الهي ماعدت أبغي شيئا في هذه الحياة سوي عفوك ورضاك

الأربعاء، 16 سبتمبر 2009

هو الطلاق بقي لعبة؟.


هو الطلاق بقي لعبة؟
**************
سيدات مصر يصرخون..رمي عليا اليمين أكتر من 3 مرات وبعدين يقولي أسف ..مكنش قصدي؟
***************
ليـــــــــــــه؟...ليه الزواج بشهود ووثيقة تضمن حق الزوجة..والطلاق لاء ؟..فتعيش معلقة لا هو بيقولها انا طلقت وهي تقول رماه 3 مرات والله سمعاااااااااااااه..و المحكمة تثبت
**************************

هو الطلاق بقي لعبة.؟ انتي طالق..بقت كلمة بتتقال في الموبيلات وبتتبعت ماسجات ..بتتقال ممكن علي الغدا وأحيانا في العربية وممكن في المصيف ..كلمة بقت بسيطة وسهلة كأن واحد صاحبك ماشي وبتقوله باي ..بتتقال أحيانا لو الاكل دلع شوية أو القميص ما اتكواش أو خرجت من غير ماتقول..كأن مفيش وراها ضياع أسرة وخراب بيت وتشريد أولاد..ياريت الامر وقف علي كده كان يمكن مانقساش قوي علي الاحوال...الأخطر والافظع هو عددها..عدد مرات التلفظ بها..الظاهر كتير نسيوا أنها المفروض ماتتقالش أكتر من 3 مرات..لان بعدها خلاص كل واحد منهم المفروض يكون في حال غير الحال..أصبح شرع الله لعبة في ايدين كتير من الرجال..بقت بتتقال مرات ومرات ..ممكن توصل لعشرات وأحيانا لمئات..الست بعدها تحتار ..بقت حياتها سلسلة خوف ورعب ..ماهو بيقولها انتي طالق الساعة 5..خمسة وعشرة بيرجع العسل وينسوا كل الكلام اللي اتقال..وتدور دايرة الخوف جواها ...رمي عليا اليمين أكتر من 3 مرات ..أعمل اي؟ أسوي ايه؟ أروح فين بالعيال؟ خليني زي ما أنا وربنا غفور رحيم..وتنسي وترجع كل الامور بينهم عادي (ويحسبونه هينا وهو عند الله عظيم...صدق الله العظيم)...وواحدة تانية تقول لالالا ....رمي عليا اليمين تلات مرات يبقي اتحرمت عليك للابد ..تهجر البيت وتروح لحالها ..لكن الاستاذ بكل بجاحة وبدون ضمير ولا ذمة يقول ..أنا ما طلقتش..تصرخ وتقول كداااااااااب ..رميته عليا 3 مرات..بسخرية اثبتي...الغلبانة مابقتش عارفة ولا فاهمة مطلقة ولا لاء..محرمة عليه ولا لاء..تروح المحاكم..و موت ياحمار ...

أنا في موضوعي هذا حبيت أثير نقطتين في غاية الاهمية ولو اتحققوا فعلا هتودع اي امرأة الخوف من أن حياتها تكون حرام في حرام
**********************************************

النقطة الاولي لرجال..كلكم طبعا حافظين كلام ربنا والاية دي بالذات لا تخفي عليكم..(ان أبغض الحلال عند الله الطلاق..صدق الله العظيم) ..لما تبقي عند اللي خلقك أبغض حاجة ..و تبقي عندك أسهل حاجة..يبقي انت ياتري بتحب ربنا؟..طب ازاي وانت لا تطيعه ولا تتبع تعاليمه السماوية اللي بكلمتك هذه..انتي طالق ..تهز عرشه من فوق سبع سموات...نعم يهتز عرش خالقك وأنت تهزأ بأسمي رابطة وضعها الله في الارض (وأخذن منكم ميثاقا غليظا..صدق الله العظيم) النقطة التانية لأهل الدين وعلماء وأئمة المسلمين..أرجوكم لا تعذبوا المرأة باسم الدين وتضعوها في موقف الخوف من الحرام...ماذا تفعل المرأة التي ألقي عليها زوجها يمين الطلاق مرات ومرات ويردها وان اعترضت يخبرها انه لم يطلق رسميا وانها لا زالت زوجته؟ ..فتضطر أن تخضع وتخنع وهي لاتدري ان كانت مذنبة أم ضحية ..هذه القضية من أهم القضايا التي علي علماءنا الافاضل الاهتمام بها لحماية مجتمعنا من الانهيار والضياع..لماذا لايخضع الطلاق لشروط مثل الزواج..لا يصح الزواج بدون شهود وبدون عقد رسمي موثق في الشهر العقاري..والا كان باطلا باطلا..فلماذا لا يخضع الطلاق لشروط مثله..مع أن الامر بينهم كان واحدا في العصور السابقة..بمعني في عهد السابقين كان الزواج والطلاق بدون عقود توثق ..فلماذا في عصرنا هذا لا يجوز الزواج سوي بالوثيقة بينما الطلاق بمجرد الكلمة؟...سؤال يدور في ذهني..لا أدعي أنني فقيهة في الدين..ولا أرتقي لادني مرتبة من مراتب العلماء..ولكن صراع المرأة العربية وخوفها وصمتها من أجل أن يمر مركب الحياة بسلام يؤلمني يعذبني يجعلني أصرخ لكم أما هناك من حل يضمن لها أن تحيا بكرامة بلا خوف من غضب الرب عليها وبلا عذاب القضاء والمحاكم لاثبات طلاقها من عدمه مع زوج انهدم وماتت بداخله كافة القيم والمثل؟
********************************************

.. أنا خايفة..خايفة في يوم اتحط في وضع مماثل لستات كتير..خايفة يبقي عندي أسرة بيت وزوج وعيال..وفي لحظات يترمي عليا اليمين..مرة في العربية..مرة في الموبايل...مرة علي ترابيزة السفرة واحنا بنتغدي قدام العيال...وبعدين يرجع يقولي ..أسف حبيبتي..كنت متضايق شوية..أأقوله حرام..يقولي العيال...أأقوله النار...يقولي العيال...أأقول يااااااارب..مايردش عليا...خايفة أصمم وااقول لاء طلاق حرام..يعند ويقول ماطلقتش اثبتي..اروح محاكم وارفع قضايا واتشرد انا والعيال..وادور في دايرة مش عارفاها ومش فاهماها..بين أهل الدين اللي بيقولوا حرام حرام حرام..وبين بطون ولادي الجعانين اللي مهددين اللي نفقة ابوهم هتذلهم اكتر مها تحميهم..صرخة تصرخ بها كثير من سيدات مصر ..أرجوكم ياعلمائنا الافاضل ..نريد حلا ..ماذا نفعل ..أمذنبون نحن أم ضحايا؟

هناك 15 تعليقًا:

hasona يقول...

السلام عليكم

موضوع جميل ومميز
وهناك بعد النقط

الزواج لابد من موافقة الطرفين حتي تنشأ العلاقة وتبدأ اول خطوة في طريق الزوجية
أما الطلاق فالمفروض حتي لو طرف واحد كره المعيشة مع الاخر وأصبحت الحياة مستحيلة
،،،،،
الزواج يصح بالشهود والاشهار والاعلان فقط أما التوثيق والعقد فهو لحفظ حقوق الزوجة والاولاد والزوج
،،،
وكما وضحتي حضرتك
أن المهم هو تغير المفاهيم الدينية الخاطئة والراسخة لدي الزوجين وكذلك تغيير مفهوم الرجولة والقوامة لدي كل الذكور

hasona يقول...

وهناك المزيد

يورو يقول...

مش عارفه يابطوط اقولك اى بجد
بس احنا فى عصر بجد مات فيه الضمير
مش بس الضمير
اكتر اجه كانت بتميز الناس زمان شهامتهم وغيرتهم على ديهم ورجولتهم
دلوقتى لارجوله ولا مسئوليه ولا شهامه
ولا حتى حد بيراعى دينه
وبقينا فى زمن الانانيه
الموضوع الى رتيه يا بطوط ميفعش ليه قانون
لازم نرجع لدينا نعامل ربا مع بعض

ازاى بقى نعمل دا
هى دى المشكله

موضوع مهم اوى يا بطوط تسلمى على طرحه وياريت نناقشه كلنا عالاميل

مطلق يقول...

وجهي كلامك احسن للستات الي منهن من يكفرن العشير و كيد الشيطان كان ضعيفا و ان كيدهن عظيم

بنت الاسلام يقول...

حسونة

وعليكم السلام ورحمة الله

ياريت فعلا المفاهيم والاعتقادات الدينية تتغير بمايحفظ حق الزوجة في توثيق الطلاق لان في كمان مشكلة اخطر انا لاحظتها وهي

رمي عليها يمين الطلاق شفهيا بعدها بفترة رسميا من اي تاريخ تحسب مدة العدة؟ من تاريخ الطلاق شفويا ام رسميا ..احيانا لو حسبتها من تاريخ الشفوي واتجوزت بعدها..يتهمها ويقول اتجوزت في شهور العدة..عدم توثيق تاريخ الطلاق في نفس يومه كارثة محدش واخد باله منها

تحياتي

بنت الاسلام يقول...

يارا


اولا وحشانىىىىىىىىى موووووووووت

ثانيا في حاجة اسمها شرع ودين وعرف ..عرف المجتمع..

الدين شرع الزواج والطلاق لكن ترك شكلياته وطرق الحفاظ وضمان الحقوق للعرف والمجتمع

فضمان الحقوق من صميم الدين ومتروكة لاعراف المجتمع كل اللي بنطالب بيه ان الطلاق لا يقع الا بشهود ووثيقة كما هو الحال مع الزواج لتحجيم سهولة الكلمة انتي طالق علي السان وفي نفس الوقت حتي لا توضع المراة في موقف لا تدري فيه اهي مذنبة ام ضحية

تحياتي

وكل سنة وانتي طيبة ياجميل

بنت الاسلام يقول...

مطلق

انا ماقلتش ان الستات كلهم ملايكة ولا قلت ان الرجالة كلهم شياطين

اولا احنا بشر رجالة وستات بشر ونفوسنا نفوس بشرية وارد انها تحمل كل الصفات خير وشر حب وكره حقد ورضا وووووو

اوجه كلامي للرجالة لما تكون كلمة الطلاق علي لسانهم اسهل من أزأزة اللب

واوجهها للستات لما تكون محولة حياة جوزها لجحيم ونكد واستفزاز

لكن بلاش نرمي اخطاءنا دايما علي شماعة الغير ونتبرأ منها ونقول للطرف الاخر انت السبب

انتم الاتنين مع بعض مشكلتكم سوي يبقي انتم بس السبب في اي نتيجة توصل لها مركب حياتكم واي ماساة ممكن يتعرض ليها اولادكم

تحياتي

وكل سنة وحضرتك طيب

غير معرف يقول...

السلام عليكم
حبيبة قلبىىىىىىىى
اللي وحشاني مووووووووووووووووووت
والله بجد وحشاااااااااااااااااااني اووووووووووووووووووووووووووي
مشتاقه ليكي كتييييييييييير يا قمر
انا جايه علشان اقولك كل سنه وانتي طيبه يا روح قلبي
عيد سعيد عليكي ياااااااااااااارب
ربنا يوفقك يا حبي
في رعاية الله
السلام عليكم

م/ الحسيني لزومي يقول...

عيد سعيد
تقبل الله منا ومنكم
وكل عام انتم بخير
ِ

mahasen saber يقول...

للاسف نقطة انكار الزوج لواقعة الطلاق دى مشكله كبيره وبترجع لضميره الدينى اليى اكيد بيكون منعدم وقتها

المهم ربنا يجير الجميع من اى ازمات ويصللح حال الجميع

عيد سعيد عليكى يا بطه وعلى كل احبابك
ابقى طمنينى عليكى يا رب تكونى بافضل حال

بنت الاسلام يقول...

بنوتة

وانتي طيبة ياجميل
ويارب يكون عيد سعيد عليكي وعلي الجميع

تحياتي

بنت الاسلام يقول...

م/حسين اللزومي

وحضرتك طيب يارب

بنت الاسلام يقول...

محاسن صابر

فعلا معاكي حق

بس هو فين الضمير؟

انا بخير الحمد لله

وعيد سعيد عليكي وعلي بودي

تحياتي

ka2aba يقول...

السلام عليكم,
موضوع هام للغاية, و نقطة تستحق التوقف, لكن في الحقيقة ما لفت نظري اكثر من موضوع المدونة (الطلاق) هو تخلينا السريع عن معني "الجهاد" ,و الجهاد يا سيدتي هو اقتحام المصاعب في سبيل تحقيق القيم التي نؤمن بها, الجهاد هو اختيار الاصوب و ان كان هو الاصعب, الجهاد هو الثبات علي المبدأ و تحمل العواقب...هو التسليم بأن الحق احق ان يتبع,يتبع حتي لو كان طريقه وعراً, هذا يا سيدتي هو درب المؤمنين الصعب, و هذه يا سيدتي هي المكاره التي حفت بها جنتهم, لم يضعها الله في طريقهم و حاشاه, انما وضعها امثال الرجل الذي يستهين بشرع الله كما مثلتي في مدونتك, فهل يكون سلوك المؤمن(المؤمنة في هذه الحالة) هو الالتفاف علي الشرع و الانضمام لزارعي الاشواك, ام الخوض في الطريق الصعب و انتظار الأجر من الله كشأن المؤمنين الذين يدركون ان الدنيا دار ابتلاء في الاساس.....هذا هو السؤال.

غير معرف يقول...

السلام عليكم,ارجو الانتباه ان ابغض الحلال الى الله الطلاق هو قول مأثور وليس آية قرآنية ,جزاك الله كل خير وسددك

مصر