الهي ماعدت أبغي شيئا في هذه الحياة سوي عفوك ورضاك

السبت، 6 سبتمبر 2008

ما دام الموت ات لا ريب فلنمت في سبيل من نحب

مادام الموت ات لا ريب فلنمت في سبيل من نحب

وانتم من نحب


مش عارفة أأقول ايه أصرخ؟؟ماكل يوم بنصرخ؟؟اي الجديد ايه اللي بيحصل؟؟ كلنا بنصرخ ولا حد سامع حاجة ولا حد حاسس بحاجة مش قادرة اوصف اللي شفته ومش قادرة اعبر باحاسيسي عن اللي عنيي شافته مش قادرة غير اني ااقول حسبي الله نعمة الوكيل في الحكومة الفاسدة الظالمة المرة ديه بصرخ بيها وبكل نفس جوايا بقول تسقط حكومة نظيف ويسقط النظام الفاسد المرتشي الظالم المعدوم الرحمة والانسانية 5 سنين عندهم تقارير تؤكد ان في كارثة جاية 5 سنين عارفين ان الجبل هينهار 5 سنين عارفين ان ارواح الاف مهددة ومع ذلك عادي وايه يعني طظ في ستين داهية خلوا الدنيا تخف عملوا مشروع ضخم سموه باسم ام مابتحسش غير بماساة اطفال هي عاوزاها تقرا وعمرها ماحست بماساة ام نفسها تاكل ولادها ولا تغطيهم ولا تلبسهم ولا تحميهم من البرد مساكن سوزان مبارك اتعملت عشان العشوائيات تتنقل فيها ومحدش اتنقل لكن الشقق اتسلمت طبعا لازم تتسلم لما يقبضوا في الشقة 70 الف جنيه لازم تتسلم لما ياجروا الشقة من الباطن ب400جنيه لازم تتسلم ماهو اللي معاه يعيش واللي مش معاه يموت وياريتهم بيكرموهم بعد ماماتوا واندفنوا تحت الصخور لاء كمان بيقدموا تقارير كذابة زيهم الناس تقول الاف تحت الانقاض وهما يقولوا 20 ماتوا ارحمونا بقي ده احنا في شهر كريم خرجتونا عن شعورنا ووعينا الست طالعة تصرخ وتصرخ من قلبها بتقول ولادي تلاتة اروح بيهم فين الراجل ماسك الانقاض بايديه وبيصرخ فينك يا امااااااا الراجل شايل جثة بنته بايده وهي متقطعة ايه ده احنا فين احنا بشر حد يعطيني امارة اننا بشر فين اعضاء مجلس الشعب والشوري فين المحليات كل واحد منهم عاوز يكبش وبس عاوز ينهب وبس منكم لله مش قادرة ااقول غير انكم ظلمة بتعيشوا من دم الناس علي اشلائهم علي الامهم علي جثثهم اللي حصل كارثة كارثة ضخمة بكل المقاييس يافرحتي بالقوات المسلحة وهما واقفين زي الحزاني مش عارفين يتحركوا وتحت رجليهم ارواح بتستنجد بيهم ويقولولك ايام وايام علي مايكسروا قضيب القطر عشان يدخلوا اهمال واستهتار وفساد وظلم وقلوب انعدمت منها الرحمة




ارجوكم نداء خاص لاهالي القاهرة اللي يقدر يساعد وينقذ يروح ان شالله كل واحد يرفع طوبة واحدة لازم نتحرك وفي اسرع وقت الحكومة ميتة ويومها بسنة حتي في الكوارث اللي يقدر يروح يتطوع يروح ياريت كل مصر تروح تعالو نحس ببعض بقي نقف جنب بعض تعالوا بجد المرة ديه نقف صف واحد ولو بمواساة ولو بكلمة حنونة ولو بوجبات بسيطة للافطار الناس ديه ياجماعة احنا في كارثة دموية واحنا قاعدين نتفرج علي مسلسلات وبرامج رمضان






وبعدهالك يابلد لغاية امتي هنفضل نموت وبلا ثمن؟؟؟؟؟؟؟؟؟؟؟




لغاية امتي هتفضل ارواحنا في ايد المهملين واصحاب الكروش الواسعة؟؟؟؟؟؟؟؟




لغاية امتي هنفضل ساكتين




؟؟؟؟؟؟؟؟؟؟؟؟؟




لغاية امتي هنفضل خايفين مرعوبين




لغاية امتي هنفضل نتكلم وبس؟؟؟




امتي هنتحرك بجد ؟؟




كده كده هنموت مش عاوزين نموت بايديهم واحنا خايفين




عاوزين نموت واحنا في وشهم واقفين؟؟




ولظلمهم رادين؟؟




وهي موتة ولا اكتر




مادام الموت ات لا ريب فلنمت في سبيل من نحب






واحنا بنحب




بنحب ولادنا




اخواتنا




امهاتنا




ابائنا




من اجلهم نضحي




ونموت




بشرف




وعزة




واحنا رافعن راسنا لفوق




وده هيتحقق لما




نقف في وش الظالم




حتي لو الرئيس نفسه




ونقوله




انت ظالم




ارفع ظلمك عنا




او ارحل وبلا وداع









هناك 17 تعليقًا:

حسن حنفى يقول...

معاكي حق هي موته ولا اكتر

للاسف الحكومه مش مهتميه باي حاجه

ارواح الناس عندها ببلاش

اهم حاجه هي بتكسب كام

احمد اشرف يقول...

حسبنا الله ونعم الوكيل
فى مبارك

فى نظيف

فى الحكومه

الشعب النايم

طلاب من أجل مصر يقول...

اسأل الله العلى القدير ان يخسف الارض

بكل ظالم متجبر... حسبى الله و نعم

الوكيل فيكى يا حكومة مصر

حسبي الله ونعم الوكيل في

مبارك وكل فرد في الحكومة

طلاب من أجل مصر يقول...

حسبنا الله ونعم الوكيل. هذا الحدث ليس غريبا فى ظل حكومة فاسدة ورئيس ظالم. رئيس الحكومة بيقول اقمنا لهم مساكن ولكن القدر لم يمهلهم اى عاقل فى مصر يصدق هذا ...

Empress appy يقول...

يا بطه عالم جولوجيا من 15 سنه نبه بانهيار المقطم
المشكله الاكبر مياه الصرف الصحى بتاعت منطقه الدويقه كلها بتصب فى الجبل يعنى الصخر امبارح كان بيتفتت فى ايدين الناس فهمتى

ميرا ( وومن ) يقول...

بطة

كارثة بكل المقاييس حسبي الله ونعم الوكيل

بس علي فكرة هما مش محتاجين ناس تشيل طوب ورمل الكارثة اكبر من كدة بكتير محتاجين معدات ثقيلة ورفع

ربنا يفرج كربهم يارب فاضل ايه تاني

فاضل الطوفان

بنت القسام يقول...

مش لاقيه كلام اقوله
حسبي الله ونعم الوكيل
تخيلي بقه ان انتى اهو ومش م القاهرة وبتعملي ايه علشانهم
تعالي شوفي بقه ان ناس م القاهرة ولحد الان مش عارفين بالكارثه دي
وغير كدة يقولولك واحنا مالنا
يابطه الناس دي ميته من زمان
مساكن ماما سوزان ربنا يخليهنا هي وبابا مبارك الى اتوزعت بمعرفه المسؤلين
انما الناس الغلابه المتمرمطين في الارف واالذل يروحو في ستنين الاف داهيه
ياشيخه وربنا الواحد ارف وتعب ومل وزهق واتخنق من الناس دهيه
تعرفي لو البلد دي نطقت
هتشتم فينا وفي الحكومه
لو الحجارة دي نطقت هتسب لينا وللحكومه
لو الجدران دي نطقت هتتبرا مينا ليوم الدين
دة لو ربنا ساب الشمس هتولع فينا وهنبقه فحمه
بس ربك والله كريم
وربنا يااياخدنا علشان نستريح منهم
ياايخدهم علشان احنا قرفنا منهم
تحياتى وربنا يتولانا برحمتنا
معلش مش لاقيه كلام اقوله تاني
بحبك يابطه

غير معرف يقول...

الغالية بطة فعلا هذه الحكومة قدرت تجسد الصراع الطبقي في عصرها فعلا قسموا مصر لأسياد وعبيد أسياد لا يتجاوزون خمسة بالمائة وعبيد هم باقي الشعب الشرطة من المفترض انها في خدمة الشعب لكنها في خدمة السادة دخل مصر كان المفروض يتوزع على اهلها لكن السادة أولى وكروشهم أوسع ما ذنب هؤلاء الذين ماتوا تحت الصخرة ذنبهم إنهم فقراء رجعوا من تعب يوم كامل وفطروا الفطور العادي واتسحروا فول كالعادة وناموا علشان يسيروا في الساقية التي وضعوهم فيها السادة
خالد

غير معرف يقول...

مش عارفه ليه شايفه ابنى فى الصوره ديه طول عمرى حاسه انه هيبكى عليه بشكل او بااخر بالشكل ده..
اما كارثة امبارح انا مش قادره اتخيل ان فيه بشر مدفون بالحيا تحت الانقاض ولا الحكومه فى دماغها البشر دى مهم لو فى دماغها ومحترمين ادميتهم كانوا وفرولهم مكان امن زى بقيت دول العالم ما بتعمل مع ابنائها مش المرمطه اليى بنتمرمطها فى بلدنا..
ربنا يرحمهم ويصبر اهاليهم ويا رب الغلابه شبعوا كوارث ورحمتك وسعة كل شئ فارحمهم برحمتك الواسعه..وملناش غير اننا نرضى بقضائك..تباركة ربى وتعاليت..

,.-~*'¨¯¨'*•~mr ,.-~*'¨¯¨'*•~monshed يقول...

حاجات تخلي الواحد خلاص بدأ يفقد الامن والامان في البلد دي بل فقد فعلا
ولكن حسبي الله ونعم الوكيل

غير معرف يقول...

قبل التطرق للى حصل

شوفوا المسئول

اطلبوا الثأر من القاتل قبل البكاء على المقتول

مش ده اللى شكرتيه قبل كده عشان موضوع المصنع

يابطه على مااظن البلد مش محتاجه الا انتفاضه

مش زى بتاعه 6 ابريل

لئه انتفاضه فكريه وعمليه بالتوازى

واطاحه بالديكتاتور

واتباعه من الديكتاتوريين الصغار

..........

ورحم الله شهدائنا والمجد والفخر لاحيائنا انهم مازالوا على قيد الحياه
رغم الكوارث

oRiGiNaL HeArT يقول...

والله عبرتى كتييييير عن اللى جوايا
انا من كتر ما بسال نفسى لحد امتى هنفضل كدة دماغى تعبت وحاسة انى بفقد الامل ان مصر ترجع بلد محترمة تانى
بفقد الامل كل يوم فى المصريين اللى بقو يرضو بالذل وكانه نعمة ربنا اكرمهم بيها
مش عارفة اقول حاجة من كتر الكلام اللى جوايا :(

نوسه وريمان فى هاكونا مطاطا يقول...

السلام عليكم

ايه يا بطه

انتى بتقولى فين مجلس الشعب والمحليات وفين مجلس الشورى

دول نايمين ننه هووووو

نايمين ولا حد منهم هنا

ضميرهم مات وقلوبهم ماتت

حسبى الله ونعم الوكيييييييييل

بنت الاسلام يقول...

حسن حنفي

ياريتها بتكسب ياحسن كنا فرحنالها

تحياتي

____________________

احمد اشرف

نعم حسبي الله كفي

تحياتي

_________________

سارة


نعم حسبي الله وكفي

تحياتي

_________________

بنت الاسلام يقول...

عبد الهادي

هو لسة في في مصر عاقلين

؟؟؟؟؟؟؟

تحياتي

بنت الاسلام يقول...

رحاب

لاء مافهمتش هما اصلا مش عاوزين حد يفهم افهم انا ليه بقي

تحياتي

__________________________


وومن

الطوفان جاي جاي

انتظريه

تحياتي

_____________________

جيلان

انتي قلتي كتير

انا كمان بحبك

تحياتي

بنت الاسلام يقول...

استاذ خالد

الحكومة استكترت عليهم الساقية

فريحتهم منها

تحياتي

______________________


عايزة اتطلق


مش ابنك بس اللي في الصورة

كل الغلابة اللي زينا

تحياتي

مصر