الهي ماعدت أبغي شيئا في هذه الحياة سوي عفوك ورضاك

الخميس، 2 أبريل 2009

ضد اضراب 6 ابريل 2009

بالله عليكم ده اضراب ..ولا بلطجة وارهاب

تصاعدت أصوات خافتة هذا العام في نفس التوقيت لاحياء ذكري اضراب 6 ابريل الماضي وتوالت البانرات المؤيدة وتعالت أصوات الجروبات الداعية له علي الفيس بوك وتوالت الاحزاب المعارضة واحدا تلو الاخر باعلانها المشاركة وانتهت باعلان جماعة الاخوان المسلمين مشاركتها وتأييدها له (جزئيا) مع احترامي للجميع وعلمي التام بأن مقصد الأغلبية هو اعلان حالة غضب عامة يشهد عليها كل فئات الشعب ضد الفساد الطاغي التي بات معششا في بلادنا وكأنه وطنه الذي لا يعرف له وطنا سواه ولكني وبصراحة أعلنها...كمدونة كانت مؤيدة بكل قواها الدعوة للاضراب العام الماضي وتبنيته بالتغطية والاهتمام أنني ضد اضراب 6 ابريل 2009 ضده تماما..ليس خوفا ..ولا ضعفا..وليس أيضا يئسا ..ولكن وبكل بساطة أحببت الاعتراف ومواجهة نفسي بنفسي ..نحن شعب لا يفقه معني الاضراب..لا بل وصار هناك اعتقاد راسخ في الاذهان بعد التجربة الماضية أن معني الاضراب عند الكثيرون هو دمار وخراب حرق واحتراق ..لست ضد الاضراب كوسيلة حرة شريفة لمحاولة رد حقوق مسلوبة أو التنفيث عن غضب مكبوت ولكن من لم يدرك حدوده وقواعده لا يريد العمار لهذه البلاد بل الخراب ونحن لن نسعي لتعمير بلادنا بجهلنا وتعصبنا الاعمي وانما بادراكنا التام بتوابع كل خطوة نخطوها في سبيل الهدف الذي نسعي اليه ونرجوه

ليس معني هذا فشل اضراب 6 ابريل الماضي ..لا لم يفشل اضراب 6 ابريل الماضي ...نعم هذا رايي والدليل واضح من كم المؤسسات الحكومية والخاصة الضخمة التي اتخذت الاضراب عنوانا لها العام الماضي فبعد أن كان مفهوم الاضراب مرتبط ارتباطا وثيقا في السنوات الماضية بعمال غزل المحلة أصبح هناك اضراب معلمين..اضراب صيادلة..اضراب أطباء(9 ابريل المقبل) ..اضراب محامين..اضراب سائقوا الترلات... وهذه بشارة مضيئة لنجاح اضراب 6 ابريل الماضي شهدها العام الحالي وسيشهدها الاعوام القادمة فقد تحررت الكثير من المؤسسات من عقدة الخوف علي التغيير ولكن أمام اجماع الجميع علي الظلم البين والنتائج المرتقبة من الاضراب عن العمل داخل تلك المؤسسات ومايتبعها من مخاوف كبيرة من قبل الحكومة دفع كل موظف علي أن يدرك أن توقفه عن عمله سيسبب كثير من المشاكل ولكن ربما حقه يعود وهذه من وجهة نظري ...حسنة الاضراب الماضي

ولكن هناك سؤال يدور بداخلي هذا العام..هدف الاضراب كالسابق؟...سقوط النظام...سقوط الحكومة..سقوط مبارك...نعم ربما يكون هذا حلمي الذي أتمناه فلم يحقق لي هذا النظام الكائن شيء يشفع له عندي ولم يحقق لمن حولي حلم الامان حتي بالاطعام...ولكن ..من التالي؟...أو بمعني أصح من البديل؟..من الذي سأرفع رايته بعد أن تتهاوي راية القديم ؟؟

أنا أري ..لا أحـــــــد..رد عليا قائل بمقولة(يكفي أن نظام مبارك يقع ومش مهم مين مكانه)..فكان ردي..ونصبح اذن كالعراق بعد سقوط صدام؟...لا يا أخي أنا لن أثور ثورة الاحرار ثورة ربما يدفع الكثيرون أرواحهم ثمنا لها من أجل اسقاط فساد لا أضمن أن يحل محله العدل ..ولكن أعدك عندما يظهر البديل في الافق وعندما تظهر من بعيد بشائر عدله فسأكون أول المبادرين لاعلان اضراب هدفه اسقاط الفساد من أجل العدالة

أحزاب المعارضة والاخوان..أعلنوا مشاركتهم في الاضراب الحالي وفي الحقيقة أثارني موقف جماعة الاخوان بالتحديد لان العام الماضي ليس مني ببعيد ومواقف مدوني الاخوان المتباينة والتي كانت مؤيدة للحظات النهائية الاضراب الماضي لا تزال أمام عيني التي ذهلت بانسحابهم في اللحظة الاخيرة أو عند لحظة الصفر بناءا علي موقف الجماعة التي أعلنت حينذاك أنها لن تشارك في اضراب مبهم بلا هوية وبلا أهداف معلنة...مما جعلني أتساءل سؤال بريء وهل هناك أهداف معلنة هذا العام؟ وهل الهوية معلومة هذا العام؟ وماذا هم فاعلون ان شبت الحرائق والتهمت الكثير وانتسب لهم شكوك حول اندلاعها كما كان مبررهم بعدم المشاركة في الاضراب الماضي بخوفهم من القاء تبعية نتائجه علي عاتقهم؟ أم أن شبح المحاكمات العسكرية قد تلاشي وحل محله شبح اسقاط النظام مهما كانت النتائج مؤلمة ؟ عذرا ..فهذه شكوك لم يهدأ عقلي الا بعد أن طرحها ليس في دائرة اتهام وانما في دائرة الالمام والشفافية التي نتوقعها دائما ممن يسعون ويطمحون أن يتولوا أمر هذا البلد والا فسنقول لهم هم أيضا سلام..


تحياتي

فاطمة الطرابيلي




هناك 46 تعليقًا:

محمد مارو يقول...

بطه همعل زى الناس مع انى بفضل اضحك عليهم هقولك هقرا و جاى

حسن مدني يقول...

عزيزتي بنت الإسلام

يبدو ي كلامك كثير من الحيرة، وشيء من التخبط. ففي البداية قلت إننا شعب لا يعرف معى الإضراب، ثم عدت فقلت إن الإضراب قد تكرر من فئات مختلفة، وفي مؤسسات متنوعة، ألا يعني ذلك أننا شعب بدأ يتعلم معنى الإضراب؟
وإذا كان لا يعرف معنى الإضراب، فكيف نعلمه ذلك؟ أليس من خلال التجارب تتعلم الشعوب. عناك مقولة أحبها كثيرا لمحمود أزهري رئيس وزراء السودان الأول. يقول"إن الديموراطية مليئة بالعيوب، وعلاجها هو مزيد من الديموقراطية"
أما عن البديل، فلا أرى بديلا سوى آلية يتفق عليها الناس. آلية تسمح للبديل الذي يتفق عليه الناس أن يقود المسير، ويحاسبه الناس. أما أن ننتظر الفارس على حصانه الأبيض، ليحرر البلاد والعباد ويرد الحقوق. فسوف يطول الانتظار. ولن يأتينا في النهاية سوى الفارس الأمريكي على صهوة دبابته. الفارق بيننا وبين العراق حتى الآن، أن السعي عندنا لإسقاط النظام بأيدينا، وليس بأيدي الأمريكي أو سواه.
تحياتي

محمد مارو يقول...

بطوط
انا من اول يوم تمت الدعوه لهذا الاضراب و انا عمال بحسبها فى دماغى

هو ليه الاضراب ده؟

طيب السنه اللى فاتت كان ضرورى و كان لازم

السنه دى بقى ليه؟

احنا لازم نعترف اننا مش عايشين فى رفاهيه
و لا سكنين فى قصور
بس برضو احنا حالنا الايام دى افضل من حال اعظم و اكبر دوله فى العالم
حالنا احسن من حالا الامريكان
الايام دى مش لاقين ياكلوا
مفيش شغل
مفيش سكن

انا بقول اننا مش عايشين ملوك و مش معنى كده اننا نرضى عن الظلم
بس لما نعمل الاضراب خلينا واقعيين شويه
ياترى هنقدر نحقق حاجه

محمد مارو يقول...

تعالى بقى نروح لموقف الاخوان

زى ما قولت و زى ما بقول و زى ما هفضل اقول

ان رفض الاخوان العام الماضى الاضراب كان مجرد صفقه فاشله
على شان المحاكمات العسكريه

انا واحد من الناس كنت هتحترمهم اكتر و اكتر لو مكنوش وافقوا على اضراب 4 مايو او اضراب ابريل الجارى

لكنى يوم بعد يوم بيتكشف لى وجه الاخوان الحقيقى

وجه كل لحظه اندم انى كنت من المحبين لهم و المدافعين عنهم

بنت الاسلام يقول...

محمد مارو

ياسيدي شرف ليا اساسا انك تقرا

نورتني

محمد مارو يقول...

تانى بقولها

انا بقيت برفض اسلوب التنبله اللى عاوزين كل حاجه بالاضراب

اول مره معت عن اضراب العام الحالى كان من جروب على الفيس بوك

صاحبه الجروب الله اعلم بحالها كانت عاوزه تشتهر زى اسراء و لا ايه

قال ايه بتدعوا لاضراب و المطالب
1200 ج لكل مصرى
قولتلها لما تطلبى اطلبى فى الاستطاعه على شان حتى مطلبك تتحقق و تبقى واقعيه
كمان بتطلب من كل مصرى يعلق علم مصر دليل على انه مشارك فى الاضراب و بتقول ان علم مصر مش قضيه بالعكس ده شرف انك تعلقه

قولت لها اولا احنا عندنا حكومه بتعرف تلفق التهم للناس ازاى
يعنى لو حد علق العلم هيعلقوه و طبعا القضيه مش رفع العلم ده ممكن يتهمومه بسرقه الهرم
قولت لها حاجه انه مش قضيه ده انا و انتى و غيرنا اللى نعرفه لكن عم احمد و عم ابراهيم و ام حنان و ام باتعه جيرانا مش يعرفوا الكلام ده

المهم اقصد اننا لازم نحدد مطالبنا صح و نشوف احنا عاوزين ايه الاول

بنت الاسلام يقول...

د/ ابو ادم ويحيي

زرت مدونتك و من سنة لسنة في التدوين منورنا

تحياتي

ريمان يقول...

للاسف

انا مش عارفه ايه اهداف اضراب السنه دى اصلا

خالد فوده يقول...

اللي مش عاوز يشارك في الاضراب
ياريت بلاش الاحباط

واللي مش عارف اهداف الاضراب وبيقول
انه مالوش مناسبه
لا له الف مناسبه
وخدي عندك علي سبيل المثال لا الحصر
. رفع الاجور وتعليقها بجانب الاسعار ارتفاعاً وهبوطاً ووضع حد لادنى المرتبات ب 1200 ج

2. الافراج عن المعتقلين السياسيين فى السجون المصريه

3 . تهيئه مناخ مناسب لبيئه ديموقراطيه والسماح بانشاء احزاب جديده دون وصايه من احد وكذلك بالنسبه الى الصحف

وغيره وغيره الكثير
يبقي ليه مالوش مناسبه

خالد فوده يقول...

والمطالب في الجامعات المصريه
هي
1 - طرد الحرس الجامعي التابع لوزارة الداخليه واستبداله بوحدات امن مدنيه تابعه لأدارة الجامعه تكون كل وظيفتها حماية المنشآت .
2 - تغيير تام للآئحه الطلابيه بما يحقق للطلبه

3 - تعليم مجاني يتضمن المصاريف القانونيه 12 جنيه لطلاب انتظام و 14 جنيه لطلاب انتساب مع ضمانة تعليم متطور يواكب سوق العمل .
4 - تطوبر الخدمات الطلابيه وتدعيمها من دعم حقيقي للكتاب الجامعي وحق سكن في المدينه الجامعيه لكل طالب مغترب .
5 - الافراج عن اسري الحركه الطلابيه

وردشان smilyrose يقول...

اختى بنت الاسلام

حبيبتى الصغيرة صدقتى فيما قولتى


عن عدم فهم شعبنا المعنى السليم

لكلمة اضراب او احتجاج بطريقة مهذبة

وباسلوب متحضر ينم عن فهم وفكر


سليم لما يحدث لنا واين هذا الوعى


امام المهازل التى تحدث


واين نحن مما يدور حولنا

وما نراه من تخازل بعض الفئات فى لحظات


الخطر قبل تاييدينا او معارضاتنا اين


نحن من كل ما يحدث وماذا فعلنا لكى

نستعد للتطورات التى ستكون بعد هذا


لابد ان نبدا بداية صحيحة ثم نفكر


ماذا نفعل وكيف سننفذ


اختك

smilyrose

وردشان

روح الحب الصادق

خالد فوده يقول...

إلى كل من اختلف مع شباب 6 أبريل وفكره الاضراب إذا لم تستطع المشاركة فلا تصادر على الأخرين حق المشاركة ولا تبث اليأس في نفوس من لم ييأس ومازال لديه الأمل.. الاضراب سلمي من أجل مصر

بنت الاسلام يقول...

استاذي الفاضل

حسن مدني

يسعدني تشريفك لي الدائم بالزيارة ويسعدني اكثر تعليقاتك التي تحرك العقل دائما وتدفعه نحو المزيد من الفكر

بداية لا لست حائرة ولست متخبطة بل اعني كل كلمة مما ذكرت فليس معني خطونا نحو تحقيق الديمقراطية اننا لن نخطيء لا سنخطيء وسنمر بتجارب نتعلم منها وهذا ما اوضحته انا في رايي الشخصي من اوجه الاستفادة الحقيقية من الاضراب السابق هو تسليط الضوء بشكل واضح ومكثف علي معني الاضراب والذي تجلي واضحا من خلال اقبال العديد من المؤسسات والنقابات علي الاضراب المنظم المنهجي المدروس المعلوم نتائجه واعتقد ان هذا هو المكسب الحقيقي لاضراب 6 ابريل 2008 بينما اعادة تكراره بنفس الصورة السابقة العشوائية بلا دعوات من قبل مؤسسات الدولة باحيائه فاري انه لن يكون سوي صورة ابشع مما سبق ولن يجدي ولن يفيد ولن يغير شيء

اما البديل فحضرتك تري انه يتم الاتفاق عليه بألية فانا لا اتفق مع حضرتك اطلاقا فكيف نسعي لاسقاط سلطة بلا بديل يرجوه الناس وتسعفني الذاكرة هنا بموقف لبنان بعد رحيل رئيسها اميل لحود واللخبطة والعنف التي سادها والخلافات والصراعت التي طالت والقتل لمن يرشح للرئاسة لانه لم يكن هناك بديل يلتف حوله الجميع


نحن من اطلنا الانتظار بعدم قدرتنا علي اختيار من ينوب عنا او ربما منعنا قهرا من هذا الحق ولكن هل سقوط السلطة بلا بديل الان لن يسمح للفارس الامريكي بالتدخل؟

تحياتي

بنت الاسلام يقول...

محمد مارو

وانا متفقة معاك تماما

الاعتراف بقدراتنا الحقيقية وتعلمنا من تجاربنا السابقة من اهم خطوات النجاح المستقبلي في تحقيق مانريد

ولا اظن ان قوة المعارضة الحقيقية في مصر تستطيع اتخاذ خطوة كهذه في ظل الظروف الراهنة التي بلا شك تزداد سوءا يوما بعد يوم

بينما ماتقصده من الازمة الاقتصادية العالمية التي طالت الجميع فاتفق معك في مقولتك ان حالنا افضل من الامريكان لان حالنا كما هو منذ زمن سيء بينما هم فقد اقبل عليهم حال لم يسمعوا عنه ولم يتوقعوا حدوثه من قبل
دعهم يذوقوا مما اذاقوا منه الشعوب

_____________________________
بالنسبة لموقف الاخوان
وانا ايضا لم تكن تراودني شكوكي لو كان موقفهم من اي اضراب مبهم مرفوض
كما حدث من اول اضراب
____________________________

بنت الاسلام يقول...

محمد مارو

جايز يامارو شافت في الاضراب حلم الحرية زي ما المصريين شافوا في ثورة يوليو حلم الجلاء مع عظمة ثورة يوليو الا انها لم تخلو من نقد كبير من المصريين انفسهم

كل ما اقصده ان الاضراب الماضي كان له وجهان وجه جيد ووجهه سيء وتكراره من وجهة نظري الخاصة لا جدوي له ولكن ليتنا نراه كل يوم من مؤسسة او من نقابة تدافع عن حقوق موظفيها

تحياتي

بنت الاسلام يقول...

ريمان

سهل تعرفيها

وبعد كده خدي قرار

ايديها

او جادلي فيها

تحياتي

Mustafa يقول...

أنت كتبتي تحت عنوان مدونتك "لا لليأس"؟

الإشارة للفوضى في العراق -في رأيي- مغالطة فيها كبيرة و قفز على الحقائق. العراق كان منهك من سنوات الحصار ثم الحرب و الإحتلال ثم الإنهيار الفعلي في تطبيق توصية الجبلي بذبح النظام (أو حل النظام). و لا أري أي وجه للمقارنة بين الاضراب و العراق.

أنا رأيي أن كل عمل من شأنه تحريك الركود و مناهضة مبارك و رجاله و محاولة إيقاظ الناس٬ يجب تشجيعه خصوصا قبله بيومين بس!

ثم من أين لنا الحكم على الشعب بأنه يفقه أو لا يفقه؟ أو إن الإضراب تخريب؟ في وجود مندسين أمن الدولة و عناصر الشغب الحكومية لا يمكن الحكم على الشعب بأنه يفقه أو لا يفقه.

في رأيي إضراب ٦ إبريل يحقق "وصل ما انقطع" (بتعبير كتاب ٤۸ ساعة هزت مصر) في يناير ۷۷.

مصطفى

mizohart2010 يقول...

تفتكرى لو النظام ده فاسد النظام ئلى بعده مش حيكون فاسد عملو ثوره ضد الملك و حرروا الفلاحين والشعب و لغوا البشويه و البهوات
رجعوها تانى
حتلاقى علاب باشا و محمد بيه و الشعب
يتداس بالجزم لو معندكيش ظهر فى الحكومه متنزليش من بتكم احسن
يا انسه فاطمه احن على الارض ليه عاوز تحلمى بالجنه و الجنه عمرها ما حتكون فى الارض
احنا شعب طيب اوى مش عاوزين غير اننا نعيش بكرمتنا وبس بنجيب لقمه يومنا بالعافيه مفيش حد فيهم فاضى يفكر فى الكلام ئلى بتقوله عليه لانه عرفين انى مفيش فايده

بنت الاسلام يقول...

خالد فودة

مش مسالة احباط وتفاؤل يا خالد ده رايي واظن انه حقي ابقي معاه او ضده وانا ماعرضتش موضوعي هذا كدعوة للاحباط اطلاقا بالعكس تفتكر لو الاضراب جاب نتيجة وحقق الاهداف اللي حضرتك كتبتها ده شيء ممكن يزعلني؟

لا طبعا ..انا اكون اول السعداء بهذا الانجاز جايز انت رؤيتك بتقولك انك ممكن تحققهم من هذا الباب لكن انا شايفة ان تحقيقهم من ابواب اخري...اذن لا خلاف

ويبدوا انها اهداف اخوانية اكثر منها اهداف تهم المواطن المصري البسيط

تحياتي

بنت الاسلام يقول...

اختي الصغيرة ايضا

روح الحب الصادق

نورتيني بزيارتك

وهذا ما وددت قوله

ليس معني نجاح جزئي للعشوائية ان تنجح كل عام


لا بد من اعمال الفكر قبل التنفيذ حتي لا نبكي علي اللبن المسكوب

تحياتي

بنت الاسلام يقول...

خالد فودة

نتمني تحقيق الاهداف

تحياتي

hasona يقول...

السلام عليكم

الاضراب - الاعتصام - العصيان المدني
كلها تعتبر من أضعف الايمان

الاضراب جميل
لكن ينقصه دعوة قوية
وتخطيط أو وتقييم
وتنظيم قوي وتفكير
في السلبيات والايجابيات


،،،
بأختلف معاك في المقارنة بين هذا والعراق
هناك رجال أجلاء موجودين لكن النظام الفاسد يبعدهم دائما
علي الاقل - نريد عدل وتعديل قوانين
لتصب في مصلحة المواظن وليس في جيب المسئول

بس النظام الحال يغور - وسيظهر علي الساحة ناس كتير - كنا لا نعرفهم ولا نعرف دورهم

لو حتي هنمر بفترة انتقالية - يلغي فيها الطوارئ - ويعدل الدستور الي الافضل
وأتمني تغير مجموعة من القوانين أو اللوائح في اختيار ومدة بقاء الاتي

رئيس الدولة لا يجب أن يزيد حكمه عن 10سنوات بأي حال من الاحوال

رئيس الوزراء أتمني أن يكون بالانتخاب وتوضع قوانين تضمن استقالايته

شيخ الازهر يجب أن يكون بالانتخاب أيضا

كلها أماني وأحلام

احمد سعيد يقول...

بلطجه ايه وارهاب ايه

هو مين السنه اللى فاتت اللى كسر ودمر وحرق ؟؟؟؟؟؟؟

مين يا ماما اللى بيعمل ارهاب وبلطجه ؟

ولا هى بقت لبانه فى البق وخلاص

من ايام الكلب عمرو اديب واللى زيه

احمد سعيد يقول...

وياريت كدة تقوليلنا ايه الحل

ايه حل اللى احنا فيه دة

طالما الاضراب كخه وارهاب

احمد سعيد يقول...

وبعدين ازاى بنطلب منى انى احتج واضرب بطريقه مهذبه

اذا كان اللى قدامى بيضربنى بالرصاص زى الكلب

وبنترمى فى السجون بدون اى تهمه

والناس اللى بتتعذب وبتهتك عرضها كل يوم

تهذيب ايه

يعنى مثلا لما الاسد ييجى ياكلنى اقوله

لا

عيييييييييييييب

ولا مثلا تخيلى عماد الكبير اثناء تصويرة بيقول لاسلام نبيه

احملك المسؤليه القانونيه عما تفعله

ههههههههههههه


ياريت طالما بتطالبوا بالمنطق

تفكروا انتوا كمان بالمنطق

بنت الاسلام يقول...

مصطفي

نورتني بزيارتك لاول مرة واتمني الا تكون الاخيرة

ربما تري من وجهة نظرك ان المقارنة مغالطة لكني اراها في محلها فالشعب المصري ايضا منهك وما اكثر فصائله العلمانية والدينية والسلفية التي حينئذ اتوفع ان اي فئة منهم لن تتورع عن فعل اي شيء في سبيل تحقيق واثبات ذاتها ووجودها وانها الاصلح والصراع السني الشيعي في العراق والفاحي الحمساوي في فلسطين ليس ببعيد عن حدوثه في مصر وربما بشكل اخطر واعمق ..هذه وجهة نظري ولا تشكك ولا تقلل من احترام بعد نظر حضرتك

نعم نشجع علي التحرر من عقد الخوف والتعبير عن قضايانا ومطالبنا وغضبنا ضد فساد النظام ولكني اعترف انني لن استطيع ان احيا وقد شجعت يوما شخصا علي التهور والتخريب والتدمير بتضامني مع اضراب عشوائي غير منظم وتجربة العام الماضي والدماء التي سالت لخير دايل عليه ولو كنت اعلم ان نتائج الاضراب الماضي ستظهر في صورة صراع دامي يدفع ثمنه الابرياء ماكنت شاركت فيه يوما ما


لا يفقه ياصديقي وليست المشكلة الاساسية به ولكن المشكلة ان من يفقه لا يعلم من لا يفقه فتكون محصلة اضراب عام في مصر تساوي شعب لا يفقه وهو الغالب


تحياتي

دمت بود

بنت الاسلام يقول...

نهر الحب

ربنا يوفقكم يارب

تحياتي

بنت الاسلام يقول...

mizohart2010

ليه اليأس ده يا اخي

ان شاء الله نحقق كل اللي بنتمناه المهم اننا مانخافش واحنا بنطالب بحقوقنا المهم اننا نتوحد ونبقي عارفين عاوزين ايه وهنعمل ايه عشان نحصل عليها ومهما فشلنا ومهما وقعنا هنقوم بعض وفي يوم من الايام اكيد هيعيش ولادنا بامان لانهم كملوا مسيرة احنا بداناها

تحياتي

بنت الاسلام يقول...

حسونة

اماني واحلام اه واعتقد انها بقت احلام علنية وليست خافية علي احد الكل بيحلم بيها واحلامنا وصلت ليهم لكنهم مصممين علي تجاهلها وعدم احترامها كاننا شعب لدولة تانية او كاننا عالم بعيد عن عالمهم كاننا اغراب في بلدنا صحيح كلنا بنتمني نحققها صحيح الاماني طالت والاحلام بتبعد مش بتقرب لكن مش لازم يدفعنا غضبنا علي اتخاذ خطوة نندم عليها خطوة غير محسوبة اضرارها اكتر من فوايدها

تحياتي

بنت الاسلام يقول...

انت تسال والكومبيوتر يجيب

ان شاء الله نتواصل

تحياتي

بنت الاسلام يقول...

احمد سعيد

الاول نورتني بوجودك

ثانيا يبدو انك فهمتني غلط

انا اقصد بالارهاب في التعليق تحت الصورة:ارهاب امني للمواطن البسيط

واقصد بالبلطجة: اندساس كثير من البلطجيين واصحاب الاغراض في الاضراب وكانت النتائج ما راينا

واظن الصورة وغيرها كتير من الصور نطقت عن ارهاب الامن والبلطجة اللي كانت موجودة

لا بقي حضرتك تقولي ايه المشكلة اللي حلها الاضراب غير اللي انا قولتها في البوست(تعلم اضراب المؤسسات) ممكن يكون في حاجة تانية وانا مش واخدة بالي

الحلول كتيرة بس احنا عمانا دايما بيخلينا مابنشوفهاش

الحلول موجودة لكنها مش لاقية اللي يفعلها ويقويها بالمنطق والعقل مش بدعوي غير مضمونة العواقب

تحياتي

رامز عباس يوضح يقول...

انا معاكي يا بطه في ردك علي احمد سعيد

بخصوص البلطجية المندسين


امثال المعلمه فوزية بسوق الجمله بالمحله


شلتها بتوع دعارة ومخدارات خدت 3 سنين سجن في احداث المحله ولسه ممسكوهاش

احمد سعيد يقول...

انا مبقولش ان الاضراب حل

بس يعتبر خطوة

وخطوة كويسه

الناس فاهمه الصح كويس

السنه اللى فاتت كانوا بيقولو محدش يحدف طوب

دا فى المحله

وكانوا بيقاوموا اى شخص يحدف الامن بالطوب

دا فى الاول

بس باقى اللى حصل كان بسبب التعامل الغبى للامن مع الناس

دا غير البلطجيه اللى حرقوا وكسروا

ودول مكانوش داخلين من نفسهم

الامن اللى دخلهم وحماهم وقعد يتفرج عليهم كمان

يعنى الفوضى من الداخليه مش من الناس

دى حاجه


تانى حاجه

فكرة ان السلطه تتغير باسلوب سلمى

دى فكرة خرافيه

وان حصلت

ودا ممكن

هتبقى اشبه بالمعجزة

ممكن واحد يقع من الدور الخامس وينزل سليم

ممكن

بس لو فكر فى كدة وهو بينط

يبقى حمار

اللى يعرف مبارك والعادلى وصفوت ورجالتهم كويس

يعرف ان دول عمرهم ما هيمشوا بالذوق

ولا بالسلم حتى

فكرة عدم تقبل وجود ضحايا فكرة مش منطقيه

انا طبعا مااتمناش لاى حد الاذى

بس دة شىء منطقى

لازم يبقى فيه تضحيات كبيرة علشان دول يمشوا

ولو استنينا لبكرة

هتيبقى التضحيات المطلوبه اكبر واكبر

الا بقى لو كنا مستنيين الفارس اللى هييجى على حصانه الابيض علشان يحرر مصر

او مستنيين ابن الجيش اللى هيتحرك ويتنحرر علشان سواد عيون مصر

يبقى هنستنى كتيييييير

انا اسف على حدة اسلوبى

بس دة كان نتيجه عنوان البوست

اللى صدمنى جامد

انا كمان ليا انتقادات على الاضراب

بس مش معنى كدة انى احبطهم واثبط هممهم

لان الشباب دول افضل منى

عرضوا نفسهم للخطر

بينما انا قاعد اتكلم قدام الشاشه

يبقى بدل ما احبطهم

اشجعهم

واوضحلهم النقطه اللى شايف انها غلط

واناقشهم فيها

انما لا والف لا

معلش

مينفعش كدة

طبعا انتى حرة فى رايك


بس دى برضه وجهه نظرى


اسف مرة تانيه على اسلوبى الحاد

معلش

اصلى برج الميزان

ساعه تروح وساعه تيجى يعنى

وحي القلم يقول...

طول ما الاضراب سلمي أنا معاه
هيتعدى الحدود دي يبقى مش ليه أي لزمة

sssssssssssss يقول...

وااااااااااااااااااو
دنتي بتموتي بالسياسه

والله انا عندي بطنش عشان انتعش

ربنا يحقق امانيك يارب

ويوفقك

اتمني تزوري صفحتي

بنت الاسلام يقول...

أحمد سعيد

انا مقدرة شعورك وغضبك يا احمد ولا يهمك احتد كما تريد وثق ان عندي سعة صدر تتحمل حدة الجميع ..فحدتك تفسيرها عندي غضب وغضب كاسر واحساس بعجز كبير أمام كيان ضخم فاسد اخطبوط امتدت اذرعه لتخنق وتلتف حول كل شيء فحدتك متوقعة

شباب 6 ابريل ..شباب زي الفل ..وانا لست ضد حركة 6 ابريل نفسها بالعكس اليوم فعلا كان يوم تاريخي ويوم لا يستطيع احد ان يغفل عنه ..ولكن هؤلاء الشباب كان لهم أن يتعلموا من أخطاء الماضي وان يدرسوا بشكل أفضل وأكبر كيفية احياء هذا اليوم بشكل تؤتي ثماره أكثر مما تخيم علينا به عواقبه ..ولكن هذا لم يحدث

وترك الامر عائم اضراب بلا قيد ولا رابط مجرد كلمة ربما تثير الخوف او تثير الامل ربما تنجح وربما تفشل ...انا مع اي جهة منظمة يقودها العقل وليس الغضب يقودها المعرفة وليس الجهل

انما قولك بان الشعب يدرك معني الاضراب فاشك..ان غالبية الشعب المصري البسيط قد سمع عن الكلمة اصلا

عمر مبارك ونظامه ماهيمشي بالذوق اوك انا معاك يلا ناخدهم بالعنف ايه النتيجة؟ ميزان القوة متساوي؟ ثورة يوليو نجحت لما الجيش بقي مع الشعب

احنا جيشنا مع مين؟

يا احمد حلمك هو حلمي وحلم كل التعبانيين لكن لازم نعترف انه في الوقت الحالي اكبر مننا وعمرنا مها نحققه طول ما قلبنا ومشاعرنا سابقة عقلنا وتفكيرنا


انا فعلا وضحت النقطة اللي هما غلط فيها

اضراب عشوائي غير منظم لو قالولي بكرة كل الشعب هيروح يقف عند قصر الريس وقفة سلمية اعلانا للغضب كنت اول واحدة هروح لكن فينا احنا وفين النظام مننا؟

تحياتي

ودايما منورني

واحتد ولايهمك

بنستوعب الجميع

بنت الاسلام يقول...

مصعب صلاح

وانا معاك

بس اديني ضمان للسلمية

تحياتي

بنت الاسلام يقول...

انتحاري

ههههههههههههه

شكلها هي اللي هتموتني

حاضر ياسيدي نزور صفحتك

ونورتني بزيارتك

تحياتي

احمد سعيد يقول...

ماهو الجيش مش مع الشعب

ومبارك مش غبى علشان يقع فى المطب اللى فاروق وقع فيه

يبقى هيمشى بالذوق ازااااااى ؟؟؟؟

فهمينى

sun_of_freedom يقول...

بسم اله الرحمن الرحيم

بطوط حبيبي انا معاكى في الى بتقولى وفى اول المر كنت رفضاه لسبب واحد خشيت يكون >كرى للسنه الى فاتت ويصبح مثل البدع كل سنه مرة في اليوم وبقيت السنه نايمين
لن لما فكرت في الموضوع كويس

بصراحه وجدت ان لازم ولا بد من الاضراب

اضراب يوم بكرا هيبقا اضراب السنه كلها

والله احسن من ان الشعب يفضل نايم دول السنه على الالقل يكون ف ييوم نرمز فيه لشعورنا بالغضب والاستياء من حكومة ظلمة ومستبده

وبإذن الله فرج الله قريب وانا واثقه على يقين من قدرة ربنا

تحيات لكى ممزوجة بآيات القرآن تنور دربك مدى الزمان

ومتنسيش تنورى مدونتى بعد التجديد

بنت الاسلام يقول...

احمد سعيد

هيموت

وهيمشي

وبس

بنت الاسلام يقول...

sun of freedom

نورتيني ياجيجي

وكويس انك متفقة معايا


تحياتي

وردة يقول...

الاضراب وتعطيل مصالح الناس مش حل
زي ما انتي قولتي
الاضراب بيندس فيه اصحاب مصالح كتيير جدا
وبلطجية
عاوزين يخربو البلد اللي بالعافية بنبني فيها
عاوزين افكار تانية نحل بيها مشكلنا
من رأيي الاضراب ليس هو الحل
ربنا يكرمك
سلام

بنت الاسلام يقول...

وردة

نورتيني


وجهة نظرك تحترم

بس انا ماقلتش كده انا بقول الاضراب حل اه لكن مع شعوب تفهم معناه تقدر تنفذه وتقوم بيه تنظمه تخرجه في صورة مشرفة وليست صورة مهينة

ومن الاخر مكانش ده وقت ولا زمن اضراب عام اطلاقا

تحياتي

احمد سعيد يقول...

بنت الاسلام
...............

اة هيموت

وهيمشى

بس هييجى غيرة

المشكله مش فى الحكام

المشكله بالاساس فى الشعب

هاتيلى شعب واحد فى الكون حكامه كلهم ظلمه

من اول مينا

الى الان

باستثناء حالات فرديه

مش هتلاقى غيرنا

يبقى اكيد العيب مش فى مئات الحكام على مدى اكتر من 5000 سنه

العيب فى العنصر المشترك الثابت

اللى هو احنا

انا مكنتش طامع ان الاضراب يغير النظام

لان النظام مش بالضعف اللى يخلى اضراب بسيط وغير محترف زى دة يشيله

بس كنت اتمنى انه يغير شخصيه المصرى

لو تدريجيا

يبطل سلبيه وجبن وغباء

وهى دى متلازمه المصرى من قديم الازل

اينعم ساعات كان بيخرج على النص

ويذهل حكامه

بس سرعان ماكان بيرجع زى الاول

انا ميهمنيش مبارك او غيرة

كدة كدة هيغور زى ما قولتى

انا يهمنى الناس

وعلى راى المثل

اللى يلاقى حمار ولا يركبوش

يبقى احمر منه

مع الاسف دة وضعنا

واللى ابتدا يتغير بسبب غباء النظام فى التعامل مع شعبه

اينعم التغير بطىء

بس شغال

مين كان يصدق من عشر سنين ان فئه معينه هتضرب وتعتصم علشان شغلها او مرتباتها

ما شى

كويس

الشعب المصرى عمرة ما هيتحرك علشان الديموقراطيه

بس ممكن يتحرك من الذل والجوع

ودة اللى الحكومه بتعمله دلوقتى بغباء منقطع النظير

ربنا يزيدهم غباء كمان وكمان

بنت الاسلام يقول...

أحمد سعيد

المرة دي حاسة في كلامك بمرارة غير الغضب مرارة قوية قوي وصدقني لو قلتلك ان ده نفس احساسي

بس انا عاوزة اسالك سؤال

هي ايه الديمقراطية

؟

غير ان يكون عندي بيت مقفول عليا ومعايا اللي يكفيني انا وعيالي

هو ده مطلب الشعب الغلبان انت بتعاتبه وتلومه عشان بيثور بس لما بطنه تجوع

تفتكر يا احمد اللي بطنه جعانة بيحلم بحاجة غير سوق العيش؟

تفتكر يا احمد اللي ابنه مريض وعاجز يجيب له دوا بيفكر في حاجة غير ان مرتبه يزيد

يا احمد الشعب تعبان قوي بدرجة كبيرة بلاش تظلمه اكتر المشكلة مش فيه ه وبس المشكلة كمان فينا لان القادر مش حاسس بالغير قادر مش متواصلين ببعض كل واحد شايف صلاح بلده من وجهة نظره بالحاجة اللي ناقصاه طبيعي اللي مش شايل هم رغيف العيش هيشوف ان الديمقراطية اللي بيتمناها انه مثلا تتلغي الوساطة من الوظايف الحكومية لو شاب بيبحث عن عمل لكن اللي بطنه شدة عليه اسمي معاني الديمقراطية عنده انه يقف باحترام في طابور عيش ويرجع مرفوع راسه ومعاه لقمة كافية تكفي ولاده

تحياتي

مصر