الهي ماعدت أبغي شيئا في هذه الحياة سوي عفوك ورضاك

الخميس، 27 يونيو 2013

اتقوا الله فى مصر ... وارحلوا

اللى نازل يوم 30 فئات كتيرة

الاولى : معارضين للحكم وده حقهم ودول كتروا جدااااااااا بشكل ملاحظ  ماهو مش معقول سواق متحارب فى رزقه ومش هينزل ولا معقول مواطن اتضاعفت عليه اجرة العربية ومش هينزل ومش معقول مواطن نام فى البنزينة عشان يمون ومش هينزل ومش معقول حكومة سايبة الازمة تزيد يوم عن يوم ومحدش هينزل يتظاهر ضدها ده احنا حتى يبقى معندناش دم وكل الحجج اللى هتقولهالنا مش هتدخل علينا انا مالى انا البنزين بيتسرق ويتباع فى السوق السودا دى مشكلة معاليك ياكبير وربنا انت اللى تحلها مش انا انا هحلها ازاى اصلا ؟؟ ودى طبعا مشكلة بسيطة من جملة المشاكل اللى بيتعرض لها المواطن المصرى الغلبان كل يوم الا يعنى اللحمة مارخصتش والبيض زاد والفراخ الكيلو بحاجة وعشرين والمرتبات بقيت كما هى والمطلوب مننا نصبر وهو احنا ورانا حاجة الا الصبر؟ انما عيالنا اللى فى الثانوية العامة ليلة امتحانها عمالة تذاكر على شمعة والله مستقبل ابنى عندى اهم من الحكومة واللى جابها والله يبقى فرح بنتى والزغاريط تقلب بصويت من الخنقة بعد ما الكهرا تقطع وتزيد حالات الاختناق ووووو ده عند امه يا ادهم انما يبقى ابنى داخل عملية وانا فى حالة رعب ان النور يقطع عليه ويروح منى ان شا الله ابن وزير الكهربا ذات نفسه هتقولى الازمة والنظام السابق ومبارك وانا مال اهلى اومال انا انتخبت سيادتك ليه؟ عشان تكذب عليا بمشروع نهضة طلع قاعدة؟؟؟؟؟؟؟ انا انتخبتك عشان تحللى مشاكلى ابسط مشاكل حياتى ضحكت عليا بدقنك و بصلاتك دول ربنا هيحاسبك عليهم انما انا هتتحاسب على بطنى اللى جعانة واظن الحساب هنا اشد

محدش بقى يطلع ويتفذلك من الجماعات اللى عاملة نفسها اسلامية وفاكرة نفسها نازلة يوم 30 تجاهد فى سبيل الله ضد الطغاة والكفار ويقولى حرب على الاسلام ..حرب على الاسلام اى ياروح خالتك؟ هو لما حضرتك شرفتنا على الكرسى الاسلام زاد ؟ لا اقل..اه بقولك قل..اصل لا عدالة اتحققت ولا حقوق رجعت وهو ده الاسلام...فاهم يا ابا.. لا تقولى بيضربوا اللحية وبيخلعوا النقاب ما امى وامك محجبة ومنقبة وجدى وجدى كان دقنهم شبرين .. بلاش سطحية وتفاهة واعترفوا مرة لوجه الله ان البلد عايشة ازماااااااااااات ازمات حقيقية مش ازمات وهمية..ما النفاب موجود من الاف السنين ولا حد جه جنبه... هطل من الاخر مش طالبين .. وشعارات الله اكبر.. اه الله اكبر على كل ظالم عامل فيها بتاع ربنا وهو مالوش علاقة بيه... اللى هيقولى الاسلام قادم لامحالة ..اه قادم لا محالة فعلا لما يتطهر من ناس فاشلة منقادة مابتعرف تقول لكبيرها غير حاضر وامين ..واللى هيعتبر نفسه مجاهد هقوله نازل تجاهد اخوك المصرى اللى نازل يطالب بحقه اللى نازل يصرخ معترض ..اتلم وارجع بيتك مش ناقصاك وفوق بقى من الهبل اللى انت معيش نفسك فيه..روح جاهد نفسك الاول اصلا جهاد النفس هو الجهاد الاعظم ..ولما تجاهدها اطلع على فلسطين ولا سوريا ومت شهيد هنا انما هتموت هنا شهيد ازاى وانت واخوك واقفين تحدفوا بعض بالطوب وتضربوا بالسنج؟

انما البلطجية اللى ناوينها ونازلين والشعب كله عارف بما فيه حكومته الجبارة ..مستنيين اى يا حكومة؟ ..البلطجية اعلنوا انهم نازلين..طب وبعدين؟ هنسبوهم يعنى يسيطروا على البلد..ماننزل ننتخبهم يبقوا وزرا مكانكم احسن بقى؟ اللى هيقولى الشرطة مش نازلة ..هى الشرطة دورها اى غير حماية المواطنين من البلطجة ليها وظيفة تانية يعنى ماسمعتش عنها انا ولا اى؟ مش راضية تسمع كلام الريس طب وده يبقى رايس؟ واللى مايسمعش كلام الريس المفروض الريس يطبطب عليه مثلا ويقول انت حر ياحبيبى سيب الشعب يموت المهم راحتك؟

سيناريوهات مخيفة ومحدش يستهون بيها الشعب مخنوق الازمة وصلت لكل بيت فى مصر مابقتش بين مؤيدين ومعارضين بقت بين شعب وحكومة كل واحد فيكى يابلد حاسس بشىء مهم وكبير ناقصه احساسه بالامان مابقاش امان من بلطجية لا ده بقى امان فى اكله وشربه ووظيفته

اتقوا الله فى مصر ... وارحلوا

والله مافى غير جيشنا اللى لينا... يرجع يحكم البلد ..ويبقى ظالم اللى يصرخ ويقول..يسقط حكم العسكر تانى



فاطمة الطرابيلى 

هناك تعليقان (2):

الأمير يقول...

قرأت موضوعك بعد ست شهور أو أكتر

وعاوز أسألك أيه رأيك دلوقتي في حكم العسكررر

ويا ترى يسقط حكم العسكر ولا لسه معترضة

أقولك بقى إتقي الله إنتي وارحلي ,,, أقصد وقولي الحق

ولو زعلانة من اتقي الله فلا تكوني كمن قيل له اتقي الله أخذته العزة بالإثم .. فلو زعلانة يعني يبقى أتقي الله أنا فاللهم اجعلنا وإياكم من أتقيائه .
والسلام .

غير معرف يقول...

ازيك يا بطوط الاكونت بتاعك على الفيس اي ؟عشان مش عارفه اوصلك
يارا

مصر