الهي ماعدت أبغي شيئا في هذه الحياة سوي عفوك ورضاك

الخميس، 9 يوليو، 2009

يــــا أنـا يـاموبيــــلك يـاحبيـبـــي في البيـــــــت



خلو بالكم من ...لاء مش من عيالكم ..من موبيلات أزواجكم.. كنت رايحة أشتري كارت شحن فودافون (اللي يحب يحول لي رصيد يعلق بذلك) من أبو عشرة جنيه (بصراحة عمري مافكرت أشتري بأغلي من كده ولا ناوية) المهم ماعلينا وقفت علي جنب أخربش الكارت وأدخل الرقم ..ووصل لوداني صوت واحدة ست بتتكلم بانفعال شديد كانت واقفة ورايا ...كانت واقفة تتكلم في موبايل خاص بالمحل ...ولاقيتها بتزعق وهي بتتكلم.

.ياسيتي أنا عارفة أن انتي مالكيش ذنب وعارفة أن جوزي هو اللي بيتصل بيكي علطول بس صدقيني لو اللي بينكم ده استمر الموضوع كده هيوصل للطلاق ...حرام عليكي سايق عليكي النبي ترحميني من العذاب اللي انا فيه يرضيكي تكوني سبب في ........عشان خاطري لو شفتي رقمه أو سمعتي صوته ماترديش ده عياله لسة صغيرين و..........

وصعبت عليا الست قوي صعبت عليا بجد واتمنيت ساعتها لو أطول زمارة رقبة جوزها كنت قطمتها ستين حتة (ده أأقل واجب) وعشان الظن وحش بلاش اتكلم عن الطرف الاخر ساعتها اتمنيت أعرف اسم مخترع الموبايل عشان ابعت له ماسج حساس شوية أأقوله فيه

ارتحت دلوقتي.؟..اخترعت واكتشفت ...وغيرت العالم باختراعك ...سهلت علي الناس الخيانة قربتها منهم قوي...كان زمان الواد يحفي علي مايعرف يعتر في واحدة من اياهم ويضرب معاها ميعاد ..دلوقتي بقت الماسجات
والرنات والشبكات جاهزة ومستعدة لاصطياد أي نفس ضعيفة قابلة للغدر والخيانة ماتعرفش في قاموسها كلمة اسمها اخلاص ولا خشي ولا دم


نفضت لمخترع الموبايل وعقلي علق شوية مع الرجالة ...ولاقيت نفسي بغضب بسألهم في راسي طبعا...مالكم انتم عاوزين ايه بالظبط بقي؟ مابتشبعوش ليه؟ طماعين ليه؟ تعملكم الست ايه أكتر من كده عشان تتقوا ربنا فيها؟ هو يعني البيت ده بيتها لوحدها؟ تخاف عليه لوحدها؟ مش المفروض انه شركة بينكم؟ هي واقفة في المطبخ تطبخ لسيادتك وسيادتك عامل نفسك نايم في التكييف ومش عاوز ازعاج وقافل الباب عليك ومش عاوز صوت والموبايل علي ودانك شغال تحب فيه ولا اعتبار لاي حاجة وفي لحظة تدلت الرقم و تقوم تاكل وتملي بطنك والغلبانة ولا هي هنا وبراءة الاطفال في عينيك

ليه كتير من الرجالة بيتعاملوا مع الست وكأنها كائن المفروض أن يعطي...يعطي فقط ...وبلا مقابل...تاخد علي دماغها وتتحمل ..وتكون الكلمة الحكيمة جاهزة
..ماتخربيش بيتك بايدك يابنتي...بكرة يعقل...او مصمصة شفايف حلوة ..و ربنا يهدي...معلش استحملي عشان خاطر عيالك

والله الواحدة تتحمل جوزها علي الحلوة والمرة اه ..تقف جنبه في شدته ازمته مرضه واجبها ..لكن ان شاء الله تتحمل خيانته ليها بأمارة ايه.؟.انه شاريها مثلا ؟..طب وهو لو شاريها كان لعب بموبايله ؟

بصراحة ربنا انا عاوزة أأقولك كلمة ياعم الحاج الراجل انت

الست بتحس قووووي وبتضحي قوووووووي وبتعطي قووووووي لكن مفيش حاجة توجعها قووووووي غير انك
تستغل حبها ليك وحاجتها ليك ورغبتها القوية في انها تحافظ علي بيتها وتلعب من وراها وتتسلي ويوم ماتكشفك تكش وتظهر لها وش الحنية الخفي ...انــــا بحبك وماقدرش اعيش من غيرك ...بضعف وبهمس تقولك طب ليه عملت كده...ترد بانكسار خزيان مفتعل...ضعفت ما احنا كلنا بشر ياحبيبتي وبنضعف بس اوعدك أخر مرة.(وتفتكر أغنية هاني شاكر ساعتها غلطة وندمان عليها ) .ولازم تفهمي ان عمر ما كان ولا هيكون في قلبي غيرك ...تفرح المسكينة وتصدق وتغفر وتسامح..ويومين اتنين وترجع ريما لعادتها القديمة ..وبدل لما كان التليفون بيرن ويرد سوري النمرة غلط...بهمس ..شوية وهكلمك استنيني وحشتيني

واخيـــــــرا بدعوا الزوجات لشن حــــملة صارمة غاضبة لمصادرة موبيــــلات الازواج شعارها


يا أنا يا موبيلك يا حبيبي في البيت

تحياتي

فاطمة الطرابيلي





هناك 26 تعليقًا:

mohamed ghalia يقول...

يا أنا يا موبيلك يا حبيبي في البيت
التوبك جامد بجد
بحترم أنا الناس الى بتتعلم من كل موقف يعدى قدمها
دمتِ فى سعادة

مصعب صلاح يقول...

السلام عليكم

احنا حسن ناس تسيء استغلال الأجهزة الحديثة

إيمان بنت الحرية يقول...

ممممم
بس يا بطوط اكيد فى رجالة كويسين ..احتمال يعنى هو مش اكيد طبعا
هههه

بس عارفة انا شايفة ان الطريقة دى غلط ..طريقة الحملة

يعنى ممكن تكون بكلمة طيبة من الزوجة الزوج..بتلميح منها ليه على الموضوع ..تذكره ببعض الآيات القرانية ..باحاديث ..بمواقف الرسول مع زوجاته ..

وبعدين انا اصلا ضد مراقبة تليفون الزوج للزوجة ..والزوجة لتليفون الزوج ..ليه !! هى الثقة اللى بينهم انعدمت ..خلاص !!

وبعدين لو الاتنين ملتزمين وعلى خلق ودين
اعتقد ان مش هيكون فى حاجة م الحاجات دى
ولو مش كدا
يبقى هى ذنبها انها اخدت واحد مش كويس ومش ملتزم ..-والعكس صحيح بردوا-

معلش انا عارفة ردى غلس شوية بس هى دى وجهه نظرى ..

الشاعر الحزين يقول...

ده هجوم كبير قوى على الرجاله
واحنا مش لازم نسكت

بس أقولك على حاجه

أنتى عندك حق فى كل كلمه قولتيها ده طبعا مع الاعتراف بإن أحيانا كتير بيحصل العكس

وبتيجى الجراح من ناحية الزوجه

بس طبعا أنا معاكى ان الأغلبيه من ناحية الزوج بما انه راجل وليه حريه أكبر فى التصرف

عموما بحييكى جدا جدا على اثارة الموضوع الجميل والمهم جدا ده

وبحييكى على طريقتك فى كتابته بجد أسلوبك جميل جدا

تسلم ايدك

ودمتى فى حفظ الله

2wzeyad يقول...

انتى موضوعك دمه خفيف اوى وطريقتك ذى العسل وطبعععععععععععا عندك حق
لازم الست تخلى عينها فى وسط راسها وحياتك من الموبايلات وغير الموبايلات بس متزودهاش اوى عشان جوزها ميزهقش ويمل اصل الانسان المخلص بيتوجع اوى لما يحس ان الطرف التانى بيشك فيه ومش مقدر اخلاصه
بس الحذر كويس ومش صح ان الست تطمن زياده عن اللزوووووم
كل ابن ادم خطااااااء

2wzeyad يقول...
أزال المؤلف هذا التعليق.
ريمان يقول...

والله يا بطه موضوعك ده مهم جدا وبيطرح قضيه مهمه جدا

الراجل من دول اصلا مش بيقبل ان مراته تشيل موبايل ولو شالته يفضل يفتش فيه وهو بقى براحته اوى يتصل باللى يعجبه ويعاكس براحته وهو ولا همه


حسبى الله ونعم الوكيل

بجد انا برضه الست دى صعبت عليا

وبعدين الست التانيه دى ازاى اصلا تكلم راجل مجوز ماتقفل فى وشه على طول عشان مش تخرب بيته


حاجه بجد مقرفه والله

رامز عباس يقول...

الموضوع مهم بس ابقي اربطيه بمشاكل المجتمع عامة انتي ناسيه ان الست التانية ميهمهاش متجوز ولا لا طالما بيفسحها وبيشترلها كل حاجه مقابل اللحظات المحرمة دى


مسمعتيش عن الفتيات المقلبات بالريكلام موجودين بالقاهرة والمحافظات كتير ودى شغلتها تعلق واحد وتقعد تكلمه في اي حاجه يحبها وواحد اعرفه حكالي انه اضطر يدفع اشتراك رحلة لرأس البر لبنتين من دول واحدة له وواحدة لصحبة النوعية دى مبتعديش حدودها لاكتر من الكلام

النوعية التانية واحدة اتظلمت من جوزها او جوزها سافر وهي اتعودت تخاطب رجال وطبعا ان عارفه ان معظم اللي في دماغ الرجاله افكار غير لائقة خاصة ان دى علاقة خاصة واتسمت كدة لانها بتؤدى لكدة

للاسف لو كل زوجة تشوف ايه ناقصها هيكون افضل لانه مش هيطلع بره الا لو مل من اللي جوه ولا ايه رأيك في كلامي وتقبلي مروري

رامز عباس يقول...

للعلم ممكن الواحد يخون مراته عن طريق النت


وممكن يخونها بمشاهدة الافلام الاباحية

للاسف الزوجة بدأت تحس انها الشريك الاضعف بالشركة الزوجية انا بدعوا كل انثي انها تشتغل وتثبت طموحاتها ويكون الزوج بالنسبة ليها الشيء اللي يجي بناء علي حبها واقتناعها وتأكدها من الشخص ده

رغم اني حزين للست دى بس مستعجب منها حطه ببالها تقنع الست التانية تسيب جوزها علي طريقة الافلام العربي لما كانت تروحلها البيت تترجاها

ومفكرتش تكلم جوزها وده دليل يا صديقتي علي حجم الفجوة في العلاقة بين الست اللي سمعتيها والبية جوزها لا ن لو فيه تفاهم هتثق فيه انها لو كلمته هيتعدل

وكمان ملاحظ من كلامها انها بتترجي من علشان احترامها لانثوتها بل من اجل البذور التي انتجتها شركتهم المشتركة

يعني بتتصل تترجي ومبتدورش علي نفسها وتقبلي زعلي من عدم التعليق علي كلماتي كما وعدتي

رامز عباس يقول...

للعلم ممكن الواحد يخون مراته عن طريق النت


وممكن يخونها بمشاهدة الافلام الاباحية

للاسف الزوجة بدأت تحس انها الشريك الاضعف بالشركة الزوجية انا بدعوا كل انثي انها تشتغل وتثبت طموحاتها ويكون الزوج بالنسبة ليها الشيء اللي يجي بناء علي حبها واقتناعها وتأكدها من الشخص ده

رغم اني حزين للست دى بس مستعجب منها حطه ببالها تقنع الست التانية تسيب جوزها علي طريقة الافلام العربي لما كانت تروحلها البيت تترجاها

ومفكرتش تكلم جوزها وده دليل يا صديقتي علي حجم الفجوة في العلاقة بين الست اللي سمعتيها والبية جوزها لا ن لو فيه تفاهم هتثق فيه انها لو كلمته هيتعدل

وكمان ملاحظ من كلامها انها بتترجي من علشان احترامها لانثوتها بل من اجل البذور التي انتجتها شركتهم المشتركة

يعني بتتصل تترجي ومبتدورش علي نفسها وتقبلي زعلي من عدم التعليق علي كلماتي كما وعدتي

رامز عباس يقول...

علي فكرة انا المدون رامز عباس بس النت بطيء فبعلق كدة

رامز عباس يقول...

علي فكرة انا المدون رامز عباس بس النت بطيء فبعلق كدة

بنت الاسلام يقول...

محمد غالية

طبعا لازم نتعلم من كل موقف وكل كلمة وكل همسة بتحصل حوالينا

والا هنفضل زي ما احنا وعمر ماحاجة هتتغير فينا

للافضل طبعا

تحياتي

بنت الاسلام يقول...

مصعب صلاح

وعليكم السلام ورحمة الله وبركاته


مكنتش لينا يامصعب والله تو علي الاقل كان لازم قبل ماتنزل السوق زي الرز يعملوا حملات توعية للمستهلكين ولا هي الحملات خاصة بتنظيم الاسرة بس؟

تحياتي

بنت الاسلام يقول...

ايمان بنت الحرية

والله انتي طيبة قوي يامنمونة ياريت كانت الدنيا والناس جميلة كده زي ما صورتها رائعة في خيالك

الثقة لا تغني عن الحذر مهما كان وخصوصا ان انا في عصر الاغراءات كل حاجة حوالينا بقت بتمثل نوع مختلف من الاغراء من شارع لتلفزيون لنت لدش لموبيلات و حدث ولا حرج عن تفنن وسائل الاغراء والضعف البشري موجود وبيزيد قدام المغريات

فلازم نحصن نفسنا دايما بالايمان القوي عشان نقدر نتغلب علي المغريات الفظيعة المنتشرة حوالينا

حبيبتي...وارد جدااا انك نكوني ملتزمة واختارتي انسان ملتزم ولكن هل يبقي الانسان علي وتيرة واحدة؟ هل تظل النفس مطمئنة للابد سيدنا يوسف عليه السلام تعرض لموقف اشد وكاد ان يهم بها لولا رحمة الله

نحن بشر ياعزيزتي والايمان يقل وينقص والضعف البشري موجود

تحياتي لردك اللي بينم عن عقل راجح يري الدنيا بمنظور حالم و مش فيه اي غلاسة

تحياتي

بنت الاسلام يقول...

الشاعر الحزين

اهوووووووووو

امسكوووووووووووه

وشهد شاهد من اهلهاااااااااا

الاعتراف بالحق فضيلة


يبقي انت تأيد نفسك معايا في الحملة بقي

وتسلم موبايلك بالذوق للمدام

بدل مانضطر اننا نستخدم السلاااااااااح

تحياتي

بنت الاسلام يقول...

2wzeyad

وهو لسة في حد مخلص في الزمن ده؟

يااااااااااريت ظني يطلع مش في محله

وربنا ااقدم اعتذار رسمي موثق من اعليالجهات النسائية للرجال

وطبعا معاكي حق كل ابن ادم خطاء

وخير الخطائين التوابين

تحياتي

بنت الاسلام يقول...

ريمان

ضحكتيني في الجزء الاخير من تعليقك يارمانة

انتي لسة شايفة الدنيا وردية

مش عارفة ان بقي فيها كل الموبقات معلنة وصريحة وبلا خجل

تحياتي

مدحت محمد يقول...

يانا ياموبايلاك ياحبيبى فى البيت
لا موبايلى طبعا

بس بجد اغبى حاجة الشك هو اللى بيخلى الشك يتحول لحقيقة

حسن مدني يقول...

الموبايل طبعاً.

أي حد واحدة في الدينا تضع قيمتها أومكانتها في مقابل موبايل، تمشي فوراً، وممكن تاخد الموبايل معاها..

تحياتي

بنت الاسلام يقول...

رامز عباس

ربنا يحفظنا يارامز انا اول مرة اسمع عن الفتيات ديه الريكلام بس وجودهم بيدل علي استمرار التدني والانحطاط الاخلاقي

والله يارامز في ستات زي الفل وكل حاجة بيتمناها جوزها بتلبيها فورا ومع ذلك التسلية في دمهم

تحياتي

بنت الاسلام يقول...

رامز عباس

ولو اشتغلت وركزت في شغلها تلاقي اللي يقولك دي مش سالة فيا كل همها الشغل وبس


انما طريقة الست اللي مش عاجباك يارامز فكان واضح عليها انها ست بسيطة وبتحاول باي طريقة حتي لو كانت جارحة ليها ولكرامتها انها تحافظ علي بيتها

تحياتي

بنت الاسلام يقول...

مدحت محمد

طبعا الشك الخانق واللي من غير مبرر كافي انه يقتل اي حب

تحياتي

بنت الاسلام يقول...

حسن مدني

طيب يا استاذ حسن واللي حط مراته في كفة وموبايله في كافة مش عشان مصلحة اكتر من كلام فاضي

نقول عليه ايه؟


تحياتي

حسن مدني يقول...

يا سيدتي القصة ليست مع الموبايل،
القصة هي بين المرأتين. فلو تخلى عن الموبايل، وظل على اتصال بالمرأة الثانية، هل حلت المشكلة؟
ولو احتفظ بالموبايل، وقطع علاقته الثانية، هل المشكلة قائمة؟
أعتقد إجابة السؤالين هي لا، إذن القصة ليست المرأة والموبايل.
فمن يريد إقامة علاقة خارج الزواج سوف يفعل، بموبايل أو بدون. ومن لا يريد فلن يجعله وجود الموبايل يفعل.
وعندما تصيغ المرأة طلبها بصيغة إما أنا أو ....، فهي تضع نفسها في مقارنة مع هذا الشيء أيا كان. فإذا نزلت بنفسها إلى درجة موبايل، فهي تحط من قدرها كثيرا كما أن الأغلب أن يكن الموبايل أحدث منها كذلك.
هذا هو وجه اعتراضي.

لا يوجد رجل عاقل يقارن امرأة بموبايل.

الكل معرض لإساءة استغلال الأجهزة المتاحة، والحل لا يكون بمنع هذه الأجزة. وإنما بالتحكم في استخدمها والحرص على استخدامها بصورة ملائمة.

تحياتي

بنت الاسلام يقول...

استاذ حسن مدني

وانا لم اقصد بموضوعي هذا حملة فعليا لمصادرة موبيلات الازواج ولم يدر بخلدي اطلاقا ان تاخذ زوجة موبايل زوجها وتلقيه بعيدا

ولكن كما اشرت حضرتك سوء استخدام الاجهزة الحديثة والذي سهل الخيانة ووسائل الاغراء كثيرا علي العديد من البشر من كلا الجانبين

وكما ذكرت حضرتك لا يصح اطلاقا ان تضع امرأة نفسها مقارنة مع موبايل ولكن ياسيدي كم موبايل كان سببا في خراب بيوتا كانت من قبله تشع سعادة وهناء

ويبقي الامر متلخصا في سوء استخدام

تحياتي

مصر