الهي ماعدت أبغي شيئا في هذه الحياة سوي عفوك ورضاك

الخميس، 25 يونيو، 2009

عرض جـــــواز عرفـــى..ألا أولي...ألا دو..ألا تررررررري

مالقتش صورة لعقد عرفي سامحوووووني



قال لي أحد ألاصدقاء


شوفتي يابطة اتعرض النهاردة عليا عرض مغري جدااا ومع ذلك رفضت


عرض ايه المغري ده اللي ترفضه


عرض جواز عرفي


ازاي مش فاهمة؟


بنت النهاردة عرضت عليا اني اتجوزها عرفي


البنت اللي عرضت ولا انت اللي عرضت وبتستهبل؟


وربنا البنت


بصراحة انا برقت


يالهووووووووووي وده من ايه طيب؟


بتقول انها كده بتعف نفسها عشان خايفة تقع في الحرام


ما الجواز العرفي احد صور الحرام والحرام البين


لالا ماهي هتقول للناس كلها انها متجوزة عرفي الا بابا وماما وبكدة حققت شرط الاشهار


ياحلاوة ...لا زواج الا بوالي..طالما انها مش ارملة ولا مطلقة ..اذن حرام حرام


سيبكم من الحوار ده كله وخليكم في المصيبة الكبري


عرض زواج عرفي ..واضح وصريح كده...من غير كسوف ولا خجل..


بصوا أنا بصراحة مش هلوي شفايفي وااقول ايه البنت قليلة الادب ديه؟ ولا هقول اووووووه معقولة في حد كده؟ ولا هقول استغفر الله العظيم يارب ربنا ياخد أشكالكم .. لاء مش هعمل كده خالص لاني بصراحة حاسة قوي بمأساة ومشكلة البنت ديه اللي لخصتها في كلمتين مستخبين في جنب حد خد باله منهم .. بابا وماما...متهيالي الطبيعي ان مفيش بنت بتتمني أنها تتجوز بدون مباركة باباها ومامتها..لان دول أقرب ناس لاي بنت في سنها..اومال ايه اللي حصل..؟ ايه تفسيرك يا فلحوسة هانم...ببساطة الام والاب معقدين الامور...كل عريس لازم شقة تمليك (مالهمش في الايجار لا تقوله جديد ولا قديم) ولازم عفش طراز اول ولازم قايمة(يضمنوا حق بنتهم) وممكن جدا مطالبة بان الشفة تتكتب باسم المحروسة...(محدش عارف الندل ده ممكن يعمل فيها ايه) ...ولازم ولازم ولازم...وعلي كده كل عريس يدخل البيت يخرج وقفاه مقمر عيش...حد ممكن يقول..طب معلش بقي يابطوووط الاهل معاهم حق..هرد بكل بساطة..هما داخلين جوازة ولا داخلين حرب؟ والله اللي كنا نعرفه زمان ان الجواز سكن وامان هب ورحمة وتراحم ..محدش قالنا ان الجواز مخدة بريش النعام ولا مرتبة فايبر(دي اغلي من القطن المرتبة باين بالفين جنيه واضرب بقي الفين في 6 مراتب شوف هيطلعوا كام) ..ولا دهان كل حيطة لون ..ولا انتريه وصالون شبه بتاع عادل امام...ولا ولا ولا ...هما في طلباتهم كل يوم بيقتلوا جوة البنت احساسها..احتياجها...اشتياقها...الطبيعي جداا واللي مافيهوش عيب ولا احراج انها تصرح بيه...احتياجها لرجل في حياتها..ياجماعة هي اتخلقت كده...تكوينها كده...طبيعتها كده...مش عيب اننا نصارح نفسنا باحتياجنا..ومش بطولة اننا نقتل رغباتنا جوانا عشان عيب وقلة ادب لاء...رسولنا الكريم قال ..يسروا ولا تعسروا...بالذمة بتيسروا؟..وقال كمان ثلاثة علي الله حق اعانته الناكح يريد الزواج..بالله عليكم بتعينوه؟؟يلعالم دانتم بتدبحوه..وقبلها بتدبحوا بنتكم..اللي بتحلم وبتتمني ...ماتزعلوش بقي وماتتصدموش لما تسمعوا ان عدد حالات الزواج العرفي في مصر وصل ل45 الف حالة سنويا ...يعني بمعدل 100 الف شاب وشابة ..ارضوا وعلموا ولادكم يرضوا..شاب علي اد حاله بيحارب في الدنيا عشان لقمة عيش نضيفة..ابرك من غني متقنعر عليها ويسمعها في الاخر كلمة ..انا اشتريتك بفلووووووووسي...مانزعلش بقي لما نلاقي بنت زي دي وغيرها وغيرها يعملوا بعد كده مكتب ...عرض للزواج العرفي...وتطلع الفتاوي والشيوخ والاخصائيين النفسيين ..وتكتب الجرايد أسباب الجواز العرفي..لماذا يلجأن البنات للزواج العرفي..الجواز العرفي حرام شرعا..الجواز العرفي حلال حلال حلال...ياعم سيبك انت وهو وركزوا في الفتاوي اللي تقدمنا لقدام..افتوا بحرمانية تصعيب تكاليف الزواج علي الشباب...اتكلموا عن حرمانية كبت مشاعر واحاسيس الشباب..من الاخر حسوا باحتياج الشباب ..عشان مايطلعش رئيس مكافحة بوليس الاداب قريب علي التلفاز يهنئونه بأنه صاحب اكبر عدد من قضايا الاداب هذا العام...بصينا تحت رجلينا كتير...ولفينا حوالين نفسنا اكتر...ركزوا بقي في اللي يفيد ويحمي بناتنا وولادنا ...وبدل مانهاجمهم ونعاقبهم ونسيبهم يضيعوا حقوقهم في فرحة كاملة بايديهم...نقف جنبهم ونساعدهم ونقدم لهم عروض زواج شرعي مبارك من الجميع اب وام وعم وخال وصحاب وجيران ..وخلوها علي الله لعل بكرة احسن من النهاردة...وحد يلحقني بعرييس شرعي بقي قبل ما ااقدم انا كمان عرض عرفي لهشام طلعت مصطفي و اشترط عليه ان فرحنا يكون في الرحاب ويكتب لي مشروع مدينتي باسمه ما انا هضحي ونتعدم سوي


تحياتي


اختكم الانسة بطة

وركزوا علي كلمة انسة قووووووووي


هناك 26 تعليقًا:

محمود يقول...

يا أنسة الصورة اللي حطيتيها في أول البوست عبارة عن صورة عقد زواج بين اتنين يهود مصريين..!!
كل ده من هول المفاجأة!!!

mohamed ghalia يقول...

ربنا يهدى بجد
حاضر هنركز على انسة ههههههههههههههههههههههه

بنت الاسلام يقول...

محمود

يعني اليهود يتجوزوا شرعي

واحنا يامسلمين

نقول اهلا بالعرفي

مش بالذمة حاجة تكسف؟؟؟؟؟

لاء ولسة بقي عمالين نفتي حرام ولا حلال

حرااااااااااااااام طبعااااااااا

ده اليهوووووووود ماعملوهاااااااش

بنت الاسلام يقول...

محمد خليل

ياااااااارب يهدي الجمييييييييع

وخصوصا

بابا وماما

بس مش بتوع الانا

تحياتي

smilyrose يقول...

انستى الغالية بطوووووووط

بجد حزنت قوى للى بيحصل دا وياترى

هنوصل لحد فين ربنا يرحمنا جميعا

بس عارفة لو فعلا طبقا مبدائ الدين

والله ما فى من الاشياء دى هتحصل

لو الاهل اتقوا الله فى اى شخص

يتقدم لبنتهم وارتضو دينه اولا

والشباب اتقوا الله فى نفسهم

وخافو عليهم ما حدث شئ مما نراه

اللهم ارحمنا

وردشان

روح الحب الصادق

غير معرف يقول...

بطة، هيا لو وهبت له نفسها تبقى ملك اليمين؟ لو كان كده يبقى حلال شرعاً انهم يناموا مع بعض! ولا أيه؟ عموماً الجواز العرفي احسن من ملك اليمين، ولا انتي مش معايا؟

رامز عباس أقري اخر بوست عندى يقول...

هشام طلعت حكموا عليه بالاعدام

خليكي في احمد عز محدش قده


بصراحة موضوع مهم جدا وجميل ان مناقشاتك مع الاصدقاء اثمرت ابداع

وكتاباتك مهمه جدا

بنت الاسلام يقول...
أزال المؤلف هذا التعليق.
بنت الاسلام يقول...

غير معرف

ملك يمين ايه يابني الله يصلح حالك مش تعرف اول يعني ايه ملك يمين؟ وليه اتوجدت؟ وايه اصلها وفصلها ؟

ده كان زماااااان بس ملك اليمين ده

ايام الحروب ...اسيرات الحرب

واسراء الحرب

حماية لهم وتوفير سكن لهم

كانوا بيفضلوا في بيوت العرب

ودي عادة عربية قديمة معروفة من قبل الاسلام حتي


لكن طبعا ده انتهي تماما ومابقاش ليه وجود والحمد لله مابقاش في اسيرات حرب مفيش غير اسري وبنعمل كمان تبادل بينا وبينهم

اذن انتهت ولم يعد هناك داعي للحديث عنها ونسبها للاسلام

مابقاش في حاجة اسمها ملك يمين لكن فيه

زواج

شرعي

رسمي

حلال حلال

غير كده بدع وابتداع في الدين

والاسلام بريء من ده كله

لا تقولي ملك يمين ولا جواز عرفي

كمان لو هتنظر لها بهذه الصورة

ملك اليمين مكانش في السر وبدون معرفة الاهل والناس

يعني كانه زواج بالظبط ومكانش تحت ضغط شقة وعفش

لكن العادات ديه انتهت بانتهاء الحروب

فبلاش نبتدع

ونحلل الحرام

الحلال بين والحرام بين

نفهم دينا صح

ونعرف كل كلمة معناها ايه ومناسبتها ايه قبل ما نغلط باسم الدين والدين بريء منه

تحياتي

بنت الاسلام يقول...

روح الحب الصادق

سؤالك مهم جدااا


هنوصل لحد فين؟

بقولك هو في اكتر من كده

في اكتر ان البنت تتبرأ من قناع الحياء اللي بيزين اي بنت من اجل اشباع رغبة طبيعية موجودة فيها؟


زمان كانت البنت لما بيسألوها عن رايها في عريس بتسكت وتحط وشها في الارض وكلنا عارفين ان السكوت علامة الرضا

لكن ان الحال يوصل ان البنت تعرض نفسها لزواج وعرفي كمان فاظن ان مفيش مدي ابعد من كده ممكن نوصل ليه

بنت الاسلام يقول...

رامز عباس

شفت الجلسة يارامز

بس لسة في نقض

واما نشوف اخرة انشغالنا بقضية هشام طلعت ايه

وطبعا الموضوع مهم

محمد مارو يقول...

عقبالى يارب

بنت الاسلام يقول...

ماروووووووو

عقباااااااالك بايه

عرفي

و لاشرعي

ماحددتش

MǿиY El-Shreef يقول...

:0

يالهوي :|

لا حول ولا قوه الا بالله

انا معاكي ف كل كلامك ع فكره

ربنا يبارك فيكي يا بطه ياحبي

سلام

الأمير يقول...

بسم الله ...

انا بصراحه محتاااار اوى

يا ترى اضحك ..؟

ابكى ..؟

أعمل ايه طيب ..؟!

المشكله ان المغالاه فى المهور
بتزيد مش بتقل
يعنى الناس ببتكلم ولا حد هنااا

----------
بجد الموضوع ولا اروع
ربنا يبارك فى حضرتك

----------
بس ياترى الحوار اللى فى الاول .. حقيقى ..؟

------------
ويا ترى الحل ايه
الشباب والبنات يولعوا بجاز ولا ايه ..؟

------------
معلش اسئلتى كتير

ويارب يرزق كل الشباب والبنات بزيجات طيبه
لوضع لبنه فى بناء المجد المندثر

-------
وافر احترامى ..؛؛

مصعب صلاح يقول...

السلام عليكم

إذا لم تستح فاصنع ماشئت

تقبلي مروري

بنت الاسلام يقول...

الامير

ماتعملش حاجة

او ااقولك اضحك

يمكن الصورة تطلع حلوة

وللاسف

الحوار ده حقيقي فعلا

وانا مكنتش مصدقة زيك تماما

لا طبعا الحل مش يولعوا في نفسهم ولا حاجة

الحل ان الدنيا كلها تسيبهم يكافحوا سوي يثبتوا نفسهم سوي

كنا زمان نسمع كلمة دي كافحت معايا ووقفت جنبي لغاية ماوقفت علي رجليا

لكن حاليا مابقاش فيه كفاح وقصص الكفاح بقت اساطير


واللهم امين لدعائك الجميل

شرفتني بالزيارة

تحياتي

بنت الاسلام يقول...

مصعب صلاح

الظروف الصعبة خلعت برقع الحياء للاسف

وفعل الجميع مايشاؤن

تحياتي

همسة ايمان يقول...

والله منتهى الهبل وقله الديت وقله ايمان

وبعدنا عن ربنا هو الجواز واحد مفيش غيره

الى بيحصل ده بجد حاجة تقهر ربنا يهدى شباب

وبنات المسلمين وحصن الجميع بالحلال

ثانكس ياعسوله على البوست الجميل

ودى اول زيارة وان شاء الله متكونش الاخيرة

بنت الاسلام يقول...

همسة ايمان

اولا نورتيني بزيارتك ياجميل

وربنا يحفظنا من كل سوء ويكفينا شر الحرام


تحياتي

خالد فوده - Khaled fouda يقول...

بصراحه عرض مغري جدا
انا لو مكانه لت اتوقف لحظه للتفكير

البنت قدمت احسن ما عندها
وكفايه ان فهمها وصلها انه كده يبقي بتعف نفسها
خلاص مدحش قادر يعلمها يعني ايه رزاج عرفي ..او يعني ايه زواج من اساسه

حسبي الله ونعم الوكيل

بنت الاسلام يقول...

خالد فودة

محدش فاهمها

وحتي لو حاولت تفهم

هتفهم ازاااااااااي

وسط تضارب الفتاوي بين كل من نطلق عليهم فقهاء وعلماء المسلمين


تحياتي

أحمد سعيد يقول...

عندك حق والله يا بطة

لازم نحارب الجهل والبعد عن الدين ،

وتلك العادات والتقاليد البالية

تعسير وتعسير على الشاب

مش في الفلوس بس

والله يا بطة في بلاوي .

ربنا يعدينا على خير

وانا فعلا مركز على آنسة دي

هههههههههههههههههههه

تسلمي يا قمر .


أخوكِ..نيجــر .

بنت الاسلام يقول...

احمد سعيد

ادينا بننفخ في اربة مخرومة يا احمد

مين عالم

جايز تتلحم

تحياتي

وبلاش تركز قوي

انت ما اخدتش بالك اني مرتبطة بهشومة ولا ايه؟

akeed يقول...

اختى العزيزة

انكِ اثارتى موضوع هام جداً و هو سبب الزواج العرفى ومن اسبابه التى فى يدينا ان نحلها و هو تسهيل الزواج على الشباب وعدم طلب المطالب المبالغ فيها وايضاً التربيه السليمة من الاباء و متابعة الابناء بنات او شباب متابعة دقيقة فى سن المراهقة


مدونتك اكثر من رائعة تحياتى
ودمتى بكل خير

بنت الاسلام يقول...

akeed

شرفتني بالزيارة

واتمني اكون قدرت اوصل الفكرة بوضوح

و

من بعض ما عندكم

تحياتي

مصر