ليه بقينا بنقول غزة؟

ايمان حجو قتلت بيد اسرائيلية ولن نثأر لدمائها بالفرقة ولكن بالوحدة

سؤال ليه بقينا بنقول غزة؟ ونسينا انها في الاصل جزء من بلد اكبر محتلة ايضا اسمها فلسطين...من صغري وانا متربية علي عشق الارض المقدسة مسري النبي محمد وملتقي جميع الانبياء وانا بفكر في حكمة اجتماع جميع انبياء الله في المسجد الاقصي للصلاة بامامة نبي الاسلام محمد صلي الله عليه وسلم لاقيت ان ربنا بيبعتلنا رسالة مهمة نسيناها في العصر الحالي..الوحدة..كل نبي واقف جنب اخوه النبي بيصلوا نفس الصلاة وفي نفس المسجد كانهم بيقولولنا كلنا واحد كلنا رسالتنا واحدة وهدفنا واحد هو وحدانية الله والدعوة ليها ويمكن اختيار المسجد الاقصي بالذات لان ربنا عارف اللي هيجري له علي مدار التاريخ والفرقة اللي هتحصل لاهله كانه بيقولنا اتجمعوا اتوحدو وصدق المولي في قوله واعدوا لهم ما استطعتم من قوة ومن رباط الخيل ترهبون به عدو الله وعدوكم...احنا اعددنا اه..لكن لم نعد قوة ولا سلاح ..احنا اعدينا فرقة وضعف ,,صنعنا بايدينا قلوب بقت بتكره اخواتها ونست من هو العدو الحقيقي ونست ماهو المكان الحقيقي وبدات تشكك في وطنية وايمان كل من حولها لدرجة انها باتت تشك ايضا في نفسها

كتير مننا نسي الحفر تحت المسجد الاقصي كتير مننا نسي ان اسرائيل بتجهز ان القدس تبقي عاصمة ليها كتير مننا نسي ان اسرائيل كل يوم يتكبر وتزيد قوتها واحنا كل يوم بنضعف وتقل قوتنا اكتر ماهي قليلة كتير مننا نسي مجازر غزة ولبنان والعراق وبدانا نلعب علي نغمة جديدة الفرقة والاتهامات المتبادلة اللي مابتنتهيش

مصر بتعمل جدار فولاذي بينها وبين غزة لتمنع التهريب

اذا كان النظام المصري مقتنع ان التهريب فيه خطورة عليه فمن حقه انه يعمل الجدار

الكلام اصبح عن الجدار المصري وقل الكلام عن الجدار العازل الاسرائيلي

جدار مصر يمكن مصر شايفة انه حماية ليها

انما جدار اسرائيل فالشعب الفلسطيني والعالم كله شايفه ازاي؟

يمكن مصر ليها مبرراتها اللي انا ممكن اكون مش مقتنعة بيها

لكن اي مبررات اسرائيل انها تعمل جدار عازل في دولة فلسطين في ارض فلسطين ولا احد يستطيع ان ينطق ولا ان يقول لها لا

المستوطنات الاسرائيلية التي لا نهاية لها الحكومة الاسرائيلية تعجبها منطقة في اي حتة في فلسطين تقول لاهلها برة الحتة دي عاجبانا هنعمل فيها مستوطنة هنا

انا بتساءل هل ترغب حكومة حماس في غزة استمرار الفرقة الحادثة بين طوائف الشعب الفلسطيني؟

يعني هتفضل غزة منعزلة عن الضفة ؟

دولتين في دولة؟

ولو قلنالها الوحدة الوحدة الرد جاهز حكومة ابو مازن خاينة وعميلة

طيب الشعب ذنبه ايه؟

بتساءل سؤال اخر مع كامل احترامي لحركة حماس وجهادها ونضالها وكفاحها بشرف علي مدار اعوام طويلة عن الارض الفلسطينية

هل الاخوة في حماس ملائكة؟

هل اصرارهم علي عزل غزة عن باقي الاراضي الفلسطينية واستمرار الحصار قرار رباني مقدس؟

ماتقوليش اصلهم رافضين الاعتراف بدولة اسرائيل الدولة خلاص رغم عن انوف الجميع اعترفنا ما اعترفناش موجودة

مش معني ان اخويا رفض الاعتراف باللي انا لعترفت بيه ان خلاص مابقيناش اخوات مش معني ان كل فكر مقتنع بعقائد معينة ان لازم اجبره علي اعتقاداتي والا يبقي خائن وعميل

كلنا بنكره اسرائيل وجودها كيانها بنتمي بلحظة نهايتها من العالم لكن ده مش هيحصل واحنا بنكره بعض وشايلين من بعض

انا نفسي وحلمي فلسطين شعبا وفصائل يرجعوا يد واحدة كيان واحد مش هما وبس وكل الامة العربية عشان نقف ونشوف هنواجه اسرائيل ازاي

لكن احنا دلوقتي بنخطط هنواجه بعض ازاي

لو مصر عاملة الجدار الفولاذي للضغط علي حماس من اجل التسوية والصلح مع الضفة وفك الحصار عن غزة وعودة الاهل في غزة لاحضان الاهل في بقية الضفة يبقي ده شرف انا شخصيا افتخر بيه

لكن ما اظنش ابدا ان مصر ممكن تعمل الجدار بغرض اذلال وتجويع الشعب الفلسطيني مش مصر اللي تعمل كده مش عربي اللي يعمل كده مش مسلم اللي يعمل كده

خلاصة كلامي ان الوحدة هي الحل ولازم تكون مصلحة الشعب الفلسطيني اطفاله نساءه شيوخه فوق كل اعتبار سياسي ومصالح مش من اجل ان تبقي حماس متزعمة السلطة في دولة جديدة بعنوان غزة نتزعم حرب اعلامية بظلم مصر وفجور مصر ببناءها لجدار لمنع التهريب

انا اي يضمن لي كمصرية ان مواد ممكن تضر مصر ممكن تدخل لي من انفاق التهريب دي؟ كل شيء وارد ده الاحتلال احتلال صهيوني ومحدش يحاول يقنعني ان غزة مائة بالمائة فلسطين وغير مخترقة من الجانب الاسرائيلي اظنه استحالة

انا لست ضد ولا مع الجدار العازل بين مصر وغزة

ولكني ضد فرقة حماس و فتح

ضد فرقة غزة والضفة

ضد فرقة مصر وغزة

ضد فرقة مصر والجزائر

ضد فرقة مصر واي دولة اسلامية او عربية

ضد فرقة اي اخ لاخوه لاختلافعقائدي او فكري

ضد فكرة سيطرة السياسة والنزعة البشرية في الرغبة علي الحكم والسيطرة علي وحدة الشعوب

لن نصفق لحماس اذا وصلت للسلطة علي حساب فرقة الشعب الفلسطيني والاراضي الفلسطينية ولكن التصفيق الحقيقي لها عندما تصل اليه وحولها كافة شعب وارض فلسطين

اعذروني فسياسة فرق تسد اصبحت هي السائدة في عالمنا اليوم

هو يفرقوننا

وايضا هم يسودون

اما نحن

فنغرق

ونغرق

ونغرق

تحياتي

وبرجاء عدم فهم مقالي هذا انني مع ااو ضد اي جهة انا مع وحدة القلوب المؤمنة ضد اي مصلحة ايان كانت شرعيتها والله علي ما اقول شهيد

بحبك يامصر

بحبك يافلسطين

بكره وجودك وكيانك يا اسرائيل

سياسة أمن الدولة في الجمعيات الخيرية(استغاثة)

طول الوقت وانا في الجامعة كنت اسمع كتير من الطلبة يقولوا قانونا الامن مالوش علاقة بالجامعة؟ ..ده قانونا ...انما فعليا كان الامن هو أساس الجامعة ..هو اللي ينجح ويسقط في انتخابات اتحاد الطلاب..هو اللي يعين ويرفض تعين المعيدين..هو كان الكبير وكلمته الكلمة الاولي ..بصراحة كنت بطنش ومابحطش في دماغي ..ولا كان بيهمني اتحاد طلبة ولا كان في دماغي تعيين..رغم اني طبعا كنت من الاوائل...و ااتخرجت ونسيت الجامعة والامن وأيامهم..انما بقي اني ألاقي الامن واقف لي في جمعية خيرية فده حرام بجد وكتير...جمعية رسالة الخيرية..كل مصر عارفاها وعارفة أصلها وفصلها..وعارفة مؤسسها دكتور شريف ...دكتور في الجامعة الامريكية..وفكرة رسالة فكرة أمريكية وااتنفذت في مصر علي ايديه..لا ليه علاقة باخوان ولا انصار...لا سلفيين ولا جهاد..ولا وطني ولا وفدي....شباب رسالة شباب عاديين جداا...كلهم خير..طاقة نفسهم يوجههوها للخير وفي الخير..طلبة جامعة وثانوي وخريجين..لبسهم عادي..لا خمار ولا نقاب..تدينهم وسطي..لا متحرر ولا متشدد..فكرهم بناء..نفسهم يمدوا ايديهم ويساعدوا غيرهم المحتاجين ..باللي يقدروا عليه..بيخافوا..وبيحبوا يمشوا في السليم..قانوني..ياخدوا تصريحاتهم من الشئون الاجتماعية زي ما القانون ماقال...شباب دمياط اتجمعوا وحطوا هدف يفتحوا فرع لجمعية رسالة في دمياط بلدهم..اتغلبوا علي أكبر مشكلة كانت بتواجههم..مشكلة المقر..مقر الجمعية..متبرع اتبرع لهم بشقة علي الطوب الاحمر..شطبوها...دهنوها بنفسهم..عشان يوفروا تكاليف الدهان...لحد مانورت وجهزت وكملت..فرحوا قوووووووي..جريوا جري علي الفرع الرئيسي في القاهرة..اخيراااااا بقي عندنا مقر للجمعية نقدر نفخر بيه...جت لجنة من رسالة القاهرة الام عاينت..وعجبها المكان..وأشرت بالموافقة..اننا هنكون فرع تابع ليها في محافظة دمياط..طيرنا من الفرحة..فاضل اخر خطوة..ونبقي فرع رسمي..نقدر نمرس انشطتنا الخيرية المختلفة بحرية واحنا واثقين ان خطواتنا صح وسليمة..رحنا الشئون..سلمناهم اوراقنا..واسماء من وقع عليهم الاختيار لتمثيل مجلس ادارة الفرع..قالولنا الاسماء الاول لازم تروح الامن..مع ان قانونا الامن مالوش دخل...قلنا ماشي..كله سليم ..مايهمناش...عدي ال60 يوم..قالولنا اسفين نقلنا مقر الشئون لمكان تاني وورقكم ضاع...قلنا ماشي الورق تاني ليكم ولا يهمكم...فات 60 وم..يقولولنا معلش بلاش اسم رسالة..اختاروا اسم تاني...نقول ماينفعش احنا فرع تابع للام والام تحمل اسم رسالة...قالولنا من الاخر كده...الامن مش موافق..ليه ياجدعاااااان..حرام عليكم..صبر 3 سنين يضيع بسبب الامن؟.....معلش اصلكم اخوان....اخوان منين بس؟..احنا جمعية مشهرة في كل فروع الجمهورية ومعروفة ان لا ليها علاقة باخوان ولا غيره...موظفة الشئون قالتهالي صراحة..خلاص لو تعرفوا حد من الحزب الوطني يكون راعي ليكم ..هيروح الامن ويتفاهم معاهم وهيجيبلكم الموافقة بسرعة جدا...ايه ده؟ في ايه؟..وطني ايه واخوان ايه؟...احنا لا عاوزين دول ولا دول..احنا جمعية خيرية ..مش لعبة انتخابات..ولا مظهر يتحمي فيه الغير..هو ده الحل الوحيد..انكم تكونوا تابعين لاحد قادة الحزب الوطني..يا كده يا انسوا الاشهار نهائي

انا شرحت باختصار حال فرع رسالة دمياط..مأساته..ناس كتير جعانة ..وناس اكتر عريانة....عرايس كتير ايتام وغير قادرين محتاجة تتشور..ناس كتير مش قادرة تاخد درس..ولا قادرة حتي تتعلم...ليه الامن يتدخل في الخير؟..وليه السياسة تلعب بمصاير ناس غلابة؟ ..كل همهم في الحياة حد يحس بيهم بهمومهم بمشاكلهم...ليه طاقة شباب تموت وتضيع؟ ..او تتوجه اتجاه غلط ..كل ده ..عشان الامن رافض؟...عشان في شبح مخيف مسيطر عليهم اسمه الاخوان؟...حد يقولي ده حلال ولا حرام

نعمل ايه عشان نثبت ان مالناش علاقة بيهم..لو حد معانا مربي دقنه نطرده؟..ولو واحدة منقبة نقولها سوري باي؟.ولا نروح نرمي الجمعية في احضان قادة الوطني..ونخضع ليهم ونسلم

ننفذ اوامرهم...وياخدوا بطولة ومجد علي قفانا؟

رسالتي ديه لكل مسئول فيكي يامصر يقدر يساعد فرع رسالة دمياط الخيري في انه بس يكون قانوني..واحنا خدامين الامن بس من غير لا وطني ولا اخوان
....

الأقصي والنقاب

بسم الله الرحمن الرحيم

"سُبْحَانَ الَّذِي أَسْرَى بِعَبْدِهِ لَيْلاً مِّنَ الْمَسْجِدِ الْحَرَامِ إِلَى الْمَسْجِدِ الأَقْصَى، الَّذِي بَارَكْنَا حَوْلَهُ، لِنُرِيَهُ مِنْ آيَاتِنَا، إِنَّهُ هُوَ السَّمِيعُ البَصِيرُ"
سورة الإسراء - الآية رقم1

وَقُلْ لِلْمُؤْمِنَاتِ يَغْضُضْنَ مِنْ أَبْصَارِهِنَّ وَيَحْفَظْنَ فُرُوجَهُنَّ وَلا يُبْدِينَ زِينَتَهُنَّ إِلَّا مَا ظَهَرَ مِنْهَا وَلْيَضْرِبْنَ بِخُمُرِهِنَّ عَلَى جُيُوبِهِنَّ وَلا يُبْدِينَ زِينَتَهُنَّ إِلَّا لِبُعُولَتِهِنَّ أَوْ آبَائِهِنَّ

سورة النور اية 31

جهات إسرائيلية تستعد لتنظيم حفل فني صاخب على جدار الأقصى

النقاب يفجّر أزمة ضد شيخ الأزهر

وزير إسرائيلي من حزب متطرف يقوم بـ"جولة استفزازية" في الأقصى

النجيمي يدعو طنطانوي لمراجعة قراره حتى لا يقع في «مصيبة كبرى»

جماعات يهودية متطرفة تستعد لتقديم القرابين داخل ساحات الاقصي

بكرى يتهم شيخ الأزهر بإهانة المجتمع المصرى

مخطط يهودي لتنفيذ أكبر اقتحام للمسجد الاقصى

هل النقاب فرض أم لا؟

منظمات يهودية تدعو لتفكيك الاقصي ونقله الي مكة

شيخ الأزهر يثير أزمة بين الإسلاميين

الاحتلال يقتحم الأقصى ويعلنه منطقة عسكرية مغلقة

تصريحات شيخ الأزهر عن النقاب تثير البرلمانيين والقانونيين بمصر

اشتباكات في القدس بعد اقتحام المسجد الاقصي

الاخوان المسلمون يطالبون باستقالة شيخ الازهر بعد موقفه من النقاب

احكموا انتم بقي

احنا فين

وهما فين؟؟؟؟؟؟؟؟؟؟؟؟

انطلاق ..حركة 7 مليون معاق (حوار خاص)

كان لنا هذا الحوار مع أحد مؤسسين حركة 7 مليون معاق ..المدون رامز عباس ... والتي كانت بدايتها من جروب تم تأسيسه من قبل مجموعة مصريين معاقين قرروا الخروج من بوتقة الاعاقة والمطالبة بقوة بكافة حقوقهم بطرق سلمية شرعية لعل أحد يسمعهم ويلبي النداء

http://www.facebook.com/reqs.php#/group.php?gid=133171907438

رامز عباس...من أجل معوقين مصر ...مدون مصري سخر نفسه وحياته من أجل الدفاع عن حقوق المعاقين...بنرحب بيك يارامز...وبداية نحب نعرف منك وباختصار ..مين هو رامز عباس؟

في الحقيقة انا شاب أصم منذ سنوات تعدت الثماني ولم أفكر منذ أصابتي بالصمم سوى بشيء واحد هو معرفتي للحقوق وموقعي كمعاق سمعيا منها ولكن المدهش انني وجدت نفسي انتقل لمستوى يمكن وصفه ببعد نظر وهو انني ادافع عن ما تعداده 13 مليون معاق وبهذا الصدد أنشئت مدونة بإسمي الشخصي وأكتب فيها وبين الحين والأخر أتبني حملات لمعاقين موثقة بإوراقهم الخاصة وهذة هي حياتي

رامز عباس ...منذ متي وأنت منطلق في سماء التدوين؟ وكيف كانت بدايتك في هذا العالم ومن له الفضل في التفاتك لهذا المنبر كوسيلة سريعة وغير مقيدة لاثارة قضايا

هامة كقضية المعاقين في مصر؟

بدئت التدوين

في يوم 29 يناير2008 وكانت بدايتي عقب جولة أستمرت لعام كامل أنفقت فيها الكثير من المال وأنا أطالب الصحف والمدونون والمواقع الألكترونية بتبني قضايانا وكنت في تلك الفترة أي من قبل أنشاء مدونتي أشارك بالأحداث الساخنة التي كانت بؤرة أهتمام المصريون والنشطاء منها حضوري محاكمة الظابط /إسلام نبيه المتهم بهتك عرض السائق عماد الكبير ويومها إلتقيت بالمدونة نوارة نجم أبنة الشاعر اليساري الكبير أحمد فؤاد نجم وعرفت يومها كيف أنها سعيدة لأنها تمتلك منبراً للرأي ثم حضرت فاعليات مثل إجتماعات حركة مصريون ضد التعذيب بالقاهرة وقابلت عشرات المدونون منهم أحمد الصباغ وكان في بداياته ومهندس مصري وهؤلاء بالنظر إليهم وكيف هم سعداء هو ما دفعني لأن أنشيء مدونتي ولا يفوتني أن أشكر كل من ساعدني علي أنشاءها وبالأخص صديقي/ محمد خالد

رامز عباس ..مؤسس حركة7 مليون معاق علي الفيس بوك ..بلغ أعضاء الحركة مايقرب من 800 شخص علي الجروب...ماهي فكرة الحركة ...وماهي الاهداف باختصار التي تسعي الحركة لتحقيقها وهل كافة مؤسسين الحركة من المعاقين؟؟

فكرة الحركة انطلقت من كوننا أصحاب قضية فقط نحن من يمتلك حق إثارتها والعمل علي حلها بدءنا في تجميع عدداً من الزملاء ذوى الإعاقة وكان بعضهم متواصل من أجل فكرة رابطة ولكنها وءدت قبل ولادتها ثم إلتقينا في إجتماعات متواصلة ليضع كل منا لبنة في صرح الحركة وكان الزميل المؤسس/محمد السيد سعد هو أبرز من ساعد علي تعريف الزملاء بعضهم البعض ثم تولي الزميل/ السعيد خالد القيام بنفس المهمة وأنا حتي اليوم لم أستطع شكرهم لهذا المجهود أما عن الأهداف التي نسعي لتحقيقها فهي كثيرة جدا وقد أوضحناها باسهاب علي لينك جربنا علي الفيس بوك ولكنني سوف ألقي الضوء علي أحد الأهداف التي نستعد لتحقيقها وهو التضامن مع المعاق ذهنياً رجائي محمد سلطان وهو الذى تعرض لتعذيب شديد علي يد النقيب / أكرم سليمان بمديرية أمن إسكندرية ليس فقط حتي لايتكرر ذلك بل لأن ذوى الإعاقة ليس من حق أحد الأعتداء عليهم خاصة وأنهم يحتاجون للمساعدة المستمرة للتواصل مع الغير فما بالك بجهاز الشرطة الذى ينتهك حقوق المواطنين الأسوياء كما اننا نسعي لجعل رجل الشرطة يحترم نص المادة 3 من الاعلان العالمي لحقوق الانسان التي تنص

علي ان لكل فرد حق في الحياة والحرية وفي الامان علي شخصه

وهذا ما اهتم به بصفة شخصية داخل الحركة لكوني دارسا للقانون أما بالنسبة لمؤسسين الحركة ..فنعم جميعهم من ذوي الاعاقات الحركية باستثنائي فأنا الوحيد من ذوي الاعاقات السمعية

رامز عباس ...رافع شعار ..شركاء ولسنا أعباء...هل تسعي لتوجيه المعاقين للمشاركة في كافة جوانب الحياة..بما فيها الحياة السياسية في مصر؟

أود أن ألفت نظرك أننا بالحركة نعتمد علي التشاور الدائم فيما يتعلق بشعارات الحركة

وعندما أقترح أحد زملائنا هذا الشعار وجدناه ملائم للغاية ولكن هل سنكون حركة حقوقية وإجتماعية شعبية أم حركة سياسية علي غرار حركة شباب ستة إبريل؟ فلم نقرر بعد ولكنني من أنصار الرأي المتفق علي كوننا حركة حقوقية لان من ضمن الحقوق المشاركة السياسية وحرية الرأي والتعبير عملاُ بنص المادة 47 من الدستور التي تنص علي ان حرية الرأي مكفولة ولكل إنسان التعبير عن رأيه ونشره سواء بالقول أو بالكتابة أو

التصوير او غير ذلك من وسائل التعبير في حدود القانون والنقد الذاتي والنقد البناء ضمان لسلامة البناء الوطني وهذا ما سنفعله بخروج مسيرتنا السلمية يوم الجمعة في الرابعة عصراً

هناك أقاويل نرجو التحقق منكم بمدي صحتها أو نفيها ..عن حضور دكتور أيمن نور رئيس حزب الغد معكم المسيرة خاصة أن المنسق العام ل حركة 7 مليون معاق هو عضو فعلي في حزب الغد ...مامدي صحة هذا الخبر أم أنها شائعة ؟

للأسف الشديد هذه الأخبار متداولة بالفعل..ولا أدري مدي صحتها من عدمه..ولكن دعينا نقول أن هناك احتمال وارد لحضوره .. ولكننا مطمئنون تماما فكما قولت نحن حركة حقوقية إجتماعية وشعبية ولسنا في موضع لنستسلم لقوى سياسية تتحكم فينا طبقاً لأهوائها كما أننا متفقون وعلي رأسنا الزميل المنسق العام أننا نحمل فقط فكر حركة 7 مليون لذلك إذا قبلنا مستقبلاًأى دعم أومساندة فلن يكون علي حساب إستقلاليتنا وتواجدنا كقوة كبيرة تستهدف الدفاع عن كل ذوى الإعاقة وحقوقهم المشروعه

من صاحب دعوة الخروج لهذه المسيرة...ومن أين ستخرج..وما الاهداف التي تسعي الحركة لتحقيقها من وراء هذه الدعوة؟

هذة الدعوة هي تطوير لفكرة الأعتصام التي كانت تراودنا قبل بدايه تأسيس الجروب وكان زميلنا / محمود عبد الحليم والمهندسة سارة سمير من قيادات الحركة هم من أطلقوا الفكرة ونحاول من وراءها التعبير عن طاقة إحتجاجية بالأضافة للمطالبة بعدد من المطالب التي أطلقنا البيان التأسيسسي علي أساسها ومنها حصول المعاقين علي حقوقهم في التعيين بالوظائف الحكومية ومنها أيضا مشكلة الموصلات لذوى الإعاقة الحركية وقد نطور الفكرة مرة أخري وسوف تخرج مسيرتنا من حديقة الحرية بالقاهرة بشكل سلمي ويشارك بها ذوى الإعاقه أعضاء الحركة والمتضامنين معهم

هل أصبح للحركة صدي ودوي مسمع لدي وكالات الانباء ووسائل الاعلام؟

بالفعل وحدث ذلك في أقل من أسبوع علي أنشاء الجروب علي الفيس بوك فقد أجرت جريدة الشروق حوارا مع الزميل / محمود عبد الحليم منسق عام الحركة وقام في اليوم الثاني الزميل الصحفي / محمد خير بكتابه مقاله عن الحركة بالإضافة للتفاعل الذى حدث للتضامن مع رامز عباس احد مؤسسي الحركة والذى تم احتجازه امنيا اثناء رجوعه من الاجتماع التحضير والذى تم يوم الثلاثاء الماضي

تقول ..أنه تم احتجازك يوم الثلاثاء الماضي...كيف ولماذا؟

تم احتجازي عند مروري بالقرب من مستشفي الهلال الاحمر بالقرب من ميدان رمسيس وقد تم جذبي بعنف

لا اعرف السبب حتي الان ولكن أرجح ذلك لأنفلات أمني تمر به مصر

المدون رامز عباس ..هل تعتقد أن المسيرة ستؤتي ثمارها حقا وستحقق ولو جزء بسيط من الاهداف التي تسعي اليها ؟

نحن نأمل فهذا الأمر لا نستطع الجزم بإمكانيه نجاحها خاصة أن الاجهزة الامنية لن تترك لنا مجالا للتعبير

رامز..نرجو أن تكون المسيرة ناجحة وسلمية فعلا كما أوضحت لنا..حتي لا يتعرض أي فرد من المعاقين المشاركين أو غير المعاقين لأي اساءة من قبل قوات الامن المصري...لكم منا دعواتنا الخالصة بالتوفيق والنجاح

اشكرك يا استاذة واتمني لكم دوام النجاح وشكرا

أم عـــزة ..و..الــســـرطـان

أم عزة...من كام سنة فرحت أم عزة ببنتها ولبستها طرحة الفرح بايديها وزغرطت وارتاحت وقالت لابو عزة جوزنا بنتين فاضل اتنين ...لكن ياخسارة مالحقتش أم عزة تفرح ببنتها سنة والتانية وبدأت مظاهر المرض تظهر علي جوز بنتها وبدأ الورم ينهش في بطنه وهو ولا داري وفي يوم من شدة الالم قرر يحلل وفاجأه الدكتور بانه عنده ورم خبيث في بطنه لازم يستأصل وفعلا عمل العملية وودع بيها الالم والمرض وشال ابنه عبد الرحمن علي ايديه و انتظر بفارغ الصبر قدوم طفلته التانية بطة للحياة لكن مالحقش يفرح بها اتولدت من هنا وبدأت معالم المرض والالم تعود له من تاني في عموده الفقري ونهش المرض جسمه المرة ديه بألام أفظع وفقد القدرة علي الحركة ..قال لعزة نفسي ياعزة أشيل بطة علي دراعي قبل ما أموت لكن مالحقش يشيلها راح يعمل العملية وجواه أمل يعود وعاد فعلا لكن كانت نهايته تاني يوم الصبح ..بكت أم عزة علي بنتها شابة العشرينات اللي أصبحت وحيدة في دنيتها ومعاها طفلة رضيعة وطفل لم يتجاوز عمره العامين ...ومات جوز بنتها ..وسنة والتانية ..النهاردة كان كتب كتاب عزة علي أخو جوزها المرحوم...و الحي أبقي من الميت..وأهو القريب أولي من الغريب برده

**************************

النهاردة برده ..وفي نفس اليوم اللي زغرطت فيه أم عزة لبنتها للمرة التانية...كان في أم عزة تانية ...ودعت بنتها عزة النهاردة...راحت المقابر ودفنتها...و بكت عليها..عزة ماتت بنفس المرض...السرطان...عزة سابت وراها 3 أطفال أكبرهم 13 سنة ...أم عزة السنة اللي فاتت فقدت ابنها البكري..بنفس المرض ..السرطان...أم عزة في سنتين فقدت بنتها وابنها...عزة ماتت بعد مانهش السرطان جسمها كله ..من صدرها لدمها لمخها..وبات العلاج والكيماوي والعمليات مستحيلة..في يوم واحد عاشت عزة وماتت عزة..سبحان الله

**************************

بسأل سؤال..هو فين ؟..فين اللي دخل المبيدات المسرطنة بلدنا وقتل بها شبابنا أبائنا وأمهاتنا وموت بها أطفالنا..؟...هو فين اللي بسببه كل يوم بتتفتح المقابر ..وبتتقبض القلوب...وبتفارقنا ناس كانوا معانا امبارح بيحلموا ...هو فين؟..أين أنت يايوسف والي...وكل الدلائل والقرائن تشير اليك ..أنت الجاني..أنت المذنب..ولكن لست أنت من تدفع الثمن..لست أنت...

أم عزة النهاردة حزينة لفراق بنتها..كم أم عزة فيكي يامصر ؟..ولكن هو.. يوسف والي واحد فقط

الي كل من يملك ضمير في هذه الامة ...دماء أبرياء سالت ولا زالت تسيل بسبب شخص انعدمت فيه الانسانية والجميع يعلم ذلك ولكن ...لا قانون ينصف...ولا عقاب يريح قلوب جريحة..ولكن بلاشك فاننا ننتظر عدالة السماء ان كانت عدالة البشر قد أصابتها الصمم والسكون

اعذروني

كلماتي حزينة

لاني كنت عارفة كويس قوي

أم عزة

الاولي والتانية

صير الله الثانية

ودامت الفرحة في قلب الاولي

تحياتي

هو الطلاق بقي لعبة؟.

هو الطلاق بقي لعبة؟
**************
سيدات مصر يصرخون..رمي عليا اليمين أكتر من 3 مرات وبعدين يقولي أسف ..مكنش قصدي؟
***************
ليـــــــــــــه؟...ليه الزواج بشهود ووثيقة تضمن حق الزوجة..والطلاق لاء ؟..فتعيش معلقة لا هو بيقولها انا طلقت وهي تقول رماه 3 مرات والله سمعاااااااااااااه..و المحكمة تثبت
**************************

هو الطلاق بقي لعبة.؟ انتي طالق..بقت كلمة بتتقال في الموبيلات وبتتبعت ماسجات ..بتتقال ممكن علي الغدا وأحيانا في العربية وممكن في المصيف ..كلمة بقت بسيطة وسهلة كأن واحد صاحبك ماشي وبتقوله باي ..بتتقال أحيانا لو الاكل دلع شوية أو القميص ما اتكواش أو خرجت من غير ماتقول..كأن مفيش وراها ضياع أسرة وخراب بيت وتشريد أولاد..ياريت الامر وقف علي كده كان يمكن مانقساش قوي علي الاحوال...الأخطر والافظع هو عددها..عدد مرات التلفظ بها..الظاهر كتير نسيوا أنها المفروض ماتتقالش أكتر من 3 مرات..لان بعدها خلاص كل واحد منهم المفروض يكون في حال غير الحال..أصبح شرع الله لعبة في ايدين كتير من الرجال..بقت بتتقال مرات ومرات ..ممكن توصل لعشرات وأحيانا لمئات..الست بعدها تحتار ..بقت حياتها سلسلة خوف ورعب ..ماهو بيقولها انتي طالق الساعة 5..خمسة وعشرة بيرجع العسل وينسوا كل الكلام اللي اتقال..وتدور دايرة الخوف جواها ...رمي عليا اليمين أكتر من 3 مرات ..أعمل اي؟ أسوي ايه؟ أروح فين بالعيال؟ خليني زي ما أنا وربنا غفور رحيم..وتنسي وترجع كل الامور بينهم عادي (ويحسبونه هينا وهو عند الله عظيم...صدق الله العظيم)...وواحدة تانية تقول لالالا ....رمي عليا اليمين تلات مرات يبقي اتحرمت عليك للابد ..تهجر البيت وتروح لحالها ..لكن الاستاذ بكل بجاحة وبدون ضمير ولا ذمة يقول ..أنا ما طلقتش..تصرخ وتقول كداااااااااب ..رميته عليا 3 مرات..بسخرية اثبتي...الغلبانة مابقتش عارفة ولا فاهمة مطلقة ولا لاء..محرمة عليه ولا لاء..تروح المحاكم..و موت ياحمار ...

أنا في موضوعي هذا حبيت أثير نقطتين في غاية الاهمية ولو اتحققوا فعلا هتودع اي امرأة الخوف من أن حياتها تكون حرام في حرام
**********************************************

النقطة الاولي لرجال..كلكم طبعا حافظين كلام ربنا والاية دي بالذات لا تخفي عليكم..(ان أبغض الحلال عند الله الطلاق..صدق الله العظيم) ..لما تبقي عند اللي خلقك أبغض حاجة ..و تبقي عندك أسهل حاجة..يبقي انت ياتري بتحب ربنا؟..طب ازاي وانت لا تطيعه ولا تتبع تعاليمه السماوية اللي بكلمتك هذه..انتي طالق ..تهز عرشه من فوق سبع سموات...نعم يهتز عرش خالقك وأنت تهزأ بأسمي رابطة وضعها الله في الارض (وأخذن منكم ميثاقا غليظا..صدق الله العظيم) النقطة التانية لأهل الدين وعلماء وأئمة المسلمين..أرجوكم لا تعذبوا المرأة باسم الدين وتضعوها في موقف الخوف من الحرام...ماذا تفعل المرأة التي ألقي عليها زوجها يمين الطلاق مرات ومرات ويردها وان اعترضت يخبرها انه لم يطلق رسميا وانها لا زالت زوجته؟ ..فتضطر أن تخضع وتخنع وهي لاتدري ان كانت مذنبة أم ضحية ..هذه القضية من أهم القضايا التي علي علماءنا الافاضل الاهتمام بها لحماية مجتمعنا من الانهيار والضياع..لماذا لايخضع الطلاق لشروط مثل الزواج..لا يصح الزواج بدون شهود وبدون عقد رسمي موثق في الشهر العقاري..والا كان باطلا باطلا..فلماذا لا يخضع الطلاق لشروط مثله..مع أن الامر بينهم كان واحدا في العصور السابقة..بمعني في عهد السابقين كان الزواج والطلاق بدون عقود توثق ..فلماذا في عصرنا هذا لا يجوز الزواج سوي بالوثيقة بينما الطلاق بمجرد الكلمة؟...سؤال يدور في ذهني..لا أدعي أنني فقيهة في الدين..ولا أرتقي لادني مرتبة من مراتب العلماء..ولكن صراع المرأة العربية وخوفها وصمتها من أجل أن يمر مركب الحياة بسلام يؤلمني يعذبني يجعلني أصرخ لكم أما هناك من حل يضمن لها أن تحيا بكرامة بلا خوف من غضب الرب عليها وبلا عذاب القضاء والمحاكم لاثبات طلاقها من عدمه مع زوج انهدم وماتت بداخله كافة القيم والمثل؟
********************************************

.. أنا خايفة..خايفة في يوم اتحط في وضع مماثل لستات كتير..خايفة يبقي عندي أسرة بيت وزوج وعيال..وفي لحظات يترمي عليا اليمين..مرة في العربية..مرة في الموبايل...مرة علي ترابيزة السفرة واحنا بنتغدي قدام العيال...وبعدين يرجع يقولي ..أسف حبيبتي..كنت متضايق شوية..أأقوله حرام..يقولي العيال...أأقوله النار...يقولي العيال...أأقول يااااااارب..مايردش عليا...خايفة أصمم وااقول لاء طلاق حرام..يعند ويقول ماطلقتش اثبتي..اروح محاكم وارفع قضايا واتشرد انا والعيال..وادور في دايرة مش عارفاها ومش فاهماها..بين أهل الدين اللي بيقولوا حرام حرام حرام..وبين بطون ولادي الجعانين اللي مهددين اللي نفقة ابوهم هتذلهم اكتر مها تحميهم..صرخة تصرخ بها كثير من سيدات مصر ..أرجوكم ياعلمائنا الافاضل ..نريد حلا ..ماذا نفعل ..أمذنبون نحن أم ضحايا؟

انســــــان بـلا دخــــــان ..(حوار)

علي فكرة بحس بحالة قرف دلوقتى لما اشوف واحد بيشرب سيجارة

اليوم الأول للاقلاع هو اهم يوم فى تاريخ المدخن

حاسس اني شايف الدنيا بشكل تاني..حاسس اني مختلف

المدخن انسان محدود محبوس داخل السيجارة

*******************

تجربة فريدة..قال لها ..لا لن أظل أسيرا لك بعد اليوم..أعلنها ثورة ..علي نفسه أولا ..فانتصر..وأصبح ..انسان..انسان بلا دخان..الاستاذ عماد خلاف..الصحفي والمدون..مدونة بحلم ببكرة..كان لنا معه هذا الحوار

بداية .نحب نعرف من حضرتك .مين هو عماد خلاف؟

عماد خلاف كاتب قصة قصيرة ومسرح ورواية واعمل فى مجال الصحافة فى جريدة اسبوعية ولي مجموعة قصصية بعنوان رقصة الموت البطئ صدرت خلال الشهور القليلة الماضية الكتابة هى مهنتى الوحيدة التى تعملتها وانا صغير

اهلا بحضرتك يا استاذ عماد ..وان شاء الله تكون في المستقبل من كبار كتاب البلد

ربنا يخليكى يارب

استاذ عماد في الحقيقة احنا في حوار النهاردة مع حضرتك عشان تحكيلنا تجربتك الفريدة واللي اظن فعلا ان محدش يقدر عليها الا اذا كان بيتمتع بارادة وعزيمة قوية جدا ألا وهي...إقلاعك عن التدخين
في الاول وقبل ما تحكيلنا عن تجربتك .. احب اسالك ...
فاكر اول مرة مسكت فيها سيجارة؟كانت امتي ..وانت عمرك كان اد ايه تقريبا؟؟

والله صعب جدا ان افتكر اول مرة مسكت فيها سيجار ة لكن بكل تا كيد كانت مع الاصدقاء

مش فاكر مين اول شخص عرض عليك سيجارة؟

مش هاتفرق مين اول شخص والا مين اخر شخص المهم انى بدات للاسف التدخين

ضيعت من عمرك كام سنة في التدخين يا استاذ عماد؟

عشرة سنين وانا بدخن السيجارة.. وانا عمرى عشرين سنة كانت رحلتى مع التدخين

فترة كبيرة جداااا...للاسف....عماد خلاف..ليه كان بيدخن؟
امتي كان بيدخن...في الحالات اللي بيكون فيها متوتر عصبيا فقط ولا الموضوع تحول لعادة ،مجرد اعتياد؟

اكيد كنت واهم نفسى زى الملايين من المواطنين ان السيجارة مهدئ قوى لللاعصاب ودا كان كلام فاضى وفارغ ولا يعبر عن الحقيقة المؤسفة وهي الموت البطئ وهو بالفعل عادة وليس ادمان كما يدعى البعض ويحتاج الى أرادة قوية وعزيمة بعد ذلك كل شئ عادى

عماد...مصروف السجاير الشهري..كان تقريبا كام؟

كنت بصرف عشرة جنية يوميا بمعدل علبتين سجاير فى اليوم وعلبة السجاير كانت بخمسة جنية يعنى 300 جنية شهريا وعلى فكرة بعد ما بطلت السجاير اكتشفت حاجة انى معاية فلوس كتير والله بجد مش عارف اعمل بيها اية بقيت اجيب بيها حاجات تعوض السنين اللى كنت فيها بشرب سجاير

300ج؟ ده مرتب موظف حكومة

اه مرتب موظف حكومة اه


عماد ..كنت بتشوف العنوان اللي مكتوب علي علبة السجاير؟

قريب من كام شهر فقط كنت بشوفه ومع ذلك كنت بشرب على فكرة مش الشكل اللى موجود هو اللى خلانى ابطل السجاير ولا عمره ها يخلى الناس تبطل ،اهم حاجة إرادة زى ما قولت لحضرتك
هو دة المهم انك تقولى لا ، يكون عندك القدرة على انك تقفى وقفة بجد مع نفسك
تقولى خلاص يبقى خلاص على فكرة انا كنت خاطب لكن ماحصل نصيب كانت خطيبتى تقولي عماد هاتعرف تبطل سجاير اقولها اه تقولى لا مستحيل حتى اصدقائى وزمايلى كلهم استغربوا لما بطلت السجاير
ازاى انته بطلت سجاير لا مستحيل ،اقولهم والله بطلت فى اية ؟

وعلى فكرة بحس بحالة قرف دلوقتى لما اشوف واحد بيشرب سيجارة

عاوزين نعرف منك يا استاذ عماد...مين السبب او مين اللي خلا عماد خلاف يفكر في الاقلاع عن التدخين؟ ..أزمة صحية ..صحوة ايمانية مثلا..احساس مفاجيء بالذنب..ولا وقعت تحت تاثير موقف ما هزك وخلاك تاخد وتصمم علي القرار ده؟ ولا ايه بالظبط؟


الحمد لله لم يكن سبب اقلاعى عن التدخين ازمة صحية لاقدر الله او موقف معين والله تقدرى تقولى حضرتك صحوة أيمانية بجد حسيت انى عايز اقرب من ربنا اكتر وربنا الحمد لله ساعدنى على الاقلاع عن التدخين انا الحمد لله عمرى ماشربت الحاجات التانية اللى بيقولوا عليها البانجو المشروب الرسمى بتاع المصريين تعرفى برة واخدين عن المصريين نظرة انهم فى حالة سكر دائم ومستمر ودى مشكلة بجد
لكن الحمد لله تقدرى تقولى صحوة ايمانية وقوة ارادة بجد خلتني ابعد عن التدخين نهائيا

الحمد لله..استاذ عماد شايف ان الايمان بالله بيولد جوة الانسان طاقة كبيرة مالهاش حدود يخليه يتحدي نفسه؟ويتغلب علي كل صعب مهما كان حجمه..وده اللي وصل عماد خلاف اللي استمر 10 سنوات من عمره مدخن..في فترة قصيرة جدااا يقلع عن التدخين؟

والله دى حقيقة يااستاذة طول مابتقولى يارب اكيد ربنا سبحانة وتعالي سيقف بجانبك المهم تكون عندك ارادة قوية وايمان بالله وربنا سبحانة وتعالى سيكون فى جانب العبد المؤمن القريب منة
واهم شئ ان الواحد يكون قوى ارادة دا اهم شئ
واللى بيقول ان السجاير ادمان مش حقيقة واللي بيقول فى علاج مش عارف اية تحطى لزقة على جسمك وبعد فترة تقلعى عن التدخين كلة ده وهم بيضحكوا بيه على المواطنين
تعرفى المشكلة كانت عندى فى ايه؟ انى كنت واهم نفسى انى لو بطلت سجاير مش هااعرف اكتب تانى
ودى كانت مشكلة ومصيبة بالنسبة لي ،،لكن فوجئت ان دا كلة وهم بكتب عادى ومفيش مشكلة وبالعكس حاسس انى عباراتى مختلفة ورائعة عن اول وكان الصداع كل شوية عندى بسبب السجاير وطبعا شاى كل شوية
وسيجارة ورا سيجارة لحد ماقرفت منها والله قرفت
ودلوقتى.. حاسس انى شايف الدينا بشكل تانى حاسس انى مختلف وصحتى طبعا بقت زى الفل


اكيد طبعا.. استاذ عماد عاوزاك تحكيلنا عن اول يوم اقلعت فيه عن التدخين..كان حالك ايه بالظبط.؟.في الشغل في البيت في تعاملك مع المحيط اللي حواليك ..وهل ياتري مرت بيك لحظات ضعف واشتياق للسيجارة..وازاي قدرت تتغلب علي اللحظات ديه؟


يوم ماقررت ابطل السجاير بقيت عمال اخرج وادخل وحاسس انى مش علي بعضى
لكن والله دا كلة وهم قعدت اما م الكمبيوتر وبدات اعمل شوية حاجات نسيت الدهولة اللى انا فيها بسبب السجاير
وبعدها تانى يوم نفس الموضوع شغلت نفسى فى اشياء اكدب عليكى لو اقولك ما كانت بتيجى على دماغى
لكن كنت ببعدها فى ثوانى واشغل نفسى فى اي شئ تانى
هو اليوم الأول اهم يوم فى تاريخ المدخن

امتي فقدت اهتمامك بيها نهائيا؟ حسيت انك خلاص اتحررت؟

والله على طول المهم زى ماقولت ليكى ارادة ، بيقولوا ان مفترض لازم يمر ستة اشهر عشان اكون اتحررت من النيكوتين اللى فى جسمى ودا وهم اخر

عماد.. ممكن تضعف تاني.. وترجع لها؟

مستحيل ، انا دلوقتى حر - انسان تانى مختلف
وفى سبب بجد والله افتكرته كان لية واحد زميلي كان كبير فى ا لسن فى الجريدة كان بيكح بطريقة غريبة وكان ببيشرب السيجارة على انه مدمن قولت ياربى هايجى اليوم اللى انا ها اكون فيه زى زميلى دة مش قادر امشى وعمال اكح وكل مايطلع السلم يبقى بينهج ومش قادر ،اية الذل دا كلة وعشان اية
دى سيجارة ملعونة وملهاش معنى ولا قيمة زى ماقولت لحضرتك دا وهم ،، السيجارة وهم


تقول ايه للشباب اللي بيحاول يقلع عن التدخين..لكن حاسس انه صعب وانه مش هيقدر..تنصحه بايه.؟

ااقوله خلى عندك ارادة قوية لو قررت شئ ما ترجع فية تانى ابدا خليك قريب من ربنا ومفيش حاجة اسمها مش قادر اكيد هاتقدر خلى عندك ارادة صدقنى ساعتها هاتحس انك شخص مختلف متحرر مش عبد للسيجارة قرر وصدقنى هاتنجح ،قول لا ساعتها بص هاتكون انسان تانى


عماد بعد الاقلاع عن التدخين يختلف..عن عماد قبل الاقلاع..ايه الاختلاف اللي حاسه جواك ياعماد.. بقيت اهدي شوية عن قبل كده ايه اللي اتغير جوة عماد خلاف؟

على فكرة انا عصبى اساسا مفيش علاقة بين التدخين و العصبية او انك تهدى نفسك دي طباع فى الشخص نفسة لكن اهم شئ اتغير جواية ان نظرتى للاشياء اتغيرت بمعنى انى بقيت اشوفها اجمل والله بجد تصدقى دى.. المدخن انسان محدود مسجون داخل السيجارة

استاذ عماد..تقول ايه للشباب اللي فاكر ان التدخين عنوان للرجولة؟

عمر الرجولة ماكانت بانك تشرب السيجارة الرجولة انك تكون قادر على انك تقول لا للسيجارة لكل شئ سئ فى حياتنا لاء صدقينى الشعوب العربية شعوب بتضيع عمرها فى حاجات تافهة وملهاش معنى
والشباب العربى كلة مفترض انه يقول لا للتدخين ومش للتدخين فقط لكل شئ سئ فى حياتنا

طبعا احنا مسلمين والمفروض نكون اكثر حرصا علي تطبيق تعاليم دينا الاسلامي ..لا ضرر ولا ضرار كما قال رسولنا الكريم..و كما قال الله عزوجل في القران الكريم ولاتلقوا بأيديكم الي التهلكة...عماد خلاف...تجربة ذات ارادة قوية..تحدي للنفس...النهاية كانت ..انسان بلا دخان..

ربنا يخليكى يارب وانا فعلا سعيد اني بحكى تجربتى مع التدخين واشكر حضرتك لانك سمحتى لي بان اقول كل شئ عن تجربتى السيئة مع التدخين

يارب تكون تجربتك بداية لكتير من الشباب اللي نفسهم فعلا يتخلصوا من عادة التدخين السيئة ووبيضعفوا او بيتوهموا انه مستحيل ..علي حسب علمي انك بقالك 5 شهور مقلع عن التدخين والحمد لله هتستمر اكيد لاخر لحظة في عمرك بعيد عنه .. انا اللي بشكرك انك منحتني جزء من وقتك عشان نتكلم عن تجربتك


والله يا استاذة الإرادة هي عنوان النجاح لاي شئ

ربنا يوفقك وتكون إرادتك في كل خطوات حياتك بنفس القوة والعزيمة

ربنا يخليكى يارب

كل سنة وحضرتك طيب ، رمضان كريم

وانتى طيبة يارب والله أكرم وكل الأمة الإسلامية بخير يا رب وبسعادة

ملحوظة: رابط مدونة الاستاذ عماد...بحلم ببكرة

http://emadkhalaff.blogspot.com/