الهي ماعدت أبغي شيئا في هذه الحياة سوي عفوك ورضاك

الثلاثاء، 25 مارس، 2008

ذلتونا منكم لله



صورة صعبة قوي بس للاسف حقيقة حقيقة حقيقة مررررررررررررررررررة




مقتل وإصابة 3 مصريين برصاص طاقم سفينة أمريكية بقناة السويس

http://www.masrawy.com/news/egypt/politics/2008/march/25/suez.aspx





حرقة دم بحرقة دم علي الصبح بقي الواحد يصحي يلاقي شباب ماتوا وأصيبوا من بلدنا برصاص امريكاني بسلاح

امريكاني رايح من قناة السويس بتاعتنا لبلدنا العربية الشقيقة المفروض العراق وعااااادي خااااااااالص ولا كأن حاجة حصلت



مالك ياعم بوش فارد جناحاتك علينا بالقوي ولاعات همك ومقوي أجنحة الكل علينا بقي بتعدي من عندنا بأسلحتك وتقتل ولادنا هو جري ايه في الدنيا يابشر



الطفلة العرايشية الي راحت برصاص اسرائيلي وبلعناها بلعنا لسانا وسكتنا واتخرسنا لكن كمان شباب مالهمش ذنب يروحوا كدة ونسكت والله نعلن الحداد رسمي علي مصر كلها ونعلن نهاية البلد ديه شعوب وحكام وننتهي ماهي دي النهاية فعلا بناخد علي قفانا وساكتين.....مش عاوزة حد يقولي ما احنا اعلناها من زماااااااااان



بقولك ايه ياعم بوش كنت زمان بحترم نفسي وااقول حسبي الله ونعمة الوكيل فيك واعيط شوية علي حالنا لكن الظاهر بقي ان الاحترام ماينفعش للزيك والدبلوماسيات مش ليك اما الاتفاقيات والمعاهدات فتبقي نصر لما نخلفها معاك ولو عجبك هتعملنا ايه يعني علي رأي المثل ضربوا الاعور علي عينوا قالهم ماهي خسرانة خسرانة واحنا بقي العور نفسه وورينا هتعمل ايه بقي هتحرمنا من المعونة كدة كدة جعانين بيك ولا من غيرك...........ماهو لينا رب اسمه الكررررررررررريم



وبصراحة ربنا بقي ياحكومة مصر لو ما أخدتي موقف رديتي بيه حق ولادك ماتستاهلي تفضلي في الحكم لحظة ونبقي ماعندناش احنا ياشعوب دم لو سكتنالك واهو بنطالب باسقاطك صحيح الطلب ده قديم وانتي لازقة وماسكة في الحكم بايدك وسنانك واحنا ساكتينلك لكن معلش هنا ستوب جوعتينا وقلنا ماشي اهو اخوات في بعضينا نكدتي علينا عيشتنا وناسيتنا حتي اسامينا اتحملنا وقولنا نصيبنا بكرة تتعدل لكن كرامتنا وكرامة ولادنا أرواحنا الي بقت رخيصة اتحملنا مرات ومرات لكن الكيل طفح بقي طفح قوي انا بكتب وانا مش حاسة بنفسي نفسي اولع في البلد الي مالهاش لزمة ديه الي مابتتحركش ودمها بينزف خلااااص ياسيتي ابتكري ولا اكتشفي اكتشاف يحول الدم الي في عروقنا لتلج لاننا بصراحة مابقناش قادرين...........وربنا دمي فاير ومش عارفة اتحكم في اعصابي



هتتحركي امتي نفسي افهم نفسي لما يصفونا واحد واحد ياسيتي اطلقي الشعب سيبيه يصرخ دانتي كتمتي الصرخة في زوره حتي ولو فتح ولانزل الشارع يصرخ تطلقي امنك وراه كانه هو الجاني



ااااااااااااااااااه محروووووووووقة قووووووووووي عاوزة اشتم بس ااقول ايه مش عاوزة القذارة تصاحب لساني وارجع تاني وااقول حسبي الله ونعمة الوكيل فيكم وفي ضعفكم ذلتونا منكم لله








هناك 19 تعليقًا:

قلب أبيــض يقول...

السلام عليكم


أول تعليق ..كنت فرحان

بس الموضوعيمكن غير المود شوية

بس عندى كلمة واحدة ...
وهى

حسبنا الله ونعم الوكيل

واتذكركلمة سيدنا عمربنالخطاب
وهو داخل القدس ليتسلم مفاتيحها
ويقول


نحن قوماعزنا الله بالاسلام
فان ابتغينا العزة فى غيرة ....
اذلنا


جزاكم الله خيرا

appy يقول...

اول كومنت انا يا بطوط كده ان شاء الله يبقوا طرحتين
طبعا قريت الخبر من بدرى
والعيب مش على الحكومه بس يا بطه احنا اللى بقينا خرعين ومستهبلين وحاجه تقرف بجد
اذا كنا يا بطه بنأكل فى بعض بزمتك هو العالم مش حاسس اننا متفككين اكيد فاهمين
الله يحرق دى حكومه بقى

مدحت محمد يقول...

الذل منا ولا لينا
الذل صنعناه باايدينا
يوم مارمينا الدين ورانا ونسينا
جرينا بعدنا خالص وقسينا
احتضرنا فى وسط دارنا فى نهارنا
الصورة عار
والامة عار
ومين هيدارلنا عارنا
ومين هياخد لينا تارنا
ومين هيرجع لينا عزة
ضاعت منا من زمان

قلم رصاص & حقوق مسلم سابقا يقول...

حسبنا الله ونعم الوكيل
والله يا بطة انا برده مش ها اقول اكتر من مقولة سيدنا عمر نحن قوماعزنا الله بالاسلام
فان ابتغينا العزة فى غيرة اذلنا
الا ان نصر الله قريب وان شاء الله النصر قريب قريب جدا جدا

جيلان يقول...

بسم الله
بطه اولا احب ان اشكرك على كلامك دة لانو بجد كلنا نفسنا نصرخ بقه ونقول الى جوانا تعبنا لحد امتى هنفضل كدة والله انا مبقيتش حاسه انى عايشه مع مسلمين
يلا حسبى الله ونعم الوكيل

عمر المصرى يقول...

السلام عليكم
أختى الكريمة للأسف كلمة الذل شديدة اوى علينا ولكنه للأسف واقع ليس المصريين ولكن الأمة المسلمة كلها
اللهم ردنا إلى دينك مردا جميلا غير مخزى ولا فاضح
اللهم أعزنا بالإسلام وأعز الإسلام بنا

Hosam Yahia حسام يحى يقول...

حسبى الله ونعم الوكيل

احنا هانعمل ايه

مش كل مره هنتفرج ونعيط (خلى بالك انتى اللى بتعيطى بس)

احنا واجبنا نعمل ايه

النظام المصرى مش فاضى للخزعبلات وشغل التهريج ده

فاضى للاخوان بس

ويولع الشعب

حسبى الله ونعم الوكيل

بنت حرة يقول...

السلام عليكم

اولا
وقبل اى شى

اول زيارة لمدونتك ...وان شاء الله مش هتكون الاخيرة
فتقبلينى ...اخت لك وصديقة

بارك الله فيكى

اما عن الموضوع

فلا اجد الى كلمة واحدة


حسبنا الله ونعم الوكيل

عبدالرحمن ياسين يقول...

والله دمي فاير اكتر منكم كلكم ..
الله عليهم يارب..
وآدينا مستنيين ...
حكومتنا الشاطرة الفالحة هتعمل إيه ...

أنا مستني وقاعد في القهوة إلي جنمبنا ..
هه
تحياتي لكي
ان انزلت بوست جديد ..بعنوان .."من طلب العلا نام الليالي"
أرجو ان تلقي عليه نظرة ..
ودمتم

بنت الاسلام يقول...

قلب أبيض


الكرامة راحت من القلوووووووب

متاكد ان لسة قلبك ابيض

ولا ايييييييييييييه

تحياتي

___________________

appy

دمي محرووووق يا ابي

ومع ذلك الطرحتين جاهزين

بس انتي انوي بس ياقمر

تحياتي

بنت الاسلام يقول...

مدحت محمد

وجعتني اوي يلمدحت اكتر ما انا موجوعة

تحياتي

___________________

جيلان

صرخي

وليت احد يسمعك

تحياتي

بنت الاسلام يقول...

قلم رصاص & حقوق مسلم سابقا

منتظرين النصر

بس ياتري هيتحقق علي ايدينا

العزة عكس الذل

زي ما النصر عكس الهزيمة

ذل مع هزيمة ينفع

لكن نصر مع ذل

مستحيييييييييل

تحياتي

بنت الاسلام يقول...

عمر المصرى

اللهم اميييييييين ياااااااارب

_____________________

حسام يحيي

اهدي ياحسام مش كدة اعصابك

وحسبنا اله ونعمة الوكيل

_______________________

بنت الاسلام يقول...

بنت حرة

نورتي مدونتي المتواضعة واتمني التواصل

________________


عبدالرحمن ياسين

خليك قاعد علي القهوة بس اوعي تشرب حاجة كدة ولا كدة


تحياتي

elbostagy2 يقول...

السلام عليكم ورحمة الله وبركاته

والله يا بطة الكل على آخره .. السؤال نعمل ايه ؟!

من كتر ما الناس اعودت على اللي بيحصل مافيش حد بيعطي اهتمام وبنكسل ،،

ليهما نبدأش حملة كمدونين ونعلن الحداد علشان المصريين دول اللي استشهدوا برصاص الصهاينه والأمريكان

55 مصري خلال 3 سنين برصاص الصهاينة !!
يبقى قمة الذل

وانا بعلن الحداد من اللحظه دي ،،

الدعاء يا شباب .. أكتر سلاح فعّال .. الا لو كان الغرب نجح يغزونا ونظن مجرد ظن ان الدعاء لا بيقدم ولا يأخر

الله المستعان ،،
حسبنا الله ونعم الوكيل

monaliza يقول...

اصرخى كمان وانا معاكى يمكن حد يسمعنا
لااااااااااا

غير معرف يقول...

جميلة جدا.... هي مدونتك سيدتي..
والاجمل انها شامة في جبين زمن مريض ... اصبح فيه كل شىء مقلوبا...
قليل هي الاقلام الشريفة... الحرة
بارك الله فيك... وفي مداد قلمك
مصعب احمد الشهيد

بنت الاسلام يقول...

elbostagy2

الدعاء انا معاك بس مش لما يكون صادق ومخلص

افتكرت مقولة قالها اهل البصرة لابراهيم بن ادهم

مالنا ندعو فلا يستجاب لنا

قال لان قلوبكم ماتت بعشرة

دور علي العشرة

وهتلاقي فعلا ليه الدعاء لايستجاب مننا

تحياتي

بنت الاسلام يقول...

monaliza
اهو بنصرخ

ليت احد يسمعنا

____________________________

مصعب احمد الشهيد

اسعدني كلمات حضرتك

واتمني اكون عند حسن ظن الجميع

واتمني التواصل

تحياتي

مصر