الهي ماعدت أبغي شيئا في هذه الحياة سوي عفوك ورضاك

السبت، 24 أكتوبر، 2009

سياسة أمن الدولة في الجمعيات الخيرية(استغاثة)


طول الوقت وانا في الجامعة كنت اسمع كتير من الطلبة يقولوا قانونا الامن مالوش علاقة بالجامعة؟ ..ده قانونا ...انما فعليا كان الامن هو أساس الجامعة ..هو اللي ينجح ويسقط في انتخابات اتحاد الطلاب..هو اللي يعين ويرفض تعين المعيدين..هو كان الكبير وكلمته الكلمة الاولي ..بصراحة كنت بطنش ومابحطش في دماغي ..ولا كان بيهمني اتحاد طلبة ولا كان في دماغي تعيين..رغم اني طبعا كنت من الاوائل...و ااتخرجت ونسيت الجامعة والامن وأيامهم..انما بقي اني ألاقي الامن واقف لي في جمعية خيرية فده حرام بجد وكتير...جمعية رسالة الخيرية..كل مصر عارفاها وعارفة أصلها وفصلها..وعارفة مؤسسها دكتور شريف ...دكتور في الجامعة الامريكية..وفكرة رسالة فكرة أمريكية وااتنفذت في مصر علي ايديه..لا ليه علاقة باخوان ولا انصار...لا سلفيين ولا جهاد..ولا وطني ولا وفدي....شباب رسالة شباب عاديين جداا...كلهم خير..طاقة نفسهم يوجههوها للخير وفي الخير..طلبة جامعة وثانوي وخريجين..لبسهم عادي..لا خمار ولا نقاب..تدينهم وسطي..لا متحرر ولا متشدد..فكرهم بناء..نفسهم يمدوا ايديهم ويساعدوا غيرهم المحتاجين ..باللي يقدروا عليه..بيخافوا..وبيحبوا يمشوا في السليم..قانوني..ياخدوا تصريحاتهم من الشئون الاجتماعية زي ما القانون ماقال...شباب دمياط اتجمعوا وحطوا هدف يفتحوا فرع لجمعية رسالة في دمياط بلدهم..اتغلبوا علي أكبر مشكلة كانت بتواجههم..مشكلة المقر..مقر الجمعية..متبرع اتبرع لهم بشقة علي الطوب الاحمر..شطبوها...دهنوها بنفسهم..عشان يوفروا تكاليف الدهان...لحد مانورت وجهزت وكملت..فرحوا قوووووووي..جريوا جري علي الفرع الرئيسي في القاهرة..اخيراااااا بقي عندنا مقر للجمعية نقدر نفخر بيه...جت لجنة من رسالة القاهرة الام عاينت..وعجبها المكان..وأشرت بالموافقة..اننا هنكون فرع تابع ليها في محافظة دمياط..طيرنا من الفرحة..فاضل اخر خطوة..ونبقي فرع رسمي..نقدر نمرس انشطتنا الخيرية المختلفة بحرية واحنا واثقين ان خطواتنا صح وسليمة..رحنا الشئون..سلمناهم اوراقنا..واسماء من وقع عليهم الاختيار لتمثيل مجلس ادارة الفرع..قالولنا الاسماء الاول لازم تروح الامن..مع ان قانونا الامن مالوش دخل...قلنا ماشي..كله سليم ..مايهمناش...عدي ال60 يوم..قالولنا اسفين نقلنا مقر الشئون لمكان تاني وورقكم ضاع...قلنا ماشي الورق تاني ليكم ولا يهمكم...فات 60 وم..يقولولنا معلش بلاش اسم رسالة..اختاروا اسم تاني...نقول ماينفعش احنا فرع تابع للام والام تحمل اسم رسالة...قالولنا من الاخر كده...الامن مش موافق..ليه ياجدعاااااان..حرام عليكم..صبر 3 سنين يضيع بسبب الامن؟.....معلش اصلكم اخوان....اخوان منين بس؟..احنا جمعية مشهرة في كل فروع الجمهورية ومعروفة ان لا ليها علاقة باخوان ولا غيره...موظفة الشئون قالتهالي صراحة..خلاص لو تعرفوا حد من الحزب الوطني يكون راعي ليكم ..هيروح الامن ويتفاهم معاهم وهيجيبلكم الموافقة بسرعة جدا...ايه ده؟ في ايه؟..وطني ايه واخوان ايه؟...احنا لا عاوزين دول ولا دول..احنا جمعية خيرية ..مش لعبة انتخابات..ولا مظهر يتحمي فيه الغير..هو ده الحل الوحيد..انكم تكونوا تابعين لاحد قادة الحزب الوطني..يا كده يا انسوا الاشهار نهائي

انا شرحت باختصار حال فرع رسالة دمياط..مأساته..ناس كتير جعانة ..وناس اكتر عريانة....عرايس كتير ايتام وغير قادرين محتاجة تتشور..ناس كتير مش قادرة تاخد درس..ولا قادرة حتي تتعلم...ليه الامن يتدخل في الخير؟..وليه السياسة تلعب بمصاير ناس غلابة؟ ..كل همهم في الحياة حد يحس بيهم بهمومهم بمشاكلهم...ليه طاقة شباب تموت وتضيع؟ ..او تتوجه اتجاه غلط ..كل ده ..عشان الامن رافض؟...عشان في شبح مخيف مسيطر عليهم اسمه الاخوان؟...حد يقولي ده حلال ولا حرام

نعمل ايه عشان نثبت ان مالناش علاقة بيهم..لو حد معانا مربي دقنه نطرده؟..ولو واحدة منقبة نقولها سوري باي؟.ولا نروح نرمي الجمعية في احضان قادة الوطني..ونخضع ليهم ونسلم

ننفذ اوامرهم...وياخدوا بطولة ومجد علي قفانا؟

رسالتي ديه لكل مسئول فيكي يامصر يقدر يساعد فرع رسالة دمياط الخيري في انه بس يكون قانوني..واحنا خدامين الامن بس من غير لا وطني ولا اخوان
....

هناك 5 تعليقات:

ألِف يقول...

مش بس رسالة، الدولة المصرية سياستها من فترة طويلة تقطيع أوصال المجتمع المدني بحيث أن يبقى المواطن علاقته الوحيدة هي العلاقة الرأسية بالدولة للقضاء على كل العلاقات الأفقية في المجتمع. الدافع كان أمني و للحفاظ على بقاء النظام و تقليل إمكانية أن الناس تتفق على الحكومة، و لكن النتيجة الفعلية كانت تدهور المجتمع من كل النواحي، اجتماعيا و ثقافيا و سياسيا.

أمن الدولة يدير الدولة.

High Sounds يقول...

حسبنا الله ونعم الوكيل

لا أكثر

لا أقل

طارق وبس

يورو يقول...

ننفذ اوامرهم...وياخدوا بطولة ومجد علي قفانا؟

هو دا المطلوب يا بطه


حسبنا الله ونعم الوكيل

م/ الحسيني لزومي يقول...

الحياة في مصر تبدأ وتنتهي من امن الدوله وانا لا استبعد ان ياتي اليوم الذي يطلب فيه المأذون من العريس موافقة امن الدوله علي عقد القران
انا اجهز لجمعيه لمحاربة الطلاق الذي تفشي في المجتمع واصبح كل دقيقه لدينا ستة حالات طلاق الموضوع بعيد جدا عن اي عمل سياسي ولكن لاني صاحب نشاط سياسي اخشي من التقدم لاني اعلم ان الاوراق ستقف في امن الدوله لهذا السبب..فلله الامر من قبل ومن بعد
-----------

من اجل
وطن آمن مستقر...حياة افضل.
من اجل
محاربة الفساد....مقاومة التزوير
من اجل
ان تكون مقدرات هذا الوطن بأيدينا
شارك في الحملة الشعبيه للقيد بالجداول الانتخابية
ضع شعار الحملة علي مدونتك اذا اردت

star يقول...

أنا مش عارفه اقولك ايه بس ربنا معاكوا وإن شاء الله صوتكوا يوصل وحد يسمعكوا علشان تفتحوا الفرع بتاعكوا ومتستسلموش لأن فعلا عمل الخير خاصتا فى جماعه بيكون مشرف ومحمس ومريح وسهل ربنا معاكوا,,من احدى المتطوعات فى رساله,,ربنا لما بيلاقى حد بيدافع عن الحق بيعليه ويقف جمبه افتكرى دايما اوعى تستسلموا

مصر