الهي ماعدت أبغي شيئا في هذه الحياة سوي عفوك ورضاك

الجمعة، 20 فبراير 2009

بـــنـتـك مـعـمـولـهـا عـمـل

(أنا أعيش طول عمري وحيدة ولا عيني في يوم تقع علي المنظر ده لاني احتمال بعدها تيجوا تقرولي الفاتحة في ابو الوفا )


تخبرها بثقة ويقين وصوت الملم بكل مجريات ومحدثات الامور

بنتك معمولها عمل

الام وشها يتخطف ويجيب ألوان الطيف وقلبها يقع في رجليها و.......


الأعمال ياحضرات أظن كلنا نسمع عنها وعارفينها الاعمال أصبحت موضة العصر الحديث الشماعة اللي بنرمي عليها أي مشكلة تقابلنا حتي لو كان أمرها سهل عندك مثلا


الأم اللي بنتها قعدت في البيت بعد تخرجها بسنة تفضل تدعي ربنا لبنتها بعريس في الرايحة وفي الجاية تسمعها تدعي من قلبها ربنا يرزقك بعريس يريحني منك وتستغل قوي الاوقات المستجاب فيها الدعاء وتدعي وتلح وبعدين نغمة الايمان تبتدي تتغير لما يعدي سنة واتنين وتبدأ تتوشوش مع الاقارب والجيران وتتحدت في الموضوع وفي الاخر تطلع الحكمة من فاه احداهن لتخبرها بثقة ويقين وصوت الملم بكل مجريات ومحدثات الامور بنتك معمولها عمل الام وشها يتخطف ويجيب ألوان الطيف وقلبها يقع في رجليها ويبتدي عقلها يسبح لبعيد وتبص في الارض بتفكر تفكير عميق وفي الاخر ترفع وشها وبايمان نادر تقول ايون فعلا معمولها عمل وأنا عرفت مين عاملهولها الست محاسن بنت عمي كارهاني وكارهة ولادي وطول عمرها بتتمنالي الشر مفيش غيرها هي محاسن شفتها كذا مرة بترش ماية في بيتها قدام عتبة الباب يبقي هي اكيد ولا حد تاني غيرها وتتحول اسطوانة الدعاء من أجل ابنتها علي محاسن واللي جابوا محاسن وتلاقي اللي يقولها فتشي يختي في هدوم بنتك كويس أكيد هتلاقي حاجة ناقصة منهم ولا حاجة مدفوسة في وسطيهم ولا بله حتة قماشة ومخبياها هنا ولا هنا والست تدور وتدور وأكيد لازم تخترع اي حاجة تثبت لنفسها بها انها سيدة الموقف


وتبدأ رحلة عذاب بطلتها الفتاة المسكينة ويصبح هم الام صنع قائمة طويلة عريضة بأسماء أفضل الشيوخ لفك الاعمال وتفضل تسمع من فلانة وعلانة القصص ونهايتها السعيدة علي ايد الشيخ فلان والبنت اللي كانت وصلت للاربعين وببركة الشيخ بتنجان جالها عريس لقطة أخدها بشنطة هدومها وغيرها اللي في شهر واحد اتجوزت وسافرت اروبا وامريكا تقضي شهر العسل ببركة الشيخ الطيب الام قلبها يطمن وتتأكد انها دخلت الباب الصحيح والمضمون ومن شيخ لشيخ ساحبة البت في ديلها لا حول لها ولا قوة يحركها الفراغ الذي تحيا فيه ورغبتها الكامنة بداخلها أن تحمل لقب زوجة وخوفها البالغ من اقتراب باب العنوسة منها وحلم الامومة التي طالما راودها فكل هذه الافكار زرعها بداخلها المجتمع الذي لا تفتأ أن تسمع فيه هذه الكلمة من قبل الميلاد ... البت مسيرها للجواز ....هي الست مننا ليها اي في الدنيا غير بيتها وجوزها وعيالها..وطالما مفيش جوز ولا بيت ولا عيال يبقي مليون في المية بنتك معمولها عمل


نروح بقي للشيوخ المؤمنين الصادقين العارفين ربنا يقولها يابنتي خدي أوراد القرأن ديه ااقريها سورة كذا 7 مرات وانتي واقفة وسورة كذا 5 مرات قبل ما تنامي وممكن يقولها ااقري القران كله مرتين في اليوم مرة الصبح ومرة بالليل كأنه برشام والمسكينة تاخدهم وتطير هعمل دول والعريس هيشرف تنفذ الاوامر بالحرف الواحد وامها طبعا متابعاها متابعة عمرها البت ماشافتها منها حتي ايام الثانوية العامة وبعد كورس العلاج تستني بقي يوم اتنين شهر بكتيره الام قلبها يتقبض مفيش عريس ياولاد ماتصبرش لاء تاخد اسم الشيخ رقم اتنين في القايمة ورحلة تانية لا تنتهي الا بشطب كل الاسماء من القائمة وتبتدي تستقصي هو في شيوخ نسيت أكتبها ولا ايه؟؟؟؟؟؟


تيأس لاء.. تتعب مستحيل .. طيب اي تاني؟ الشيوخ خلصت تلاقي اللي يقولها مفيش قدامك غير شيخ مخاوي يعني ايه يا اختي شيخ مخاوي؟ تقولها ماتخافيش ده رجل صالح طيب ومخاويلك جن تقولها لا ياختي الكلام ده حرام تقرب منها تقولها ماتقوليش كده حرام ايه وهو احنا بتوع الحرام برده ده مخاوي جن مسلم وتقي وما بيأذيش وبالامارة اسمه الحاج محمد ..الجن اللي اسمه كده علي فكرة... وتجر معها الذبيحة من جديد واخر المتمة تلاقي البت المسكينة وامها في بيت دجال ولا دجالة عمالين ينفخوا في النار وجنبهم زار وناس بتتضرب وناس تصرخ وتبقي الام حاملة بداخلها عزيمة واصرار بان محاسن بنت عمها اللي جايز جدا تكون ماتت وربنا افتكرها عاملة لبنتها عمل بوقف الحال


وانتهت الرحلة بعدما نفذت وسائل الأم ولكنها لم تنتهي في قلب البنت التي زادتها هذه الرحلة الما وعذاب كيف لا وهي بلا قيمة في الحياة سوي ذبيحة منقادة في رحلة طويلة هدفها اهدائها لمن يبغي الشراء


للاسف ياجماعة الموضوع ده فعلا اصبح منتشر جدا بشكل مرعب ومش مع الام بس اللي ترغب في سترة ابنتها لاء مع التلميذ لو سقط في الامتحان يبقي معموله عمل لو شاب صغير جاله مرض الله اكبر تسمع الكلمة يبقي معموله عمل لو راجل تاجر رزقه قل يومين ولا حاجة يبقي حد اذيه وعامله عمل بوقف الحال أنا خايفة ابو صابر البواب يفتكر ان بواب العمارة اللي جنبه عامله عمل عشان يكره فيه السكان


في ناس عايشة حياتها كله مسيطر عليها فكر ان غيرها بيأذيها وتمشي ورا الفكر ده لغاية مايدمر حياتها ونسينا الاية الكريمة اللي بتقول قل لن يصيبنا الا ما كتب الله لنا هو مولانا وعلى الله فليتوكل المؤمنون صدق الله العظيم


نسينا حديث سيد الخلق عن عبد الله بن عباس -رضي الله عنهما- قال كنت خلف النبي -صلى الله عليه وسلم- يوما فقال: يا غلام إني أعلمك كلمات: احفظ الله يحفظك، احفظ الله تجده تجاهك، إذا سألت فاسأل الله، وإذا استعنت فاستعن بالله، واعلم أن الأمة لو اجتمعت على أن ينفعوك بشيء لم ينفعوك إلا بشيء قد كتبه الله لك، وإن اجتمعوا على أن يضروك بشيء لم يضروك إلا بشيء قد كتبه الله عليك، رفعت الأقلام، وجفت الصحف رواه الترمذي


صدقت يا حبيبي يارسول الله
النفع والضرر بيد الله وحدهفلنعد للايمان الذي من أركانه الايمان بالقضاء والقدر
ولنقف بشجاعة لنعلن عن أنفسنا بتحمل الصعاب ومواجهتها ولنغير فكر المجتمع السلبي عن طبيعة المرأة ولتقف كل فتاة حرة مع نفسها وقفة لتفتخر بعلمها بنبل أخلاقها برغبتها أن تحيا الحياة لتضيف عليها جديد وجديد ان لم يكن من خلال بيت وزوج وأطفال فمن خلال عمل شريف تزرع فيه حبا وخيرا وحنانا

علي الهامش كده: سبعين مليون مصري كارهين مبارك محدش عمل له عمل ليه؟ ولا هو الوحيد المحصن ضد الاعمال هههههههههه

تحياتي

فاطمة الطرابيلي




هناك 29 تعليقًا:

حمادة زيدان يقول...

بطوووووووووووووووووووووووووووووووط

الدجالين أصبحوا أكتر من الهم , والسبب في انتشارهم هو إحنا , أحنا اللى ادنالهم الفرصة علشان يلعبوا في دماغنا بدجلهم وشعوذتهم ...

ومع زيادة أعمار البنات طبيعي يعني تلاقي الشعوذة منتشرة بينهم لأنهم في النهاية مفيش في أيدهم غير كدة "بيتعلقوا بالحبال الخايبة" زي ما بيقولوا ...

ربنا يبعدنا عن الشعوذة يارب

موضوع في الجون يا بطوط

محمد مارو يقول...

بطه

اللى جيبنا ورا و اللى مأخرنا اعتمدنا الدائم على القوه الخفيه اللى هتحل كل المشاكل

حتى فى القضيه الفلسطينيه

بيعتقدوا بان قوه خفيه ستمو اسرائيل و كان مفيش مسلمين

وردشان smilyrose يقول...

بطبطوووووووووووط

ايه يا بنتى انتى قعدتى مع الست

الوالدة ولا ايه

اصل لسه سامعة منها الكلمتين دوووووووول


دا كله عشان بقلها انا مش فاضية

وربنا يعينى على دراستى وشغلى

لقيتها بتقولى انتى اكيد معملك عمل

ضحكت وقلتلها بخيبة الأمل اللى راكبة

حرحورررررررررر صغير

ههههههههههههههههههه

والله كل اللى احنا فيه من الجهل دا

كل لن يصيبنا الا ما كتب الله لنا

ربنا يسترها علينا

شكلك كدا يابت معملك عمل


ههههههههههههههه

وردشان

smilyrose

روح الحب الصادق

mohamed ghalia يقول...

ياريت فعلا نتعلم إنى نصيبنا هنشوفه
ونبطل خزعبلات بقى
دمتى بكل الود
موضوع رائع

ريمان يقول...

بطتى


فعلا معاكى حق

هى بقت الشماعه اللى بيعلقوا عليها كل المشاكل


وكمان ضعف الايمان هو اللى بيخلى الناس دى تروح للدجالين والمشعوذين

والتخلف اللى حصل فى العقول هو سبب التاخر اللى احنا فيه


الله يحفظنا ويهدى النماس اللى عقلهم ضارب دول

ميرا ( وومن ) يقول...

ههههههههههههههههههههههههههههههههههههههههههههههههههههههههههههههههههه

يخرب عقلك يا بطوط سكر والله علي فكرة انا شوفت الفيلم ده بحذفيره مع واحدة صحبتي ويااما اتجرجرت وراها علشان اتفرج

جهل وخرافة ده لغير المتعلمين اومال المتعلمين المثقفين نقولهم ايه

فعلا عندك حق الموضوع بقي مخيف ربنا يهدي

غير معرف يقول...

أمانى

بجد ده موضوع مهم اوى الناس الظاهر لغت عقلها وكمان دينها لو كان كده مكنش حد غلب كان كل الى نفسه فى حاجه راح لدجال من دول وتخلص المشكلة

بنوتة يقول...

السلام عليكم
بجد تسلم الايد ايلل يكتبت والعقل ايللي فكر
موضوع مميز جدا واسلوبك فوق رائع
للاسف فعلا الحكاية دى منتشرة جدا
والحقيقة هو مفيش كلام يتقال بعد كلامك
بس في موقف مهم
النبي صلى الله عليه وسلم واحد من المشركين عمله عمل وهما في الوقت ده كانوا بيعرفوا الحاجات دى كويس
المولى عز وجل أنزل المعوذتين والاخلاص وجبريل أمر النبى انه يقرا كل واحدة ثلاثة مرات و كانت كل سورة بتعادل حلقة من العمل وكل ما قرأ واحدة حلقة اتفكت الى ان اتفك العمل نهائى عشان كده النبي أمرنا بقرأة السور دى قبل النوم لبعد الاذى
الموضوع بسيط بس احنا ايللي بنكبره
على فكرة
احنا وببركة ربنا اللهم لا اعتراض
وصلنا 85 مليوووون مصرى
تحياتى ليكى

حاجات جوايا يقول...

بجد يا بطوط الموضوع ده زاد عن حده
لدرجة انى تقدرى تقولى ان نص شعب مصر عامل عمل للنص التانى ههههههههههه

بجد الناس معادش عندها عقل
وايمانها ضعف
والشيطان بقى قريب منهم اووووووووووى

ربنا يهدى ويصلح الحال يارب

المهم انتى اخبارك ايه ؟؟؟

عالم حبيب يقول...

صدقتي أختنا الكريمة .. وما أجمل الحديث الذي ذكرتي .. وما أجمل أن نملأ قلوبنا باليقين والتوكل على الله رب العالمين ونعلم أن النفع والضر بيد الله سبحانه وتعالى

ريكو يقول...

السلام عليكم
معك كل الحق
للأسف الموضوع دة بقى منتشر بطريقة فظيعةوواللة مش فارقة سيان بين المتعلمين والجهلة
الكل مؤمن بالقوة الخفية اللى عندها القدرة على تغيير مجرى الحياة

ودا طبعا ناتج عن ضعف الايمان بقضاء اللة وقدرة
وقانا اللة وعفانا
تقبلى مرورى

د.آيه يقول...

بسم الله الرحمن الرحيم
كلامك مظبوط اوى فعلا يا بطوط..
هو فعلا الموضوع ده انتشر اوى .. من رأيي ان السبب ان الانسان بيتعلق اوى بالوهم اى حاجه نفسه يعرفها عن الغيب .. رغم ان انه كتير بيبقي عارف ان الموضوع ده غلط و مش بيأثر في حاجه ..
كمان نسوا ان "لو علمتم الغيب لخترتم الواقع"..
حتى في احيان كتيره الداكتره ممكن يوهموا المرضي الميأوس من علاجهم انهم تمام فالمريض يصدق و يقدر يتمتع باليومين اللى فاضلينلوا...
سوري طولت..
تحياتى..

بنت الاسلام يقول...

حمادة زيدان

المشكلة ياحمادة اننا بنحاول نتجاهل الاسباب الحقيقية لمشاكلنا وبنحاول نتعلق باوهام عشان نهرب من الواقع المر

وما اكثر من يدفع من اجل ان يغير من حياته دون ان يدري انه لا يدفع سوي للاوهام

نورتني ياحمادة ويارب دايما اتبني مواضيع في الجون

تحياتي

بنت الاسلام يقول...

محمد مارو

مع ان الانسان يامارو بيمتلك قوة كامنة بداخله كافية لمواجهة كل المصاعب ولكن ان احسن استخدامها

تحياتي

بنت الاسلام يقول...

روح الحب الصادق

هههههههههههههه

هي مامتك منهم

والله اغلب الامهات بقوا كده دلوقتي

معلش نستحملهم بقي


قدرنا


تحياتي ياجميل

Unknown يقول...

انا دخلت عندك المدونة
وانا اسف عشان اول مرة ادخل
بس المدونة عجبانى جدا والمواضيع فيها جميلة وربنا يوفقك

عبد الجليل ابوحسين
من عمال غزل المحلة

Tarkieb يقول...

رغم اني مش مقتنع بالاعمال دي لكن كلامك فكرني مرة بقصة زي قصتك بس حقيقية
وحصلت قدامي
والشبخ وحياتك ماطلب مليم بعد كدة....الجميل في الحكاية ان البنت اللي اتفكلها العمل اتجوزت لكن بعد ما خلفت اكتشفت انها جوازة الندامةهههههه وقالت ياريتني زي هاني شاكر......موضوعك جميل وبلوجك احلى

بنت الاسلام يقول...

محمد خليل

طب ونسيب الجهل لمين؟

انت حطيت ايدك علي مربط الفرس

العلم

طب ما هما متعلمين

يعني مالهمش عذر

اومال في ايه

الله اعلم

تحياتي

بنت الاسلام يقول...

ريمان

ضعف الايمان ده مصيبة فعلا بيخلي الانسان يتحرر من اي خوف من ربنا والاخطر انه بيفقد ايمانه بالقضاء والقدر

تحياتي

بنت الاسلام يقول...

ميرا

انتي اللي سكر

اهو ده بقي ياستي هو الفيلم السائد والسوبر اليومين دول

وسوقه رايج قووووووووووي

تحياتي

بنت الاسلام يقول...

أماني

هو هروب وعجز عن مواجهة الموقف وقلة صبر

ربنا يقوي ايمانا دايما ويجعلنا من الصابرين

تحياتي

بنت الاسلام يقول...

بنوتة

نورتيني وشرفتيني بالزيارة

الرقية الشرعية امر كلنا مؤمنين بيه

ولكن الخزعبلات اللي بقينا بنسمعها والتحايل والاحتيال علي الناس باسم الدين ده امر يرفضه الشرع والدين

اتمني التواصل بينا يدوم

تحياتي

بنت الاسلام يقول...

حاجات جوايا

انا بخير ياسالي الحمد لله

ومعاكي طبعا ان الموضوع زاد وعاد لدرجة اني بفكر اعمل عمل للواد دودو عشان اربطه جنبي العمر كله وابعده عن مامته اللي هو انتي طبعا هههههههههههههههههههههه



نورتيني يا ام الغالي

بنت الاسلام يقول...

عالم حبيب

ماهو مايبقاش دينا بينهي عن كده

ونروح احنا بتصرفات جهلا ناكد انه بيدعونا لكده

ده ظلم لدينا الجميل وتعاليمه الشمحة

نورتني

تحياتي

بنت الاسلام يقول...

ريكو

يارب الحال يعود كما كان ونرجع زي زمان مسلمين مؤمنين عن حق ويقين

تحياتي

بنت الاسلام يقول...

د اية

شرفتيني

وفعلا الوهم

الوهم والرغبة الملحة لتغيير واقع غير مرضي عنه يدفع الكثير لاجتياز طرق وعرة غير سوية


تحياتي

بنت الاسلام يقول...

abo33

شرفتني بالزيارة ياعبده واتمني تتكرر تاني

وتحياتي لكل عمال غزل المحلة

بنت الاسلام يقول...

tarkieb

هههههههههههههههه

حلوة اغنية هاني شاكر

يارتني

كتير بقوا بيغنوها دلوقتي

قوووووووووووي

نورتني

تحياتي

غير معرف يقول...

نطلق اليوم في تمام التاسعة والنصف الأربعاء الموافق
(25/2/2009)وتستمر حتي نهاية مارس القادم
حملة (دعونا نعيش بكرامة)
حملة (دعونا نعيش بكرامة) هي حملة عبر الأنترنت ووسائل الأعلام
ونناشد من خلالها الصحف المصرية
بتبني مأساتنا نحن معاقي مصر
الذين يعانون الويلات جراء عدم تطبيق قانون 39 لسنه 1975
والذى بتطبيقه نستطيع الحصول علي فرصة عمل
وأن نعيش بكرامة مساوية لكرامة المجتمع
لذلك نرفع نص الرسالة المرسلة إلي كلاً من
السيد المستشار/وزير العدل- مصر
السيدة الفاضلة / وزيرة القوى العاملة والهجرة - مصر
السيد المستشار/عبد المجيد محمود النائب العام - مصر
تحية طيبة وبعد
مقدمه لسيادتكم الموقعون أدناه يلتمسون من سيادتكم العدل ..
وذلك من خلال تنفيذ القانون 39 لسنة 1975
وتعديلاته (الخاص بتأهيل وتشغيل المعاقين)..
حيث أن أصحاب الأعمال ومسئولي الشركات يتعنتون في تطبيق نصوص ذلك القانون
في تعاملهم معنا مما يجعلنا من المتعطلين إضافة لاننا من فئات المعاقين هذا بخلاف
تأثيره علي نفسيتنا ومعنوياتنا لاحساسنا ان المجتمع يرفضنا..
وبعض الأحيان يقابلنا بالشفقة التي قد تجرح مشاعرنا..
لذا نرجوكم التدخل والعمل علي إصدار أوامركم بتطبيق القانون...
وتفضلوا سيادتكم عظيم الشكر والاحترام
مقدمه لسيادتكم عن المعاقين
أ/ رامز محمود عباس
معاق سمعياً
أ/ محمد سعد الدين نصير
نقص نمو وتشوه بالجمجمة
أ/ محمد مختارغريب
شلل أطفال بالساق اليمني

ملحوظة هذا الموضوع خاضع للتحديث طوال مدة الحملة
وفي إنتظار مزيد من المطالب التي يأمل المعاقين الحصول عليها
تبعاً والتي أرجواً أن تكون ذات إتصال بهدف واحد حاليا وهو حقنا بالعمل
وأيضا لكم في تعليقاتكم أن تطالبواً بإضافة توقيعاتكم لنرسلها للمسئولين

مصر