مواقـــف مضحكة من حيـــاتـي

مش عارفة ليه بقالي فترة ذكريات الطفولة والمواقف اللي مريت بيها في حياتي مصممة تقفز لذاكرتي المضحكة منها والمؤلمة قلت أكتب شوية مواقف أبت ذاكرتي الضعيفة أن تسقطها وتنسيني اياها

الموقف الاول

بابا ياحضرات اللي مايعرفهوش عن قرب يخاف منه قوي وياريت خوف عادي لاء رعب حقيقي وبلا مبالغة واحنا أطفال صغيرين كنا كلنا بنخاف منه مووووووت مش احنا ولاده بس لاء كل العيلة ماما و عماتي وعمي لدرجة ان اخويا محمد الصغير كان بيستخبيي تحت السرير طول ما بابا موجود في البيت حتي نينا اللي هي والدته كانت بتحبه حب فظيع وتخاف منه برده المهم بقي كان في بداية حياته مكتب المحاماة بتاعه في بيت نينا وفي يوم ولاد عمتي الصغيرين كانو جايين يزوروا نينا وطبعا باب البيت مفتوح عشانه مكتب دخلوا لاقوا بابا قاعد علي المكتب وهو لا بس جاكت البدلة والجرافتة وبرعبهم اللي مالوش حدود قعدوا معاه شوية وبعدين استأذنوا فقام بابا يسلم عليهم وهما ماشيين فاذا به نسي يلبس بنطلون البدلة ....... ولك أن تتخيل بقي واحد في اختيار اما ان يموت من الضحك..او من الرعب

الموقف الثاني

بابا برده مش عارفة بابا هافف عليا ليه كتير اليومين دول المهم اخواتي الكبار عبد الرحمن وعبد الله كانوا بيتخانقوا مع بعض وفجأة بابا فتح باب الشقة فتسمر الجميع من المفاجأة والرعب بابا اتنرفز زنق اخويا عبد الرحمن في السرير ونزل ضرب فيه اخويا التاني بقي واقف علي باب الاوضة عمال يضحك ومبتسم علي الاخر فرحان في اخوه بقي بابا خارج لاقي ده بيضحك راح قايله بتضحك علي ايه يا ابن التييييييت ...وراح ضاربه بالقلم...كان منظره مسخرة بصراحة

الموقف الثالث

أخويا عبد الله كان بيروح يجيب لماما فلوس من بابا من المكتب يعني وهو صغير المهم ماما قالتله لو مجبتش الفلوس فكة مش هتاخد انت واخواتك مصروفكم الصبح وانتم رايحيين المدرسة (كان مصروفنا ربع جنيه اياميها) المهم أخويا اتأخر قوي العشا اذنت والساعة عشرة جت واحداشر واتناشر وكنا هنبلغ البوليس خلاص وفي الاخرررررر لاقينا الواد جاااااي ومعاه كومة فلوس كبيرة فرحان بيها من وهو تحت أمي طبعا نست ان الواد اتاخر وافتكرت ان بابا بعت لها كنز اتاري الواد العبيط كل ده بيلف علي المحلات كلها عشان يفك لها العشرين جنيه كلها اربااااااااع 20 في 4 يعني 80 ربع بالصلاة علي النبي ومالكيش حجة ياماما بقي

الموقف الرابع

كنا بنحب نلعب لعبة الشايب بالكوتشينة قوي واحنا صغيرين وكان من حظ محمد اخويا الاغبر ان كل مرة يطلع هو الحرامي وكنا بنحكم عليه أحكام بشعة مرة حكمنا عليه يلبس طرحة وينزل يلف الشارع سبع لفات ونفذ ومرة تانية حكمنا عليه يحط كارتونة جزم قديمة فوق راسه وينزل السلم كله بيها ويمشي بيها في الشارع واثناء التنفيذ نزل دور دورين وفجأة سمعنا صوت الكرتونة بيترمي علي الارض ومحمد بيعيط وفجأة لاقيناه طالع وغضب الدنيا كله في وشه وطلع يجري ورانا وكانت حتة علقة ..لا تنسي

الموقف الخامس.

.(موقف حديث جه علي بالي محبتش أحرمكم منه)

أختي سومة واحدة صاحبتها بتحكي لها علي بنت اخوها الصغيرة بتقولها غبية قوووووي يا سومة ابوها قالها انزلي ياتقي شوفي العربية دايرة ولا لاء طلعت وقالتله لاء يابابا مش دايرة ...دي مستطيل

كفاية كده..صدعتكم

اتمسوا بالعافية