الهي ماعدت أبغي شيئا في هذه الحياة سوي عفوك ورضاك

الثلاثاء، 30 أكتوبر 2007

كان يوم غريب ...تحيا مصر و...البلالين

كان يوم غريب

بصوا بقي احنا ساكنين علي الكورنيش ومش اي كورنيش كورنيش تحفة(الله اكبر)ماعلينا من الصبح لاقيت في تغيرات جامدة بتحصل ماحطتش في دماغي الاول قلت جايز حملة نظافة في البلد اكتر ماهي نظيفة وبعدين اذ فجأة كدة علي المغرب وبلقي نظرة علي كورنيشنا التحفة والاقيلك ايه صوان كبيررررر قوي منصوب ما أخدتش خوانة قلت جايز حد من اهالي المنطقة هيعمل فرحه علي النيل مايضرش اهو برده توفير بدل اسعار النوادي الغالية اهو يفرح نفسه وحبايبه بفرح علي النيل برده وبعدين بقي لاقيت الدجي لعلع والاصوات طلعت بركز كدة لاقيتها اغاني وطنية وانا مصري وابويا مصري ولوكنا بنحبها(بنحبها والله) وبتاعة الجد حفيده ديه وشوية اغاني يعجبوا كدة قلت لا بقي محدش عاقل هيشغل في فرحة وطني الا اذا كان طبعا عضو في الحزب الوطني وبعدين قلت ازاي بس يابت يابطة اعضاء الحزب برده هيعملوا فرحهم علي الكورنيش اومال النوادي والفنادق والتخفيضات الهايلة بس لمين لا يابت مش معقولة رحت بصيت للتاريخ قلت جايز في النهاردة مناسبة وطنية ولاحاجة والحزب الوطني الاصيل بيفكرنا بيها كتر خيره لاقيت ان عيد النصر عدي من زمان اومال في ايه ياجدعان بس كتر خيره اخويا قالي جعانة يابطة قلتله موت قالي طب يالا ليكي عندي عشوة تجنن برة شوية كباب وكفتة انما ايه ماكدبتش خبر هوي كنت لابسة وناطة في العربية واتبرقت بقي مافي حتة فيك ياكورنيش الا وفيها بلالين كبيرة اشكال والوان منفوخة واليفط عليها ايه منورة فلان الفلاني يؤيد مبارك رئيسا للحزب الوطني قلت يالهوي هو الزمن نط فجاة وبقينا في الفين وحداشر مرة واحدة صراحة زعلت قوي لاقيت نفسي كبرت اربع سنين مرة واحدة سالت اخويا احنا في سنة كام يابني قالي وسبعة قلت لا بقي هو في ايه وخد عندك بقي وانت ماشي يفط ياما ماتتعدش وانوار وزينة وكأننا في مولد النبي صلوا عليه عليه افضل الصلاة والسلام ومؤيدون لمباااارك ويفطة بقي حسستني بالخجل كدة مكتوب فيها شعب دمياط بأكمله يؤيد مبارك قلت الله انا ايدته امتي بس مش فاكرة فزعلت من نفسي ايدته من غير ماعرف ولاجايز انا من شعب تاني ماعلينا المهم اهو بالعافية كدة ايدته وخلاص رجعت بقي وانا مشتاقة اروح احضر قلت لماما عاوزة اروح لماما طبعا كان ردها الطبيعي انتي هبلة يابت قلتلها وانا مالي عاوزة اروح وكنت هعيط بس لما لاقيت الوش اتقلب والحالة هتطلع قلت خلاص اايده من منازلنا احسن وقفت في شباكنا بقي وبصيت لنهر النيل الملوث وقلت بعلو الصوت...تحيا مصر

وقلت هبعت دعوة عامة للجميع يأيد معايا بالعافية كدة قهرا وعدوانا ريسنا القمر

ياكدة يا اما

انتوا عارفين بقي


تحياتي


ولانفسكم تقولوا


لا وألف لا


هناك 21 تعليقًا:

ريهام يقول...

بصراحه لازم اضحك ههههههههههه هايل يابطوط السخريه اللى فى موضوع تموت من الضحك بس هو ده اللى بيحصل دايما تلاقى اليوفط محطوطه وعليها نؤيد ونبايع وكلها بصيغه الجمع ومعرفش مين اللى فوض الناس دى تتكلم بلسانا زى مايكونا بيقولوا لنا غصب عنكم هتوافقوا وترضوا بالامر الواقع كوسه بقى بلد ديمقراطى صحيح الديمقراطيه هتفط مننا

غير معرف يقول...

وطبعا الكلام ده مش فى دمياط بس
الكلام ده فى كل الجمهورية
تلاقى المنافقين والجوقة وكدابين الزفة
يؤيدوا ويبايعوا
ويطلوا ويهيصوا لفخامته لحد ما فخامته يتورم وفى الاخر يتاله ويسبحوا بحمده
ويشعر فخامته ان البلد عزبة ورثها عن المراحيم فمن حقه طبعا انه يورثها لاولاده
ويكون ده حق شرعى
وحتلاقى برضه المنافقين هما هما يطبلوا ويهيصوا

وحسبنا الله ونعم الوكيل

مع تحياتى
صلاح شنان

غير معرف يقول...

ارجو المرور على
مدونتى صيحة حق
موضوعى الجديد هو
القرانيون من هم
http://salahshnan70.maktoobblog.com
مع تحياتى
صلاح شنان

محمد مارو يقول...

صبااااااااااااااح الخير
انا مش فاهم حاجه خالص
هو فى ايه ؟
الصوان ده كان ليه ؟
و اليفط دى كانت ليه ؟
و انتى اتعشيتى الكباب و لا ايه ؟
و كده برضه تتعشى من غير ما تدينى حته ؟
ع فكره انا قلت لكى قبل كده عندنا توارد اخطار الظاهر كمانتوارد فى الاكل
انا متعشى كباب و اله النهارده
تحياتى لكى

ابن رشد يقول...

اية الجمال دة يا بطوط مش قلتلك المناضلين زادوا عنصر مهم جدا
ربنا يخليكي يارب و يخلي قلمك

Unknown يقول...

برافوا يا بطة دايما متجددة وافكارك رائعة وجذابة بس نفسى اسالك حاجة هم هيخصموا التكاليف دى من تكاليف حملة الباشا الانتخابية ولا من تكليف حملة المحروس نانوس عين مامته جيمى عزو؟؟؟؟؟؟؟؟؟

بنت الاسلام يقول...

ريهام

اه شوفتي

لاقيت نفسي مؤيدة من غير ما اعرف

بس برده لا

لا والف لا

بنت الاسلام يقول...

استاذي الغالي

صلاح شنان

والله مبارك غلبان

اه غلبان قوي


فاته يعني الصداع مش مفارقه

من كتر الدوشة الي حواليه بقي بلالين ويفط واغاني ودنيا

الله يكون في عونه

تحية كبيرة جداا لحضرتك

بنت الاسلام يقول...

صباح الفل علي اجدع الكيميائيين يامارو

مش فاهم ليه بس


كان مؤتمر للحزب الوطني ياسيدي علي كورنيش شعب دمياط ....احتكار يعني

اليفط بقي كانت لزوم الشغل يعني

اه اتعشيت كباب عندك مانع

وبالهنا والشفا لينا الكباب

وللوطني المؤتمر

بنت الاسلام يقول...

شمس

الزعيم

كلنا تلامذتك ياباشا

اي خدمة

بنت الاسلام يقول...

د/عبد الخالق زهران

لالالالالالا ما اظنش هيخصوموها من حمالتهم

لكن الاكيد هيخصموها من مرتبات الموظفين الغلابة

طبعا

ماهو كل الشعب مؤيد

بالعافية

تحياتي لجيمي

طرقعات فجائية يقول...

السلام عليكم صدقينى يابطة اصبح 2007 زى 2011 وكلنا شعب واحد ووطن واحد وكلنا نؤيد الوطنى ونبارك القيادة السياسية ونسأل الله صلاح الاحوال

هشام رمضان يقول...

اجدع حاجة فيكو يا مدونين : اسلوبكم الساخر , بس بجد موضوع لذيذ و إن دل فإنه يدل على ذكائك و كلامك فعلاً مظبوط ان ده احتكار .. صحيح ايه اللي جاب دمياط لينا ؟!!؟ يلا

بنت الاسلام يقول...

استاذي الفاضل طارق الجيزاوي

من ناحية ان 2007 زي 2011

انا معاك فيها

ولكن

بنت الاسلام يقول...

هشام رمضان

اسعدني وجودك جدااا


والحمد لله ان البوست عجبك

Monzer يقول...

انتى عارفة لما قريت كباب
قلت قشطة الحزب الوطنى، باه يوزع كباب
لكن طلعت عزومة اخوية
بينى وبينك لو كان فيها كباب
كان البوست شكله اتغير خالص
:)) ههههههههههههههه
على الاقل بالنسبة ليا

أسلوب سرد شيق وساخر للغاية
رسم البسمة على وجهى
تحياتى اختى الكريمة

بنت الاسلام يقول...

منذر

هو لو كان الحزب الي هيوزع كباب كنت انا سمعت كلام ماما

كنت نطيت من الشباك علي الصيوان عدل

شكرا علي زيارتك الغالية لمدونتي المتواضعة

اتمني التواصل

غير معرف يقول...

لا طبعاً

هنأيده

بالروح بالدم

نفديك

بس اللى مزعلنى فين الكباب

هههههههههههههه

تسلمى يا بطوطه

ربنا يحفظك

أخوكِ..نيجــر

بنت الاسلام يقول...

مالكش دعوة بالكباب يانيجر

ركز بس

هتايد

ولا هتقول

لا والف لا

simple girl.. ..simple dream يقول...

انا عن نفسى هأيد طبعا
امال ايه
العمر مش بعزءة
ولا ايه يا بطة؟

بنت الاسلام يقول...

طبعا ياشاهي

مش بعزقة

مش بعزقة خالص

ايدي انتي بس لحسن هيبعزقوكي هما من نفسهم

تحياتي

مصر