الهي ماعدت أبغي شيئا في هذه الحياة سوي عفوك ورضاك

الأحد، 18 يناير 2009

بعـــتــــذر لــــــك يادنــــيا


بعتذرلك يادنيا

صدقت ان الفرحة فيكي موجودة

ونسيت ان نصيبي منك

حزن والم ودموع

بعتذر لك يادنيا

نسيت الحزن

وافتكرت انه نساني

لكن خلاص سامحيني

مش هنساه تاني

بعتذر لك يادنيا

ظنيت انه من حقي أعيش

زي البشر

لكن خاني ذكائي

في دنيا البشر

بعتذر لك يادنيا

غمضت عيوني وحلمت

فتحتهم علي ضربة كف

بعتذر لك يادنيا

نسيت أن الموج عالي

والريح شديدة

وان مركب قلبي

زي الريشة

بعتذر لك يادنيا

في لحظة اتمنيت اللمة

ونسيت أن عنواني الوحدة

بعتذر لك يادنيا

اتمنيت مرة ان الفرح يدوم

والالم والحزن يزول

لكن ازاااااااااااااي

وانا ليهم وبيهم

بعتذر لك يادنيا

فتحت قلبي وشوفت الكل ملايكة

أتاري الملايكة مش هنا مكانها

بعتذر لك يادنيا

أوعدك هرجع تاني

هنسي أحلامي

هدفن جوايا كل أمالي

هدوس بقسوة علي كل المعاني

هفتكر بس دروسك اللي علمتهالي

دموعي في عنيا

والحزن في قلبي

والكسر في روحي

كفاية عليا

ولا لسة فيه نوع تاني

من الألم ماعشتوش

مجربتوش

أرجوكي

لو فيه قوليلي

بلاش صدمة جديدة

بلاش جرح جديد

ولا أقولك

وايه الجديد؟؟؟

احنا ارواحنا مالهاش تمن

اصدمينا

اجرحينا

موتينا

ااقتلي الاحساس فينا

ولو فكرنا يوم نبتسم

انتظري رجوعنا

واسمعي صوتنا

واحنا ليكي بنعتذر





هناك 25 تعليقًا:

ريمان يقول...

يااااااااااااه يا بطه

قلبى وجعنى يا بنتى اكتر ما هو موجووووووع


بجد مش قادره استحمل اشوفك كده حبيبتى


والله كلامك كله صح ومش احساسك لوحدك

بس هنعمل ايه حبيبتى

نصيبنا كده

والحمد لله

حبيبتى

روقى كده يا قمر

وساعات بتكون الوحده احسن من حاجات تانيه ممكن ألمها يبقى صعب اوى

روقى بقى يا قمر

وتعالى فى حضن رمانتك اللى بتحبك

وخدى بوسه كمان اهى حبيبتى

امووااااااااه

اموااااااااه

امواااااااااااه

بحبك اوى يا بطه

ربنا ما يحرمنى منك ابدا ابدا

blue-wave يقول...

حلوة الكلمات
قاسيه وموجعه بالفعل
ولكن
الدنيا مالهاش ذنب
احنا اللى بايدينا قتلنا نفسنا

hasona يقول...

ايه يا بطة المأساة دية ؟؟
طبعا لسنا ملائكة - وهكذا تكون الحياة
ألم بعذابه وروعته (ما لم يقتل يقوي )ويتغييير المسار
،،،،
تذكرت كلمات أغنية لعبد الحليم(قلبي يقول للحب يبعد عن طريقي - أي قلب هأقابله ياويله0000000)لا نقابل القسوة بقسوة ولا نقابل الخيانة بمثلها
ـ،،،
عايز أقولك هناك أنواع وأصناف كثيرة من الألم - ربنا يجنبك اياها ولا تتذوقبها

ومش لازم نعتذر ولا نقتل الأمل فينا-فالحياة بلا أمل قريبة من الموت
ـ،،،ـ،،،ـ
جاهدي وتغلبي علي هذه الحالة

تحياتي لك

بنت القسام يقول...

بسم الله
السلام عليكم
ايه بس يابطوط مالك
الدنيا فانيه والله يابطه ومفيش حد يستاهل والله
يلا كل شئ هينحل بااذن الله بس قولي يارب
تحياتى يابطوط
بحبك

حسن حنفى يقول...

دائما حزن في حزن

ابتسمي للحياه تبتسم لكي

مش هقولك الا دمتي بفرح

رانيا الجبالي يقول...

ايه ده كل ده تشاؤم يابنتي دا انتي اللي بتديني الامل اخد امل منين انا دلوقتي مليش دعوه
ربنا يوفقك ويعينك علي اللي جاي

ميرا ( وومن ) يقول...

بطوط

قولك ايه ؟

اقولك كلامك وجعني

اقولك حسيتك قوي

اقولك اتمنين اني ابقي جنبك دلوقتي واخدك في حضني

ليه ؟ ليه يا بطوط الدنيا اسودت في عنيكي قوي كدة لية سبتي الدموع تخليكي تنسي طعم الإبتسامة .

لاء مش دي النهاية دي مجرد مرحلة وهاترجعي زي ما كنتي وهاتعرفي ان دة اختبار خلكيي قدة واحمد ربنا

ربنا مفيش احن ولا ارحم منة عمرة ما اخد ممنا الا علشان يدينا اللي احسن
ومش انا اللي هاقولك الكلام دة

ربنا يطمني عليكي يارب

غير معرف يقول...

ياااااااااه
كل ده
كلام بجد جميل وجامد اوى وجاى فى وقت صعب
بس والله الدنا ملهاش ذب فى اى حاجه
وكده اوكده هيه
يعنى حبينها او محبنهاش هيه الدنيه ولازم تتعاش
فانتى فومكيها زهيه والله هتحلوا
تحياتى بطوووط

حاجات جوايا يقول...

تصدقى بالله
انا بعد ما قريت على عكس كل البشر هاين عليا اضحك ههههههه
بجد والله متستغربيش
اصل انا عاملة زيك كده كل شوية اغلط فى حق الدنيا وافرح شوية واصدقها شوية .. وبعدين ارجع اعتذر لها تانى واقولها حقك عليا مش هعمل كده تانى .. مخدتش بالى

اييييييييييييييه
اهى دنيا وعايشينها وخلاص
ربنا يخرجنا منها على خير

روقى يا بنتى
بس هقولك حاجة
من هنا ورايح مش هنعتذر تانى للدنيا
مفيش حاجة بجد تستاهل منا لحظة زعل او حزن
عارفة ان باب النجار مخلع وبنصحك والاولى انصح نفسى
بس بجد بعد كده هاخدها مع الدنيا تحدى
يا تغلبنى
يا هغلبها

حياة تستحق الانقاذ يقول...

جميلة
معبرة
صارخة
ومتألمة
ما بين الابيضوالاسود عدد لا منتهي من الالوان فلا تستعجلي الدنيا يا بطة
لكن بالنهاية : لا تعتذري الا لأمك لأنها الاحق بالاعتذار

دمتي بخير يا صديقتي

أم المييس

بنت الاسلام يقول...

ريمان

اسفة حبيبتي اني وجعتت قلبك

سامحينىىىىىىىى

الحمد لله علي كل حال

كله رضا

ومحدش عارف الخير فين

ادعيلنا انتي بس

وربك كبيررررررررر

تحياتي

بنت الاسلام يقول...

blue-wave

معلش اصل البشر دول تخصص يرموا اخطائهم وسبب احزانهم علي غيرهم

وشماعة الدنيا دايما جاهزة

نورتني

تحياتي

بنت الاسلام يقول...

-حسونة

معاك حق

جايزالامنا واحزانا معنوية اكتر من كونها حسية ملموسة

مهما كانت قسوتها ومرارتها

فلن ترقي لمرتبة انواع اشد واقسي من الالم

تحياتي

بنت الاسلام يقول...

بنت القسام

يااااااارب

وانا كمان بحبك ياجيجي

ادعيلي بقي

تحياتي

محمد مارو يقول...

بطه

اسمحيلى اقولك و بكل صدق مفيش اى حاجه فى الدنيا تستاهل لحظه حزن واحده منك

اسمحيلى اقولك مفيش انسان يستاهل انك تبكى عليه

اسمحيلى اقولك
حتى لو الدنيا مزعلاكى حتى لو ايه نقول الحمد لله على كل حال و صدقينى دموعك و حزنك اطهر و افضل من انك تحزنى على اى حاجه


يارتنى اقدر اقول اكتر من كده بس مش قادر اتكلم

القلم السكندري يقول...

بل أنتِ أقوي من ضربات الحياةِ وطعناتها بإذن الله

وما تلك الدُنيا بدارِ مُقام.. تُوشكُ أن تزول بآلامها وأوجاعها..

إلي حيثُ الخلود.. ونسأل الله أن يكون خلود الجنان

((لكي لا تأسوا علي ما فاتكم ولا تفرحوا بما آتاكم))


كلماتٌ معبرة..


تحياتي

بنت الاسلام يقول...

حسن حنفي

معلش يا ابو علي دايما منكدة عليك سامحني

هحاول ابتسم


حتي لو ما ابتسمتش الدنيا


تحياتي

بنت الاسلام يقول...

رانيا الجبالي

افتحي ايديك يابت يارانيا خدي شوية

امال من عندي اهم


ربنا يقوينا علي الدنيا ويخلينا دايما صامدين قدام ازماتها

ونخرج من كل ازمة

وعلي لسانا كلمة الحمد لله

اعذريني لكلمات طلعت مني في حالة يأس

هستمر اعطيكي امل وامال للابد

تحياتي

بنت الاسلام يقول...

وومن

لية سبتي الدموع تخليكي تنسي طعم

الإبتسامة .

جميلة قوي الجملة ديه ياميرا

انا كمان حسيتها قوووووي

فعلا سيبنا الدموع تسيطر علينا

وعلي فرحة قلوبنا

ولكن الحمد لله

ادعيلنا انتي بس

تحياتي

بنت الاسلام يقول...

بطوط

معاكي حق

هي الدنيا ولازم تتعاش

نورتيني

تحياتي

م/ الحسيني لزومي يقول...

هل انتهت الحرب علي فلسطين؟
هل انتهي التأمرالرسمي العربي والدولي علي المقاومة؟
كيف نفعل روح المقاومة المدنية بيننا؟
كيف نطور الهبة الشعبية العربية والاسلامية لصالح القضية الفلسطينية ؟
شارك معنا بافكارك واطروحاتك
حتي لايكون جهدنا قبض الريح
مدونة مواطنون ضد الشعب
نحن في انتظارك

بنت الاسلام يقول...

حاجات جوايا

المهم انك ضحكتي

احيانا من شدة الالم

عيونا بترفض اا انها تبتسم

جايز تقدر تخفف عننا

ولو بضحكة مش صادقة

تحياتي

بنت الاسلام يقول...

محمد مارو

معاك حق

في ناس كتيرة بتمر في حياتنا بنتعلق

بيها قوي وبنفتكر انهم كمان زينا

اتعلقوا بينا وبنرسم حياتنا واحلامنا

وهما معانا فيها

لكن هما وهما بيرسموا احلامهم وبيخططوا

ليها عمرنا ما كنا جزء من الصورة

حبيناهم اه

ماحبوناش حقهم

يوم فراقنا ليهم

بنتالم

بنتوجع

بنحس ان الحياة فاضية

لكن مش افضل مليون مرة من وجودنا

جنبهم وهما قلوبهم مش لينا ومش معانا

؟؟؟

مش افضل مليون مرة من جرحهم المستمر

لينا ؟؟

مش افضل لكرامتنا وعزتنا؟؟

انا متفقة معاك تماما يامارو


الدموع أطهر من انها تتبكي علي قلب لم

يشعر بنا يوما ما

تحياتي لرايك السديد دائما

ومشورتك التي سأخذ بها حتما

وانت مكنتش محتاج تقول اكتر من كده

لانك قلت كتير كتير قوي

تحياتي

محمد مارو يقول...

نو كومنت على وقت الرد

بنت الاسلام يقول...

محمد مارو

مش فاهمة يعني ايه لا تعليق علي وقت الرد

ياريت حضرتك توضح

تحياتي

مصر