم بالساهل

وياريتنا بنتعلم

طيبين بقي نعمل ايه

بنت الاسلام يقول...

ابو مفراح

وحضرتك بالصحة والسلامة يارب


عيد سعيد وجميل علي حضرتك والاسرة وكل المسلمين

بنت الاسلام يقول...

Ahmed Al-Sabbagh

اولا شكرا لزيارتك الغالية لمدونتي المتواضعة
وانا معاك الظاهر ان الغباء بقي حاجة في الدم سمعت انها من الاكل الملوث جايز

بنت الاسلام يقول...

ENAS

امين يارب يبعده عننا كلنا

وانتي اطيب ياقمر

بنت الاسلام يقول...

فارس وحيد

يا استاذ فارس
سيبنا الجاني ومسكنا في الضحية

عارفة انهم غلطوا

لكن لو سالتهم ليه

هيقولولك الف سبب
وكلهم مقنعين

تحياتي

وكل سنة وحضرتك طيب

غير معرف يقول...

بطوط
كل سنة وانتِ طيبة ... أدينا طلعنا ولاد برج واحد ولازم ولاد البرج يهنوا بعض ولا إيه
يارب تحققي كل أمانيكي يا بطوط السنادي
أخوكي
حمادة زيدان

مصر